Keriso Ena Mikiri Mue.
15
Uahoꞌabaꞌu e,
bariu au nanuatae pou namona airoro aina heremiai hauna toaꞌina weiana ahanai emi aꞌikakaumai tikori ꞌini hauna kabaraonanimi.
2 Pou namona weiana heremiai airoro aina hauna katoaꞌi ꞌinina hanona bamauri katoaꞌina,
weiana hanona wai aꞌi tuaꞌikakauma ꞌabaea.
3 Au pou namona aꞌina hauna wai abenimi,
neiana hanona taba apaꞌuana ꞌakina.a
Weiana Keriso hanona aika eka kiꞌa paukiai eꞌari Puka robenai tererena ihobona,
4 weiana ia tehorena,
ba wapu ibaihaunai emikiri mue emauri Puka robenai tererena ihobona.
5 Ia hanona Peterob herenai ewaira tina ꞌuai muriai iuhubeau haukia harau haea rua herekiai ewaira tina.
6 Weiana murinai ia hanona aꞌikakauma haukia hinabu ima abihana ikoikiai rani hamonai herekiai ewaira tina,
maearima weiakia boꞌona hanona bariu timauri ohomo,
ꞌa baika hanona aba teꞌari.
7 Ba ia ewaira tina Iakobo herenai,
muriai iuhubeau haukia ikoikiai herekiai ewaira tina.
8 Orena ꞌakinai hanona hereꞌuai abomo ewaira tina,
au hanona rama taearana tohanai aꞌi arama hauꞌu.
9 Iuhubeau haukia ikoikia baiatakiai au hanona akoꞌikoꞌi ꞌaki,
ba au eꞌu bero ahaꞌi kateaparinaꞌu iuhubeau hauꞌu,
pokina au Tirama ena marea maearimakia aꞌoatanakia.
10 Ia Tirama ena aokoꞌo hoana paunai au hanona iuhubeau hauꞌuai naeao,
mai ena aokoꞌo hoana ebenaꞌu hauna buona aꞌi eahaꞌi.
Au hanona aka kiꞌa baha ba iuhubeau haukia ikoikia,
iamo weiana hanona au kipoꞌu aꞌi aka,
ꞌa Tirama ena aokoꞌo hoana au hereꞌuai hauna ebatabaranaꞌu aka.
11 Weiana buonai au airoro aina ꞌao iuhubeau haukia baika teiroro aina reꞌa,
ia Iesu eꞌari haeamona emikiri mue pouna ai tairoro aina hauna wai toaꞌikakaumana.
Aika Eka Mikiri Mue.
12 Bariu ai hanona Keriso ꞌariai emikiri mue hauna pouna ṯairoro aina,
ba aehoma buonai wai baika tuꞌabi ꞌariai aꞌi katemikiri mue ṉa tuhoma?
13 Ba ꞌariai mikiri mue ahaꞌi raninai Keriso abomo ꞌariai aꞌi pemikiri.
14 Keriso ꞌariai aꞌi pemikiri raninai,
ai emai iroro hanona anina ahaꞌi,
ba wai emi aꞌikakauma abomo anina ahaꞌi.
15 Weiana ahanai,
ai hanona aba baiꞌoi haumaiai pataeao pokina Tirama pouna tahinana ia hanona Keriso ꞌariai ebamikiri muena.
Ia ꞌariai mikiri mue ahaꞌi raninai,
Tirama abomo Keriso ꞌariai aꞌi pebamikiri muena.
16 Pokina ꞌariai mikiri mue ahaꞌi raninai,
Keriso abomo aꞌi pemikiri mue.
17 Ba Keriso aꞌi pemikiri mue raninai,
wai emi aꞌikakauma hanona anina ahaꞌi,
wai hanona kiꞌa aonai patomiaho ohomo.
18 Ba neiana anina hanona Keriso teaꞌikakaumana teꞌari haukia hanona aba pateꞌakauma.
19 Bariu hanopaka maurina neiana ikupaiana mo paunai eka buabeni Keriso herenai hahorotina raninai,
aika hanona pateaokoꞌoai kiꞌa bahanaka ba hanopaka maearimakia ikoikiai.
20 Iamo ꞌabi tohana Keriso hanona ꞌariai emikiri mue.
Weiana hanona ꞌari haukia ekia mikiri mue hoana koriꞌuaina.
