9
Haeamona Iesu ehina benakia etibaha,
“ꞌAbi tohana mo au wai nahina benimi,
baika neia tekoroti haukia aꞌi kateꞌari baha keao mo Tirama ena obia aiarana mai hiabuna kemai hanona kateihana.”
Mareko 9.1-29
Iesu Ihana Ebahaeaina.
2 Beraura ꞌabaihau teao murinai,
Iesu hanona Petero,
Iakobo mai Ioane mo ebakaꞌanakia oeo apaꞌuana ha ai tekaraꞌau,
weia teikupai aonai wairakiai ihana ehaeai,
3 ena habuni eꞌimare ꞌimare epore obo,
epore kiꞌa baha hanopakai habuni utu hauna ha ua aꞌi pebapore aihona.
4 Weiana Elia mai Mose ohi tewaira tina ia wairakiai,
terarua Iesu kipokia teꞌabi ꞌabi.
5 Petero ehore Iesu ehina bena etibaha,
“Baꞌiobi haumu e,
aika neia hanona enamo,
iꞌaua aihau kata babainakia,
ha oi ꞌeumu,
ha Mose ꞌeuna,
ha Elia ꞌeuna.”
6 Pokina tetaꞌu kiꞌa baha buonai,
Petero aea keꞌabi aiho hanona aꞌi eꞌiobina.
7 ꞌAuhao ha emai ekaiabunakia,
abonamo aia ha ꞌauhao aonai emai,
etibaha,
“Neiana hanona au nahaꞌu,
eꞌu raonaꞌau hauna,
aiana katona.”
8 Beronai teiha banai iha banai ia tai ha aꞌi teihana,
Iesu ikupaiana mo ia baiatakiai.
9 Oeoai teriri raninai,
Iesu eharabunakia teiha tabakia hanona hau ha haianai aꞌi kateꞌabi,
keao mo Maearima Nahuna ꞌari ai kemikiri mue.
10 Ena ꞌabi teaꞌi ꞌinina,
ia kipokia mo teꞌabiꞌabi aina,
ꞌariai mikiri mue anina hanona taba.
11 Ia tehore Iesu tebakaina tetibaha,
“Taba buonai Rauhubu poki haukia teꞌabi Elia hanona kemaiꞌuai?”
12 Iesu ehina benakia etibaha,
“ꞌAbi tohana.
Elia hanona kemai ꞌuai,
taba ikoinai kebaꞌorunakia.
Ia taba buonai Maearima Nahuna ꞌabina Puka Robenai tererena kehaiara kiꞌa baha abomo kateꞌoatana?
13 Au wai nahina benimi,
Elia hanona aba emai,
maearima ekia nuatae akakia ikoinai herenai tebabai,
ia ꞌabina tererena ihobonai.”
Iesu Miori Ha Aonai Auba Kiꞌa Obona Hauna Ebamaurina.
14 Temai iꞌabana haukia baika herekiai raninai,
maearima boꞌona ꞌakina tekori kakaiaronakia,
rauhubu poki haukia mai iꞌabana haukia kipokia tibaihara tae teihanakia.
15 Toꞌu haukia Iesu teihana raninai,
tetaꞌu taꞌu huri tebeau herena teao tebanamona.
16 Iesu iꞌabana haukia ebakainakia etibaha,
“Ia kipokia taba tubaihara taeaina?”
17 Toꞌu aonai hau ha eꞌabi etibaha,
“Baꞌiobi haumu e!
Au nahaꞌu amaiaina oi heremu,
pokina aonai maea kiꞌa aubana nemiaho aꞌi niꞌabiꞌabi.
18 Rani baika auba kiꞌa obona neibiu hanona nibaꞌehona ꞌanoai nienoti pinana ꞌutoꞌuto mai niara rabina hauna nipahihi obo.
Iꞌabamu haukia anoinakia,
auba kiꞌa obona kateuꞌu ahina,
ia aꞌi etainakia.”
19 Iesu ehinabe pahihinakia etibaha,
“Uru neiana haumi emi aꞌikakauma ahaꞌi,
heremiai kamiaho keao mo rani tabanai?
Kahau haiara heremiai keao mo rani tabanai?
Miori tomaiaina hereꞌu.”
20 Miori teaoaina Iesu herena,
auba kiꞌa obona Iesu eihana raninai,
miori ebaꞌururu kiꞌana,
weiana eꞌeho ꞌanoai ehere banai here banai,
pinana ꞌutoꞌuto tekarahi.
21 Iesu miori hamana ebakaina etibaha,
“Aita raninai nahomana eaꞌi ramana?”
Ia eꞌabi etibaha,
“Aba koꞌikoꞌina raninai.
22 Rani boꞌona auba kiꞌa obona nihore iruba ahanai nikapo ꞌauna mai beiai nikapo uhuna kebaꞌarina.
Kobabaina ketaina reꞌa,
poaokoꞌo ainamai,
pobarainamai.”
23 Iesu ehina bena etibaha,
“Taba buonai kababaina ketaina ṉa ohoma!
Tirama niaꞌikakauma hauna herenai taba ikoikiai kebabai hanona ketaina.”
24 Beronai miori hamana eio etibaha,
“Au hanona aba naꞌikakauma,
mobarainaꞌu eꞌu aꞌikakauma papana hauna mobapaꞌuana.”
25 Iesu toꞌu haukia eihanakia,
teraꞌa herena teao.
Weiana ia auba kiꞌa obona ebatana etibaha,
“Maea kiꞌa mai haia poꞌo aubana,
au oi nahina beniꞌo.
Miori aonai mokarahi,
naia aꞌi kototo mue.”
