—Chjo̱ta̱a je kàfìkao̱ yao‑le̱ Nai‑ná,

kꞌoa̱ lìkoi ꞌyaà jñá kàfìsíkájna.

3 Kꞌoa̱ kitjo Pedro kao̱ xi ngìjngo chjo̱ta̱ xi ya̱ kòtꞌayàtꞌa‑le̱ Jesús,

kꞌoa̱ ki ya̱ ngijao.

4 Ñatje̱n kitòka ngajaò;

to̱nga jè xi ngìjngo chjo̱ta̱ xi ya̱ kòtꞌayàtꞌa‑le̱ Jesús ngìsa̱ nꞌión kitòka ti̱kꞌoa̱‑ni Pedro,

kꞌoa̱ jè títjòn kichò ya̱ ngijao jña kisꞌejnaya yao‑le̱ Jesús.

5 Kꞌoa̱ tsakasejna‑tꞌachrian ngijao kꞌoa̱ kiskòtsensꞌèn,

tsabe jè najño xi kisꞌejtéjon yao‑le̱ Jesús nga ya̱ tjió,

to̱nga lìkoi jaꞌasꞌen.

6 Kꞌia̱ Simón Pedro kichòtje̱n‑ngile̱,

kꞌoa̱ jaꞌasꞌen ya̱ ngijao jña kisꞌejna yao‑le̱ Jesús,

kꞌoa̱ tsabe nga ya̱ tjió jè najño xi kisꞌejté yao‑le̱ Jesús,

7 kꞌoa̱ tsabe nga jè najño xi kisꞌejtéjin jko̱ Jesús lìkoi tsà ya̱ tíjnajin‑le̱ jè najño xikꞌa,

to̱ xìn tíjnaxkóya.

8 Kꞌia̱ kꞌoa̱ti̱ jaꞌasꞌen jè chjo̱ta̱ xi ngìjngo xi ya̱ kòtꞌayàtꞌa‑le̱ Jesús,

jè xi títjòn kichò ya̱ ngijao;

kꞌoa̱ tsabe,

kꞌoa̱ koan‑kjaín‑le̱.

9 Nga̱ kje‑sa majin‑jìn‑le̱ jotsò Xo̱n Én‑le̱ Niná,

nga machjén nga Jesús kjoa̱ꞌáyajin‑nile̱ kꞌen.

10 Kꞌoa̱ ngajaò chjo̱ta̱ xi ya̱ kòtꞌayàtꞌa‑le̱ Jesús ki‑ni jña tjió xi ngìkꞌa.

11 To̱nga María xi Magdala tsꞌe̱ tíjna ya̱ nditsin‑le̱ ngijao jña kisꞌejnaya yao‑le̱ Jesús nga tíkjiꞌndiá;

kꞌoa̱ tíkjiꞌndiákao̱‑ni nga tsakasèn‑tꞌachrian ngijao nga kiskòtsen‑sꞌèn;

12 kꞌoa̱ tsabe jaò cho̱ꞌnda ngꞌajmi xi najño chroa yꞌakjá,

ya̱ tjió jña kisꞌejna yao‑le̱ Jesús,

jngo xi ya̱ tíjna jña kisꞌejna jko̱,

kꞌoa̱ jè xi ngìjngo ya̱ tíjna jña kisꞌeyo ndso̱ko̱.

13 Kꞌoa̱ jè cho̱ꞌnda ngꞌajmi kitsò‑le̱:

—Ji chjo̱on,

án‑ni nga tìchjiꞌndiá‑ni.

María kitsò‑le̱:

—Koiì nga chjo̱ta̱ kàfikao̱ yao‑le̱ Nai‑na̱,

kꞌoa̱ lìkoi ꞌbe jña‑ni kàfìsíkájna.

14 Kꞌia̱ nga je kꞌoa̱kitsò,

kisikꞌófaya,

kꞌoa̱ tsabe nga ya̱ tíjna jngo chjo̱ta̱,

jé Jesús;

to̱nga María lìkoi be nga jè‑ni Jesús.

15 Jesús kitsò‑le̱:

—Chjo̱on,

án‑ni nga tìchjiꞌndiá‑ni.

ꞌYá‑ni xi tìbijnchisjaì.

María kꞌoa̱sꞌìn kisikꞌaitsjen,

nga jè cho̱ꞌnda xi síkoìnda̱ yántjè,

kitsò‑le̱:

—Tsà jiì kàꞌmikoai̱,

kꞌoa̱tꞌìn‑naí jñá‑ni kànikájnai yao‑le̱,

jmé‑ni nga an kjoíkꞌa ngìndia‑nia.

16 Jesús kitsò‑le̱:

—¡María!

Kꞌia̱ kisikꞌófaya María,

kitsò‑le̱:

—¡Raboni!

(Én xi tsò‑ni:

Ji xi bakòyai).

17 Jesús kitsò‑le̱:

—Lì an‑jìn nìkꞌéjnanꞌión‑naí,

nga̱ kje fimikon‑jìnle̱ jè Nꞌai‑na̱;

to̱nga tꞌin‑chón‑lai̱ ngatsꞌi ndsꞌe,

kꞌoa̱ i̱ tꞌìn‑lai̱:

“Tìfimikon‑le̱ jè Nꞌai‑na̱,

kꞌoa̱ jè xi Nꞌai‑no ma,

jè Niná‑na̱ kꞌoa̱ xi Niná‑no ma”.

