Iesu ꞌAriai Emikiri Mue.
28
Beraura robe eore murinai hui beraurana koriꞌuaina raurani amarinai,
Maria Magadala babiꞌena mai Maria ha ohi teao ꞌariahana kateihana.
2 Rani weianai kanokau rarina ꞌakina ekaꞌa aonai Obiapaka ena aneru ha kupai eriri emai ꞌariahana paꞌabina piharana ebahere parena ahanai emiaꞌau.
3 Ia hauna ea obo matoha ꞌimare ꞌabana ena habuni tepore wairai matoha ꞌauhao porena ꞌabana.
4 ꞌAriahana teꞌimana haukia aneru teihana raninai tetaꞌu kiꞌa teꞌururu aokia terea teꞌeho matoha teꞌari.
5 Ia aneru hanona babiꞌe ehina benakia etibaha,
“Aꞌi tomotaꞌu,
au aꞌiobina wai Iesu matiu ibiri ropo ubinai tekoko ꞌauna hauna tutabuna.
6 Ia hanona neia ahaꞌi.
Ia hanona aba emikiri ꞌuainai ehinabenimi ihobona.
Tomai enoti ꞌekana tomoihana.
7 Ba tomoao biai iꞌabana haukia katohina benakia,
‘Ia hanona ꞌari haukia baiatakiai aba emikiri mue ba aba neꞌuai niao Galilea,
weia katoihana.’
ꞌAbi neiana kabenimi paunai amai.”
8 Ua buonai babiꞌe ꞌariahanai tekarahi noanoa mai taꞌukia mai aonamokia tebeau iꞌabana haukia herekia katehina benakia.
9 Taearai tiao aonai Iesu kipokia tebaitabu ahi.
Ehinabenakia etibaha,
“Raurani namona!”
Ba teao herena teꞌumuti aena teaꞌi toꞌo tekutiaina.
10 Ba Iesu ehina benakia etibaha,
“Aꞌi tomotaꞌu,
katoao uahoꞌabaꞌu katohina benakia kateao Galilea uaꞌa kateihanaꞌu.”
ꞌAriahana Teꞌimana Haukia Ekia ꞌAbi.
11 Babiꞌe taearai tekaꞌa teao aonai,
huari haukia ꞌariahana teꞌimana haukia baika temue aiara apaꞌuana teao taba terama haukia poukia ikoikiai robe haukia apaꞌuakia herekiai tehinanakia.
12 Robe haukia apaꞌuakia hanona Iuda ekia maearima apaꞌuakia kipokia tetoꞌu teꞌabiꞌabi ekia raona tebakorina huari haukia weiakia moni rarina ha tebenakia,
13 ba tehina benakia tetibaha,
“Wai katoꞌabi katotibaha,
‘Iꞌabana haukia rabi taparua rea aonai temai Iesu hauanina tebainao aina.’
14 Pou neiana Kabana hauna keona raninai ai katabaꞌamena,
aona kataba kabanaina keraonana wai hanona emi kiꞌa ahaꞌi,
abomo taba ha aomi aꞌi kebaroꞌarina.”
15 Huari haukia moni teaꞌina ba tehina benakia ihobona tebabaina.
Ua buonai ꞌabi neiana Iuda haukia baiatakiai tehina otaraina rani weianai emai mo bariu.
Iesu Iꞌabana Haukia Herekiai Ewaira Tina Aka Ebenakia.
16 Ba iꞌabana haukia harau haea hamomo teao Galilea Iesu ehina benakia oeona teao.
17 Iꞌabana haukia ia teihana raninai tekuti aina,
ꞌa baika hanona aokia tekaiꞌau kaiꞌau.
18 Iesu ekaꞌa ha ha eao herekia ba ehinabenakia etibaha,
“Tirama ehore hiabu ikoinai kupai mai hanopakai hauna aba ebenaꞌu.
19 Ua buonai katoao itubu ikoikiai maearimakia herekia iꞌabaꞌu haukiai katobaonakia,
katobaꞌuere robenakia Hamana Nahuna mai Auba Robe atakiai,
20 ahinabenimi ꞌabikia ikoikiai katoba ꞌiobinakia katekaꞌainakia.
Tomobahu,
au hanona rani ikoinai wai heremiai keao mo hanopaka kepua.”