26 Auba kiꞌa obona eio,
miori ebaꞌururu kiꞌana,
ba ia ekarahi,
miori enoti matoha eꞌari,
maearima teꞌabi miori aba eꞌari baihana.
27 ꞌA Iesu miori imanai eaꞌi eberi taeana,
beronai emikiri ekoroti.
28 Ia itu aonai tekatoto,
iꞌabana haukia bunianai tebakaina tetibaha,
“Taba buonai ai auba katauꞌu ahina hanona aꞌi etainamai?”
29 Ia ehina benakia etibaha,
“Taba nahomakia iuꞌu ahikia taearana ha ahaꞌi,
bahubaꞌari mo ikupaiana.”
Iesu Ena ꞌAri Pouna Ehina Muena.
30 Iesu iꞌabana haukia kipokia ꞌeka weiana tehabona,
Galilea hanonai tekabanai.
Aꞌi enuatae hau ha keꞌiobina ia hanona aeꞌeai,
Mareko 9.30-50
31 pokina iꞌabana haukia nibaꞌiobinakia,
ehina benakia etibaha,
“Hau ha au Maearima Nahuna kehinahina ainaꞌu maearima imakiai keutanaꞌu,
kateahu ꞌarinaꞌu.
ꞌA beraura ibaihaunai au hanona kamikiri mue.”
32 ꞌA ia hanona aꞌi teꞌiobina taba eꞌuahina abonamo katebakaina hanona tetaꞌu.
Tai keapaꞌua?
33 Kaperanauma aiaranai tekaraꞌau,
itu aonai Iesu iꞌabana haukia ebakainakia etibaha,
“Bariu taearai hamai hanona taba tobaihara taeaina?”
34 Ia aꞌi teꞌabi,
pokina taearai temai hanona tai atana keapaꞌua hauna tebaihara taeaina.
35 Iesu emiati,
iꞌabana haukia harau haea rua eaparinakia,
ehina benakia etibaha,
“Tai nenuatae keꞌuai hauna,
ia kipona muri ꞌakinai kehorotina abomo maearima ikoikiai ekia taꞌara iaꞌina haunai keao.”
36 Weiana Iesu miori papana ha eaꞌina wairakiai ebakorotina huanai eaꞌi ba ehina benakia etibaha,
37 “Hau ha au ataꞌu ai miori papana ṉa homana niaꞌi taeana hauna au aboꞌumo niaꞌi taeanaꞌu,
au niaꞌi taeanaꞌu hauna hanona au mo ikupaiaꞌu ahaꞌi,
ia euhunaꞌu Tiramana abomo niaꞌi taeana.”
Aꞌi Niꞌoatanaka Hauna Aika ꞌAbaka.
38 Ioane ehore ehina bena etibaha,
“Baꞌiobi haumu e,
hau ha taihana,
atamuai auba kiꞌa obokia euꞌu ahinakia,
ai tahore tahina bena kebapuana,
pokina ia hanona aika ꞌabaka ahaꞌi.”
39 Iesu ehina benakia etibaha,
“Aꞌi patokaiabuna,
pokina au ataꞌuai hiabu akakia nibabai hauna,
muriai au ataꞌu aꞌi keaꞌi kiꞌana.
40 Pokina aꞌi niꞌoatanaka hauna hanona aika ꞌabaka.
41 ꞌAbi tohana mo au wai nahina benimi.
Ataꞌuai hau ha bei ꞌaki ꞌereai kebenimi katoinu pokina wai hana Keriso ꞌeuna,
hau weiana hanona mai ꞌarana.
Baihobo Kebabaina Hauna Herenai Kekiꞌa Wairai.
42 “Tai au tiaꞌikakaumanaꞌu miorikia ha kebabehona hauna hanona iata rarina ꞌakina ha ꞌakonai patetoba ꞌauna patekapo uhuna ꞌakuai hanona ma enamo ba Tirama ena puma kebaibeni hauna.
43 Imamu kebabehoniꞌo raninai,
kokabe obona,
imamu hamonai mauri namona aonai kototo,
ba aꞌi enamo imamu ruai koao iruba aꞌi niꞌao ꞌapua ꞌekana.
44 ꞌEka weiana ꞌerauꞌeraukia maearima tiani haukia hanona aꞌi tiꞌari ꞌapua,
abomo irubana aꞌi niꞌao ꞌapua.
45 Aemu kebabehoniꞌo raninai,
kokabe obona,
aemu hamonai mauri namona aonai kototo,
ba aꞌi enamo aemu rua namokiai iruba ꞌekanai katekapo totoniꞌo.
46 ꞌEka weiana ꞌerauꞌeraukia maearima tiani haukia hanona aꞌi tiꞌari ꞌapua,
abomo irubana aꞌi niꞌao ꞌapua.
47 Mahamu kebabehoniꞌo raninai,
koꞌipahina,
mahamu hamonai Tirama ena obia aiaranai kototo ba aꞌi enamo mahamu rua namokiai iruba ꞌekanai katekapo totoniꞌo.
48 ꞌEka weiana ꞌerauꞌeraukia maearima tiani haukia hanona aꞌi tiꞌari ꞌapua,
abomo irubana aꞌi niꞌao ꞌapua.
49 “Weiana puma iruba ꞌabana kehore maearima ikoikiai kebahaiara banainakia matoha kikimaru ai tekapanakia ꞌabana.
50 “Kikimaru hanona taba namona,
ꞌa kikimaru aꞌi keꞌakuꞌaku hanona ibaꞌaku muena taearana ahaꞌi.
Wai hanona uahomanai aꞌi katoao,
ia kikimaru katoaꞌina baiatamiai,
katomiaho oioi mai baibuami.”