—ꞌYá‑ni xi ngìsa̱ títjòn tíjna ya̱ jña batéxoma jè xi tíjna ya̱ ngꞌajmi.

2 Kꞌoa̱ Jesús kinchja̱bꞌàkjá jngo‑le̱ ti ꞌndí,

kꞌoa̱ ya̱ kisikasénjna ngabasen‑le̱ jña tjió,

3 kꞌoa̱ kitsò:

—Ñaki kìxi̱i xi xin‑no,

tsà tsì kꞌoa̱ntjaìyao,

nga kꞌoa̱ koa̱kjoaon jokjoan jè xti ꞌndí,

lìkoi koa̱n koi̱tjásꞌao̱on ya̱ jña batéxoma jè xi tíjna ya̱ ngꞌajmi.

4 Kꞌoa̱a ma‑ni,

nga to̱ꞌya‑ni xi nangi síkꞌéjna yao‑le̱ joni jè ti ꞌndí xo̱kji,

jè‑ní xi ngìsa̱ títjòn tíjna ya̱ jña batéxoma jè xi tíjna ya̱ ngꞌajmi.

5 Kꞌoa̱ to̱ꞌya‑ni xi tꞌatsꞌa̱n kjoétjaò jngo ti ꞌndí,

joni tsà jè xo̱kji,

aàn xi kjoétjaò‑na.

6 »Kꞌoa̱ to̱ꞌya‑ni xi si̱ikajngijé jè xi kꞌoa̱kjoan jokjoan jè xti ꞌndí xo̱kjoan xi makjaín‑le̱ tꞌatsꞌa̱n,

to̱ ngìsa̱a nda‑nile̱ tsà jngo natsí sꞌe̱tꞌanꞌión‑ngi yásin kꞌoa̱ si̱kꞌatje̱n‑ngindá ya̱ jña nꞌión na̱nga̱ jin ndáchikon.

7 ¡Ma̱xó‑nile̱ yao‑le̱ chjo̱ta̱ soꞌnde!,

nga̱ xá to̱ tjín‑ni kjoa̱ xi síkajngijé chjo̱ta̱,

to̱nga ¡ma̱xó‑nile̱ yao‑le̱ jè chjo̱ta̱ xi síkajngijé xikꞌa!

8 »Koiì kjoa̱,

tsà ndsai̱ axo̱ ndso̱koi xi síkajngijé‑lì,

ti̱chátꞌai kꞌoa̱ ti̱kꞌatjai̱n;

ngìsa̱a nda‑ni nga koi̱tjásꞌai̱n ya̱ jña tjín kjoa̱bijnachon xi tsìkꞌia fetꞌa ni̱nga chi̱ꞌngétꞌa axo̱ tsà kotontsja tìsoiì,

ti̱kꞌoa̱‑ni tsà tjió ngajaò ndsai̱ axo̱ ngajaò ndso̱koi nga si̱kꞌatje̱njin‑lì ya̱ lꞌí xi tsìkꞌia bitsꞌao.

9 Kꞌoa̱ tsà jè xkoin xi síkajngijé‑lì,

chꞌa̱sjai kꞌoa̱ ti̱kꞌatjai̱n;

ngìsa̱a nda‑ni tsà to̱ jngo ma xkoin kꞌia̱ nga koi̱tjásꞌai̱n ya̱ jña tjín kjoa̱bijnachon xi tsìkꞌia fetꞌa,

ti̱kꞌoa̱‑ni tsà tjió ngajaò xkoin kꞌia̱ nga si̱kꞌatje̱njin‑lì ya̱ lꞌí xi tsìkꞌia bitsꞌao.

10 »Ti̱koìndao̱o yao‑no,

alì chꞌàsjengi‑jiòn jè xi kꞌoa̱kjoan jokjoan xti ꞌndí xo̱kjoan;

nga̱ kꞌoa̱axin‑no nga jè cho̱ꞌnda ngꞌajmi xi síkoìnda̱,

ya̱a tjió ngantsjaì ya̱ ngixko̱n Nꞌai‑na̱ xi tíjna ya̱ ngꞌajmi.

11 Nga̱ jè ꞌNdí‑le̱ Chjo̱ta̱ koiì xá jaꞌai‑ni nga kꞌoa̱sjentjaì chjo̱ta̱ xi kjin tjió‑le̱ Niná.

12 »Jó bixón.

Tsà jngo chjo̱ta̱ xi jngo ciento̱ barrè tjín‑le̱,

kꞌoa̱ tsà jngo barrè‑le̱ xi xìn ndia̱a koai̱,

a tsí tsà si̱ikatió jè xi ñokan kao̱ chrjaꞌaòn‑ño kꞌoa̱ koai̱ ngakijndà nindo nga koai̱kásjai jè xi xìn ndia̱a ki.

