Banaba Mai Saulo Teuhu Ahinakia.
13
Antioka mareana aonai mahabanai mai bamarere haukia baika atakia neiakia,
Banaba,
Simeona (hau umuna),
Lukio (Kurene hauna),
Manaen (Heroda ohi tekiro haeamo) mai Saulo.
2 Ia tehore Obiapaka tekuti aina mai teani robe aonai,
Auba Robe ehina benakia etibaha,
“Banaba mai Saulo ohi katoaꞌi taeanakia au pauꞌuai,
au anuatae aina akana katebabaina.”
3 Weiana teani robe mai tebahubaꞌari murinai,
imakia ia terarua ahakiai tehao ꞌau ba teuhu ahinakia.
Kupuro ai Teiroro.
4 Auba Robe ehore Banaba mai Saulo ohi euhunakia teriri teao Seleukia ai,
weia haeamona aunohiai tebeau ahi teao Kupuro kereibuanai.
5 Salami ai tekaraꞌau weia Tirama ena ꞌabi Iuda haukia ekia marea aokiai teiroro aina Ioane Mareko abomo weia herekiai ia ebarainakia.
6 Kereibua maikoinai tekabanai teao Pafo ai hanona hau ha tetabu ahina,
Iuda haukia ekia mea hauna mai mahabanai baiꞌoina hauna ha atana Bariesu.
7 Ia hanona kereibua weiana ena Kabana hauna Seregio Paulo aobero hauna ena hau.
Kabana hauna ehore Banaba mai Saulo eaparinakia wairanai,
pokina ena nuatae Tirama ena ꞌabi aiana keona.
8 ꞌA Bariesu atana ibaruana Eluma (Helene maeanai anina hanona mea hauna) ia terarua ekaiabunakia Kabana hauna ekia ꞌabi paunai aꞌi meaꞌikakauma.
9 ꞌA Saulo,
atana ibaruana hanona Paulo,
Auba Robe ai ebonu ꞌauna,
mea hau weiana eiha ꞌiniꞌinina,
10 ehina bena etibaha,
“Oi Tiaporo nahuna!
Oi hanona taba namokia ikoikiai nuꞌoatanakia aomu baiꞌoi mai kiꞌa akakiai ebonu.
Obiapaka ena ꞌabi tohakia ikoinai nuaꞌi banai baiꞌoi ai nubaonakia.
11 Bariu Obiapaka imana hanona oi ahamuai kehore ꞌauna aonai mahamu katekiꞌa,
rani papana beraura eana aꞌi koihana.”
Beronai Eluma eonobaina ꞌabu mai wapura mahana tekaiabuna,
maearima enoinakia ibakaꞌana hauna ha pehaea imanai peꞌebe pebakaꞌana.
12 Kabana hauna hoa weiana erama eihana raninai eaꞌikakauma,
pokina Obiapaka ena baꞌiobi ꞌabikiai etaꞌutaꞌu huri.
Paulo Mai Banaba Teao Pisidia Hanona Antiokai Teiroro.
13 Paulo mai teꞌabana haukia kipokia Pafo ai tebeau ahi teao Perega,
Pamfulia hanonai tekaraꞌau,
weia Ioane Mareko ia ehabonakia emue Ierusalema eao.
14 Paulo mai Banaba ohi Perega ai temikiri teao Pisidia hanona Antioka ai tekaraꞌau.
Weia beraura robe aonai teao Iuda haukia ekia mareai tekatoto temiati.
15 Mose ena rauhubu pukana mai mahabanai haukia tererenakia pukakia tetuabinakia murinai marea poki haukia tebaiuhu eao herekiai tetibaha,
“Uahoꞌabamai e,
emai nuatae emi batabura ꞌabina ha reꞌa maearima neiakia herekiai patohinanakia.”
16 Paulo emikiri imanai etori abunakia etibaha,
“Isaraela haumi mai rama haeai Tirama ṯokuti aina haumi e,
aiaꞌu tomona.
17 Isaraela hauka eka Tirama ehore kupuka ꞌabaꞌabaka etinaꞌanakia abomo haukia ebaboꞌonakia ekia miaho Aigupito aonai,
haeamona ia ena hiabu apaꞌuanai Aigupito ai ebakarahinakia.
