Ibeni Tabakia Auba Robe Herenai Timai.
12
Uahoꞌabaꞌu e,
bariu au eꞌu nuatae wai Auba Robe ena ibeni tabakia hanona katoꞌiobi harainakia.
2 Wai toꞌiobina,
aꞌi toaꞌikakauma baha aonai,
kaibaꞌuku weiakia aꞌi timauri mauri haukia tehore teꞌuai ainimi abomo tebakaꞌa parenimi.
3 Ua buonai au wai nahina benimi,
Tirama ena Auba ena baraibarai ai niꞌabiꞌabi hauna hanona Iesu aꞌi neururu aina aꞌi netibaha,
“Iesu hanona ekiꞌa,”
abomo Auba Robe ena baraibarai eaꞌina hauna pinanai niꞌabi netibaha,
“Iesu hanona Obiapaka.”
4 Auba Robe ena ibeni tabakia hanona haeai haeai,
iamo Auba Robe hamona mo weiana nihore nibaibeni.
5 Obiapaka ena aka ibabaikia taearakia hanona haeai haeai,
iamo Obiapaka hamona mo taꞌarana nahaꞌi.
6 Maearima eka mauri aonai Tirama ena aka taearakia hanona haeai haeai,
iamo Tirama hamona mo nihore ena maearima ikoikai iriara nibenaka ia ena aka kahababai.
7 Auba Robe nihore aꞌikakauma maearimakia ha ha hiabu nibenakia hanona Tirama ena marea maearimakia ikoikiai ibaraikia ekia namo paunai.
8 Auba Robe nihore hau ha aobero ꞌabikia nibena kehina,
Auba Robe ihobona mo weiana nihore ha aotipa ꞌabikia nibena kehina.
9 Auba Robe ihobona mo weiana nihore hau ha aꞌikakauma nibena,
Auba Robe hamona mo weiana nihore ha inawa ibanamokia hiabuna nibena inawa ꞌao haiara kebanamonakia.
10 Auba Robe weiana nihore hau ha hiabu nibena bataꞌutaꞌu huri hoakia kebabai,
ha hanona mahabanai ꞌabikia kehina,
haeamona ha hiabu nibena auba haeai haeai ekia haeai kehina pouna,
ha hiabu nibena maea haeai haeaiai keꞌabi,
ha hanona hiabu nibena maea haeai haeai ṯehinana anikia keaꞌi banainakia.
11 Taba neiakia ikoikiai hanona Auba Robe hamona ia ikupaiana nibabainakia,
ia nihore maearima ikoinai ha ha ibeni haeai haeai nibenakia ia kipona ena nuatae ihobonai.
Aika Ikoikai Hanona Hauani Hamona Puapuana.
12 Maearima hauanina hanona hamona,
iamo ꞌeteꞌetena hanona eboꞌo,
ba ꞌeteꞌetekia weiakiai hanona hauani hamonai teara ꞌau.
Ba Keriso abomo uamo homana.
13 Ihobonaimo aika ikoikai Iuda haukia ꞌao Helene haukia,
taꞌaraꞌi haukia ꞌao taꞌara aꞌi tiaꞌi haukia Auba Robe hamona ehore hauani hamonai ebaꞌuere robenaka,
aika ikoikai hanona Auba Robe hamona haꞌina aokai nemiaho.
14 Maearima hauanina hanona ꞌetena hamona ahaꞌi ia ꞌetena eboꞌo.
15 Ba ae peꞌabi petibaha,
“Au hanona ima ahaꞌi buonai au hanona hauani ꞌetena ha ahaꞌi,”
ba ꞌabi weiana pehinana reꞌa ae hanona hauani ꞌetena ha ai aꞌi keibao taearana ahaꞌi.
16 Mai haia petibaha,
“Au hanona maha ahaꞌi buonai,
au hanona hauani ꞌetena ha ahaꞌi,”
ba ꞌabi weiana pehinana reꞌa haia hanona hauani ꞌetena ha ai aꞌi keibao taearana ahaꞌi.
17 Ba hauani maikoinai maha ai peao raninai,
aia aea peoꞌo aihona?
ꞌAo hauani maikoinai haia ai peao raninai,
timi aea peo aihona?
18 Ua homana ahaꞌi.
Tirama ena nuatae ihobonai hauani ꞌetena ikoinai ꞌekakia tohakiai ehorotinakia ba ha ha ekia aka tohakia katebabai.
19 Ba ꞌete ikoikiai hanona ꞌete hamonai pateao raninai,
hauani hanona aeꞌe?
20 Hauani hanona ua homana ahaꞌi.
Hauani hanona hamona ia ꞌetena hanona eboꞌo.
21 Ua buonai maha hanona ima aꞌi kehina benakia aꞌi ketibaha,
“Au wai aꞌi nanuatae ainimi,”
ꞌAra abomo ae aꞌi kehina benakia aꞌi ketibaha,
“Au wai aꞌi nanuatae ainimi.”
22 Ahaꞌi.
ꞌEte weiakia hauaniai tiꞌabeꞌabe haukia pateahaꞌi raninai hauani hanona aꞌi keaka harai.
23 Abomo hauani ꞌetena baika naharaonana ekia aka aꞌi teapaꞌua haukia nahaꞌima harainakia,
ꞌa ꞌete weiakia nahahaumaeai haukia hanona habuniai nahabahu abu harainakia.
24 ꞌA ꞌetekia ihakia tenamo haukia hanona robakia aꞌi naha ahunakia.
Tirama hauani ṉa ebabai aihona hanona ꞌete ikoikiai ebahamonakia hauani hamonai,
teꞌabeꞌabe haukia abomo neꞌima harainakia.
25 Ua buonai hauani aonai hanona hoa hore ahaꞌi,
ia ꞌete ikoikiai hanona katebahaeamo ha ha katebarai barai.
26 Ba ꞌete ha kehaiara raninai ꞌete ikoikiai hanona ia kipokia katehaiara haeamo,
ba ꞌete ha atana katebanamona raninai ikoikiai ia kipokia kateaonamo haeamo.
27 Bariu wai ikoimiai hanona Keriso hauanina,
ba wai ha ha hanona ia hauanina ꞌetena ha.
28 Tirama ehore ena marea aonai maearima eaꞌi taeanakia,
koriꞌuaina hanona iuhubeau haukia,
ibaruana hanona mahabanai haukia,
ibaihauna hanona baꞌiobi haukia,
ba hiabu hoakia haeai haeai katebabai haukia,
ia murikiai hanona inawa katebanamo haukia,
baika barai barai haukia,
baika ꞌuai haukia,
ba weiakia maea haeai haeaiai kateꞌabi haukia.
29 Ia ikoikiai hanona iuhubeau haukia mo ahaꞌi,
ikoikiai hanona mahabanai haukia mo ahaꞌi.
Ikoikiai hanona baꞌiobi haukia mo ahaꞌi.
Ikoikiai hanona hiabu hoakia katebabai haukia mo ahaꞌi.
30 Ikoikiai hanona inawa katebanamo haukia mo ahaꞌi.
Ikoikiai maea haeai haeaiai kateꞌabi haukia mo ahaꞌi.
Ikoikiai maea haeai haeai anikia kateaꞌi banai haukia mo ahaꞌi.
31 Auba Robe ena ibeni apaꞌuakia haukia katonuatae ainakia.a
Bariu au kahore taeara namona tohana hauna kabaihanimi.