Petero Taba Erama Hauna Ehina Haraina Ierusalemai.
11
Iuhubeau haukia mai uahoꞌaba Iudeai ṯemiaho haukia hanona rama haeai haukia abomo Tirama ena ꞌabi aba teaꞌi taeana hauna pouna teona.
2 Weiana Petero emue Ierusalemai ekaraꞌau raninai,
Iuda haukia weiakia Iesu tiaꞌikakauma haukia ia herenai teꞌabi pahihi,
3 tetibaha,
“Oi aꞌi tetarenakia haukia herekia oao ekia ituai kipokia toaniani haeamo,
ꞌu?”
4 Weiana Petero ehore taba terama haukia ikoikiai ia wairakiai ehina harainakia.
5 Ia eꞌabi etibaha,
“Iopai uaꞌa rani ha eꞌu bahubaꞌari aonai amahabanai,
ba taba ha kupai eriri aihana ihana matoha habuni rarina ꞌakina ꞌabana,
puana bani banikiai iaꞌi toꞌo ibariri hereꞌu.
6 Aihaiha haraina aona tabakia ikoikiai hanona mahi aekia banibani tikaꞌa haukia,
hanopakai tikara tabakia mai ꞌubiai tirobo roborobokia aihanakia.
7 Ba aia ha aona ehina benaꞌu etibaha,
‘Petero e,
omikiri moahu ꞌari moani.’
8 Ia au aꞌabi atibaha,
‘Obiapaka e,
ahaꞌi ꞌakina,
au ꞌopu tabakia ꞌao aꞌi terobe tabakia ha pinaꞌuai aꞌi ṉani ꞌapuana.’
9 Iamo aia ibaruana haeamona kupai emai etibaha,
‘Tirama ebamaha mahanakia tabakia hanona oi ꞌopukia aꞌi kohinanakia.’
10 Hoa neiana rani ibaihauna ewaira tina.
Ba taba weiakia ikoikiai mai habunina haeamona iberiꞌau mue kupa eao.
11 Rani weianai hau aihau Kaisareai teuhunakia temai hereꞌu haukia beronai amiaho itunai tekaraꞌau.
12 Aonai Auba Robe ehina benaꞌu aꞌi kabaoao ia kipokia kataeao.
Uahoꞌabaka neiakia ꞌabaihau kipokia taeao Kaisareai hau weiana atana Korenelio ena ituai takatoto.
13 Ia ehina benamai,
aneru ha ena ituai ewaira tina ba ia ehina bena etibaha,
‘Hau harua kouhunakia kateao Iopa ai uaꞌa Simona atana ha Petero katehina bena kemai.
14 Ia kehore ꞌabi kemaiaina,
weiana oi mai emu itu maearimakia kipokia ibamaurimi.’
15 Eꞌu ꞌabi aꞌiramana aonai Auba Robe ia ahakiai eriri ihobona ꞌuainai aika ahakai eriri ꞌabana.
16 Weiana aonai Obiapaka ena ꞌabi araona tinana,
‘Ioane beiai ebaꞌuere robe ꞌa wai hanona Auba Robeai katoꞌuere robe.’
17 Weiana aika Obiapaka Iesu Keriso haꞌikakauma aonai Tirama ena beruberu ebenaka ihobonai beruberuna hamona ia abomo ebenakia.
Ba au maearima aea homaꞌu Tirama ena aka weiana kakaiabuna?”
18 Iuda aꞌikakauma haukia ꞌabi neiana teona raninai ekia baoao baoao tebapuanakia iamo Tirama tebanamona tetibaha,
“Tirama ehore rama haeai haukia abomo aba bero ebenakia weiana ekia kiꞌai kateraona kabe raninai mauri kebenakia.”
Antioka Haukia Keriso Ena Maearimai Teao.
19 Stefano ena ꞌari murinai aꞌikakauma haukia terama otaraina,
baika atauꞌa tohana teao Foenikia,
Kupuro hanokia mai Antioka,
Iuda haukia kipokia mo baiatakiai pou namona tebaꞌiobi aina.
20 Ia aꞌikakauma haukia baika hanona Kupuro mai Kurene haukia.
Ia teao Antioka ai tekaraꞌau raninai rama haeai haukia abomo tehina benakia.
Obiapaka Iesu pouna namona teiroro aina.
21 Obiapaka ena hiabu hanona ia herekiai paunai maearima boꞌona ꞌakina teaꞌikakauma Obiapaka herena teao.
22 Pou neiana eao Ierusalemai aꞌikakauma haukia teona,
weiana Banaba teuhuna Antioka keao.
23 Ia Antiokai ekaraꞌau Tirama maearima ua ebanamo harai aihonakia eihana raninai ia aona hanona enamo,
haeamona ikoikiai ebataburanakia Obiapaka aiana katekaꞌaina mai aokia ikoinai.
24 Banaba hanona hau namona Auba Robeai ebonu mai ena aꞌikakauma etabura.
Ua buonai maearima boꞌona temai Obiapaka herena.
25 Weiana murinai Banaba emikiri Taso eao Saulo ketabuna.
26 Etabu ahina raninai eaoaina Antioka.
Ihau hamona terarua uaꞌa,
aꞌikakauma haukia kipokia tetoꞌu abomo maearima boꞌona tebaꞌiobinakia.
Weia Antiokai Iesu tiaꞌikakaumana haukia weiakia atakia teapari ramana Keriso ena maearima.a
27 Rani weianai mahabanai haukia baika Ierusalemai teriri temai Antioka.
28 Ha atana hanona Agabo emikiri Auba Robe ena hiabuai arobo rarina ꞌakina hanopaka maikoinai kerama hauna pouna ehinana.
(Arobo weiana hanona Klaudio ena obia raninai erama toha.)
29 Weiana aꞌikakauma haukia weia Antiokai hanona aokia tebahamona tenuatae ia ha ha ekia tabura ihobonai baraibarai katetiu ahina uahoꞌabakia Keriso aonai weia Iudea ai ṯemiaho haukia ꞌeukia.
30 Ba ua tebabai aiho.
Ekia beruberu hanona Banaba mai Saulo imakiai teutana ba ia terarua tehore beruberu weiana teaoaina Iudeai aꞌikakauma haukia ṯeꞌuai ainakia haukia katebenakia.