Én nda‑le̱ Jesucristo josꞌìn kiski
Lucas
Én xi kichji‑le̱ Teófilo
1
Nga̱ nꞌión nkjìn xi je tsakꞌénè‑le̱ yao‑le̱ nga koanme‑le̱ kꞌoa̱sꞌìn kiski chꞌin chꞌin jè kjoa̱ xi ñaki kꞌoa̱tjín,
xi koan ya̱ jin‑le̱ chjo̱ta̱ xi makjaín‑ná,
2 jokjoà sꞌìn nga kitsòya‑naji̱n jè chjo̱ta̱ xi ñaki kao̱ xko̱n tsabe‑ni saꞌnda nga kitsꞌia‑ni kjoa̱ jè,
kꞌoa̱ nga koi xá tsakꞌaì‑le̱ nga koi̱tso̱ya én nda,
3 kꞌoa̱ati̱ an kisaseèn‑na,
kꞌia̱ nga je nꞌión nda tsakàte̱jnatsꞌinya ngayije kjoa̱ jo saꞌnda nga kitsꞌia‑ni,
nga kꞌoa̱sꞌín tìkji chꞌin chꞌin‑lè,
ji Teófilo xi nꞌión nda bekòn‑lì chjo̱ta̱,
4 jmé‑ni nga ñaki nda kàtaꞌya‑ni jè kjoa̱kìxi̱‑le̱ jokjoà tjín‑ni jè kjoa̱ xi tsakꞌìnya‑lì.
Én xi kitsjoa jè cho̱ꞌnda ngꞌajmi xi tꞌatsꞌe̱ nga jtsín Juan
5 Ni̱chrjin kꞌia̱ nga jè Herodes koan chjo̱ta̱xá ngajko̱‑le̱ ꞌnde Judea,
tsakꞌèjna jngo na̱ꞌmi xi Zacarías tsakꞌìn,
xi ya̱ nchja̱‑ni jtín‑le̱ Abías;a
jè chjo̱on‑le̱ Elisabet tsakꞌìn,
kꞌoa̱ ntje̱‑le̱ Aarón tje̱n‑ni.
6 Ngajaò chjo̱ta̱ xo̱kjoan kìxi̱‑ní ya̱ ngixko̱n Niná,
kꞌoa̱ ni̱jme‑jìn xi koansjai xi tsì kisikitjosòn tꞌatsꞌe̱ ngayije kjoa̱téxoma xi bꞌénè Niná xi kiski Moisés,
kꞌoa̱ josꞌìn bꞌénè Nai‑ná.
7 To̱nga tsìn‑le̱ xti,
nga̱ jè Elisabet chjo̱on ꞌndi̱‑ní,
kꞌoa̱ ngajaò jeè chjo̱ta̱ jchínga.
8 Kꞌoa̱koan kꞌia̱ nga jè Zacarías tísíkitjosòn xá na̱ꞌmi‑le̱ ngixko̱n Niná josꞌìn tsꞌakao̱‑le̱ jtín‑le̱,
9 josꞌìn be‑ni ngatsꞌi xi na̱ꞌmi ma,
kꞌia̱ nga je kisiskána̱cha̱,
jé Zacarías tsꞌakao̱‑le̱ nga tsjoátꞌa xichaxi xi na̱ská na̱nje̱n,
kꞌoa̱ jaꞌasꞌen ya̱ yo̱ngo̱‑le̱ Nai‑ná.
10 Kꞌoa̱ ngatsꞌi chjo̱ta̱‑nkjìn ya̱ tjió nditsin,
nga tjiófákao̱ Niná,
nga̱ choa̱‑leè jochon tì xichaxi xi na̱ská na̱nje̱n.
11 Kꞌoa̱ Zacarías jaꞌatsen jngo‑le̱ cho̱ꞌnda ngꞌajmi‑le̱ Nai‑ná,
xi ya̱ sénjnatꞌa ngakìxi̱‑le̱ kàxa̱ ki̱cha̱ jña tìsòn xichaxi xi na̱ská na̱nje̱n.
