3 Kꞌia̱ jaꞌaikòn‑le̱ Jesús jè chjo̱ta̱ fariseo nga kiskòtꞌayàkao̱ kꞌoa̱ kitsò‑le̱:

—A tiꞌndè‑le̱ jngo chjo̱ta̱ xi chjo̱on chixàn‑kao̱ nga tsjión chjo̱on‑le̱ ni̱nga to̱ tꞌatsꞌe̱ to̱jme kjoa̱‑ni.

4 Kinchja̱ Jesús,

kitsò‑le̱:

—A kjeè bꞌèxkia̱‑jiòn xo̱n én‑le̱ Niná,

nga jè xi kisinda chjo̱ta̱ saꞌnda nga títjòn,

kisinda xi xꞌi̱n kao̱ xi chjo̱on,^a

5 kꞌoa̱ kitsò:

“Koiì kjoa̱ nga jè xi xꞌi̱n si̱ikꞌéjna nꞌai‑le̱ kao̱ na̱‑le̱,

kꞌoa̱ chjo̱on‑le̱ kꞌoéjna‑kao̱ kꞌoa̱ ngajaò to̱ jngoò yao koa̱n”.^b

6 Kꞌoa̱a ma‑ni nga lìkoi ti̱ jaò ma‑ni,

to̱sa̱a jngo yao ma‑ni;

kꞌoa̱a ma‑ni nga jè xi Niná kisíjngo,

alì jè‑jìn chjo̱ta̱ sítsjion.

7 Kitsò jè chjo̱ta̱ fariseo:

—Kꞌoa̱ án‑ni nga Moisés tsakꞌénè‑ni nga ꞌya xi tsjion chjo̱on‑le̱,

kàtatsjoá‑le̱ xo̱n nga je kàtasjion,

kꞌoa̱ kꞌoa̱sꞌìn tsjion chjo̱on‑le̱.^c

8 Jesús kitsò‑le̱:

—Koiì nga tàja ni̱ma̱‑no nga Moisés kitsjoaꞌndè‑nino nga koa̱n koi̱njión yánchjín‑no;

to̱nga kꞌia̱ nga kitsꞌia lìkoi kꞌoa̱ koan.

9 Kꞌoa̱ an xin‑no,

to̱ꞌya‑ni xi tsjion chjo̱on‑le̱,

tsà tsì tsà koi nga kàsíchajngi jè chjo̱on,

kꞌoa̱ tsà kja̱ꞌaí chjo̱on ti̱ koi̱xan‑kao̱ ngá‑ni tísíchajngiì;

kꞌoa̱ jè chjo̱ta̱ xi koi̱xan‑kao̱ jè chjo̱on xi kinjion kꞌoa̱ati̱ tísíchajngi.

10 Jè chjo̱ta̱ xi ya̱ kòtꞌayàtꞌa‑le̱ Jesús,

kitsò‑le̱:

—Tsà tsì‑ni tjoꞌnde nga ma tsjion chjo̱on‑le̱ chjo̱ta̱ ni̱nga to̱jme kjoa̱‑ni,

lìkoi kjen‑ndia̱a nga koi̱xan.

11 Kꞌia̱ Jesús kitsò‑le̱:

—Lìkoi tsà ngatsꞌi nga macho̱ya‑le̱ kjoa̱faꞌaitsjen jè‑bi̱ kꞌoa̱ nga tsì bixan,

to̱jè jokjoan xi kꞌoa̱sꞌìn bꞌaì‑le̱.

12 Nga̱ tjín kꞌa chjo̱ta̱ xi to̱ je kꞌoa̱sꞌìn yꞌa‑ni saꞌnda nga tsin nga to̱ batiò to̱jè,

kꞌoa̱ tjín kꞌa xi jè chjo̱ta̱ bꞌénè‑le̱ nga to̱ batiò to̱jè,

kꞌoa̱ tjín kꞌa xi to̱jè xi kꞌoa̱sꞌìn koanme‑le̱ nga to̱ koa̱tiò to̱jè,

jmé‑ni nga ngìsa̱ nda síxá‑nile̱ jè xi tíjna ya̱ ngꞌajmi.