21 ꞌAri hanona maearima hamona ena babai paunai emai,
ihobonai ꞌariai mikiri mue abomo maearima hamona ena babai paunai nimai.
22 Adamu ena babai kiꞌa paunai maearima ikoinai tiꞌari,
ihobonai Keriso ena babai harai paunai maearima ikoikiai katemauri.
23 ꞌA mikiri mue paipana tohanai Tirama kehore ha ha kebamikiri muenakia.
Koriꞌuaina hanona Keriso,
muriai hanona ia ena mai mue raninai weiakia Keriso tiaꞌikakumana haukia.
24 Weiana murinai hanopaka puana kemai.
Rani weianai Keriso kehore auba kiꞌa obokia ekia poki haukia ikoikiai,
obia haukia ikoikiai,
mai hiabu haukia ikoikiai keba pururunakia,
ba ia ena obia aiarana kebamuena Hamana Tirama imanai keutana.
25 Keriso hanona keobiai kemiaho keaomo Tirama kehore ꞌou haukia ikoikiai Keriso ꞌapuna baꞌanai kehorotinakia.
26 ꞌOu hauna orena Iesu kehore keba pururuna hauna hanona ꞌari.
27 Puka robenai ṉa eꞌabi aiho,
“Tirama taba ikoikiai ia ꞌapuna baꞌanai ehorotinakia.”
‘Taba ikoikiai’ ṉa niho hanona aika nahaꞌiobi haraina Tirama kipona hanona Keriso ꞌapuna baꞌanai ahaꞌi,
Tirama ehore taba ikoikiai Keriso ꞌapuna baꞌanai ehorotinakia.
28 Taba ikoikiai Nahuna ena ihaꞌini baꞌanai teao ore murinai,
Nahuna kipona kehore keaoaina Hamana ena ihaꞌini baꞌanai kemiaho.
Ba taba ikoikiai hanona Tirama kepokiai ore haraina.
29 Mikiri mue peahaꞌi raninai,
maearima weiakia tibaꞌuere robenakia aba teꞌari haukia iraonakiai hanona taba ṯebuabena paunai ua tihoma?
ꞌAri haukia aꞌi katemikiri mue toha raninai,
aeahoma buonai weiakia tibaꞌuere robenakia ꞌari haukia paukiai?
30 Aehoma buonai ai rani ikoinai ꞌarimo wairamaiai nemiaho hauna aꞌi ṯataꞌu aina?
31 Uahoꞌabaꞌu e,
weiana emi mauri Keriso Iesu aonai hauna au napaina paunai ꞌabi tohana nahina benimi.
Au hanona ꞌari mo wairaꞌuai nemiaho rani ikoinai.
32 Au Epesoai maearima weiakia matoha mahi aibarakia ꞌabana haukia kipokia maearima ekia raona paunai taꞌau raninai,
ena namo hanona taba au hereꞌuai?
ꞌA ꞌari haukia aꞌi katemikiri mue raninai,
ꞌabi neiana rani ikoinai ṯehinana hauna hamababaina,
“Aika hamaniani mo,
hamainuinu mo,
pokina mara hanona kahaꞌari.”
33 Ua tiꞌabi aiho haukia aꞌi temeꞌoinimi.
“Maearima kiꞌa obokia kipokia bahaeamona hanona emi hoahoa namokia keaꞌi kiꞌanakia.”
34 Tomoraona raona harai kiꞌa akakia tomohabonakia,
pokina neiana nahinana hanona keba haumaeanimi,
wai baika hanona Tirama aꞌi toꞌiobina.
Mikiri Mue Hauanina Hanona Haeai.
35 ꞌA hau ha kebakai bakai ketibaha,
“ꞌAri haukia aea katemikiri mue aiho?
Hauani tabanai kateao?”
36 Neiana hanona poꞌo bakai bakaina.
Uho tubatona hauna aꞌi keꞌari ꞌuai raninai,
ia hanona aꞌi kemauri.
37 Taba nubatona hauna hanona uho ꞌabaeana,
paꞌe witi uhona ꞌao uho haeai ha,
ia matiu weiana keꞌomu hauna maikoina aꞌi nubatona.
38 ꞌA Tirama nihore uho weiana hauanina ha nibena ia ena nuatae ihobonai,
ia nihore uho ha ha hauanikia tohakia mo nibenakia.