12 Kꞌoa̱ ñaki chixojeèn kjoa̱faꞌaitsjen‑le̱ Zacarías kꞌia̱ nga tsabe,
kꞌoa̱ nꞌión kitsokjòn.
13 To̱nga jè cho̱ꞌnda ngꞌajmi kitsò‑le̱:
—Zacarías,
alì bijkon‑jìn;
Niná jeè kinchrꞌoè kꞌia̱ nga nòkjoa̱koai̱,
kꞌoa̱ jè chjo̱on‑li̱ Elisabet tsjoá jngo‑lì ꞌndí,
kꞌoa̱ Juan kꞌoín‑lai̱.
14 Kꞌoa̱ nꞌión sꞌe̱‑lì kjoa̱tsjoa kꞌoa̱ si̱tsjoa‑ní,
kꞌoa̱ nkjìn xi si̱itsjoaya kꞌia̱ nga jtsín ꞌndí;
15 nga̱ jè soaà Niná xi ngꞌa si̱ikꞌéjna ya̱ ngixko̱n.
Lìkoi tsà ndá totseè jchá skꞌoí kꞌoa̱ ni̱ xán‑jìn,b
kꞌoa̱ ñaki to̱jè Sén Ni̱chrjin Tsje koa̱tèxomajin ni̱ma̱‑le̱,
saꞌnda nga sꞌa̱ kꞌoéjnaya tsꞌoa̱ na̱‑le̱.
16 Kꞌoa̱ jè kꞌoa̱sꞌi̱in nga nkjìn chjo̱ta̱ xi ntje̱‑le̱ Israel tje̱n‑ni,
si̱ikꞌófayatꞌa‑nile̱ Nai‑no xi Niná‑no ma.
17 Kꞌoa̱ jé koai̱ títjòn‑le̱ Nai‑ná kao̱ Sén Ni̱chrjin Tsje kꞌoa̱ kao̱ nganꞌión xi kisꞌe‑le̱ Elías,
jmé‑ni nga jè kꞌoa̱sꞌiìn‑ni nga si̱ikjaónda ni̱ma̱‑le̱ xi nꞌai ma kao̱ xti‑le̱,c
kꞌoa̱ jè kꞌoa̱sꞌiìn nga jè ni̱ma̱‑le̱ chjo̱ta̱ xíjin sꞌe̱‑le̱ kjoa̱nkjìn‑tokòn xi tjín‑le̱ chjo̱ta̱ kìxi̱,
jmé‑ni nga si̱ikatiónda‑nile̱ Nai‑ná,
chjo̱ta̱ xi nꞌión nda koa̱tiònda.
18 Kꞌoa̱ Zacarías kitsò‑le̱ jè cho̱ꞌnda ngꞌajmi:
—Jókoa̱n‑ni nga skoe‑jiàn nga kꞌoa̱koa̱n.
Nga̱ an kao̱ chjo̱on‑na̱ jeè nꞌión chjo̱ta̱ jchíngai‑ji̱n.
19 Kinchja̱ jè cho̱ꞌnda ngꞌajmi,
kitsò‑le̱:
—An‑nià Gabriel,d
xi tìjna̱ ya̱ ngixko̱n Niná;
kꞌoa̱ koiì xá kàsíkasén‑nina nga kjoakao̱‑lè kꞌoa̱ nga tsjoa‑lè én xi nꞌión nda tsò.
20 Kꞌoa̱ koe̱e‑ni,
ndꞌai̱ to̱ koi̱jna cha̱sín‑ní kꞌoa̱ lìkoi ti̱ koa̱n koi̱nókjoa̱‑ni,
jo saꞌnda nga koi̱chò ni̱chrjin nga koi̱tjosòn kjoa̱ jè,
nga̱ lìkoi kàmakjaín‑lì jè én‑na̱,
jña‑nile̱ xi kꞌoa̱sꞌìn koi̱tjosòn kꞌia̱ nga koi̱chò ni̱chrjin‑le̱.
