Jaꞌaín xi Mateo tsò nga én hebreo “kjoa̱tjao xi tsꞌe̱ Niná” tsò-nile̱, kꞌoa̱ koiì jè xi ngìjngo jaꞌaín-le̱ Leví (Mt. 9:9), jè xi tao̱n basèn kisikꞌéchjí xi tꞌatsꞌe̱ chjo̱ta̱xá títjòn-le̱ Roma, kisikꞌèjna xá-le̱ nga kitje̱ngi-le̱ Jè Xi Niná Kisikasén (Lc. 5:27-28). Mateo jngoò chjo̱ta̱ xi ya̱ koanxki̱kao̱ xi tejaò chjo̱ta̱ xi xá kisikasén-ni Jesús (Mt. 10:3), jè soaà xi ya̱ to̱jngo kisꞌin jaꞌaín-le̱ kao̱ chjo̱ta̱ xi tao̱n basèn síkꞌéchjí (Mt. 10:3), jè chjo̱ta̱ xi tao̱n basèn síkꞌéchjí xi to̱ tꞌatsꞌe̱ nga ya̱ síxákao̱ chjo̱ta̱xá xi Roma tsꞌe̱, tsokjón-le̱ chjo̱ta̱ kꞌoa̱ nga kijnda Israel jtichaà.

Jè xi kiski xo̱n jè lìkoi tsòya jaꞌaín-le̱, to̱nga tsꞌe̱e Mateo jè jaꞌaín xi bꞌaì-le̱ én nda-le̱ Jesucristo jè, Mateo matseèn ya̱ xo̱n xi títjòn kichji, nga tao̱n basèn síkꞌechjí xi tꞌatsꞌe̱ chjo̱ta̱xá Roma, koaàn-le̱ tsꞌasje xki̱ kꞌoa̱ koaàn-le̱ tsàkꞌéndá xo̱n, koiì xi nda tsakasén-kao̱ jmé-ni nga koanskan-ni jè kiski jè én nda-le̱ Jesucristo xi títjòn xi jaꞌaín-le̱ yꞌa.

Koa̱an nga koixoàn nga jè Én nda-le̱ Jesucristo jè-bi̱, ti̱ngi-ni kichji nga kje nìkixòya-jìn jè yo̱ngo̱ Jerusalén, nga nò jàn-kan kao̱ te koanskan-nile̱ nga kitsin Cristo. Tjín kꞌa chjo̱ta̱ xi nda kòtꞌayasòn xi koi nó tsjoá, nó ñachan-te kao̱-ni ño koanskan-nile̱ nga kitsin Cristo.

Tsò én nga Mateo jé chjo̱ta̱ judío xi koankjaìn-le̱ tꞌatsꞌe̱ Jesús kiski-le̱, kꞌoa̱ jè xá xi kiski-ni koiì nga koa̱kò-le̱ jè xi bꞌéxkia̱ xo̱n xo̱kji nga Jesús jé-ní Jè Xi Niná Kisikasén, xi tsò ya̱ xo̱n jña faꞌaitꞌa kjoa̱bꞌè-nꞌión xi títjòn kisꞌe-nꞌión. Mateo koiì “jè én nda-le̱ Jesucristo xi bitjosòn”, koi bꞌaꞌmì-nile̱ nga chrjan-aòn jngo kꞌa faꞌaitꞌa, én xi tsò: “Kꞌoa̱koan ngayije jè‑bi̱, jmé‑ni nga kꞌoa̱sꞌìn kitjosòn‑ni jè xi Niná kitsò josꞌìn nga kinchja̱ jè chjo̱ta̱ xi kinchja̱ya ngajao‑le̱ …” Xi je ma kꞌia̱ síkꞌaxki̱ én xi faꞌaitꞌa ya̱ xo̱n jña faꞌaitꞌa kjoa̱bꞌè-nꞌión xi títjòn kisꞌe-nꞌión nga síkìxi̱ya nga kinòkjoa̱ya tꞌatsꞌe̱ kjoa̱bijnachon-le̱ Jesús nga jé-ní Jè Xi Niná Kisikasén.