—Ni̱jme‑jìn xi chꞌàtje̱n‑ngi‑lao̱o yao‑no xi ya̱ koa̱n‑chjén‑no ya̱ yandia̱a,

ni̱ yánise‑jìn,

ni̱ xijtsa‑jìn,

ni̱ nio̱xtìla̱‑jìn,

ni̱ tao̱n‑jìn;

ni̱ jaò‑jìn chi̱nga chꞌaò.

4 Kꞌoa̱ to̱jña‑nile̱ ndꞌia xi koi̱tjásꞌao̱on,

ya̱ ti̱yo,

kꞌoa̱ ya̱a tìtjo̱‑nio nga koan‑ngión jña xìn ꞌnde.

5 Kꞌoa̱ to̱jña‑ni nga tsì skoétjaò‑no chjo̱ta̱,

tìtjo̱‑nio ya̱ na̱xi̱nandá‑nꞌión,

kꞌoa̱ tꞌètsaojnao chaoꞌnde‑le̱ ndso̱ko,

nga koiì jè choa̱‑le̱ nga kàbꞌasjengi‑no.

6 Kꞌoa̱ kitjo,

tsakꞌèmasòn ngakijndà na̱xi̱nandá‑ꞌndí,

nga kinchja̱ya én nda‑le̱ Jesucristo,

kꞌoa̱ kisindaya chjo̱ta̱ xi chꞌin tjín‑le̱ ngakijndà ꞌnde.

7 Herodes Antipas,

jè chjo̱ta̱xá xi tíbatéxoma ꞌnde Galilea,

kinchrꞌoé ngayije kjoa̱ xi tísꞌín Jesús;

kꞌoa̱ nꞌión kisikjájon‑le̱ yao‑le̱,

nga̱ tjín kꞌa chjo̱ta̱ xi kitsò:

“Jé Juan xi jaꞌáyajin‑nile̱ kꞌen”;

8 tjín kꞌa xi kitsò:

“Jè‑ní Elías xi kinchja̱ya ngajao‑le̱ Niná nga ni̱chrjin jchá xi kàfaꞌai”;

kꞌoa̱ tjín kꞌa xi kitsò:

“Jngoò‑la̱ chjo̱ta̱ xi kinchja̱ya ngajao‑le̱ Niná nga ni̱chrjin jchá kàfaꞌáya‑nile̱”.

9 Kꞌoa̱ Herodes Antipas kitsò:

—Aàn tsakꞌénè nga tsakichàsin Juan;

to̱nga ꞌyá‑ni tsòkꞌoa̱ jè chjo̱ta̱ xo̱kji,

xo̱ síkji kjoa̱ tìnchrꞌoe tꞌatsꞌe̱.

Kꞌoa̱ tsakásjai jókoa̱n‑ni nga skoe̱ Jesús.

10 Kꞌia̱ nga jaꞌai‑ni jè chjo̱ta̱ xi xá kisikasén‑ni Jesús,

kitsòya‑le̱ ngayije jme xi kisꞌin.

Kꞌia̱ kikao̱tꞌaxìn ya̱ jngo ꞌnde tꞌaxìn‑tꞌa ya̱ chrian na̱xi̱nandá‑nꞌión Betsaida.

11 Kꞌoa̱ kꞌia̱ nga kisꞌejin‑le̱ chjo̱ta̱‑nkjìn,

kitje̱n‑ngi‑le̱ Jesús;

kꞌoa̱ jè kiskoétjaò,

kꞌoa̱ tsakjákao̱ xi tꞌatsꞌe̱ jña batéxoma Niná,

kꞌoa̱ kisindaya jè xi machjén‑le̱ nga koa̱n‑ndaya.

