—A tiꞌndè‑le̱ jè xi xꞌi̱n nga tsjión chjo̱on‑le̱.

3 Jesús kinchja̱,

kitsò‑le̱:

4 Jè chjo̱ta̱ fariseo kitsò:

—Moisés kitsjoaꞌndè nga ꞌya xi tsjion chjo̱on‑le̱, kàtatsjoá‑le̱ xo̱n nga je kàtsjion, kꞌoa̱ kꞌoa̱sꞌìn koa̱n tsjión chjo̱on‑le̱.^a

5 Kꞌia̱ Jesús kinchja̱,

kitsò‑le̱:

6 to̱nga jo saꞌnda nga títjòn nga kisꞌenda ngayije jme xi tjín,

Niná kisinda xi xꞌi̱n kao̱ xi chjo̱on.^b

7 Koiì kjoa̱ nga jè xi xꞌi̱n si̱ikꞌéjna‑ni nꞌai‑le̱ kao̱ na̱‑le̱,

kꞌoa̱ kꞌoéjnakao̱ jè chjo̱on‑le̱,

8 kꞌoa̱ ngajaò to̱jngo yao koa̱n;

kꞌoa̱ lìkoi tsà ti̱ jaò ma‑ni,

jeè to̱jngo ma.^c

9 Kꞌoa̱a ma‑ni nga jè xi Niná kisíjngo,

alì jè‑jìn chjo̱ta̱ sítsjion.

10 Kꞌia̱ nga kichò ya̱ ndꞌia jè chjo̱ta̱ xi ya̱ kòtꞌayàtꞌa‑le̱ ngìjngokꞌà kiskònangi ngá‑nile̱ tꞌatsꞌe̱ kjoa̱ jè,

11 kꞌoa̱ Jesús kitsò‑le̱:

—To̱ꞌya‑ni xi tsjion chjo̱on‑le̱ kꞌoa̱ kja̱ꞌaí chjo̱on ti̱ bixan‑kao̱ngá‑ni,

tísíchajngitꞌa‑le̱ chjo̱on tjòn‑le̱;

12 kꞌoa̱ tsà jè chjo̱on tsjion xꞌi̱n‑le̱,

kꞌoa̱ kja̱ꞌaí xꞌi̱n ti̱ bixan‑kao̱ngá‑ni tísíchajngitꞌa‑le̱ xꞌi̱n xi títjòn chixàn‑kao̱.

13 Kꞌoa̱ jè chjo̱ta̱ jaꞌaikao̱tꞌa‑le̱ xti ꞌndí,

jmé‑ni nga kàtasíchikon‑tꞌain‑ni;

kꞌoa̱ jè chjo̱ta̱ xi ya̱ kòtꞌayàtꞌa‑le̱ Jesús kinchja̱tikao̱ jè chjo̱ta̱ xi jaꞌaikao̱ xti ꞌndí.

14 Kꞌia̱ nga tsabe Jesús,

koanjti‑le̱,

kꞌia̱ kitsò‑le̱:

—Tꞌaìꞌnde‑lao̱o jè xti ꞌndí nga kàtanchroákon‑na,

alì bꞌèchjoàjìn‑lao̱o;

nga̱ ya̱ jña batéxoma Niná, tsꞌe̱e ꞌya‑ni xi kꞌoa̱tjió ni̱ma̱‑le̱ joni tsà tsꞌe̱ xti ꞌndí.

15 Ñaki kìxi̱i xi xin‑no,

jè xi tsì kjoétjaò jña batéxoma Niná josꞌín jngo ti ꞌndí,

lìkoi koa̱n kjoa̱ꞌasꞌen ya̱.

16 Kꞌoa̱ kiskoé xti ꞌndí tsakꞌéyachrja,

tsakánè‑le̱ ntsja,

kisichikon‑tꞌain.

17 Kꞌia̱ nga to̱ je tífì‑ni Jesús,

jaꞌaitòka jngo xi tsakasènxkónchꞌin‑tꞌale̱,

kiskònangi‑le̱:

—Ji xi bakòyai,

xi nda‑jìn chjo̱ta̱, jmé xi sꞌian nga koa̱n sꞌe̱‑na kjoa̱bijnachon xi tsìkꞌia fetꞌa.

18 Jesús kitsò‑le̱:

—Án‑ni nga chjo̱ta̱ nda ꞌmì‑ninaí,

nga̱ ni̱jngo‑jìn xi nda,

to̱jngoò jè Niná.

