2 Kꞌoa̱ jngo chaón xi nꞌión jaꞌa,

nga̱ jngo cho̱ꞌnda ngꞌajmi‑le̱ Nai‑ná kitjojen‑ni ngꞌajmi,

kꞌoa̱ jaꞌai ya̱ ngijao,

kiskanìbꞌàkjá jè la̱jao̱ xi tíjnajchro ngijao jña kisꞌejna yao‑le̱ Jesús,

kꞌoa̱ ya̱ tsakꞌèjnanè.

3 Kꞌoa̱ jè sén‑le̱ jo lꞌí chꞌao̱n kji,

kꞌoa̱ najño‑le̱ nꞌión chroa kji joni tsà nchꞌán xi tsꞌe̱ na̱xi̱ chroa̱.

4 Kꞌoa̱ jè chjo̱ta̱ kjoa̱jchán xi tjiósíkoìnda̱ ngijao kꞌia̱ nga tsabe jè cho̱ꞌnda ngꞌajmi nꞌión kitsokjòn,

tsꞌatsé kꞌoa̱ jo xi kꞌeèn koan‑kjoan.

5 To̱nga jè cho̱ꞌnda ngꞌajmi kinchja̱,

kitsò‑le̱ jè yánchjín:

—Alì bijkon‑jiòn jòn,

nga̱ ꞌbe‑nià an nga jè Jesús xi krò kisꞌetꞌa tifasjao.

6 Lìkoi ti̱ i̱ tíjna‑ni,

nga̱ jeè kàfaꞌáya‑nile̱ josꞌìn nga kitsò.

Nchroaó,

chótsaon ꞌnde jña kisꞌejna jè Nai‑ná.

7 Kꞌoa̱ ndi̱to̱n tangión kꞌoa̱ tꞌìnya‑lao̱o jè chjo̱ta̱ xi ya̱ kòtꞌayàtꞌa‑le̱ nga̱ jeè kàfaꞌáyajin‑nile̱ kꞌen,

kꞌoa̱ koe̱e‑ni jeè kàfì títjòn‑no ya̱ ꞌnde Galilea;

ya̱a ska̱jion.

Koe̱e‑ni,

nda ti̱nchaño én xi tìxin‑no.

8 Kꞌia̱ jè yánchjín kitjo‑ni ya̱ ngijao,

ñaki tjiótsokjón kꞌoa̱ nꞌión tsjoa tjió‑le̱,

kitòka nga kikao̱ én‑le̱ chjo̱ta̱ xi ya̱ kòtꞌayàtꞌa‑le̱ Jesús.

Kꞌoa̱ kꞌia̱ nga tjiófìkao̱ én‑le̱ chjo̱ta̱ xi ya̱ kòtꞌayàtꞌa‑le̱ Jesús,

9 to̱ i̱i koan kisatekjao Jesús,

kitsò‑le̱:

—ꞌNda‑no.

Kꞌoa̱ jè yánchjín tsakinchatꞌachrian‑le̱,

kitsoakjá ndso̱ko̱,

kꞌoa̱ tsabexkón.

10 Kꞌia̱ Jesús kitsò‑le̱:

—Alì bijkon‑jiòn;

tangión,

tꞌìnya‑lao̱o én nda jè,

jè ndsꞌe,

jmé‑ni nga kàtafì‑ni ya̱ ꞌnde Galilea,

kꞌoa̱ ya̱a ska̱jian.

11 Kꞌia̱ nga tjiófì jè yánchjín,

koe̱e‑ni,

tjín kꞌa chjo̱ta̱ kjoa̱jchán xi kisikoìnda̱ ngijao jña kisꞌejnaya yao‑le̱ Jesús xi ki ya̱ na̱xi̱nandá‑nꞌión Jerusalén,

kꞌoa̱ kisikinchrꞌoé jè na̱ꞌmi xi tjió títjòn‑le̱ na̱ꞌmi tꞌatsꞌe̱ ngayije jè kjoa̱ xi koan.

12 Kꞌoa̱ kꞌia̱ nga je tsakatiòjtín kao̱ chjo̱ta̱ jchínga‑le̱ chjo̱ta̱ judío,

kꞌoa̱ nga je tsakjaóya‑ni,

nꞌión tse tao̱n kitsjoa‑le̱ jè chjo̱ta̱ kjoa̱jchán,

13 kitsò‑le̱:

«I̱ tixón jòn:

“Jé chjo̱ta̱ xi ya̱ kòtꞌayàtꞌa‑le̱ kàfaꞌai nga njiòn kꞌia̱ nga tìsoyofaì‑ji̱n kꞌoa̱ kàfìkao̱ché yao‑le̱”.

14 Kꞌoa̱ tsà jè Pilato sꞌe̱jin‑le̱ kjoa̱ jè,

ji̱in xi ꞌya-niji̱n josꞌìn chja̱kao̱ na̱jmí‑ji̱n,

kꞌoa̱ chꞌa̱sjentjaì‑laìji̱n».

15 Kꞌoa̱ jè chjo̱ta̱ kjoa̱jchán kiskoé tao̱n,

kꞌoa̱kisꞌin josꞌìn tsakꞌìn‑le̱.

Jè én xo̱ tsò tsangabasòn ya̱ jin‑le̱ chjo̱ta̱ judío saꞌnda ndꞌai̱.

16 To̱nga jè chjo̱ta̱ xi to̱ tejngo sa ma xi xá tsakjaꞌájin‑ni Jesús,

ki ya̱ ꞌnde Galilea,

ya̱ nindo jña nga Jesús tsakꞌénè‑le̱ nga koai̱.

17 Kꞌoa̱ kꞌia̱ nga tsabe Jesús,

tsabexkón;

to̱nga tjín kꞌa xi jaò tjió kon.

18 Kꞌia̱ Jesús tsakasèn‑tꞌachrian‑le̱ tsakjákao̱,

kitsò‑le̱:

—Jè Nꞌai‑na̱ kitsjoa‑na ngayije nganꞌión nga an batèxoma ya̱ ngꞌajmi kao̱ i̱ soꞌnde.

19 Koiì kjoa̱ nga tangíchon‑nilao̱o ngayije ntje̱ xi tjín ngakijndà soꞌnde,

kꞌoa̱ ta̱kòya‑lao̱o nga kàtakòtꞌayà tꞌatsꞌa̱n,

cha̱nìsꞌen‑ngindaó kao̱ nganꞌión‑le̱ jaꞌaín‑le̱ Nꞌai,

kao̱ tsꞌe̱ ꞌNdí,

kꞌoa̱ kao̱ tsꞌe̱ Sén Ni̱chrjin Tsje;

20 ta̱kòya‑lao̱o nga kàtasíkitjosòn ngayije xi an tsakꞌenè‑no;

kꞌoa̱ koe̱e‑ni,

i̱i koàte̱jnakao̱‑no ni̱chrjin nga nchaon saꞌnda nga je me kjoe̱tꞌa ni̱chrjin xi tiyoaà.

Kꞌoa̱kàtama.