12 To̱nga jeè kjimaxòn;

kꞌoa̱ jè chjo̱ta̱‑le̱ xi tejaò xi xá kiskoéjin‑ni Jesús,

tsakinchabꞌàkjátꞌa‑le̱ Jesús,

kitsò‑le̱:

—Kꞌoa̱tꞌìn‑lai̱ jè chjo̱ta̱‑nkjìn nga kàtafì ya̱ na̱xi̱nandá‑ꞌndí kao̱ ya̱ ꞌnde jña kjio choa ndꞌia,

jmé‑ni nga ya̱ kàtabatiò‑ni kꞌoa̱ kàtabajngi xi koa̱kje̱n;

nga̱ i̱ jña tiyoaà ꞌnde tꞌaxìn‑tꞌaà.

13 Jesús kitsò‑le̱:

—Jòn tꞌaì‑lao̱o xi koa̱kje̱n‑ni.

Kꞌoa̱ jè chjo̱ta̱ xi tejaò kitsò:

—Lìjme xi tjín‑naji̱n to̱ aòn nio̱xtìla̱ kꞌoa̱ to̱ jaò jti̱ tjió‑naji̱n,

to̱kꞌia̱‑jìn tsà ji̱n koangín ki̱ndá‑lai̱ji̱n xi koa̱kje̱n‑ni ngatsꞌi chjo̱ta̱‑nkjìn xo̱chon.

14 Kꞌoa̱ aòn‑la̱ jmi ma‑ni xi to̱ chjo̱ta̱ xꞌi̱n.

Kꞌia̱ Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:

—Xki̱ jtín ti̱katió,

ñachàn‑te ñachàn‑te ti̱katió‑nio.

15 Kꞌoa̱ jè,

kꞌoa̱asꞌìn kisikatió ngatsꞌi.

16 Kꞌoa̱ Jesús kiskoé nio̱xtìla̱ xi aòn kao̱ jti̱ xi jaò,

kiskòtsen ngꞌà,

kitsjoa‑le̱ kjoa̱nda Niná,

kꞌoa̱ kisixkoa̱,

kꞌoa̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱ jmè‑ni nga kàtasíkꞌabí‑nile̱ chjo̱ta̱‑nkjìn.

17 Kꞌoa̱ tsakjèn ngatsꞌi chjo̱ta̱‑nkjìn kꞌoa̱ koanski;

kꞌoa̱ jè chjo̱ta̱ xi kòtꞌayàtꞌa‑le̱ Jesús tsakꞌéxkó xi kinjèn‑ngi,

tejaò ni̱si̱nyá koan xkoa̱‑le̱.

18 Kꞌoa̱koan kꞌia̱ nga Jesús tífákao̱tꞌaxìn Niná,

ya̱ tjiókao̱ chjo̱ta̱ xi ya̱ kòtꞌayàtꞌa‑le̱;

kꞌoa̱ kiskònangi‑le̱,

kitsò:

—Jótsò chjo̱ta̱ ꞌyá‑nia an.

19 Kꞌia̱ jè kinchja̱,

kitsò:

—Tjín kꞌa xi tsò nga ji xoí Juan xi kiskanìsꞌen‑ngindá;

kꞌoa̱ tjín kꞌa xi tsò nga ji xoí Elías;

kꞌoa̱ tjín kꞌa sa xi tsò nga ji xoí jngo chjo̱ta̱ xi kinchja̱ya ngajao‑le̱ Niná ni̱chrjin jchá,

xi jaꞌáyajin‑nile̱ kꞌen.

20 Jesús kitsò‑le̱:

—Kꞌoa̱ jòn,

jó bixón,

ꞌyá‑nia an.

Kꞌia̱ kinchja̱ Pedro,

kitsò:

—Ji‑ní Jè Xi Niná Kisikasén.

