Heroda Iakobo Eahu ꞌarina Ba Petero Tebawapurana.
12
Ua raninai Heroda Obia hauna ehore Tirama ena marea haukia baika eaꞌinakia enuatae keaꞌi kiꞌanakia paunai.
2 Ia ehore Ioane aꞌana Iakobo akiua ai ehara ꞌarina,
3 Heroda Iuda haukia eihanakia babai weiana hauna teaonamo aina,
ua buonai ia ehore Petero abomo eaꞌina.
Rani weiana hanona Iuda haukia ekia tatu ha Parawa ibakupu ahaꞌi tatuna ranina.
4 Eaꞌina wapura itunai ekaiabuna,
huari haukia harau haea ꞌabaihau imakiai eutana,
bani bani kateꞌimana.
Heroda ena raona hanona tatu murinai kebakarahina mako wairakiai kebabakaina.
5 Ua buonai Petero wapura itunai teꞌimana,
ia aꞌikakauma haukia hanona Tirama tenoi tabura taburana Petero paunai.
Aneru Petero Ebaraina Wapura Itunai Ebakarahina.
6 Heroda eraonana kebakarahina ṉa ehoma rani weiana aꞌi nimai baha rabinai,
Petero hanona huari haukia rua baiatakiai enoti eparua mai ibirikia rua.
Ba huari haukia rua paꞌabi ꞌakonai tebaiꞌima.
7 Aonai biai mo Obiapaka ena aneru ia herenai ekoroti eana ikaihuri ebaeana,
aneru ehore Petero robuna eati ꞌapuana,
ebaona etibaha,
“ꞌOmikiri biai,”
raninai imana rua tabiri teꞌeho.
8 Aneru ehore Petero ehina bena etibaha,
“Emu habuni mobatotona,
emu tamaka moabaꞌau.”
Petero ua ebabai aiho,
aneru eꞌabi mue,
“Emu iroꞌabu moaꞌina moroꞌabuniꞌo,
muriꞌuai kokaꞌa.”
9 Petero wapura ituna ikaihurina ekarahi aneru murinai ekaꞌa,
ia aꞌi ebabataina aneru ena aka weiana hanona tohana ꞌao nimahabanai.
10 ꞌIma haukia kori ꞌuaina mai ibaruana tekaboinakia teao auri paꞌabina weiana katekarahi aiarai katetoto hauna kipona ekaikauna,
ba terarua tekarahi aiara taearana tekaꞌa teao aonai beronai aneru Petero herenai ekaobo.
11 Weiana Petero aona ea eꞌabi etibaha,
“Bariu au aꞌiobi haraina Obiapaka ehore ena aneru euhuna,
Heroda ena hiabu baꞌanai mai Iuda haukia ekia raona weiana hereꞌuai katebabai aokiai ebamaurinaꞌu.”
12 Kipona aonai eraona raona haraina,
ba beronai Maria ena itu eao,
Maria weiana hanona Ioane Mareko hinana,
aꞌikakauma haukia boꞌona weia tetoꞌuna tibahubaꞌari.
13 Petero itu weiana paꞌabinai ehara hara,
ba taꞌaraꞌi uahona ha atana Roda eao paꞌabi kekaikauna.
14 Uaho Petero aiana eꞌiobina raninai,
aona enamo kiꞌa baha,
paꞌabi aꞌi ekaikauna ia ebeau emue eao ehina benakia etibaha,
“Petero hanona paꞌabi ꞌakonai ekoroti.”
15 Ia uaho tehina bena tetibaha,
“Oi nuao ꞌabaea!”
ꞌA uaho eꞌabi tabura weiana hanona tohana.
Ua buonai ia teꞌabi tetibaha,
“Ṉa paꞌe Petero neꞌimana aneruna.”
16 ꞌA Petero ehara hara oho paunai,
ia paꞌabi tekaikauna ba teihana raninai tetaꞌu taꞌu huri.
17 Petero imanai ehara abunakia urukia keahaꞌi,
ba Obiapaka wapura itunai aea ebakarahi aihona hauna pouna ehinana,
abomo ehina benakia Iakobo mai uahoꞌabakia herekiai pouna katehinana.
Ba ekaobo ꞌeka ha eao.
18 Raurani ꞌamarinai atetua rarina erama huari haukia kipokia baiatakiai tebakai bakai Petero herenai taba erama.
19 Heroda eꞌabi katetabuna,
ia aꞌi tetabu ahina,
ua buonai iꞌimana haukia ebakainakia ba ena ꞌabiai teahu ꞌarinakia.
Neiana murinai Heroda Iudea ehabona eao Kaisarea uaꞌa emiaho.
Heroda Eꞌari.
20 Heroda hanona Turo mai Sidono maearimakia eopuereai kiꞌanakia,
ua buonai ikoikiai aokia tebahamona herena kateao.
Koriꞌuaina Heroda ena itu nipoki aina hauna atana Blasto herena teao tebaꞌamena temaiaina ia taikiai,
ba teao Heroda herena baibua tenoi aina.
Pokina ekia aniani hanona obia hauna weiana ena hanoai nimai.
21 Heroda etinaꞌana wapunai,
ia ehore ena obia habunina ebatotona ena obia imiaꞌaunai emiaꞌau maearima eiroronakia.
22 Ba aiara maearimakia ia teioaina tetibaha,
“Neiana hanona Tirama ha aiana,
ia maearima ha aiana ahaꞌi.”
23 Weiana aonai Obiapaka ena aneru beronai Heroda eahu obona pokina ia Tirama aꞌi ebanamona paunai,
ꞌerauꞌerau ia hauanina teana ba eꞌari.
24 Ia Tirama ena ꞌabi hanona etabura haeamona erama otaraina,
aꞌikakauma maearimakia hanona eboꞌo hao boꞌo hao.
25 Banaba mai Saulo ekia aka weiana moni tebenakia hauna tebaorena raninai Ierusalema tehabona,
Ioane atana ha Mareko abomo tebakaꞌana kipokia Antioka teao.