Kꞌia̱ nga Jesús jaꞌáyajin‑nile̱ kꞌen
16
Kꞌia̱ nga je jaꞌato ni̱chrjin xotò,
ni̱chrjin nga bexkón Niná chjo̱ta̱ judío,
María xi Magdala tsꞌe̱,
María na̱‑le̱ Jacobo,
kao̱ Salomé,
tsakatse chao xi na̱ská na̱nje̱n, jmé‑ni nga si̱ikajon‑síni yao‑le̱ Jesús.
2 Kꞌia̱ nga nꞌión ta̱njiòn kꞌia̱ nga taingo̱ nga je kitjo tsꞌoí jaꞌai ya̱ ngijao jña kisꞌejna yao‑le̱ Jesús.
3 To̱nga kꞌoa̱ tjiótsò‑le̱ xínkjín:
«ꞌYá‑ni xi kjoa̱ꞌàxìn‑ná jè la̱jao̱ xi tíjnajchro ngijao».
4 To̱nga kꞌia̱ nga kiskòtsen,
tsabe nga je kitjoxìn la̱jao̱ xi ya̱ tíjnajchro ngijao,
jè la̱jao̱ nꞌión ꞌmbá kji.
5 Kꞌoa̱ kꞌia̱ nga jaꞌasꞌen ya̱ ngijao,
tsabe jngo chjo̱ta̱ xti xi tíjnajté jngo najño jnchro xi chroa kji,
xi ya̱ tíjna ngakìxi̱‑le̱ jña kisꞌejna yao‑le̱ Jesús;
kꞌoa̱ jè yánchjín kitsokjòn.
6 To̱nga jè kitsò‑le̱:
—Alì bijkon‑jiòn;
jé Jesús xi Nazaret tsꞌe̱ tifasjao,
jè xi krò kꞌen‑tꞌa;
jeè kàfaꞌáyajin‑nile̱ kꞌen,
lìkoi ti̱ i̱ tíjna‑ni;
chótsaon ꞌnde jña‑ni kisꞌejna yao‑le̱.
7 To̱nga tangión,
kꞌoa̱tꞌìn‑lao̱o jè chjo̱ta̱ xi ya̱ kòtꞌayàtꞌa‑le̱ Jesús kao̱ jè Pedro,
nga Jesús tífì títjòn‑no ya̱ ꞌnde Galilea;
ya̱a jcha̱o, josꞌìn nga jè kitsò‑no.
8 Kꞌoa̱ jè yánchjín kitjotòka‑ni ya̱ ngijao,
nga̱ nꞌión kitsokjòn kꞌoa̱ ñaki tsꞌatsé;
ni̱ꞌya‑jìn xi jo kitsò‑le̱,
nga̱ nꞌión tjiótsokjón.
María xi Magdala tsꞌe̱ tsabe Jesús
9 Kꞌia̱ nga Jesús je jaꞌáyajin‑nile̱ kꞌen nga ta̱njiòn,
nga taingo̱, Jesús, jé títjòn tsakakó‑le̱ yao‑le̱ jè María xi Magdala tsꞌe̱, xi Jesús ñato sén ni̱chrjin xi tsꞌe̱ nai̱i tsakꞌasjejin‑le̱.
10 Kꞌia̱ ki,
kitsòya‑le̱ ngatsꞌi xi ya̱ tsakatiòkao̱ Jesús,
nga̱ baà‑le̱ kꞌoa̱ tjiókjiꞌndiá.
11 Kꞌia̱ nga jè chjo̱ta̱ xi ya̱ kiskòtꞌayàtꞌa‑le̱ Jesús kinchrꞌoé nga tíjnakon‑ni kꞌoa̱ nga jè María xi Magdala tsꞌe̱ je tsabe,
lìkoi koan‑kaín‑le̱.
Ngì jaò chjo̱ta̱‑le̱ Jesús xi kꞌoa̱ti̱ tsakakó‑le̱ yao‑le̱
12 To̱nga koan‑skan‑ni kja̱ꞌaí sꞌìn tsakakó‑le̱ yao‑le̱ jaò chjo̱ta̱ xi ya kòtꞌayàtꞌa‑le̱ xi tje̱nyandia̱a nga tjiófì ya̱ jña kji tsojmìntjè.
13 Kꞌoa̱ ki ngajaò,
kitsòya‑le̱ chjo̱ta̱ xi ya̱ kiskòtꞌayàtꞌa‑le̱ Jesús;
kꞌoa̱ ni̱ jè‑jìn én‑le̱ chjo̱ta̱ xo̱kjoan koan‑kjaín‑le̱.
Jesús kitsjoaxá‑le̱ chjo̱ta̱ xi ya̱ kòtꞌàyatꞌa‑le̱
14 Xi jetꞌa‑ni,
Jesús tsakakó‑le̱ yao‑le̱ chjo̱ta̱ xi to̱ tejngo sa ma xi xá kiskoéjin‑ni,
kꞌia̱ nga tjiótꞌa yámìxa̱, kinchja̱tikao̱ nga tsìn‑le̱ kjoa̱makjaín kꞌoa̱ nga tàja tjió ni̱ma̱‑le̱, nga tsì koan‑kjaín‑le̱ jo kitsò‑le̱ jè xi tsabe nga je jaꞌáyajin‑nile̱ kꞌen.
15 Kꞌoa̱ kitsò‑le̱:
«Tangión ngakijndà soꞌnde kꞌoa̱ ti̱nókjoa̱ya‑lao̱o ngatsꞌi chjo̱ta̱ jè én nda‑na̱.
16 Jè chjo̱ta̱ xi koa̱n‑kjaín‑le̱ én nda kꞌoa̱ cha̱nìsꞌen‑ngindá,
koi̱tjontjaì‑ní;
to̱nga jè chjo̱ta̱ xi tsì koa̱n‑kjaín‑le̱ én nda,
kjoa̱ñꞌaiìn kꞌoai̱‑le̱.
17 Kꞌoa̱ koiì choa̱ xo̱kjoan xi koa̱n‑le̱ sꞌin jè xi koa̱n‑kjaín‑le̱:
Kao̱o nganꞌión‑le̱ jaꞌaín‑na̱ kꞌao̱nsjejin sén ni̱chrjin xi tsꞌe̱ nai̱i;
kꞌoa̱ koi̱nchja̱a én xi kja̱ꞌaí;
18 kao̱ ntsja skoé‑ni ye̱ toán kꞌoa̱ lìkoi si̱ikìꞌaon,
kꞌoa̱ tsà xki xi síkꞌen chjo̱ta̱ skꞌoí,
lìkoi si̱ikìꞌaon;
koa̱anè‑le̱ ntsja jè xi chꞌin tjín‑le̱,
kꞌoa̱ koa̱n‑ndaya».
Jesús kitjoémi ya̱ ngꞌajmi
19 Kꞌoa̱ jè Nai‑ná Jesús,
kꞌia̱ nga je koan tsakjákao̱ chjo̱ta̱ xi ya̱ kòtꞌayàtꞌa‑le̱,
kitjoémi ya̱ ngꞌajmi, kꞌoa̱ ya̱ tsakꞌèjna ngakìxi̱‑le̱ Niná.
20 Kꞌoa̱ jè chjo̱ta̱ xi ya̱ kiskótꞌayàtꞌa‑le̱ kitjo,
kinchja̱ya ngakijndà ꞌnde,
jè Nai‑ná tsakasèn‑kao̱ kꞌoa̱ jè choa̱ xi kisꞌin koiì xi tsakakó nga kìxi̱ én xi kinchja̱ya.
Kꞌoa̱kàtama.