19 Jeè ꞌyai jè kjoa̱téxoma xi bꞌénè Niná,

xi tsò:

“Alì nìchajngi‑jìn,^d

alì nìkꞌen‑jìn,^e

alì nìché‑jìn,^f

alì jè‑jìn én xi tsì kꞌoa̱tjín fanaì chjo̱ta̱,^g alì chꞌàna̱cha̱‑jìn, jcha̱xkoín nꞌai‑li̱ kao̱ na̱‑li̱”.^h

20 Kꞌia̱ jè chjo̱ta̱ xo̱kji kinchja̱,

kitsò‑le̱:

—Ji xi bakòyai,

ngayije jè‑bi̱ jeè tìsikitjosoàn jo saꞌnda nga sꞌa̱ xtia.

21 Kꞌia̱ Jesús kiskòtsen‑le̱,

koa̱n‑tsjoake,

kꞌoa̱ kitsò‑le̱:

—Jngoò kjoa̱ cha sa‑lì:

Tꞌin,

ta̱tènai ngayije jme xi tjín‑lì,

kꞌoa̱ tꞌaì‑lai̱ jè chjo̱ta̱ xi yo̱ma̱ sꞌìn tjió,

kꞌoa̱ sꞌe̱e‑lì kjoa̱nchi̱ná ya̱ ngꞌajmi;

kꞌia̱ nchroaí,

nchroátje̱n‑ngi‑naí, kꞌoa̱tꞌai tokoìn ni̱nga krò koi̱yátꞌai.

22 To̱nga kꞌia̱ nga kinchrꞌoé én xo̱ tsò ꞌaí kiska‑le̱,

tsakja ba baà nga ki,

nga̱ nꞌión nkjìn tsojmì tjín‑le̱.

23 Kꞌia̱ Jesús kiskòtsen‑le̱ chjo̱ta̱ xi ya̱ tjióndai‑le̱,

kitsò‑le̱ chjo̱ta̱ xi ya̱ kòtꞌayàtꞌa‑le̱:

—Jmé kꞌoa̱kji ñꞌain tjín‑ni nga kjoa̱ꞌasꞌen ya̱ jña batéxoma Niná jè chjo̱ta̱ xi kjoa̱nchi̱ná tjín‑le̱.

24 Jè chjo̱ta̱ xi ya̱ kòtꞌayàtꞌa‑le̱ to̱ koanxkón‑le̱ tꞌatsꞌe̱ én‑le̱ Jesús;

to̱nga jè kinchja̱,

kitsò ngìjngokꞌà‑le̱:

—ꞌNdí xti, jmé kꞌoa̱kji ñꞌain koa̱n‑nile̱ nga kjoa̱ꞌasꞌen ya̱ jña batéxoma Niná jè xi kjoa̱nchi̱ná sínꞌión‑tꞌa.

25 To̱ ngìsa̱a choa ñꞌain tjín nga jngo cho̱‑chꞌá xi camello ꞌmì koa̱n kjoa̱ꞌasꞌen ya̱ xko̱n nindo, ti̱kꞌoa̱‑ni nga jngo chjo̱ta̱ nchi̱ná kjoa̱ꞌasꞌen ya̱ jña batéxoma Niná.

26 Jè chjo̱ta̱ xi ya̱ kòtꞌayàtꞌa‑le̱ to̱ ngìsa̱a ti̱ to̱ koanxkón‑ngá‑nile̱,

kitsò‑le̱ xínkjín:

—ꞌYá‑ni xi koa̱n koi̱tjontjaì tsòkꞌoa̱.

27 Kꞌia̱ Jesús,

kiskòtsen‑le̱,

kitsò:

—Jè chjo̱ta̱ lìkoi koa̱n‑le̱ kꞌoa̱sꞌi̱in,

to̱nga Niná maà‑le̱, nga̱ Niná maà‑le̱ kꞌoa̱sꞌín to̱jme kjoa̱‑ni.

28 Kꞌia̱ Pedro tsakꞌétsꞌia̱kao̱ nga kitsò‑le̱:

—Koe̱e‑ni,

ji̱n‑ji̱n jeè kinìkatoí‑ji̱n ngayije,

kꞌoa̱ timatje̱n‑ngi‑laìji̱n.