21 Kꞌoa̱ jè chjo̱ta̱‑nkjìn tjiókoya‑le̱ Zacarías,
kꞌoa̱ to̱ koanxkón‑le̱ nga koan‑tseyà‑le̱ ya̱ ya yo̱ngo̱.
22 To̱nga kꞌia̱ nga kitjo‑ni,
lìkoi ti̱ koan kinchja̱kao̱‑ni chjo̱ta̱;
kꞌoa̱ jè chjo̱ta̱‑nkjìn koan‑cho̱ya‑le̱ nga tjín xi tsabe ya̱ ya yo̱ngo̱.
Kꞌoa̱ jè,
to̱ ntsja kisìkjan nga tsakjákao̱,
kꞌoa̱ to̱ tsakꞌèjna cha̱sín.
23 Kꞌoa̱ kꞌia̱ nga je kisikitjosòn xá na̱ꞌmi‑le̱ jotjín ni̱chrjin tsꞌakao̱‑le̱,
ki‑ni ndꞌia‑le̱.
24 Kꞌia̱ nga je jaꞌato ni̱chrjin xo̱kjoan,
Elisabet jè chjo̱on‑le̱ Zacarías ꞌndí kisꞌejnayaꞌma‑le̱,
kꞌoa̱ aòn sá nga to̱ ya̱ tsakꞌèjnaꞌya nꞌión ndꞌia‑le̱,
kitsò:
25 —Kꞌoa̱a kisꞌin jè Nai‑ná xi tꞌatsꞌa̱n,
ni̱chrjin nga koanme‑le̱ nga tsakjaꞌáxìn‑na jè kjoa̱soa xi tìjna̱jiàn ngixko̱n chjo̱ta̱.
Én xi kitsjoa jè cho̱ꞌnda ngꞌajmi xi tꞌatsꞌe̱ nga jtsín Jesús
26 Xi koan‑ni jaon sá nga tjiáꞌma‑le̱ ꞌndí Elizabet,
Niná kisikasén ya̱ na̱xi̱nandá‑nꞌión Nazaret jè cho̱ꞌnda ngꞌajmi xi Gabriel ꞌmì,
jngo na̱xi̱nandá‑nꞌión xi ꞌnde Galilea nchja̱‑ni,
27 kisikasén‑kon‑le̱ jngo tsòti xo̱ngó xi je tjínꞌión‑le̱ kjoa̱bixan kao̱ jngo chjo̱ta̱ xꞌi̱n xi José ꞌmì,
xi ntje̱‑le̱ David tje̱n‑ni,
kꞌoa̱ María ꞌmì jè tsòti xo̱ngó.
28 Kꞌia̱ nga jaꞌasꞌen jè cho̱ꞌnda ngꞌajmi ya̱ jña tíjna jè tsòti xo̱ngó,
kitsò:
—ꞌNda‑lì ꞌndí chjo̱on,
ji xi tse kjoa̱nda kàtsjoá‑lì Niná.
Jè Nai‑ná tíjnakao̱‑lì;
jó to̱nda‑lì ya̱ ngixko̱n Niná,
ya̱ jin‑le̱ yánchjín.
29 To̱nga jè tsòti xo̱ngó,
kꞌia̱ nga tsabe jè cho̱ꞌnda ngꞌajmi ñaki chixojeèn kjoa̱faꞌaitsjen‑le̱ xi tꞌatsꞌe̱ én xi tsakjákao̱,
kꞌoa̱ kisikꞌaitsjen jmé kjoa̱nìtìꞌnda‑ni jè.