Jè xi macho̱ya‑le̱ kjoa̱faꞌaitsjen jè‑bi̱ kꞌoa̱ koa̱n‑le̱ kꞌoa̱sꞌìn,

kꞌoa̱kàtasꞌìn.

13 Kꞌia̱ jè chjo̱ta̱ jaꞌaikao̱tꞌa kꞌa‑le̱ xti ꞌndí Jesús,

jmé‑ni nga kàtabásòn‑nile̱ ntsja,

kꞌoa̱ nga kàtafàkao̱ Niná xi tꞌatsꞌe̱ xti ꞌndí;

to̱nga jè chjo̱ta̱ xi ya̱ kòtꞌayàtꞌa‑le̱ Jesús kinchja̱tikao̱ jè chjo̱ta̱ xi jaꞌaikao̱ xti ꞌndí.

14 To̱nga Jesús kitsò:

—Tꞌaìꞌnde‑lao̱o jè xti ꞌndí nga kàtanchroákon‑na,

kꞌoa̱ alì bꞌèchjoàjìn‑lao̱o;

nga̱ jè xi kꞌoa̱kjoan jokjoan xti ꞌndí,

tsꞌe̱e jña batéxoma jè xi tíjna ya̱ ngꞌajmi.

15 Kꞌoa̱ kꞌia̱ nga je tsakásòn‑le̱ ntsja xti ꞌndí,

ki‑ni ya̱.

16 Kꞌia̱ jaꞌaikòn jngo‑le̱ chjo̱ta̱ kꞌoa̱ i̱ kitsò‑le̱:

—Ji chjo̱ta̱ nda xi bakòyai,

jmé kjoa̱nda xi tjínè‑na sꞌian nga koa̱n sꞌe̱‑na kjoa̱bijnachon xi tsìkꞌia fetꞌa.

17 Jesús kitsò‑le̱:

—Án‑ni nga chjo̱ta̱ nda ꞌmì‑ninaí.

Ni̱jngo‑jìn xi nda,

to̱ jngoò jè Niná.

To̱nga tsà me‑lì nga koi̱tjásꞌai̱n jña tjín kjoa̱bijnachon xi tsìkꞌia fetꞌa,

ti̱kitjosoìn kjoa̱téxoma xi bꞌénè Niná.

18 Jè chjo̱ta̱ xo̱kji kitsò:

—Jñá‑nile̱ xi bꞌénè Niná.

Kꞌoa̱ Jesús kitsò‑le̱:

—Alì nìkꞌen‑jìn.^d

Alì nìchajngi‑jìn.^e

Alì nìché‑jìn.^f

Alì jè‑jìn én xi tsì kꞌoa̱tjín fanaì xi kja̱ꞌaí.^g

19 Jcha̱xkoín nꞌai‑li̱ kao̱ na̱‑li̱;^h

kꞌoa̱,

kàtamatsjoachai chjo̱ta̱ xi xìngi̱ josꞌìn tsjoachai yao‑li̱.ⁱ

20 Jè chjo̱ta̱ xti kitsò‑le̱ Jesús:

—Ngayije jè‑bi̱ jeè tìsikitjosoàn jo saꞌnda nga koan xo̱ngó‑jiàn.

Jmé sa xi cha‑na.

21 Jesús kitsò‑le̱:

—Tsà me‑lì nga tsì jme xi chꞌao tjín sꞌe̱ ya̱ jin kjoa̱bijnachon‑lì,

tꞌin,

ta̱tènai ngayije xi tjín‑lì,

kꞌoa̱ tꞌaì‑lai̱ jè chjo̱ta̱ xi yo̱ma̱ sꞌìn tjió,

kꞌoa̱ sꞌe̱e‑lì kjoa̱nchi̱ná ya̱ ngꞌajmi;

kꞌoa̱ nchroaí,

kꞌoa̱ nchroátje̱n‑ngi‑naí.