18 Ihau bariabui ꞌabana hanoꞌakunai herekiai ebapahihi.
19 Ia ehore Kanana hanopakakia ꞌabaihau hamomo ebapururunakia.
Hanokia ewatenakia Isaraela hanokiai teao ihau hinabu bani reana imabui ꞌabana aonai.
20 Taba neiakia murikiai bakai haukia ebamikirinakia kateꞌuainakia emaimo mahabanai hauna Samuela ena rani ai.
21 “ꞌA ia tehore obia ꞌarana ha tenuatae aina hanona Tirama ehore Beniamina itubuna hauna ha,
Kisa nahuna Saulo ebenakia,
ihau bariabui aonai eobia.
22 Tirama Saulo eaꞌi obona murinai Davida eaꞌi taeana ekia obia ꞌaranai eao.
Ia pouna ehinana etibaha,
‘Iese nahuna Davida abatabu ahina anuatae aina,
ia hanona eꞌu nuatae akakia ikoikiai kebabainakia.’
23 Tirama ena ꞌabiꞌuai ihobonai Davida ena rama haunai Isaraela maearimakia kebamaurinakia hauna ebamikirina,
weiana hanona Iesu.
24 “Iesu ena aka aꞌi eaꞌi rama bahana aonai Ioane hanona aba eiroro ꞌuai Isaraela maearimakia ikoikiai ekia kiꞌai kateraona kabe mai kateꞌuere robe.
25 Ioane ena aka aba kepua aonai maearima ehina benakia etibaha,
‘Wai turaonana au hanona tai?
Au hanona Keriso ahaꞌi.
Ia hanona muriꞌuai nimai,
au hana aꞌi anamo ena tamaka warokia aꞌi karubunakia.’
26 “Uahoꞌabaꞌu Aberahamo ramana haukia nahukia abomo wai rama haeai Tirama ṯokuti aina haumi e,
Tirama ehore bamauri ꞌabina neiana aba euhuna emai aika herekai.
27 Ierusalema ai ṯemiaho haukia mai teꞌuai ainakia haukia aꞌi teꞌiobina Iesu hanona bamauri hauna.
Abomo beraura robe ai rani ikoikiai tetuabina ꞌabina weiana mahabanai haukia tererena hauna obona aꞌi teobo,
Iesu aka kiꞌa haunai tebaona,
weiana hanona mahabanai haukia ekia ꞌabi aba etohana.
28 Iesu kateahu ꞌarina ena pokina ha aꞌi tetabu ahina,
weiana Pilato tenoina ꞌari ꞌekanai kehorotina.
29 Ia ꞌabina puka robenai terere ꞌuainakia ihobonai akakia ikoikiai tebaorenakia murinai,
ia eꞌari hauanina matiu ibiri ropo ꞌubinai teaꞌi obona ꞌariahanai tehorena.
30 Ia Tirama ehore Iesu ꞌariai ebamikiri muena.
31 Weiana murinai,
Iesu hanona rani boꞌona kipokia tekaꞌa Galilea ai eaomo Ierusalemai haukia herekiai ewaira tina.
Bariu maearima weiakia hanona ia mahakiai teihana hauna pouna tehinana Isaraela haukia wairakiai.
32 “Ua buonai ai abomo pou namona weiana Tirama ꞌabaꞌabaka herekiai eꞌabiꞌuai aina hauna ṯamaiaina wai heremi.
33 Tirama hanona Iesu ꞌariai ebamikirina weianai ena ꞌabiꞌuai ꞌabaꞌabakia herekiai ebatohana.
Salamo ibaruana aonai abomo Iesu pouna ehinana etibaha,
‘Oi hanona au Nahaꞌu.
Bariu rani neianai
au hanona oi Hamamu.’a Sal 2.7
34 Tirama Iesu ꞌariai ebamikirina,
ba ꞌariahana aonai aꞌi keburu buru.
