Jè jaꞌaín xi bꞌaì-le̱ ya̱a nchroá-ni jaꞌaín-le̱ jè xi kiski, nꞌión to̱ choa ꞌya-le̱ xi tꞌatsꞌe̱ Lucas, jè lìkoi jme én xi tsakꞌétꞌa xi tꞌatsꞌe̱. Jè Pablo chji̱ne̱xki sꞌìn kisikꞌaxki̱ Lucas, (Col. 4:14); kꞌoa̱ xá-le̱ Niná kisꞌin, (Flm.24)

Lucas nꞌión mìyo̱ koan-le̱ jè Pablo kꞌoa̱ ñatje̱n kisòn-kao̱ én-le̱ Niná (Flm. 24); kꞌoa̱ chji̱ne̱xki koan (Col.4:14); jè nꞌión nda tsakꞌèjnatsꞌinya nga jngó jngó kjoa̱ kꞌoa̱ kꞌoa̱jàn sꞌìn kitsòya jmé xi koan. (Lc.1:1-4 )

Jè xi kiski xo̱n xo̱kji lìkoi tsòya jaꞌaín-le̱, to̱nga tjín-ni choa̱ xi bakó nga jè Lucas xi kiski, kꞌoa̱ meè ngayije choa̱ jè xi ya̱ faꞌaitꞌa ya̱ xo̱n jña faꞌai “Kjoa̱ xi kisꞌin jè chjo̱ta̱ xi xá kisikasén‑ni Jesús”, nga ti̱ jè-ni jè xi kiski jè xo̱n jè kao̱ jña faꞌai kjoa̱ xi kisꞌin jè chjo̱ta̱ xi xá kisikasén‑ni Jesús kꞌoa̱ ngajaò xo̱n xo̱kjoan jè Teófilo kichji-le̱, kꞌoa̱ kꞌoa̱asꞌìn ꞌya-nile̱ nga ngajaò xo̱n xo̱kjoan nga jè Lucas kiski, nga̱ ya̱ xo̱n jña faꞌai kjoa̱ xi kisꞌin jè chjo̱ta̱ xi xá kisikasén‑ni Jesús, Lucas nꞌión kisichjén én xi tsò “ñá” kꞌia̱ nga nkjìn chjo̱ta̱ kisikꞌaxki̱ (Hch.16:10-17; 20:5; 21:18; 27:1;28:16), koiì jè-bi̱ xi bakó jókoan nga kisòn én-le̱ Niná ngakijndà.

I̱ én nda-le̱ Jesucristo jè-bi̱ lìkoi síchjén én xi “ñá” tsò, koiì jè xi bakó nga jè xi kiski én nda jè, jé kiskònangiya-le̱ chjo̱ta̱ xi xko̱n tsabe-ni jme xi koan, jmé-ni nga koan kiski-ni tꞌatsꞌe̱ kjoa̱bijnachon-le̱ Jesús (Lc.1:2), koiì xi bakó nga Lucas lìkoi ñaki xko̱n tsabe-ni jme xi koan.

Lìkoi ꞌya-le̱ jme kjoàn nó-ni nga kichji én nda-le̱ Jesucristo xi faꞌaitꞌa xo̱n xo̱kji, to̱nga tjín xi tsò nga nó jàn-kan kao̱ te axo̱ nó ñokan koanskan-nile̱ nga kitsin Cristo.

Jè én nda-le̱ Jesucristo josꞌìn kiski Lucas koiì xi bakó ꞌyá-ni jè Jesucristo kꞌoa̱ kao̱ kjoa̱bijnachon-le̱, kꞌoa̱jàn sꞌìn kiski josꞌìn tjín, nga je nda tsakꞌèjnatsꞌin-ya, koiì xá kichji-ni jmé-ni nga koa̱n-tàja-ni jè kjoa̱makjaìn-le̱ jè xi koankjaìn-le̱ tꞌatsꞌe̱ Jesús kꞌoa̱ nga koa̱tiòtàja-le̱ én xi tsì kꞌoa̱tjín, xi tsò jè xi tsì makjaìn-le̱, jè-jàn chjo̱ta̱ xi ntje̱-le̱ chjo̱ta̱ griego kitje̱n-ni. I̱ én ndá-le̱ Jesucristo jè-bi̱, jè kjoa̱bijnachon-le̱ Jesús nꞌión nda ꞌya-le̱ josꞌìn kikao̱, kꞌoa̱ ñaki nda bakó nga ñaki jè soa Niná kꞌoa̱ nga chjo̱ta̱ koan.