30 Kꞌia̱ jè cho̱ꞌnda ngꞌajmi kitsò‑le̱:
—María,
alì bijkon‑jìn,
nga̱ kjoa̱nda kàsokó‑lì ya̱ ngixko̱n Niná.
31 Kꞌoa̱ ndꞌai̱,
jngo ꞌndí kꞌoa̱njcháya ya̱ ya ndsꞌoai,
kꞌoa̱ sꞌe̱e jngo‑lì ꞌndí xꞌi̱n xi JESÚS kꞌoín‑lai̱.
32 Kꞌoa̱ jè nꞌión ngꞌa kꞌoéjna,
kꞌoa̱ ꞌNdí‑le̱ Niná xi Nꞌión Ngꞌa Tíjna kꞌoín;
kꞌoa̱ jè Nai‑ná Niná tsjoá‑le̱ nga jè koa̱texoma ngajao‑le̱ David,
chjo̱ta̱ jchínga‑le̱;
33 kꞌoa̱ jè koa̱tèxoma‑le̱ to̱kꞌia saꞌnda ntje̱‑le̱ Jacob,
kꞌoa̱ lìkꞌia kjoe̱tꞌa nga koa̱tèxoma.e
34 Kꞌia̱ María kitsò‑le̱ jè cho̱ꞌnda ngꞌajmi:
—Jókoa̱n‑ni nga kꞌoa̱koa̱n kjoa̱ jè,
nga̱ kje sa xꞌi̱n kàjonjìn‑na.
35 Kinchja̱ jè cho̱ꞌnda ngꞌajmi,
kitsò‑le̱:
—Jé Sén Ni̱chrjin Tsje kjoa̱ꞌaíjen‑nèlì,
kꞌoa̱ jè nganꞌión‑le̱ Xi Nꞌión Ngꞌa Tíjna kꞌoe̱ejtsanè‑lì kao̱ ngꞌián‑le̱;
kꞌoa̱ koiì nga jè ꞌndí xi jtsín Niná skoétꞌaxìn,
kꞌoa̱ ꞌNdí‑le̱ Niná kꞌoín.
36 Kꞌoa̱ koe̱e‑ni,
Elisabet jè chjo̱on xìngi̱,
kꞌoa̱ati̱ ꞌndí yꞌa,
nda tsà je chjo̱on jchínga;
kꞌoa̱ ndꞌai̱ je fì‑le̱ jaon sá nga tjiáꞌma‑le̱ ꞌndí,
jè xi chjo̱on ꞌndi̱ tsakꞌìn‑le̱;
37 nga̱ lìkoi jme xi tjín xi Niná lìkoi koa̱n‑le̱ kꞌoa̱sꞌiìn.f
38 Kꞌia̱ María kitsò:
—I̱i tìjna̱,
xi chjo̱on cho̱ꞌnda‑le̱ Nai‑ná ma;
kꞌoa̱ kàtama xi kao̱ an jo kjoàsꞌìn tsò én xi kànokjoai̱.
Kꞌoa̱ jè cho̱ꞌnda ngꞌajmi ki‑ni.
María kise‑le̱ Niná
39 Kꞌia̱ nga koi ni̱chrjin,
María kitjo ndꞌia‑le̱,
kjitꞌanangi ki ya̱ jngo na̱xi̱nandá‑nꞌión xi tíjna ya̱ ꞌnchò nindo,
xi nchja̱‑ni ꞌnde Judá;
40 kꞌoa̱ jaꞌasꞌen ya̱ ndꞌia‑le̱ Zacarías,
kꞌoa̱ kisitìꞌnda Elisabet.
