Iesu Iꞌabana Haukia ꞌAbaihau Hamomo Herekiai Ewaira Tina.
21
Weiana murinai,
Iesu Tiberiaa obunai iꞌabana haukia herekiai ewaira tina mue,
ṉa ebawaira tina aihona.
2 Simona Petero,
Toma tiaparina baiꞌapaea,
Natanaela Galilea Kana hauna,
Sebedeo nahuna rua,
mai iꞌabana haukia rua abomo weia kipokia ꞌeka hamonai temiaho.
Jesus at the Sea of Galilee (Ioane 21:1-25)
3 Simona Petero ehina benakia etibaha,
“Au aba naeao kabaꞌeha.”
Ia tetibaha,
“Ai abomo kipokia hamaeao.”
Weiana teao ahiai teheꞌau,
ia rabi weiana aonai hanona maia ha aꞌi tebarewana.
4 Rani nirerena aonai Iesu hanona poe haianai ekoroti,
ia iꞌabana haukia aꞌi teꞌiobina weiana hanona Iesu.
5 Ba Iesu ebakainakia etibaha,
“Eꞌu hau e,
taba ha tobarewana?”
Ia teꞌabi tetibaha,
“Taba ha ahaꞌi.”
6 Iesu haeamona ehina benakia etibaha,
“Emi reꞌe ahi itipanai tomohorena,
ba maia baika katobarewanakia.”
Weiana tebabaina aonai reꞌe kateberi ꞌauna hanona aꞌi etainakia,
pokina maia eboꞌo kiꞌa baha.
7 Ba Iesu iꞌabana hauna weiana eraonaꞌau aina hauna ehore Petero ehina bena etibaha,
“Weiana hanona Obiapaka.”
Simona Petero hanona ena habuni ebakuri ahina ebaꞌeha,
ba ꞌabi neiana ‘Ia hanona Obiapaka’ hauna eona raninai emikiri ena habuni ehaina beronai obuai etobu.
8 Iꞌabana haukia baika hanona ahiai reꞌe mai maiana ebonu hauna teberi ririna teaoaina poe,
pokina poe hanona aꞌi ehomaꞌa roba hinabu hamomo ꞌabana.
9 Ia poeai tekaraꞌau raninai mahakia eao iruba baubaeana ahanai maia ihoreꞌau teihanakia,
parawa baika abomo weia.
10 Iesu ia ehina benakia etibaha,
“Maia bariu toaꞌinakia haukia baika tomai ainakia.”
11 Simona Petero emue ahiai ekaraꞌau reꞌe eberiꞌauna poeai,
reꞌe aonai maia rarikia mo ꞌabaeana ikoinai hinabu hamomo imabui aihau,
maia rarikia ꞌabaeana ia ekia reꞌe hanona aꞌi etapa.
12 Iesu ia eaparinakia etibaha,
“Tomai,
tomoaniani!”
Ba iꞌabana haukia ia katebakaina,
‘Oi tai?’
hauna aꞌi tenuatae,
pokina aba teꞌiobina ia hanona Obiapaka.
13 Iesu ekaꞌa haha eao herekiai parawa eaꞌina ba ebenakia,
ihobonai maia abomo ua ebabai aihona.
14 Neiana hanona Iesu ꞌariai emikiri mue murinai rani ibaihauna kipona iꞌabana haukia herekiai ewaira tina.
Iesu Mai Petero.
15 Teaniani murinai Iesu Simona Petero ebakaina etibaha,
“Simona Ioane nahuna e,
oi emu raonaꞌau hereꞌuai eapaꞌua kiꞌa baha ba neiakia ekia raonaꞌau,
u?”
Petero etibaha,
“ꞌE,
Obiapaka,
oꞌiobina au ꞌarimu naꞌari.”
Ba Iesu eꞌabi etibaha,
“Eꞌu mamoe nahu koꞌima harainakia.”
16 Rani ibaruana ebakai muena etibaha,
“Simona Ioane nahuna e,
oi au nuraonaꞌau ainaꞌu,
u?”
Petero etibaha,
“ꞌE,
Obiapaka,
oꞌiobina au oi ꞌarimu naꞌari.”
Ba Iesu eꞌabi etibaha,
“Eꞌu mamoe koꞌima harainakia.”
17 Iesu rani ibaihauna Petero ebakaina etibaha,
“Simona Ioane nahuna e,
oi au ꞌariꞌu nuꞌari,
ꞌu?”
Petero aona ehai hai pokina aba rani aihau ebakaina etibaha,
“Oi au nuraonaꞌau ainaꞌu?”
Weiana Petero eꞌabi etibaha,
“Obiapaka e,
oi hanona taba ikoinai oꞌiobinakia,
oꞌiobina au oi ꞌarimu naꞌari.”
Iesu etibaha,
“Eꞌu mamoe kobanianinakia.
18 ꞌAbi tohana au oi nahina beniꞌo,
ꞌaruꞌarumuai raninai oi kipomu emu habuni obatotona abomo emu nuatae ꞌekana aeꞌeai hanona oao.
Ia koanepaka raninai imamu kotiu ahinakia,
hau ha kehore emu habuni kebabatotoniꞌo,
keaoainiꞌo aꞌi nonuatae aina ꞌekanai.”
19 Iesu ꞌabi neiana ehinana hanona Petero aea keꞌari aiho Tirama ena nuabi kebawaira tinana.
Ba ehina bena etibaha,
“Muriꞌuai omai.”
Iesu Iꞌabana Eraonaꞌauai Kiꞌa Bahana Hauna Ena ꞌAbi.
20 Petero eiha kabe hanona Iesu iꞌabana niraonaꞌau aina hauna eihana,
ia hanona ani toꞌuai Iesu haunai ekapeꞌau,
ba ebakaina etibaha,
“Obiapaka e,
tai oi hinahinamu kehinahina?”
21 Petero hau weiana eihana raninai Iesu ebakaina etibaha,
“Obiapaka e,
hau weiana hanona aea keho?”
22 Iesu ehore Petero ehina bena etibaha,
“Panuatae ia pemiaho peaomo au pamue pamai,
iamo oi emu aka hanona taba ia herenai?
Oi hanona muriꞌuai omai.”
23 ꞌAbi neiana paunai iꞌabana haukia kipokia baiatakiai teꞌabiꞌabi aina,
iꞌabana hauna weiana aꞌi keꞌari ṉa ehoma.
Iamo Iesu hanona ua aꞌi eꞌabi aiho hau weiana aꞌi keꞌari,
ꞌa ia eꞌabi,
“Panuatae ia pemiaho peaomo au pamue pamai,
iamo oi emu aka hanona taba ia herenai?”
24 Iꞌabana hauna weiana ehore ꞌabi neiakia ikoinai ehinanakia haeamona ererenakia,
ba haꞌiobina ꞌabi neiakia ehina haukia hanona tohakia.
25 Iesu hanona hoa boꞌona ꞌakina ebabainakia.
Au naraonana weiakia ikoikiai hamohamo temerere ꞌaunakia raninai,
hanopaka maikoinai puka neiakia patebararonakia hanona ꞌekana ahaꞌi.