22 Kꞌia̱ nga je kinchrꞌoé jè chjo̱ta̱ xti xo̱kji jè én xo̱ tsò,

tsakja ba baà nga ki,

nga̱ nꞌión nkjìn tsojmì tjín‑le̱.

23 Kꞌia̱ Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:

—Ñaki kìxi̱i xi xin‑no,

nga nꞌión ñꞌain koa̱n‑le̱ jè chjo̱ta̱ nchi̱ná nga kjoa̱ꞌasꞌen ya̱ jña batéxoma jè xi tíjna ya̱ ngꞌajmi.

24 Kꞌoa̱ati̱ xin‑no,

nga ngìsa̱ choa ñꞌain tjín nga jngo cho̱ chꞌá xi camello ꞌmì kjoa̱ꞌasꞌen ya̱ xko̱n nindo,

ti̱kꞌoa̱‑ni nga jngo chjo̱ta̱ nchi̱ná kjoa̱ꞌasꞌen ya̱ jña batéxoma Niná.

25 Kꞌia̱ nga kinchrꞌoé jè én xo̱ tsò jè chjo̱ta̱ xi ya̱ kòtꞌayàtꞌa‑le̱ Jesús,

ñaki to̱ koanxkón‑le̱,

kitsò:

—ꞌYá‑ni tsòkꞌoa̱ xi koa̱n koi̱tjontjaì.

26 Kꞌoa̱ Jesús kiskòtsen‑le̱,

kitsò‑le̱:

—Jè chjo̱ta̱ lìkoi koa̱n‑le̱ kꞌoa̱sꞌi̱in kjoa̱ jè;

to̱nga jè Niná maà‑le̱ kꞌoa̱sꞌín to̱jme kjoa̱‑ni.

27 Kꞌia̱ kinchja̱ Pedro,

kitsò‑le̱:

—Koe̱e‑ni,

ji̱n‑ji̱n jeè kinìkatoí‑ji̱n ngayije,

kꞌoa̱ timatje̱n‑ngi‑laìji̱n;

jmé‑ni xi sꞌe̱na‑niji̱n.

28 Jesús kitsò‑le̱:

—Ñaki kìxi̱i xi xin‑no kꞌia̱ nga koa̱n‑chjo̱tse̱ya ngayije,

kꞌia̱ nga jè ꞌNdí‑le̱ Chjo̱ta̱ ya̱ kꞌoèjna jña koa̱tèxoma kao̱ kjoa̱jeya‑le̱,

jòn xi tìmatje̱n‑ngi‑naó kꞌoa̱ati̱ ya̱ koi̱yosòn yáxìle̱ nga koa̱tèxoma‑lao̱o jè xi tejaò jko̱ ntje̱‑le̱ Israel.

29 Kꞌoa̱ to̱ꞌya‑ni xi kisikatió ndꞌia‑le̱,

axo̱ ndsꞌe̱,

axo̱ ndichja,

axo̱ nꞌai‑le̱,

axo̱ na̱‑le̱,

axo̱ chjo̱on‑le̱,

axo̱ xti‑le̱,

axo̱ nangi‑le̱,

xi to̱ tꞌatsꞌa̱n,

jngo ciento̱o‑ya kꞌoa̱kji kꞌoai̱‑nile̱,

kꞌoa̱ kꞌoai̱ kjoa̱tjaò‑le̱ kjoa̱bijnachon xi tsìkꞌia fetꞌa.

30 To̱nga nkjìn xi tjió títjòn,

xi kjoe̱tꞌa‑ni,

kꞌoa̱ nkjìn xi fetꞌa‑ni xi koa̱tiò títjòn.