21 To̱nga Jesús tsakꞌénè‑le̱ chjo̱ta̱ xi ya̱ kòtꞌayàtꞌa‑le̱ nga ni̱ꞌya‑jìn xi kàtatsòya‑le̱ nga jè‑ní Jè Xi Niná Kisikasén,

kꞌoa̱ ñaki nꞌión tsakꞌétꞌain‑le̱

22 kꞌoa̱ kitsò:

—Machjén nga nkjìn jko̱ya kjoa̱ñꞌain kjoa̱ꞌà jè ꞌNdí‑le̱ Chjo̱ta̱,

nga jè chjo̱ta̱ jchínga kao̱ jè na̱ꞌmi xi tjió títjòn‑le̱ na̱ꞌmi kꞌoa̱ kao̱ chjo̱ta̱ xi kji kjoa̱téxoma‑le̱ Niná xi kiski Moisés kꞌoa̱sjengi,

kꞌoa̱ nga ni̱kꞌen,

kꞌoa̱ nga kjoa̱ꞌáyajin‑nile̱ kꞌen nga koa̱n jàn‑ni ni̱chrjin.

23 Kꞌia̱ kitsò‑le̱ ngatsꞌi:

—Tsà ꞌya‑ni xi me‑le̱ nga an koi̱nchroatje̱n‑ngi‑na,

alì ti̱jè‑jìn batéxoma‑nìle̱ yao‑le̱,

kꞌoa̱ kàtabꞌé‑kon ni̱chrjin nga nchaon ni̱nga krò kàtanìkꞌen‑tꞌa,

kꞌoa̱ katanchroátje̱n‑ngi‑na.

24 Nga̱ to̱ꞌya‑ni xi me‑le̱ nga kꞌoa̱sjentjaì kjoa̱bijnachon‑le̱,

to̱saà si̱icha;

kꞌoa̱ to̱ꞌya‑ni xi si̱icha kjoa̱bijnachon‑le̱ xi to̱ tꞌatsꞌa̱n,

jé xi kꞌoa̱sjentjaì kjoa̱bijnachon‑le̱.

25 Nga̱ jmé xi sꞌi̱in‑ni chjo̱ta̱ ni̱nga koi̱njen‑le̱ ngayije jme xi tjín i̱ soꞌnde,

kꞌoa̱ tsà koi̱xo̱ya‑ni axo̱ si̱icha‑ni kjoa̱bijnachon‑le̱.

26 Nga̱ jè xi koa̱nsoa‑le̱ xi tꞌatsꞌa̱n kao̱ tꞌatsꞌe̱ én‑na̱,

jè ꞌNdí‑le̱ Chjo̱ta̱ kꞌoa̱ati̱ koa̱nsoa‑le̱ xi tꞌatsꞌe̱ kꞌia̱ nga kjoa̱ꞌaí kao̱ kjoa̱jeya‑le̱,

kꞌoa̱ kao̱ kjoa̱jeya‑le̱ Nꞌai‑le̱,

kꞌoa̱ kao̱ ngatsꞌi cho̱ꞌnda ngꞌajmi xi xá kiskoétꞌaxìn‑ni Niná.

27 To̱nga kìxi̱i xi xin‑no,

nga tjín kꞌa xi tjió i̱,

xi tsì koi̱yá jo saꞌnda nga skoe̱ jña batéxoma Niná.

28 Jin‑la̱ ni̱chrjin je jaꞌato kꞌia̱ nga je tsakjákao̱ én xo̱ tsò,

nga i̱ koan,

Jesús kikao̱tꞌaxìn Pedro,

Juan,

kao̱ Jacobo,

kimi ya̱ nindo nga kikjákao̱ Niná.

29 Kꞌoa̱ kia̱nga Jesús to̱jo tífàkao̱ sa Niná,

tsꞌantjaìya nkjaín,

kꞌoa̱ najño‑le̱ koan‑chroa kꞌoa̱ koan‑fate.

30 Kꞌoa̱ to̱ i̱i koan jaò chjo̱ta̱ koan‑tsen xi tjiófákao̱ Jesús,

chjo̱ta̱ xo̱kjoan jè‑ní Moisés kao̱ Elías;

31 xi koan‑tsen kao̱ jngo lꞌí xi nꞌión kisi‑isen jngotjondai‑le̱,

kꞌoa̱ koiì tjiófaóya‑ni kjoa̱biya‑le Jesús,

xi koai̱ síkitjosòn ya̱ Jerusalén.