13 Kꞌoa̱ tsà koa̱nsjai‑le̱,

ñaki kìxi̱i xi xin‑no,

nga ngìsa̱ koa̱n‑tsjoa‑le̱ xi tꞌatsꞌe̱ xi jngo,

xi xìn ndia̱a ki tsàkai ti̱kꞌoa̱‑ni tꞌatsꞌe̱ jè xi ñokan kao̱ chrjaꞌaòn‑ño xi tsì tsà xìn ndia̱a ki.

14 Kꞌoa̱ati̱ lìkoi me‑le̱ jè Nꞌai‑no xi tíjna ya̱ ngꞌajmi,

nga jngo kàtacha jè xi kꞌoa̱kjoan jokjoan jè xti ꞌndí xo̱kjoan.

15 »Koiì kjoa̱ tsà ndsꞌai bajngijé xi tꞌatsi̱,

tꞌin‑chón‑lai̱ ya̱ ndꞌia‑le̱ kꞌoa̱ ti̱chákjáya‑lai̱,

kꞌia̱ nga to̱ jòn ngajaò tiyo,

kꞌoa̱tꞌìn‑lai̱ nga chꞌao tísꞌín,

kꞌoa̱ tsà koi̱nchrꞌoé‑lì,

jeè kànìkinjain ndsꞌai.

16 To̱nga tsà tsì koa̱sènño‑lì,

to̱jo ti̱nókjoa̱‑lai̱ tsà jngo axo̱ jaò chjo̱ta̱,

jmé‑ni nga jaò axo̱ jàn chjo̱ta̱ xi tsjoá‑ni én‑le̱ nga kjoa̱kìxi̱ xi tiꞌmì‑lai̱.^a

17 Tsà tsì koi̱nchrꞌoé‑le̱ tsànda jè chjo̱ta̱ xo̱kjoan,

tꞌìnya‑lai̱ jè ndsꞌai xi ya̱ ñatje̱n biyoxkó;

kꞌoa̱ tsà tsì koi̱nchrꞌoé‑le̱ jè ndsꞌai xi ya̱ ñatje̱n biyoxkó,

to̱ kꞌoa̱sꞌìn jcha̱tokoìn joni tsà jngo chjo̱ta̱ xi tsì makjaín‑le̱,

kꞌoa̱ joni tsà jngo chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma.

18 »Ñaki kìxi̱i xi xin‑no nga ngayije jme kjoa̱ xi tsì kꞌoai̱ꞌnde‑lao̱o chjo̱ta̱ i̱ soꞌnde,

kꞌoa̱ati̱ tsì tjóꞌnde‑le̱ ya̱ ngꞌajmi;

kꞌoa̱ ngayije jme kjoa̱ xi kꞌoai̱ꞌnde‑lao̱o chjo̱ta̱ i̱ soꞌnde kꞌoa̱ati̱ tjóꞌnde‑le̱ ya̱ ngꞌajmi.

19 »Ngìjngokꞌà kꞌoa̱xin‑no,

tsà jaò mao xi si̱ngósòn kjoa̱faꞌaitsjen‑no i̱ soꞌnde tꞌatsꞌe̱ to̱jme‑ni xi si̱jaó,

kꞌoa̱asꞌìn tsjoá‑no jè Nꞌai‑na̱ xi tíjna ya̱ ngꞌajmi.

20 Nga̱ ya̱ jña jaò axo̱ jàn chjo̱ta̱ tjiójtín xi tꞌatsꞌa̱n,

ya̱a tíjna̱jin basen‑le̱ an.

21 Kꞌia̱ Pedro tsakasèn bꞌàkjátꞌa‑le̱ Jesús,

kꞌoa̱ kitsò‑le̱:

—Nai,

jótjín kꞌa sichàtꞌa‑le̱ jè ndsꞌe xi koa̱jngijé tꞌatsꞌa̱n.

A saꞌnda ñatoò kꞌa.

22 Jesús kitsò‑le̱:

—Alì koi xín‑lè nga to̱ tje̱n ñato kꞌa,

to̱sa̱a saꞌnda ñato kꞌa nga jàn‑kan kao̱ te.

23 »Kꞌoa̱ koiì nga jña batéxoma jè xi tíjna ya̱ ngꞌajmi,

ya̱a mangósòn‑kao̱ jngo chjo̱ta̱xá ngajko̱ xi koanme‑le̱ nga kisikꞌéchjí tao̱n xi kjiotje̱n‑le̱ cho̱ꞌnda‑le̱.

