Iesu Ihana Ehaeai.
17
Wapu ꞌabaihau murinai Iesu ehore Petero mai Iakobo hatina Ioane ohi ia ikupaiakia mo eꞌuaiainakia oeo apaꞌuana ha ai tekaraꞌau.
2 Ba weia ia wairakiai Iesu ihana ehaeai,
wairana ea obo matoha beraura ꞌabana abomo ena habuni tepore kiꞌa teꞌimare ꞌimare.
The Transfiguration (Mataio 17:1-13)
3 Mawaꞌeai Mose mai Elia tewaira tina ia wairakiai,
Iesu kipokia teꞌabi ꞌabi.
4 Ba Petero Iesu ehinabena etibaha,
“Obiapaka e,
aika neia nahamiaho hanona enamo,
oi konuatae raninai au iꞌaua aihau kababainakia ha oi ꞌeumu ha Mose ꞌeuna ha Elia ꞌeuna.”
5 Petero niꞌabi ohomo aonai,
ꞌauhao pore obona emai ebahu abunakia,
ba aia ha ꞌauhao aonai emai eꞌabi etibaha,
“Naiana hanona au nahaꞌu,
eꞌu raonaꞌau,
au ia naonamoaina,
aiana katona.”
6 Iꞌabana haukia aia weiana teona raninai teꞌeho ꞌanoai teꞌumuti,
tetaꞌu wairai.
7 ꞌA Iesu ekaꞌa emai herekia,
eaꞌi ꞌapuanakia eꞌabi etibaha,
“Aꞌi katotaꞌu,
tomomikiri.”
8 Ba ia teaꞌa taea hanona tai aꞌi teihana ia Iesu mo ikupaiana.
9 Oeoai teriri raninai Iesu eharabunakia etibaha,
“Taba toihana hauna hau ha haianai aꞌi katoꞌabi keaomo au maearima nahuna ꞌariai kamikiri mue.”
10 Ba iꞌabana haukia tebakaina tetibaha,
“Taba buonai rauhubu poki haukia tiꞌabi Elia hanona kemai ꞌuai?”
11 Iesu ekia ꞌabi ebamuena etibaha,
“ꞌAbi tohana,
Elia hanona kemai haeamona taba kehorehore harainakia.
12 Ia au wai nahina benimi,
Elia hanona aba emai,
maearima ia aꞌi teiha ꞌiobiaina ia herenai ekia nuatae akakia tebabainakia,
ihobona uahomanai au maearima nahuna hauꞌu ua katebahaiara aiho.”
13 Ba iꞌabana haukia obona teobo,
ia hanona Ioane baꞌuere robe hauna robana eahuna.
Iesu Miori Ha Aonai Auba Kiꞌa Obona Euꞌu Ahina.
14 Weiana temue toꞌu haukia herekiai tekaraꞌau raninai,
hau ha emai Iesu wairanai ekaipehu eꞌabi etibaha,
15 “Obiapaka e,
Nahaꞌu moaokoꞌoaina pokina ia hanona nawa niꞌariaina ena haiara eapaꞌua,
rani baika kipona iruba ai nenoꞌau ꞌao beiai nitobu.
16 Amaiaina iꞌabamu haukia herekia,
katebanamona hanona aꞌi etainakia.”
17 Iesu ehinabenakia etibaha,
“Aꞌikakauma ahaꞌi mai haia poꞌo uruna haumi,
heremiai kabapahihi kamiaho keaomo aita?
Miori tomaiaina hereꞌu.”
18 Iesu auba kiꞌa obona ebatana,
ba auba kiꞌa obona miori aonai ekarahi,
miori beronai enamo.
19 Weiana murinai iꞌabana haukia bunianai teao Iesu tebakaina tetibaha,
“Aehoma buonai ai auba kiꞌa obokia katauꞌu ahina hanona aꞌi etainamai?”
20 Iesu ekia ꞌabi ebamuena etibaha,
“Pokina emi aꞌikakauma tekoꞌikoꞌi ꞌaki.
ꞌAbi tohana au wai nahina benimi,
emi aꞌikakauma petuaba uhona ꞌabana raninai,
oeo neiana pohinabena,
‘Moibiu moao weia’ hanona beronai peibiu peao,
taba ha heremi aꞌi kepahihi kiꞌa baha.
21 Ia taba nahomakia hanona kipokia aꞌi katekarahi ꞌapua,
ia mo bahubaꞌari ai mai ani robeai hanona katekarahi.”
Iesu Ena ꞌAri Pouna Ehina Muena.
22 Iꞌabana haukia ikoikiai temai Galileai tebahamomo,
ba Iesu ehina benakia etibaha,
“Au maearima Nahuna hanona ihina hinai kaeao ba kateahuꞌarinaꞌu,
23 ia wapu ibaihaunai Tirama kebamikiri muenaꞌu kamauri mauri.”
Weiana teona raninai iꞌabana haukia aokia eaokoꞌo.
Iesu Petero Ohi Marea Monina Tebaibeni.
24 Iesu mai iꞌabana haukia teao Kaperanaumai tekaraꞌau raninai,
marea robe takitina tibararo haukia temai Petero herena tebakaina tetibaha,
“Emi poki hauna Marea Robe takitina nibaibeni?”
25 Petero eꞌabi etibaha,
“ꞌE,
nibaibeni.”
Ba Petero eao itu aonai etoto aꞌi niꞌabi baha aonai,
Iesu Petero ebakaina etibaha,
“Simona e,
oi taba ṉa nuho?
Hanopaka obiakia hanona nahukia herekiai takiti tiaꞌi ꞌao maearima haeai herekiai tiaꞌi?”
26 Petero eꞌabi etibaha,
“Maearima haeai herekiai tiaꞌi.”
Iesu etibaha,
“Oꞌabi harai,
weiana nahukia hanona takiti aꞌi katehoroti.
27 Ia maearima neiakia aokia aꞌi hamaba opuerenakia paunai,
moao obuai monaku,
maia koberiꞌau ꞌuaina hauna pinana kohaokauna aonai moni kotabu ahina,
koaꞌina kobenakia hararua eka takiti ꞌarana.”