39 Mauri tabakia hauanikia ikoikiai hanona ihobo ahaꞌi.
Maearima hauanikia haeai,
mahi hauanikia haeai,
roborobo hauanikia haeai,
maia hauanikia abomo haeai.
40 Kupa tabakia hauanikia ikoikia,
mai hanopaka tabakia hauanikia abomo ikoikia.
Ia kupa tabakia hauanikia ekia nuabi hanona haeai,
hanopaka tabakia hauanikia ekia nuabi abomo haeai mo.
41 Beraura ena nuabi hanona ehaeai,
nawa abomo ena nuabi haeai mo,
bihiu ekia nuabi abomo ha mo.
Ba bihiu ha ha ekia nuabi abomo haeai haeai mo.
42 Ba ꞌari haukia katemikiri mue abomo uamo homana,
hauani nahahorena aonai ia hanona nipari niꞌakauma,
ꞌa kemikiri mue hanona kemauri banaibanai aꞌi kekiꞌa.
43 Nahahorena aonai,
ihana ekiꞌa abomo eꞌabeꞌabe,
ꞌa kemikiri mue aonai ihana hanona kenuabi abomo ketabura.
44 Hanopaka hauaninai nahahorena,
nemikiri mue hanona auba hauaninai.
Hanopaka hauanina ha ikoina,
mai auba hauanina abomo ha ikoina.
45 Puka robenai aba tererena ꞌabana,
“Hau kori ꞌuaina Adamu hanona ibabai maearima maurimaurina.”
ꞌA Adamu murihaina hauna Keriso hanona auba mauri nibaibeni hauna.
46 Auba hauanina aꞌi emai ꞌuai,
ia hanopaka hauanina eꞌuai ba murinai hanona auba hauanina emai.
47 Hau koriꞌuaina Adamu hanona hanopaka apuroronai ebabaina,
ꞌa hau ibaruana Keriso hanona kupai emai.
48 Hanopaka haukia hanona hanopakai emai hauna ihobona,
kupa haukia hanona kupai emai hauna ihobona.
49 Hanopakai emai hauna ihaihanai nahaeao ihobona,
aika abomo kupai emai hauna ihaihanai kahaeao.
50 Uahoꞌabaꞌu e,
au taba naꞌuahina hauna neiana,
hauani weiana bitio mai aruaruai erama hauna Tirama ena obia aiaranai aꞌi kekatoto,
abomo hauani keꞌari hauna hanona aꞌi kemauri banaibanai.
51 Tomobahu,
au taba bunina ha nabaꞌiobinimi,
aika ikoikai hanona aꞌi kahaꞌari ore,
ia aika ikoikai Tirama kehore kebahaeainaka,
52 kenoanoa kiꞌa baha matoha maha nahahaba ꞌununa ꞌabana pihi orena keꞌarara aonai.
Pihi ꞌuruna kebua raninai Tirama kehore ꞌari haukia kebamikiri muenakia aꞌi kateꞌari haukiai kateao,
ba aika ikoikai kebahaeainaka.
53 Pokina hauani kepari hauna kebahaeaina aꞌi kepari haunai keao,
abomo hauani keꞌari hauna kebahaeaina aꞌi keꞌari haunai keao.
54 Ba hauani kepari hauna kehaeai hauani aꞌi kepari haunai keao abomo hauani keꞌari hauna kehaeai hauani aꞌi keꞌari haunai keao raninai,
Puka robenai tererena ꞌabina hanona ketohana,
“Tirama ehore ꞌari ena hiabu
ebapururuna ꞌari ebapua
baihana.” Isa 25.8
55 “ꞌAri e,
oi kobaꞌari hiabuna
hauna aeꞌe?
ꞌAri e,
oi kobahaiara hiabuna
hauna aeꞌe?” Hos 13.14
56 ꞌAri ena bahaiara hiabuna hanona kiꞌa herenai niaꞌina,
ꞌa kiꞌa ena hiabu hanona rauhubu herenai niaꞌina.
57 Namo ꞌabikia Tirama kahabena!
Ia ehore aika herekai ꞌari ena hiabu ebapururuna eka Obiapaka Iesu Keriso haunai.
58 Ua buonai,
uahoꞌabaꞌu kiꞌami e,
katokori ꞌini,
tai ha aꞌi kebaibiunimi,
rani ikoinai Obiapaka ena aka katobabai toꞌo baihana,
pokina wai toꞌiobina Obiapaka ena aka tubabaina hanona aꞌi tuaka ꞌabaea.