Tirama Ena Maearima Ibaraikia Monina.
16
Bariu wai Tirama ena maearima Iudeai ṯemiaho haukia ibaraikia paunai moni katobararo ꞌabina hanona neiana,
Tirama ena marea maearimakia Galatia hanonai ṯemiaho haukia ahina benakia moni tebararo taearana ihobona katobabaina.
2 Hui ha ha wapukia koriꞌuaikia ikoikiai aokiai wai ha ha emi itabu ahi ihobonai moni papakia baika katohore parenakia katobararona keapaꞌua,
ba au kawahi raninai moni bararo ha aꞌi kahababaina.
3 Au heremiai kakaraꞌau raninai toaꞌi taeanakia haukia poukia ihinana marerena karerena kabenakia ba kahauhunakia,
emi beruberu monikia kateaoainakia Ierusalema.
4 Ba au ia kipokia kataeao hanona kenamo raninai,
ia au kateꞌabanaꞌu kipokia kataeao.
Paulo Ena Raona Ebaꞌorunakia Haukia.
5 Au naraonana Makedonia hanona kakabanai ꞌuai ia kaihanakia murinai kawahi heremi.
6 Au rani papana wai heremiai kamiaho ꞌao kahamiaho keaomo ꞌama ranina keore,
ba eꞌu kaoao ꞌekakia ha ha kaeao aokiai wai katobarainaꞌu.
7 Au aꞌi nanuatae bariu eꞌu kabanai aonai noanoai wai kaihanimi.
Eꞌu buabeni hanona Obiapaka kenuatae raninai rani homaꞌana kipokia pahamiaho.
8 Ia au hanona neiamo Epeso aiaranai kamiaho keaomo Pentekoste ranina keaꞌina.
9 Pokina Tirama ena aka taearana paꞌabina aba ekaikauna ena aka rarina neia kababaina.
Iamo iꞌoataꞌu haukia abomo eboꞌo.
10 Timoteo kewahi heremi raninai katoaꞌi taeana,
aona katobakirona kipokia katomiaho aꞌi metaꞌu,
ia hanona Obiapaka ena aka nibabaina hauna au ihoboꞌu.
11 Hau ha ia iaꞌitaeana aꞌi kebaoao aina,
ia katobaraina katouhuna mai baibuana kemai,
ba ia kemue kemai hereꞌu,
au hanona ia nabahubahu aina uahoꞌabaka baika kipokia katemue katemai.
12 Uahoꞌabaka Apolo ena pou hanona nahomana,
abahi ahi taburana uahoꞌabaka baika kipokia katewahi,
ia bariu hanona aꞌi enuatae,
muriai rani namona ha aona ketaina hanona aba kewahi.
Banamo ꞌAbina Orena.
13 Katoꞌima ꞌima harainimi,
emi aꞌikakaumai katokori ꞌini,
aomi katobanua koꞌonakia,
abomo katotabura.
14 Tirama mai maearima katoraonaꞌau ainakia,
hoahoa neianai emi aka ikoikiai katobabai.
15 Wai toꞌiobina Akaia hanona aonai Stefano mai ena itu haukia kipokia hanona teraonakabe ꞌuai Tirama ena maearimai teao ba ia kipokia ekia mauri tebaibeni Tirama ena marea maearimakia tebarainakia.
Uahoꞌabaꞌu e,
au hanona wai nabahi ahinimi,
16 aꞌikakauma haukia uahomakia mai baika ia kipokia tiaka haeamo tibarainakia haukia aiakia katona.
17 Stefano,
Forotunato mai Akaiko temai hanona aoꞌu enamo,
pokina wai tokapare aonai ia hanona wai ꞌekami teaꞌina.
18 Ia tehore eꞌu ao aroꞌari tebaꞌorona,
wai emi ao aroꞌari abomo tebaꞌorona.
Maearima uahomakia hanona kahaꞌitaea harainakia.
19 Tirama ena marea maearimakia Asia hanona aonai haukia ekia banamo ꞌabikia ṯeuhunakia heremi,
Akula mai Priskila ekia banamo ꞌabina abomo Obiapaka atanai ṯeuhuna,
mai Tirama ena marea maearimakia ia ekia itu aonai titoꞌu haukia ekia banamo ꞌabina abomo ṯeuhuna.
20 Uahoꞌabaka neia ṯemiaho haukia ikoikiai ekia banamo ꞌabikia ṯeuhunakia.
Wai ha ha kipomi baipau robenaia katobanamonimi.
21 Au Paulo kipoꞌu imaꞌuai eꞌu banamo ꞌabina neiana narerena.
22 Hau ha Obiapaka aꞌi niraonaꞌau aina hauna ia hanona ururu aonai kemiaho.
Obiapaka e,
ꞌOmai!b