Mahabanai Ibenina Mai Maea Haeaiai Niꞌabi Ibenina.
14
Raonaꞌau taearanai katokaꞌa,
Auba Robe ena ibeni tabakia hanona katonua kiꞌainakia,
iamo mahabanai ibenina katonuataeai apaꞌuana weianai Tirama pouna katohinana.
2 Pokina hau ha maea haeai ai niꞌabi hanona maearima aꞌi nehina benakia ia Tirama nehina bena,
ꞌabi tohana ena ꞌabi obokia aꞌi kateobo,
ia hanona taba bunikia nehinanakia Auba Robe ena hiabuai.
3 Ia nimahabanai hauna hanona Tirama ena ꞌabi nehinana maearima herekiai,
nibarainakia,
aokia nibataburana,
abomo aokia nibakirona.
4 Hau weiana maea haeaiai niꞌabi hauna ia kipona mo nibaraina,
ia nimahabanai hauna hanona Tirama ena marea maearimakia ikoikiai nibarainakia.
5 Au nanuatae ikoimiai maea haeai haeaiai katoꞌabi iamo eꞌu nuatae tohana hanona katomahabanai,
nimahabanai hauna hanona eapaꞌua ba maea haeai haeai niꞌabi hauna,
pokina maea haeai weiana keaꞌi banai hauna ahaꞌi raninai Tirama ena marea maearimakia ikoikiai ibaraikia taearana ahaꞌi.
6 Uahoꞌabaꞌu e,
au pawahi heremiai maea haeai haeai paꞌabi,
iamo ꞌabi weiakia Tirama ebawaira tina haukia,
aotipa ꞌabikia,
mahabanai ꞌabikia,
ꞌao baꞌiobi ꞌabikia baika aꞌi pawahi ainakia raninai,
maea haeai ai kaꞌabi ena namo hanona taba wai heremiai?
Ena namo ahaꞌi tohana.
7 Ihobona taba baika aꞌi timauri mauri ia ꞌuru nahababuana tabakia weiakia,
remoremo ꞌao kita,
ꞌurukia aꞌi katebero harai raninai maearima aea kateꞌiobi aihona hui tabana ꞌuruna tibabuana.
8 Ihobona huari pihina neubaina hauna pihi aꞌi keubai haraina raninai tai kebaꞌoru huari kekori abuna?
9 Heremiai abomo uamo homana,
wai maeamiai ꞌabi aꞌi katohina harai raninai hau ha aea keꞌiobi aihona wai taba ṯoꞌuahina?
Weiana hanona wai aba tuꞌabi ꞌabaea ꞌabi ꞌabaea mo.
10 ꞌAbi tohana hanopaka neiana maikoina aonai maea haeai haeai hanona teboꞌo,
ba ikoikiai mo hanona mai anikia.
11 Hau ha maea weiana nehinana ba au aꞌi naꞌiobina raninai,
niꞌabi hauna hanona au hereꞌuai hanopaka haeai hauna,
au abomo hanopaka haeai hauꞌu ia herenai.
12 Heremiai abomo uamo homana.
Wai ṯonuatae kiꞌa baha Auba Robe ena ibeni tabakia katoaꞌinakia buonai,
ibeni weiakia Tirama ena marea maearimakia katebarainakia mai kateba taburanakia haukia katonoiai taburanakia Tirama herenai.
13 Maea haeai niꞌabi hauna hanona mebahubaꞌari Tirama menoina ꞌabi iaꞌi banaikia meꞌiobina ba ꞌabi nehinanakia haukia keaꞌi banainakia.
14 Pokina au maea haeai nabahubaꞌari raninai,
aubaꞌu hanona nibahubaꞌari ia au aoꞌu hanona nemiaho ꞌabaea.
15 Ba au taba kababaina?
Au aubaꞌu ai kabahubaꞌari hanona aoꞌu ai abomo kabahubaꞌari.
Au aubaꞌuai kahui hanona aoꞌu ai abomo kahui.
16 Ba oi aubamuai Tirama namo ꞌabina nubena raninai,
maearima ꞌabaeana ha emu namo ꞌabina bahubaꞌarina weiana obona aꞌi keobo hauna “Amen” aea kehina aihona.
17 Emu namo ꞌabina bahubaꞌarina Tirama herenai hauna enamo kiꞌa baha,
ia maearima baika hanona aꞌi nibarainakia.
18 Au namo ꞌabina Tirama herenai nahinana,
pokina au rani boꞌokia maea haeai haeai nahina ba wai ikoimiai.
19 Au nanuatae Tirama ena marea toꞌuna aonai maea haeai haeaiai ꞌabi taha harau haea (10,000) aꞌi kahinana,
ia ꞌabi ima obokia kateobo haukia kahinanakia katebarainakia ekia ꞌiobi kerama.
20 Uahoꞌabaꞌu e,
taba neiakia herekiai miori ekia raonaraonai aꞌi katoraonaraona ainakia,
ꞌa kiꞌa ibabaikiai wai hanona miori ꞌoruꞌorukia ꞌabakiai katoao,
ia emi raonaraonai wai hanona hau apaꞌuakia ꞌabakiai katoao.
21 Puka robenai ṉa erere aihona,
“Obiapaka niꞌabi netibaha,
maea haeai haeai haukia mai
hanopaka haeai haukia pinakiai
au kahore maearima neiakia
herekiai eꞌu ꞌabi kahinana.