32 Kꞌoa̱ Pedro kao̱ xi ya̱ ñatje̱n tjió nꞌión nijñá‑le̱;

to̱nga tsakatiòkòn,

tsabe jè kjoa̱jeya‑le̱ Jesús,

kꞌoa̱ nga jaò chjo̱ta̱ xi ya̱ tjiókao̱.

33 Kꞌoa̱koan kꞌia̱nga jè chjo̱ta̱ xi jaò tsakinchaxìn‑nile̱ Jesús,

Pedro kitsò‑le̱:

—Ji xi bakòyai,

jó to̱nda‑naji̱n nga i̱ tiyoi‑ji̱n;

kꞌoa̱ jàn xkójndà kꞌoéndai‑ji̱n,

jngo xi tsi̱,

jngo xi tsꞌe̱ Moisés,

kꞌoa̱ jngo xi tsꞌe̱ Elías.

Kꞌoa̱ Pedro lìkoi be jme xo̱ títsò‑le̱.

34 Ti̱kꞌia̱‑ni nga tínchja̱,

jaꞌai jngo yojbi xi tsakꞌéjtsanè;

kꞌoa̱ nꞌión kitsokjòn nga jaꞌasꞌenjin ya̱ yojbi.

35 Kꞌoa̱ jngo jta̱ kinòꞌyà‑le̱ ya̱ jin yojbi xi kitsò:

«Jé ꞌNdí‑na̱ xo̱kji,

nꞌión tsjoake̱;

jé xi ta̱sèño‑lao̱o».

36 Kꞌia̱ nga je kisꞌejñá jè jta̱ xi kinòꞌyà‑le̱,

jeè‑ni to̱jè Jesús tíjna;

kꞌoa̱ jè Pedro,

Juan kao̱ Jacobo jyó tsakatiò,

kꞌia̱ nga koi ni̱chrjin lìꞌya xi kitsòya‑le̱ jme xi tsabe.

37 Kꞌia̱ nga koan‑nchaon‑ni,

nga kinchroajen‑ni ya̱ nindo Jesús,

Pedro,

Juan kao̱ Jacobo,

nꞌión nkjìn ma chjo̱ta̱ xi kikꞌáyandia̱a.

38 Kꞌoa̱ to̱ i̱i koan,

nꞌión kinchja̱ jngo chjo̱ta̱ xi ya̱ tje̱njin‑le̱ chjo̱ta̱‑nkjìn,

kitsò:

—Ji xi bakòyai,

bꞌetsꞌoaà‑lè nga chótsen‑lai̱ jè ꞌndí‑na̱,

nga̱ to̱ kꞌoa̱tjín jngo ma‑ni;

39 kꞌoa̱ kꞌoa̱ama nga jngo sén ni̱chrjin xi tsꞌe̱ nai̱i faꞌasꞌenjin‑le̱,

kꞌoa̱ to̱ i̱i ma nga kjindiáxá,

kao̱ kjoa̱tsꞌe̱n bꞌétsaojneyà‑ni kꞌoa̱ ndáxó bꞌasje tsꞌoa,

kꞌoa̱ nꞌión síkìꞌaon kꞌoa̱ to̱ ꞌyaà basènxìn‑nile̱.

40 Kꞌoa̱ nꞌión kàsijé‑le̱ jè chjo̱ta̱ xi kòtꞌayàtꞌa‑lì nga kàtamꞌaonsjejin‑le̱,

kꞌoa̱ lìkoi kàma‑le̱.

41 Kꞌia̱ kinchja̱ Jesús kitsò:

—¡Jòn chjo̱ta̱ xi tsì makjaín‑no,

kꞌoa̱ xi nꞌión chꞌao kjoaon!

