Jaꞌaín-le̱ Marcos bꞌaxki̱ ya̱ xo̱n xi faꞌaitꞌa kjoa̱ xi kisꞌin jè chjo̱ta̱ xi xá kisikasén‑ni Jesús, ya̱ xo̱n xi kiski Pablo kꞌoa̱ kao̱ ya̱ xo̱n xi títjòn kiski Pedro; tsà nda jè lìkoi kꞌoa̱sꞌin xá kisìkasèn-ni Jesús joni tsà jè Mateo kao̱ Juan, jngoò chjo̱ta̱ xi nꞌión nda tsàkáyajta Pedro; jaò jaꞌaín kisꞌe-le̱: “Juan” tsakꞌìn jaꞌaín-le̱ nga én hebreo kꞌoa̱ “Marcos” tsakꞌìn kao̱-ni nga én-le̱ chjo̱ta̱ Roma (Hchos 12:12-25). Ti-le̱e koan jngo nchjoo̱n kꞌan xi nchi̱ná xi María tsakꞌìn, ya̱ ndꞌia̱-le̱ ya̱a koanxkó-ni jè chjo̱ta̱ xi títjòn koankjaìn-le̱ tꞌatsꞌe̱ Jesús ya̱ Jerusalén. Tsò én nga jè Marcos jè chjo̱ta̱ xti xi kijnajtì nga kitòka xi bꞌaxki̱ ya̱ Marcos 14:51-52.

Nda tsà jè én nda-le̱ Jesucristo lìkoi bakó ꞌyá xi kiski, kꞌoa̱asꞌìn ꞌya-le̱ nga jè Marcos kiski, nga̱ lì ꞌya xi jaò bꞌé kòn nga jè chjo̱ta̱ xi títjòn tsàkincha títjòn-le̱ jè na̱xi̱nandá-le̱ Jesucristo, jngojtín koan nga kisikìxi̱ya nga jè Marcos kiski jè én nda-le̱ Jesucristo xi ma-ni jaò. Jotsò én xi kisichjén jè chjo̱ta̱ xi koankjaìn-le̱ tꞌatsꞌe̱ Jesús, Marcos ya̱a tsàkasèn-kao̱ Pedro kꞌoa̱ én kisikꞌatoya-le̱, jè Pedro “ti-na̱a” tsò-le̱ xi kao̱ kjoa̱tsjoacha-le̱ (1Pedro5:13). Alì ꞌya xi jaò bꞌé kòn nga jè én xi kinchja̱ya Pedro ñaki ya̱a kisatiòjin ni̱ma̱-le̱ Marcos, xi ya̱ kiskòtꞌayàtꞌa-le̱ Pedro, kꞌoa̱ jè-ní xi kiski jè én nda-le̱ Jesucristo xi ma-ni jaò.

Jè chjo̱ta̱ xi kòtꞌayàsòn jè Én-le̱ Niná tsò nga nꞌión ti̱ngi-ni kichji jè Én nda-le̱ Jesucristo jè, kꞌoa̱atsò nga jè Én-nda jè-bi̱ xi ngìsa̱ kjoatse tíjna-le̱ nga ño, nó xi tsjoá tsò nga nó ñachàn-te koanskan-nile̱ nga kitsin Cristo kichji.

Marcos i̱isꞌìn bꞌétsꞌia̱kao̱ nga kiski nga kao̱ kjoa̱jkon-le̱ Niná kiski: “I̱isꞌìn kitsꞌia‑ni jè én‑nda xi tsꞌe̱ Jesucristo, ꞌNdí‑le̱ Niná” (Mr 1:1); xi kao̱ Marcos ngìsa̱ nꞌión koa̱kjájòn-le̱ nga koa̱kò jmé xi sꞌìn Jesús ti̱kꞌoa̱-ni jme xi tsò, koiì nga kꞌoa̱sꞌìn ꞌya-nile̱ joni “Jè Én nda-le̱ Jesucristo xi koi bakó xá xi kisꞌìn Jesús”. Marcos jè kiski-le̱ chjo̱ta̱ xi Roma tsꞌe̱, xi tsì tsà judío‑jìn, kitsòya josꞌìn be-ni chjo̱ta̱ judío, kisikꞌatoya én arameo nga én griego, én latín kisichjén ꞌnde-le̱ én griego, kꞌoa̱ nꞌión to̱sakꞌoa̱ nga kisikꞌaxki̱ én xi ya̱ faꞌaitꞌa xo̱n xi tjítꞌa Kjoa̱bꞌè-nꞌión xi Títjòn Kisꞌe-nꞌión.