41 Kꞌoa̱ kꞌia̱ nga kinchrꞌoé Elisabet jè kjoa̱nìtìꞌnda‑le̱ María,
jè ꞌndí‑le̱ Elisabet nꞌión kisikjan ya̱ tsꞌoa̱;
kꞌoa̱ ñaki to̱jè Sén Ni̱chrjin Tsje tsakatéxoma‑jin ni̱ma̱‑le̱ Elisabet,
42 kꞌoa̱ nꞌión kinchja̱ Elisabet,
kitsò:
—Jó to̱nda‑lì ji ya̱ ngixko̱n Niná,
ya̱ jin‑le̱ ngatsꞌi yánchjín,
kꞌoa̱ jó to̱nda‑le̱ ya̱ ngixko̱n Niná jè ꞌndí xi kjimajcháya ndsꞌoai.
43 Án‑ni nga an bꞌaì‑nina kjoa̱nda jè,
nga jè na̱‑le̱ Nai‑na̱ jaꞌaikòn‑na.
44 Nga̱ to̱ maà kàkaya chrjoa̱ñoa kjoa̱nìtìꞌnda‑li̱,
jè ꞌndí‑na̱ kao̱o kjoa̱tsjoa nꞌión kàsíkjan ya̱ ya ndsꞌoa.
45 Kꞌoa̱ jó to̱nda‑lì ji ya̱ ngixko̱n Niná nga koa̱n‑kjaín‑lì,
nga̱ koi̱tjosòn jè én xi kisikasén‑lì Nai‑ná.
46 Kꞌia̱ María kitsò:g
Jè kjoa̱bijnachon‑na̱ nꞌión jeya síkꞌéjna Niná;
47 Kꞌoa̱ jè sén ni̱chrjin‑na̱ matsjoaà‑le̱ tꞌatsꞌe̱ Niná Jè Xi Bꞌasjentjaì‑na.
48 Nga̱ kiskòtsen‑na,
an xi chjo̱on cho̱ꞌnda‑le̱ ma,
xi nangi tìjna̱;
Nga̱ koe̱e‑ni,
bꞌétsꞌia̱‑ni ndꞌai̱ nga “jó to̱nda‑lì ngixko̱n Niná” koi̱tso̱‑na ngantsjaì ngatsꞌi chjo̱ta̱.
49 Nga̱ nꞌión tse kjoa̱xkón xi kisꞌin xi kao̱ an Jè Xi Nꞌión Tse Nganꞌión Tjín‑le̱;
Jè Nꞌión Xkón Tíjna,
50 Kꞌoa̱ jè kjoa̱ma̱tokòn‑le̱ machjo̱tseyaà kao̱ chjo̱ta̱ xi kisꞌe ngasꞌa̱,
kao̱ xi tjín ndꞌai̱ kꞌoa̱ kao̱ xi sꞌa̱ nchroá
Jè xi jè tsokjón‑ke.
51 Kao̱ nganꞌión‑le̱ tsakakó kjoa̱xkón;
Tsakꞌétsaoba jè xi ngꞌakon tjió kjoa̱faꞌaitsjen‑le̱.
52 Tsakjáꞌa‑le̱ xá‑le̱ jè chjo̱ta̱xá xi tse nganꞌión tjín‑le̱,
To̱nga ngꞌa kisikatió jè xi nangi tjió ni̱ma̱‑le̱.
53 Jè xi bao‑le̱ kisiski‑ni kao̱ nꞌión tse kjoa̱nda,
To̱nga jè xi chjo̱ta̱ nchi̱ná kꞌia̱ nga ki‑ni to̱ kisikasén kjitia‑ni.
54 Tsakasèn‑kao̱ jè chjo̱ta̱ Israel xi cho̱ꞌnda‑le̱ ma,
Kꞌia̱ nga jaꞌaitsjen‑le̱ tꞌatsꞌe̱ kjoa̱ma̱tokòn
55 Xi tsakjákao̱ chjo̱ta̱ jchínga‑ná,
Abrahamh kao̱ ntje̱‑le̱,
to̱kꞌia saꞌnda‑ni.
56 Kꞌoa̱ jè María jàn‑la̱ sá ya̱ tsakꞌèjnakao̱ Elisabet;
kꞌoa̱ xi je koan ki‑ni ndꞌia‑le̱.