Kꞌiá saꞌnda nga i̱ koàte̱jnakao̱‑no,

kꞌoa̱ nga ska̱‑na xi tꞌatsao̱on.

Nchroákoai̱ i̱ jè ti‑li̱.

42 Kꞌoa̱ kꞌia̱ nga tínchroá chrian jè ti,

jè sén ni̱chrjin xi tsꞌe̱ nai̱i kisikꞌatje̱n‑tꞌa nangi,

kꞌoa̱ nꞌión tsakꞌétsaojne;

to̱nga Jesús kinchja̱tikao̱ jè sén ni̱chrjin xi tsì nda,

kꞌoa̱ kisindaya jè ti,

kꞌoa̱ kꞌia̱ kisintsja ngìndia‑ni nꞌai‑le̱.

43 Kꞌoa̱ ngatsꞌi to̱kꞌoa̱a koan‑le̱ tꞌatsꞌe̱ nganꞌión‑le̱ Niná.

44 —Tꞌènè‑lao̱o yao‑no nga nda kàtafaꞌasꞌen xo̱ñoò jè én jè;

nga̱ kꞌoa̱akoa̱n nga jè ꞌNdí‑le̱ Chjo̱ta̱ ya̱a koa̱ntsjatꞌa chjo̱ta̱ xi tike.

45 To̱nga jè chjo̱ta̱ xi ya̱ kòtꞌayàtꞌa‑le̱ lìkoi koan‑cho̱ya‑le̱ én jè,

nga̱ kisꞌeꞌmaà‑le̱ jmé‑ni nga tsì koa̱n‑cho̱ya‑nile̱,

kꞌoa̱ lìkoi koan‑nꞌión kon nga kiskònangi‑le̱ tꞌatsꞌe̱ én jè.

46 Kꞌia̱ tsakjaótiya‑ni jè chjo̱ta̱ xi ya̱ kòtꞌayatꞌa‑le̱,

ꞌyá‑ni xi koa̱se̱n‑jna títjòn.

47 Kꞌoa̱ Jesús tsabe kjoa̱faꞌaitsjen xi tjín ya̱ jin ni̱ma̱‑le̱,

kiskoé jngo ti ꞌndí kꞌoa̱ ya̱ kisikasén‑tꞌale̱ yao‑le̱,

48 kꞌoa̱ kitsò‑le̱:

—To̱ꞌya‑ni xi tꞌatsꞌa̱n skoétjaò ti ꞌndí xo̱kji,

aàn xi koétjaò‑na;

kꞌoa̱ to̱ꞌya‑ni xi kjoétjaò‑na an,

jé kjoétjaò jè xi kisikasén‑na;

nga̱ jè xi ngìsa̱ nangi tíjna xi ya̱ tíjnajin‑no,

jé xi ngìsa̱ ngꞌa tíjna.

49 Kꞌoa̱ kꞌia̱ kinchja̱ Juan,

kitsò:

—Ji xi bakòyai,

jngo chjo̱ta̱ tsaꞌyai‑ji̱n xi kao̱ nganꞌión‑le̱ jaꞌaín‑li̱ mꞌaosjejin‑ni sén ni̱chrjin xi tsꞌe̱ nai̱i;

kꞌoa̱ tsakꞌèchjoà‑lai̱ji̱n,

nga̱ tsì tsà i̱ tsòꞌbakao̱‑ná.

50 Jesús kitsò‑le̱:

—Alì bꞌèchjoàjìn‑lao̱o;

nga̱ jè xi tsì chꞌao fìkao̱‑ná tꞌatsꞌa̱an tíjna.

51 Kꞌia̱nga je kichò ni̱chrjin nga tjoémi ya̱ ngꞌá Jesús,

kiskoé kjoa̱nꞌión‑tokòn nga koai̱ ya̱ Jerusalén.