Iamo Iuda haukia neiakia hanona
au aiaꞌu aꞌi kateona.” Isa 28.11, 12
22 Ua buonai maea haeaiai kateꞌabi hanona aꞌi tiaꞌikakauma haukia kateꞌiobina hoa weiana hanona Tirama herenai nimai,
ia tiaꞌikakauma haukia paukiai ahaꞌi,
iamo mahabanai hanona aꞌikakauma haukia hoa weianai ekia aꞌikakauma katetabura,
ia aꞌi tiaꞌikakauma haukia paukiai ahaꞌi.
23 Weiana Tirama ena marea maearimami ikoimiai katotoꞌu aonai,
maea haeai haeaiai katoꞌabi ba maearima taba neiakia obokia aꞌi tiobo haukia mai aꞌi tiaꞌikakauma haukia toꞌu weiana aonai aꞌikakauma haumi maea haeai haeai tuꞌabi aiami kateona raninai,
ia kateꞌabi wai hanona tubeau ꞌari.
24 Ia ikoimiai mahabanai ꞌabikia katohina aonai,
maearima taba neiakia obokia aꞌi tiobo haukia ꞌao aꞌi tiaꞌikakauma haukia aiami kateona raninai kateꞌiobina ia hanona kiꞌa haukia.
Ba ꞌabi teona hauna kehore ia keba bakainakia,
25 ia ekia raona bunikia ikoikiai katekere,
ba katekuti Tirama katebanamona kateꞌabi katetibaha,
“ꞌAbi tohana Tirama hanona neia wai baiatamiai.”
Tirama Ena Marea Ena Aka Paipana.
26 Ua buonai,
uahoꞌabaꞌu e,
taba ṉa kahahoma?
Wai tutoꞌu tubahubaꞌari hanona hui ha tuaꞌina,
ha baꞌiobi nibaibeni,
ha hanona Tirama taba ha herenai ebawaira tinana hauna pouna nehinana,
ha maea haeaiai niꞌabi,
abomo ha hanona maea haeai ꞌabina weiana niaꞌi banaina.
Taba neiakia ikoikia tubabai hanona Tirama ena marea maearimakia ibaraikia mai ibataburakia.
27 Maea haeaiai tuꞌabi raninai,
maearima hamona,
rua ꞌao aihau mo katoꞌabi,
ia rani hamonai aꞌi katoꞌabi,
ha keꞌabi ꞌuai ba ha murinai koꞌabi,
abomo hau ha kehore ꞌabi ṯohinana hauna keaꞌi banaina.
28 Ia maea haeai ꞌabikia iaꞌi banaikia hauna ahaꞌi raninai,
maea haeai ai niꞌabi hauna aꞌi keꞌabi aota marea toꞌuna weiana aonai,
ia kiponamo herenai mai Tirama herenai keꞌabi.
29 Mahabanai hamona,
rua ꞌao aihau mo kateiroro ba ꞌabakia baika hanona ꞌabi weiakia ṯehina haukia kateraonaraona ainakia.
30 Tirama ena ꞌabi ha kemai temiati tibahu haukia ha herenai kewaira tina raninai,
weiana eiroro ꞌuai hauna keꞌoro ba Tirama ena ꞌabi emai hauna aiana kateona.
31 Taeara neianai mahabanai haumi ikoimiai hamo hamo Tirama ena ꞌabi katohinana,
weiana maearima ikoikiai kateꞌiobina abomo katetabura.
32 Mahabanai ꞌabikia katehinanakia haukia ia kipokia pinakia kateꞌimanakia keaomo ekia rani ketaina ba kateꞌabi.
33 Pokina Tirama hanona bahuahurea Tiramana ahaꞌi,
ꞌa ia hanona baibua Tiramana.
Tirama ena maearima ekia marea toꞌukia ikoikiai aokiai tibabaina ꞌabana,
34 babiꞌe hanona aꞌi kateꞌabi marea toꞌukia aokiai.
Ia hanona ekia bero ahaꞌi aꞌi kateꞌabi,
Mose ena rauhubu eꞌabi ihobona ia hanona aꞌi katepoki.
35 Babiꞌe tenuatae taba ha kateꞌiobina raninai ekia ituai uaꞌa atawakia katebakainakia,
pokina babiꞌe ha Tirama ena marea toꞌunai keꞌabi hanona mai haumaeana.
36 Turaonana Tirama ena ꞌabi hanona wai Korinto haumi heremiai ekarahi?
ꞌAo waimo ikupaiami paumiai emai?
Ahaꞌi ꞌakina.
37 Hau ha niraonana ia hanona mahabanai hauna ꞌao Auba Robe ena ibeni ha eaꞌina hauna,
ia keꞌiobi haraina au taba narere benimi haukia hanona Obiapaka ena rauhubu ꞌabina.
38 ꞌA ia rauhubu neiakia aꞌi keaꞌi taeanakia raninai wai abomo ia aiana aꞌi katoaꞌi taeana.
39 Ua buonai,
uahoꞌabaꞌu e,
mahabanaiai Tirama ena ꞌabi ihinana hanona katohau aroaina,
ia maea haeaiai kateꞌabi haukia aꞌi katobaꞌoronakia.
40 Taba ikoikiai hanona taeara beronai haeamona paipakia tohakiai katobabainakia.