Kꞌia̱ nga kitsin Juan xi Kanísꞌen‑ngindá
57 Kꞌia̱ nga kichò ni̱chrjin‑le̱ nga jtsín ꞌndí‑le̱ Elisabet,
jngo ꞌndí xꞌi̱n kisꞌe‑le̱.
58 Kꞌoa̱ kꞌia̱ nga kinchrꞌoé chjo̱ta̱ ndai ndꞌia‑le̱ kao̱ xínkjín,
nga Niná tse kjoa̱ma̱tokòn‑le̱ tsakakó‑le̱,
kisitsjoakao̱ Elisabet.
59 Kꞌoa̱koan kꞌia̱ nga koan jin‑ni ni̱chrjin jaꞌaikao̱ jè ꞌndí nga jtí tji‑le̱;i
kꞌoa̱ jè chjo̱ta̱ tsakꞌétsꞌia̱kao̱ nga kao̱ jaꞌaín‑le̱ nꞌai‑le̱ kinchja̱‑le̱,
Zacarías tjiótsò‑le̱;
60 to̱nga kinchja̱ jè na̱‑le̱ ꞌndí,
kitsò:
—Mai;
Juan kꞌoín.
61 Kꞌia̱ jè chjo̱ta̱ kitsò‑le̱:
—Án‑ni nga kꞌoa̱kꞌoín‑síni,
nga̱ tsìꞌya xìngi̱ xi kꞌoa̱ ꞌmì.
62 Kꞌoa̱ kꞌia̱ kao̱ ntsja kiskònangi‑nile̱ nꞌai‑le̱ ꞌndí,
jósꞌìn me‑le̱ nga kꞌoín.
63 Kꞌoa̱ kꞌia̱ kisijé jngo yáte ꞌndí xi kiskijòn jngo jaꞌaín xi tsò:
“Juan ꞌmì”.
Kꞌoa̱ ngatsꞌi chjo̱ta̱ ñaki to̱kꞌoa̱a koan‑le̱.
64 Kꞌoa̱ kjoan kitjoꞌaì tsꞌoa kꞌoa̱ kisꞌejnandaí ni̱je̱n,
kꞌoa̱ kinchja̱ nga kitsjoa‑le̱ kjoa̱nda Niná.
65 Kꞌoa̱ nꞌión kitsokjòn ngatsꞌi chjo̱ta̱ ndai ndꞌia‑le̱;
kꞌoa̱ ngakijndà ꞌnchò nindo xi ꞌnde Judea nchja̱‑ni,
kisòn én xi tꞌatsꞌe̱ kjoa̱ jè.
66 Kꞌoa̱ ngatsꞌi xi kinchrꞌoé kjoa̱ jè tsakatiótjaò‑jin ni̱ma̱‑le̱,
kitsò:
«ꞌYá‑ni tsòkꞌoa̱ jè ꞌndí xo̱kji».
Kꞌoa̱ jè nganꞌión‑le̱ Niná ya̱a tsakꞌèjnakao̱ ngantsjaì jè ꞌndí.