52 Kꞌoa̱ kisikasén chjo̱ta̱ xi ki títjòn‑le̱,

jè chjo̱ta̱ xo̱kjoan ki kꞌoa̱ jaꞌasꞌen jngo na̱xi̱nandá‑ꞌndí xi ꞌnde Samaria nchja̱‑ni,

jmé‑ni nga koa̱tiònda‑nile̱ xi koa̱n‑chjén‑le̱.

53 To̱nga jè chjo̱ta̱ xi ya̱ tsꞌe̱ lìkoi kiskoétjaò Jesús,

nga̱ tseèn kji nga ya̱ Jerusalén tífì.

54 Kꞌia̱nga Jacobo kao̱ Juan chjo̱ta̱ xi ya̱ kòtꞌayàtꞌa‑le̱ Jesús tsabe kjoa̱ jè,

kitsò:

—Nai,

a meè‑lì nga si̱jaí‑ji̱n nga kàtanchroájen‑ni lꞌí ya̱ ngꞌajmi jo kisꞌin Elías,

kꞌoa̱ kàtasíkjesòn chjo̱ta̱ xo̱kjoan.^a

55 Kꞌia̱ Jesús kisikꞌófaya,

kinchja̱ti‑kao̱,

kitsò‑le̱:

—Jòn lìkoi bakìn‑no nga kꞌoa̱sꞌìn koi̱nókjoa̱o;

56 nga̱ jè ꞌNdí‑le̱ Chjo̱ta̱ lìtsà koi‑jìn xá jaꞌai‑ni nga chjo̱ta̱ si̱ikꞌen,

to̱sa̱a koi nga kꞌoasjentjaì chjo̱ta̱.

Kꞌoa̱ ki ngatsꞌi jña xìn na̱xi̱nandá‑ꞌndí.

57 Kꞌia̱ nga tjiófì Jesús kao̱ chjo̱ta̱ xi ya̱ kòtꞌayatꞌa‑le̱,

jngo chjo̱ta̱ kitsò‑le̱ Jesús ya̱ yandia̱a:

—Nai,

kꞌoamjen‑tje̱n‑ngiì‑lè to̱jña‑ni nga koi̱tòmjain.

58 Kꞌoa̱ Jesús kitsò‑le̱:

—Jè ni̱nda̱ tjín‑le̱ ngijao,

kꞌoa̱ jè ni̱se tjín‑le̱ tjé,

to̱nga jè ꞌNdí‑le̱ Chjo̱ta̱ tsìn‑le̱ jña‑ni nga síkꞌéjnamitꞌa jko̱.

59 Kꞌoa̱ Jesús kitsò‑le̱ xi kja̱ꞌaí:

—Nchroátje̱n‑ngi‑naí.

Jè kitsò:

—Nai,

tꞌai̱ꞌnde‑naí nga títjòn kjoíkꞌeñe nꞌai‑na̱.

60 Jesús kitsò‑le̱:

—Tꞌaiꞌnde‑lai̱ kꞌen nga kàtabꞌéñe kꞌen‑le̱;

kꞌoa̱ ji,

tꞌin,

kꞌoa̱ ti̱nòkjoa̱yai én xi tsꞌe̱ jña batéxoma Niná.

61 Kꞌoa̱ kꞌia̱ kꞌoa̱ti̱ kitsò ngìjngo:

—Kjoítje̱n‑ngiìlè Nai;

to̱nga tꞌaìꞌnde‑naí nga títjòn‑jalà kjoísixan‑tꞌa jè xi tjió ya̱ ndꞌia‑na̱.^b

62 Kꞌoa̱ Jesús kitsò‑le̱:

—Jngo xi tsoanꞌión yá‑le̱ ki̱cha̱ xi bakján nangi xi kjenꞌndó nchra̱ja̱,

xi yátsꞌi̱n kòtsen‑ni,

lìkoi koa̱n‑chjén xá‑le̱ ya̱ jña batéxoma Niná.