Raonaꞌau.
13
Au maea haeai haeai mai aneru maeakiai paꞌabi reꞌa,
iamo hereꞌuai raonaꞌau ahaꞌi raninai,
au hanona matoha kapa ꞌao irarabu weiakia tiahu ꞌurukiamo ṯebua haukia ꞌabakia.
2 Au mahabanai ibenina paꞌina ꞌao Tirama ena ꞌabi bunikia mai aotipa ikoinai paꞌiobinakia,
abomo eꞌu aꞌikakauma petabura kiꞌa baha kobio paba ibiunakia reꞌa,
iamo hereꞌuai raonaꞌau ahaꞌi raninai,
au hanona taba ahaꞌi.
3 Eꞌu taba ikoikiai uraru haukia pabenakia,
abomo hauaniꞌu pabaibeni ꞌabaea irubai patehuhuna peꞌara obo reꞌa,
iamo hereꞌuai raonaꞌau ahaꞌi raninai,
weiakia ikoikiai ekia namo ahaꞌi au hereꞌuai.
4 Raonaꞌau hoana hanona bakiro mai rabo harai,
raonaꞌau hoana hanona aꞌi niwamuru ꞌao aꞌi nibaroꞌe ꞌao aꞌi niapa.
5 Raonaꞌau hoana hanona aꞌi nibapairi pairi,
aꞌi eani kiꞌa,
aꞌi niopuere noanoa mai maearima ekia beho aꞌi niraona ꞌini.
6 Raonaꞌau hoana hanona aka kiꞌa aꞌi niaonamo aina,
ꞌa ia hanona bero akana niaonamo aina.
7 Raonaꞌau hoana hanona taba ikoikiai aokiai aꞌi nihabaꞌau,
ena aꞌikakauma aꞌi niꞌabeꞌabe,
rani ikoinai buabeniai nemiaho mai nibapahihi taba ikoikiai aokiai.
8 Raonaꞌau hanona kemiaho banaibanai.
Mahabanai ꞌabikia katehina iamo aba katepua,
maea haeai haeaiai kateꞌabi iamo aba katepua,
aotipa ꞌabikia katehina ia abomo aba katepua.
9 Pokina eka aotipa hanona tekoꞌikoꞌi mai eka mahabanai ꞌabikia tekoꞌikoꞌi mo aꞌi tebero ꞌau harai,
10 ia ebero ꞌauna tohana kemai raninai,
weiakia aꞌi tebero ꞌau harai haukia hanona kateꞌakauma.
11 Au mioriꞌuai raninai eꞌu ꞌabiꞌabi,
eꞌu raonaraona,
eꞌu ꞌiobi ikoikiai hanona temiori,
ꞌa bariu au aba ahau aonai miori ekia hoahoa weiakia ikoikiai aba ahabonakia.
12 Taba bariu nahaiha hanona matoha oreore ꞌabuꞌabunai oreoreka nahaihana ꞌabana,
muriai hanona katewaira tina harai kahaiha harainakia.
Taba ikoikiai bariu hanona papakia mo naꞌiobinakia,
ꞌa muriai hanona kaꞌiobi ꞌaunakia,
matoha Tirama au eꞌiobi ꞌaunaꞌu ꞌabana.
13 Bariu taba aihau neiakia hanona katemiaho banaibanai,
aꞌikakauma,
buabeni,
mai raonaꞌau.
Ia neiakia aihau baiatakiai apaꞌuana ꞌakina hanona raonaꞌau.