29 Kꞌia̱ kinchja̱ Jesús kꞌoa̱ i̱ kitsò:

—Ñaki kìxi̱i xi xin‑no,

nga ni̱jngo‑jìn xi je kisikatió ndꞌia‑le̱,

axo̱ ndsꞌe̱,

axo̱ ndichja,

axo̱ nꞌai‑le̱,

axo̱ na̱‑le̱,

axo̱ chjo̱on‑le̱,

axo̱ xti‑le̱,

axo̱ nangi‑le̱,

xi to̱ tꞌatsꞌa̱n kꞌoa̱ xi to̱ tꞌatsꞌe̱ én nda,

30 xi tsì jngo ciento̱‑ya kꞌoa̱kji kꞌoai̱ ngajao‑nile̱ ni̱chrjin xi tiyoaà ndꞌai̱,

a ndꞌia‑ní,

a ndsꞌeè,

a ndichjaà,

a na̱‑le̱e,

a xti‑le̱e axo̱ nangi‑le̱e,

kao̱ nga taon jcha̱;

kꞌoa̱ jè ni̱chrjin xi sꞌa̱ nchroá kꞌoa̱iì‑le̱ kjoa̱bijnachon xi tsìkꞌia fetꞌa.

31 To̱nga nkjìn xi tjió títjòn ndꞌai̱ xi jè kjoe̱tꞌa‑ni,

kꞌoa̱ nkjìn xi fetꞌa‑ni ndꞌai̱ xi jè koa̱tió títjòn.

32 Kꞌia̱ tje̱nyandia̱a nga tjiófìmi ya̱ Jerusalén;

kꞌoa̱ Jesús tje̱n títjòn,

kꞌoa̱ ngatsꞌi to̱ koanxkón‑le̱,

ñaki tjiótsokjón nga tje̱n‑ngitsao‑le̱.

Kꞌia̱ ngìndia kikao̱tꞌaxìn chjo̱ta̱‑le̱ xi tejaò xi xá kiskoéjin‑ni Jesús,

kꞌia̱ tsakꞌétsꞌia̱kao̱ nga tsakjákao̱ jè kjoa̱ xi sꞌa̱ koa̱n‑tꞌain, kitsò‑le̱:

33 —Koe̱e‑ni,

ya̱a Jerusalén timangín‑miaà,

kꞌoa̱ jè ꞌNdí‑le̱ Chjo̱ta̱ ya̱a koa̱ntsjatꞌa na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés,

kꞌoa̱ tsjoá én‑le̱ nga si̱ikꞌen kꞌoa̱ ya̱a si̱intsjatꞌa chjo̱ta̱ xi tsì tsà judío‑jìn;

34 nga koi̱jnòke,

koa̱a‑le̱ kao̱ chrjoa̱xín xi ki̱cha̱ tjiójkò,

kꞌoa̱ kꞌoe̱echrájon,

kꞌoa̱ si̱ikꞌen;

to̱nga xi koa̱njàn‑ni ni̱chrjin kjoa̱ꞌáyajin‑nile̱ kꞌen.

35 Kꞌia̱ Jacobo kao̱ Juan,

xti‑le̱ Zebedeo,

kichòkon‑le̱ Jesús,

kitsò:

—Ji xi bakòyai, meè‑naji̱n nga kꞌoa̱sꞌiai̱n jme xi si̱jé‑laì‑ji̱n.

36 Jesús kitsò‑le̱:

—Jmé‑ni xi me‑no nga sꞌian xi tꞌatsao̱on.

37 Kꞌoa̱ jè kitsò‑le̱:

—Kꞌia̱ nga koa̱tèxomai kao̱ kjoa̱jeya‑li̱,

tꞌaìꞌnde‑naíji̱n nga koi̱yotꞌa‑laìji̱n,

jngo xi ngakìxi̱‑li̱ kꞌoa̱ jngo xi ya̱ ngaskón‑li̱.

38 Kꞌia̱ Jesús kitsò‑le̱:

—Lìkoi ꞌyao jme xi nìjaó.

A koa̱an sꞌio̱yao cho̱tsín kjoa̱ñꞌain xi an skꞌoi̱ya,

axo̱ koa̱an cha̱nìsꞌen‑ngindá‑no jè kjoa̱ñꞌain josꞌin nga an cha̱nìsꞌen‑ngindá‑na.

39 Jacobo kao̱ Juan kitsò:

—Koa̱an‑naji̱n.

Jesús kꞌoa̱kitsò‑le̱:

—Xi kjoa̱kìxi̱,

jè cho̱tsín xi an tìꞌbi̱ya,

sꞌio̱ya‑nió,

kꞌoa̱ jè kjoa̱sꞌejtsanè xi an tísꞌejtsanè,

kꞌoa̱ati̱sꞌìn sꞌe̱jtsa‑naò;

40 to̱nga xi ya̱ koi̱yotꞌa‑naó ngakìxi̱‑na̱ kao̱ ngaskón‑na̱,

lìkoi tsà an bꞌakao̱‑na nga tsjoa‑no,

jé kꞌoai̱‑le̱ ꞌya‑ni xi jè Nꞌai tsakatiónda‑le̱ nga tsjoá‑le̱.

