Kꞌia̱ nga kitsin Jesús
2
Kꞌoa̱koan kꞌia̱ nga koi ni̱chrjin,
nga jè Augusto César,
chjo̱ta̱xá títjòn‑le̱ Roma,
jngo kjoa̱téxoma tsakꞌasje nga kàtasꞌeya xo̱n ngatsꞌi chjo̱ta̱ ngakijndà ꞌnde jña nga jè batéxoma,
jmé‑ni nga kꞌoe̱etsꞌia̱kao̱‑ni nga kꞌoeèchjí tao̱n basen.
2 Jè kjoa̱sꞌeyaxo̱n jè,
kꞌia̱a kꞌoa̱koan títjòn kꞌia̱ nga jè Cirenio tíbatéxoma ya̱ ꞌnde Siria.
3 Kꞌoa̱ ki ngatsꞌi chjo̱ta̱ nga kikáyaxo̱n yao‑le̱ nga jngó jngó,
ya̱ na̱xi̱nandá jña tsꞌe̱ chjo̱ta̱ jchínga‑le̱.
4 Kꞌoa̱ José kao̱ María tsitjo‑ni ya̱ na̱xi̱nandá‑nꞌión Nazaret,
xi nchja̱‑ni ya̱ ꞌnde Galilea kꞌoa̱ kimi ya̱ na̱xi̱nandá‑le̱ David jña‑ni nga Belén ꞌmì,
xi nchja̱‑ni ꞌnde Judea,
koiì nga ya̱ tsꞌe̱ xínkjín kꞌoa̱ nga ntje̱‑le̱ David tje̱n‑ni;
5 jmé‑ni nga sꞌe̱yaxo̱n‑ni José kao̱ María chjo̱on‑le̱ nga je tjínꞌión‑le̱ kjoa̱bixan,
kꞌoa̱ María jeè ꞌndí yꞌa.
6 Kꞌoa̱koan kꞌia̱ nga tjió ya̱ na̱xi̱nandá‑nꞌión Belén,
kichò ni̱chrjin‑le̱ nga jtsín ꞌndí‑le̱.
7 Kꞌoa̱ kitsin ꞌndí tjòn‑le̱ xi ꞌndí xꞌi̱n,
kꞌoa̱ kisikájtéjin najño,
kꞌoa̱ kisikájnaya ya̱ kàxa̱ jña kjènya cho̱,
nga̱ lìkoi kisoko‑le̱ ꞌnde ya̱ ndꞌia jña síkjáya chjo̱ta̱.
Jè cho̱ꞌnda ngꞌajmi kitsòya nga kitsin Jesús
8 Ya̱ ꞌnde jè,
tjió chjo̱ta̱ xi barrè koꞌnda,
xi tjiókòn,
nga̱ nꞌión nda tjiósíkoìnda̱ barrè‑le̱ nga koi ni̱tje̱n.
9 To̱ i̱i koan jaꞌai kasènjna basen jngo cho̱ꞌnda ngꞌajmi‑le̱ Niná,
kꞌoa̱ jè kjoa̱jeya‑le̱ Niná kisí-isen‑le̱ nga jngotjondai‑le̱ ya̱ ꞌnde jña tjió;
kꞌoa̱ nꞌión kitsokjòn.
10 To̱nga jè cho̱ꞌnda ngꞌajmi kitsò‑le̱:
—Alì bijkon‑jiòn;
nga̱ koiì xi jaꞌai̱xinya‑no jè én nda xi tjín‑le̱ kjoa̱tsjoa,
xi tsꞌe̱ koa̱n ngatsꞌi chjo̱ta̱ judío:
11 Nga jeè kàtsin‑no ndꞌai̱,
ya̱ na̱xi̱nandá‑le̱ David,
jngo Xi Bꞌasjentjaì,
Jè Xi Niná Kisikasén xi Nai‑ná ma.
12 Kꞌoa̱ koiì jè xi choa̱ koa̱n‑no:
Koa̱nsjai‑no jè ꞌndí xi kijnajtéjin najño,
xi ya̱ kijnaya kàxa̱ jña kjènya cho̱.
13 Ti̱kꞌia̱‑ni nga tínchja̱ nꞌión nkjìn‑sa cho̱ꞌnda ngꞌajmi koan‑tsen xi jaꞌaikinchatꞌa‑le̱,
nga tjióbꞌasjejeya Niná,
kꞌoa̱ tjiótsò:
14 «Kàtasꞌe‑le̱ kjoa̱jeya Niná jña saꞌnda fetꞌa‑ni ngꞌajmi,
Kꞌoa̱ i̱ soꞌnde kàtasꞌe kjoa̱chꞌán,
ya̱ jin‑le̱ chjo̱ta̱ xi tjín‑le̱ kjoa̱nda‑le̱ Niná».
15 Kꞌoa̱ kꞌia̱ nga jè cho̱ꞌnda ngꞌajmi xi nꞌión nkjìn ma‑ni ki‑ni ya̱ ngꞌajmi,
jè chjo̱ta̱ xi koꞌnda barrè kitsò‑le̱ xínkjín:
—Tjián saꞌnda Belén,
tjian chòtsen‑le̱e jme kjoa̱ xi kàma,
xi Niná je kàbakó‑ná.
16 Kjitꞌanangi kinchroa,
kꞌoa̱ koansjai‑le̱ María kao̱ José kao̱ jè ꞌndí xi ya̱ kijnaya ya̱ kàxa̱ xi kjènya cho̱.
17 Kꞌia̱ nga tsabe jè ꞌndí,
kitsòya‑le̱ ngatsꞌi chjo̱ta̱ jme‑ni xi tsakꞌìn‑le̱ tꞌatsꞌe̱ jè ꞌndí.