Én xi Zacarías kinchja̱ya ngajao‑le̱ Niná
67 Kꞌoa̱ Zacarías jè nꞌai‑le̱ ꞌndí,
ñaki to̱ jé Sén Ni̱chrjin Tsje tsakatéxoma‑jin ni̱ma̱‑le̱,
kꞌoa̱ kinchja̱ya ngajao‑le̱ Niná,
kitsò:
68 «Kjoa̱nda kàtasꞌe‑le̱ jè Nai‑ná Niná‑le̱ chjo̱ta̱ Israel,
Nga jaꞌai kòtsen‑le̱,
kꞌoa̱ nga jaꞌai kisikatióndaì chjo̱ta̱‑le̱,
69 Kꞌoa̱ kiskomitje̱n jngo‑ná xi nꞌión tse nganꞌión tjín‑le̱ Jè Xi Bꞌasjentjaì‑ná,
Xi ya̱ ntje̱‑le̱ David tje̱n‑ni,
jè xi cho̱ꞌnda‑le̱ ma,
70 Josꞌìn kinchja̱ Niná
Nga kisichjén tsꞌoa ngatsꞌi chjo̱ta̱ xi kiskoétꞌaxìn,
xi kinchja̱ya ngajao‑le̱ saꞌnda nga kitsꞌia soꞌnde;
71 Nga kꞌoa̱sjentjaì‑ná tꞌatsꞌe̱ chjo̱ta̱ xi tsì nda fìkao̱‑ná,
Kao̱ tꞌatsꞌe̱ ngatsꞌi xi chꞌaoke‑ná;
72 Nga̱ kꞌoa̱asꞌìn bakó kjoa̱ma̱tokòn xi kisꞌe‑le̱ kao̱ chjo̱ta̱ jchínga‑ná,
Kꞌoa̱ nga jaꞌaitsjen‑le̱ tꞌatsꞌe̱ kjoa̱ xi tsakꞌénꞌión xi tsꞌe̱;
73 Josꞌìn nga Niná kitsjoa‑le̱ tsꞌoa Abraham chjo̱ta̱ jchínga‑ná,
Nga kitsò nga jè tsjoá‑ná
74 Nga tsì tsà kao̱ kjoa̱jkon si̱xá‑nile̱e,
Kꞌia̱ nga je si̱ikatióndaí‑ná tꞌatsꞌe̱ xi tsì nda fìkao̱‑ná
75 Nga to̱sa si̱xá‑le̱e kao̱ kjoa̱kìxi̱ ya̱ ngixko̱n,
Nga je kiskoétꞌaxìn‑ná,
jotjín ni̱chrjin koi̱yochoaàn.
76 Kꞌoa̱ ji ꞌndí,
kꞌoa̱a kꞌoín‑lì nga ji‑jìn chjo̱ta̱ xi nchja̱ya ngajao‑le̱ Niná Xi Nꞌión Ngꞌa Tíjna;
Nga̱ jiì kꞌoín títjòn‑lai̱ Niná,
nga kjoánda‑lai̱ ngayije ndia̱a‑le̱;j
77 Jmé‑ni nga koi̱nókjoa̱ya‑nilai̱ tꞌatsꞌe̱ kjoa̱bitjontjaì jè chjo̱ta̱‑le̱,
Jmé‑ni nga jcha̱tꞌa‑nile̱ jé‑le̱.
78 »Xi to̱ tꞌatsꞌe̱ nga nꞌión tse kjoa̱ma̱tokòn‑le̱ Niná‑ná
Koiì nga ngꞌajmi kàfaꞌai‑ni nga kàfaꞌaikon‑ná,
jè xi joni jngo lꞌí xi sí-isen nga nchroá sꞌe sén,
79 Jmé‑ni nga si̱i-isen‑nile̱ jè chjo̱ta̱ xi kjoa̱njiònk kꞌoa̱ kao̱ xi ya̱ ngi ngꞌián‑le̱ kjoa̱biya tjiósíjchá‑jin yao‑le̱;
Kꞌoa̱ jmé‑ni nga si̱ikinchá yandia̱a ndso̱koá ya̱ ndia̱a‑le̱ kjoa̱nchꞌán».
80 Kꞌoa̱ jè ꞌndí koanjchínga,
kꞌoa̱ kisꞌe‑le̱ nganꞌión jè sén ni̱chrjin‑le̱;
kꞌoa̱ ya̱ tsakꞌèjna jña tjín ꞌnde tꞌaxìn‑tꞌa jo saꞌnda nga kichò ni̱chrjin‑le̱ nga tsakakó xá‑le̱ ya̱ jin‑le̱ chjo̱ta̱ Israel.