41 Kꞌia̱ nga kinchrꞌoé jè chjo̱ta̱ xi ngì te,

koanjti‑le̱ xi tꞌatsꞌe̱ Jacobo kao̱ Juan.

42 To̱nga Jesús,

kinchja̱‑le̱ ngatsꞌi,

kitsò‑le̱:

—Jòn, ꞌya‑niò nga jè xi ꞌya‑le̱ nga chjo̱ta̱xá títjòn‑le̱ na̱xi̱nandá soꞌnde, kꞌoa̱asꞌìn batéxoma josꞌìn nga jè me‑le̱, kꞌoa̱ jè xi xá ngꞌa tjín‑le̱ jé kjoa̱téxoma‑le̱ síchjén nga kꞌoa̱síkao̱ jè na̱xi̱nandá josꞌìn nga jè me‑le̱.

43 To̱nga xi kao̱ jòn lìkoi tjínè‑le̱ nga kꞌoa̱koa̱n,

to̱ꞌya‑ni xi me‑le̱ nga ngꞌa kꞌoéjna‑no,

to̱saà jè cho̱ꞌnda‑no kàtama,

44 kꞌoa̱ to̱ꞌya‑ni jòn xi me‑le̱ nga koi̱se̱n‑títjòn,

cho̱ꞌnda‑le̱ ngatsꞌi kàtama.

45 Nga̱ jè ꞌNdí‑le̱ Chjo̱ta̱,

alì tsà koi xá jaꞌai‑ni nga cho̱ꞌnda sꞌe̱‑le̱,

to̱saà koi xá jaꞌai nga cho̱ꞌnda koa̱n,

kꞌoa̱ jaꞌaitsjoá kjoa̱bijnachon‑le̱ nga jaꞌai kꞌéchjí‑ntjaì jmé‑ni nga nkjìn chjo̱ta̱ kàtabitjontjaì‑ni.

46 Kꞌia̱ Jesús kao̱ chjo̱ta̱ xi ya̱ kòtꞌayàtꞌa‑le̱ jaꞌai ya̱ na̱xi̱nandá‑nꞌión Jericó;

kꞌoa̱ kꞌia̱ nga je tjióbitjo‑ni ya̱ Jericó kao̱ chjo̱ta̱ xi ya̱ kòtꞌayàtꞌa‑le̱,

kao̱ jè chjo̱ta̱‑nkjìn,

Bartimeo jè chjo̱ta̱xka̱,

jè xi ti‑le̱ Timeo,

tíjnandai ya̱ yandia̱a,

tísíjé tao̱n.

47 Kꞌia̱ nga kinchrꞌoé nga jè Jesús xi Nazaret tsꞌe̱ xi ya̱ tífaꞌa,

tsakꞌétsꞌia̱kao̱ nga kiskiꞌndiáxá,

kitsò:

—¡Jesús,

xi ntje̱‑le̱ David kitje̱n‑ni,

jcha̱ma̱tokòn‑naí!

48 Kꞌoa̱ nkjìn xi kinchja̱tikao̱,

jmé‑ni nga jyó kàtabꞌèjna‑ni,

to̱nga jè ngìsa̱a sa nꞌión kiskiꞌndiáxá,

kitsò:

—¡Jesús xi ntje̱‑le̱ David kitje̱n‑ni, jcha̱ma̱tokòn‑naí!

49 Kꞌia̱ Jesús,

tsakasènjna,

tsakꞌénè nga kàtanòkjoa̱‑le̱,

kꞌoa̱ kinòkjoa̱‑le̱ chjo̱ta̱xka̱,

tsakꞌìn‑le̱:

—Nꞌión tꞌiai̱n tokoìn;

ti̱sótjai̱n, tínchja̱a‑lì.

50 Kꞌia̱ jè chjo̱ta̱xka̱ kisikꞌatje̱n najño xi tíjnajté,

jngotjò tsakisótje̱n‑ni,

kꞌoa̱ jaꞌainchrꞌoè Jesús.

51 Kꞌia̱ Jesús kitsò‑le̱:

—Jmé xi me‑lì nga sikao̱‑lè.

Kꞌoa̱ jè chjo̱ta̱xka̱ kitsò‑le̱:

—Ji xi bakòyai, meè‑na nga kàtamatsen ngìndia‑na.

52 Jesús kitsò‑le̱:

—Tꞌin,

jé kjoa̱makjaín‑li̱ kàsíndaya‑lì.

Kꞌoa̱ ti̱ꞌa kꞌia̱a koan‑tsen‑nile̱,

kꞌoa̱ kitje̱n‑ngi‑le̱ Jesús ya̱ yandia̱a.