Weiana hanona ena ꞌabi puka robenai hauna ebatohana,
‘Au kahore Davida herenai
aꞌabiꞌuai aina weiana erobe mai
etohana hauna wai kabenimi.’ Isa 55.3
35 Salamo haeai aonai abomo ṉa eꞌabi aiho,
‘Emu robe hauna hanona
aꞌi kohabo ꞌabaeana aꞌi
keburu buru.’ Sal 16.10
36 Davida ena mauriai hanona Tirama ena nuatae akakia ebabai,
murinai eꞌari kupuna ꞌabaꞌabana herekiai tehorena,
haeamona hauanina ꞌuriai eburu buru.
37 Ia Tirama ꞌariai ebamikiri muena hauna hanona ꞌuriai aꞌi eburu buru.
38 Ua buonai uahoꞌabaꞌu e,
ṯanuatae katoꞌiobina Iesu paunai kiꞌa ihina haona pouna hanona wai heremiai ṯairoro aina.
39 Tirama ehore Iesu tiaꞌikakaumana haukia hanona bero ebenakia,
pokina Mose ena rauhubuai ꞌekakia ikoikiai wai bero aꞌi katotabu ahina.
40 Ua buonai katoꞌima ꞌima harainimi mahabanai haukia ꞌabi tabana tehinana hauna heremiai aꞌi merama.
Ṉa teꞌabi aiho,
41 ‘ꞌUahiꞌuahi haumi,
tomotaꞌutaꞌu huri ba
tomoꞌari baihana.
Au emi raniai taba ha kababaina,
hau ha pekikipa haraina
iamo aꞌi kato aꞌikakaumana.’” Hab 1.5
42 Paulo mai Banaba marea ai tikarahi aonai,
maearima ia tenoinakia pou neiakia waira rani robenai katehina mue herekiai.
43 Toꞌu epua murinai,
Iuda maearimakia mai rama haeai maearimakia Tirama tekuti aina ba Iuda haukia baiatakiai tetoto haukia boꞌokia Paulo mai Banaba murikiai teꞌau.
Ia terarua maearima weiakia tebahi ahinakia Tirama ena aokoꞌo hoana aonai katemiaho.
44 Rani robena ibaruanai aiarai ṯemiaho haukia ikoinai temai tebararona Tirama ena ꞌabi aiana kateona.
45 ꞌA Iuda haukia hanona toꞌu haukia teihanakia raninai tewamuru kiꞌa,
Paulo ꞌabi ehinanakia haukia teaꞌi kiꞌanakia haeamona ꞌabi kiꞌa obokia tehina ia herenai.
46 Ia Paulo mai Banaba teꞌabi tabura tetibaha,
“Tirama ena ꞌabi hanona wai patoꞌiobi ꞌuaina,
ia wai hanona tubakiꞌana haeamona kipomi kiꞌa ꞌekanai tuhorotinimi mauri banaibanai aꞌi ṯonuatae aina,
ua buonai ai aba rama haeai haukia herekia ṯaeao.
47 Obiapaka ṉa ehinabe aihonamai,
‘Au oi nahorotiniꞌo rama haeai
haukia ibaeakia ai koao,
abomo bamauri koaoaina
hanopaka puana.’” Isa 49.6
48 Rama haeai haukia aia weiana teona raninai aokia enamo ba Obiapaka ena ꞌabi tebanamona.
Weiakia Tirama etinaꞌanakia mauri banaibanai kateaꞌina haukia hanona teaꞌikakauma.
49 Ba Obiapaka ena ꞌabi hanona hano weiana maikoina aonai teuhu otaraina.
50 Ia Iuda haukia tehore obia babiꞌekia weiakia Tirama ṯekuti aina haukia mai aiara haukia apaꞌuakia aokia teani tekai taꞌa taꞌanakia,
Paulo mai Banaba ohi teꞌoatanakia haeamona hano weiana aonai teuꞌu ahinakia.
51 Paulo mai Banaba hanona bakiꞌa aiarana weiana herenai aekia apurorokia teahuahu obonakia ba teao Ikonio.
52 Aꞌikakauma haukia weiakia Antioka ai ṯemiaho haukia aokiai enamo mai Auba Robe ai tebonu.