24 Kꞌia̱ nga tíbꞌétsꞌia̱kao̱ nga tíbꞌasjengi jótjín tjín‑ni xi kjiotje̱n‑le̱ cho̱ꞌnda‑le̱,

jaꞌaichanìtꞌa jngo‑le̱ xi jàn‑kan millòn tao̱n chroa kitje̱n‑le̱.

25 Jè cho̱ꞌnda xo̱kji nga lìkoi koan tsakꞌéchjí jotjín xi kitje̱n‑le̱,

jè chjo̱ta̱xá ngajko̱ tsakꞌénè nga kàtasaténa cho̱ꞌnda xo̱kji kao̱ chjo̱on‑le̱,

xti‑le̱,

kꞌoa̱ kao̱ ngayije jmè xi tjín‑le̱,

jmé‑ni nga koa̱n si̱ikꞌéchjí‑ni ngayije tao̱n‑le̱ xi tje̱n.

26 Kꞌia̱ jè cho̱ꞌnda xo̱kji tsakajnajten‑tꞌa nangi,

kisijé‑le̱ kjoa̱nda,

kitsò‑le̱ chjo̱ta̱xá ngajko̱:

“Nai,

kàtasꞌe‑lì kjoa̱tsejta xi tꞌatsꞌa̱n,

kꞌoa̱ aàn kꞌoechjí‑lè ngayije tao̱n xi kitje̱n‑na”.

27 Jè chjo̱ta̱xá ngajko̱ koanma̱ke cho̱ꞌnda xo̱kji,

kisikꞌéjnandaí kꞌoa̱ kisichatꞌa‑le̱ ngayije tao̱n xi kitje̱n‑le̱.

28 »To̱nga kꞌia̱ nga je tíbìtjo‑ni jña tíjna jè chjo̱ta̱xá ngajko̱,

jè cho̱ꞌnda xo̱kji kisatekjao jngo cho̱ꞌnda xínkjín,

xi jngo ciento̱ tao̱n chroa kitje̱n‑le̱;

kꞌoa̱ kitsoa,

tsakájtísin,

kitsò‑le̱:

“Tꞌèchjí‑naí tao̱n‑na̱ xi kitje̱n‑lì”.

29 Kꞌia̱ jè cho̱ꞌnda xínkjín tsakajnajten‑tꞌa nangi ya̱ ngi ndso̱ko̱,

tsakꞌétsꞌoa‑le̱ kitsò‑le̱:

“Kàtasꞌe‑lì kjoa̱tsejta xi tꞌatsꞌa̱n,

kꞌoa̱ aàn kꞌoechjí‑lè ngayije xi kitje̱n‑na”.

30 To̱nga jè koan‑kai‑le̱,

to̱sa̱a ndo̱yá kisikꞌéjnaꞌya saꞌnda nga koa̱n kꞌoe̱echjí‑le̱ tao̱n xi kitje̱n‑le̱.

31 Kꞌia̱ nga tsabe cho̱ꞌnda xínkjín jme xi koan,

nꞌión koanba‑le̱,

kꞌoa̱ kitsòya‑le̱ jè chjo̱ta̱xá ngajko̱ ngayije jme xi koan.

32 Kꞌia̱ jè chjo̱ta̱xá ngajko̱ kinchja̱‑le̱ cho̱ꞌnda xo̱kji,

kitsò‑le̱:

“Cho̱ꞌnda tsꞌe̱n,

ngayije tao̱n xi kitje̱n‑lì kisichatꞌà‑lè nga̱ tsakꞌètsꞌoa‑naí.

33 A tsí kꞌoa̱ti̱ tjínè‑lì ji nga koa̱nma̱chai tsàkai cho̱ꞌnda xìngi̱,

josꞌìn nga an koanma̱kè‑lè”.

34 Kꞌia̱ jè chjo̱ta̱xá ngajko̱ nꞌión koan‑jti‑le̱,

kisintsjatꞌa chjo̱ta̱ xi nꞌión tse kjoa̱ñꞌain kitsjoa‑le̱,

saꞌnda nga kꞌoe̱echjí‑le̱ ngayije tao̱n xi kitje̱n‑le̱.

35 »Kꞌoa̱ati̱ sꞌìn si̱ikao̱‑no jòn jè Nꞌai‑na̱ xi tíjna ya̱ ngꞌajmi tsà tsì kao̱ ngayije ni̱ma̱‑no si̱chatꞌa‑lao̱o ndsꞌao jña‑nile̱ jé xi koa̱jngí tꞌatsao̱on.