18 Kꞌia̱ ki María xi Magdala tsꞌe̱,

kikon‑le̱ chjo̱ta̱ xi ya̱ kòtꞌayàtꞌa‑le̱ Jesús jmé‑ni nga tsjoá‑nile̱ én xi kꞌoa̱tsò nga je tsabe jè Nai‑ná kꞌoa̱ nga jè xi tsakjákao̱ én xo̱ tsò.

19 Kꞌia̱ nga je koanjiòn nga ti̱koi‑ni ni̱chrjin,

nga taingo̱,

kꞌia̱ nga tjióchjoà xo̱ntjoa̱‑le̱ ndꞌia jña tjió jè chjo̱ta̱ xi ya̱ kòtꞌayàtꞌa‑le̱ Jesús,

tjiójtín nga tjiótsokjón‑le̱ chjo̱ta̱ jchínga‑le̱ chjo̱ta̱ judío,

jaꞌai Jesús,

kꞌoa̱ tsakasènjnajin basen‑le̱,

kitsò‑le̱:

—Kjoa̱nchꞌán kàtasꞌe‑no.

20 Kꞌoa̱ kꞌia̱ nga je kꞌoa̱kitsò‑le̱ én jè,

tsakakó‑le̱ ntsja kao̱ ninda ni̱si̱n‑le̱.

Kꞌoa̱ chjo̱ta̱ xi ya̱ kòtꞌayàtꞌa‑le̱ nꞌión kisitsjoa nga tsabe Nai‑ná.

21 Kꞌia̱ Jesús kitsò ngìjngokꞌà‑le̱:

—Kjoa̱nchꞌán kàtasꞌe‑no.

Josꞌìn kisikasén‑na jè Nꞌai,

kꞌoa̱ati̱ sꞌìn tìsikasén‑no jòn.

22 Kꞌia̱ nga je kꞌoa̱kitsò‑le̱ én jè,

tsakꞌéntjao̱jon,

kꞌoa̱ kitsò‑le̱:

—Tsjoaà‑no jè Sén Ni̱chrjin Tsje.

23 Jè xi si̱chatꞌa‑lao̱o jé‑le̱,

jcha̱tꞌaà‑le̱,

to̱nga jè xi tsì si̱chatꞌa‑lao̱o,

lìkoi jcha̱tꞌa‑le̱.

24 To̱nga Tomás,

jngo chjo̱ta̱‑le̱ xi tejaò xi xá kiskoéjin‑ni Jesús,

jè xi Dídimo ꞌmì‑le̱,

lìkoi ya̱ tíjnakao̱ xikꞌa kꞌia̱ nga jaꞌainchrꞌoè Jesús.

25 Jè chjo̱ta̱ xikꞌa xi ya̱ kòtꞌayàtꞌa‑le̱ Jesús kitsò‑le̱ Tomás:

—Kàꞌya‑níji̱n jè Nai‑ná.

Tomás kitsò‑le̱:

—Tsà tsì skoe ntsja jokjoan jña kixinchasꞌèn xò,

kꞌoa̱ tsà tsì skanisꞌèn na̱jmá-ndsa̱ jña nga kisꞌen‑le̱ xò,

kꞌoa̱ tsà tsì skanisꞌèn ndsa̱ ya̱ ninda ni̱si̱n‑le̱,

lìkoi koa̱n‑kjaín‑na kjoa̱ xi tiꞌmì‑lao̱o.

26 Xi koan jin‑ni ni̱chrjin ya̱ tjióꞌyà‑ngá‑ni jè chjo̱ta̱ xi ya̱ kòtꞌayàtꞌa‑le̱ Jesús,

kꞌoa̱ Tomás kꞌoa̱ti̱ ya̱ tíjnajin‑le̱.

Jaꞌai Jesús kꞌia̱ nga tíchjoà xo̱ntjoa̱ ndꞌia,

kꞌoa̱ tsakasènjnajin basen‑le̱,

kꞌoa̱ kitsò‑le̱:

—Kjoa̱nchꞌán kàtasꞌe‑no.

27 Kꞌoa̱ kjoan kitsò‑le̱ Tomás:

—Cha̱nìsꞌain na̱jmá-ndsai̱ i̱,

kꞌoa̱ chótsen‑lai̱ ndsa̱;

nchroákoai̱ ndsai̱ i̱,

kꞌoa̱ cha̱nìsꞌain i̱ ninda ni̱si̱n‑na̱;

a lì kꞌoa̱‑jìn makjoain jokjoan jè chjo̱ta̱ xi tsì makjaín‑le̱,

to̱saà kàtamakjaín‑lì.

28 Kꞌia̱ Tomás kinchja̱ kꞌoa̱ i̱ kitsò:

—¡Nai‑na̱,

kꞌoa̱ Niná‑na̱!

29 Jesús kitsò‑le̱:

—Koiì nga kàꞌya‑naí Tomás,

nga kamakjaín‑nilì;

jó to̱nda‑le̱ ngixko̱n Niná jè xi tsì tjióbe‑na kꞌoa̱ makjaín‑le̱.

30 Nꞌión nkjìn sa kjoa̱xkón xi kisꞌin Jesús ya̱ ngixko̱n chjo̱ta̱ xi ya̱ kòtꞌayàtꞌa‑le̱,

jña‑nile̱ xi tsì faꞌaitꞌa i̱ xo̱n xo̱kji.

31 To̱nga én jè koiì kichji‑ni,

jmé‑ni nga koa̱n‑kjaín‑nino nga Jesús Jè‑ní Xi Niná Kisikasén,

jè ꞌNdí‑le̱ Niná,

kꞌoa̱ jmé‑ni kꞌia̱ nga koa̱n‑kjaín‑no sꞌe̱e‑no kjoa̱bijnachon xi to̱ tꞌatsꞌe̱.