18 Kꞌoa̱ ngatsꞌi xi kinchrꞌoé,
ñaki to̱kꞌoa̱a koan‑le̱ tꞌatsꞌe̱ kjoa̱ xi kitsò‑le̱ jè chjo̱ta̱ xi koꞌnda barrè.
19 To̱nga jè María tsakꞌéjin‑kon ngayije kjoa̱ jè,
nga kisikjaꞌaitsjen ya̱ ji̱n ni̱ma̱‑le̱.
20 Kꞌoa̱ ki‑ni jña kinchroa‑ni jè chjo̱ta̱ xi koꞌnda barrè,
tjióbꞌasjejeya kꞌoa̱ tjióbꞌasjengꞌa Niná tꞌatsꞌe̱ ngayije kjoa̱ xi kinchrꞌoé kao̱ xi tsabe,
josꞌìn nga jè cho̱ꞌnda ngꞌajmi kitsò‑le̱.
Kꞌia̱ nga tsangìkao̱ títjòn Jesús ya̱ nditsin‑le̱ yo̱ngo̱
21 Kꞌia̱ nga kichò‑le̱ jin ni̱chrjin ꞌndí nga jtí tji‑le̱,a
Jesús tsakꞌìn‑le̱,
koiì jaꞌaín xi jè cho̱ꞌnda ngꞌajmi kitsjoa‑le̱ nga to̱ngi‑ni nga kjesa sꞌe̱jnayaꞌma ya̱ tsꞌoa̱ na̱‑le̱.
22 Kꞌoa̱ kꞌia̱ nga jè xijchá‑le̱ koanjngo‑le̱ ni̱chrjin tꞌatsꞌe̱ nga kisikitjosòn nga koa̱n‑tsje yao‑le̱ ngixko̱n Niná,b
josꞌìn bꞌénè jè kjoa̱téxoma‑le̱ Niná xi kiski Moisés,
jaꞌaikao̱ ꞌndí ya̱ Jerusalén jmè‑ni nga kisintsjatꞌa‑ni Niná
23 (Josꞌìn tjítꞌa jè kjoa̱téxoma‑le̱ Niná:
«Ngatsꞌi ꞌndí xꞌi̱n xi títjòn jtsín,
kꞌoa̱a kꞌoín nga jè xi Niná kiskoétꞌaxìn»c),
24 kꞌoa̱ jmé‑ni nga tsjoátꞌa jme xi bꞌénè jè kjoa̱téxoma‑le̱ Niná xi kiski Moisés:
Jngo ngà to̱nia̱ axo̱ jaò ni̱se chroa.d
25 Kꞌoa̱ kꞌia̱ nga koi ni̱chrjin ya̱ Jerusalén tíjna jngo chjo̱ta̱ xi Simeón ꞌmì,
xi jè Sén Ni̱chrjin Tsje je jaꞌainè‑le̱,
kꞌoa̱ jè chjo̱ta̱ xo̱kji kìxi̱‑ní kꞌoa̱ bexkón Niná,
tíkoya‑le̱ nga Niná kꞌoa̱sjentjaì na̱xi̱nandá‑je Israel.
26 Kꞌoa̱ jè Sén Ni̱chrjin Tsje tsakakó‑le̱ nga tsì koi̱yá to̱ngi‑ni nga skoe̱‑ni kao̱ xko̱n Jè Xi Nai‑ná Kiskoéjin.
27 Kꞌoa̱ jè Sén Ni̱chrjin Tsje kisixájin ni̱ma̱‑le̱,
jaꞌai ya̱ nditsin‑le̱ yo̱ngo̱.
Kꞌoa̱ kꞌia̱ nga jè xijchá‑le̱ Jesús jaꞌai‑kao̱ ya̱ nditsin‑le̱ yo̱ngo̱,
jmé‑ni nga si̱ikitjosòn‑ni tꞌatsꞌe̱ ꞌndí jotsò xi bꞌénè jè kjoa̱téxoma‑le̱ Niná xi kiski Moisés,
28 jè Simeón kiskoé ꞌndí,
tsakꞌéyachrja kꞌoa̱ tsakꞌasjejeya Niná,
kitsò:
29 «Ndꞌai̱,
Nai,
jeè tìbꞌaínde‑naí,
an,
cho̱ꞌnda‑li̱ nga nchꞌán kàtamꞌen,
Jotsò én xi tsakꞌaì‑naí;
30 Nga̱ jeè kàꞌbe‑nia kao̱ xkoan jè xi ji kanìkasaín xi kꞌoa̱sjentjaì‑naji̱n,
31 Jè kjoa̱bitjontjaì xi ji tsakꞌèjnandai ya̱ ngixko̱n ngatsꞌi na̱xi̱nandá;
32 Jè‑ní lꞌí xi si̱i-isen‑le̱ chjo̱ta̱ xi tsì tsà judío‑jìn,e
Kꞌoa̱ kjoa̱jeya‑le̱ na̱xi̱nandá‑li̱ Israel».
33 Kꞌoa̱ nꞌai‑le̱ kao̱ na̱‑le̱ ñaki to̱kꞌoa̱a koan‑le̱ jme xi to̱ kitsò Simeón xi tꞌatsꞌe̱ ꞌndí.
34 Kꞌoa̱ jè Simeón kisichikon‑tꞌain,
kꞌoa̱ kitsò‑le̱ María na̱‑le̱ ꞌndí:
—Koe̱e‑ni,
jè ꞌNdí xo̱kji kinìkasén xi tꞌatsꞌe̱ nga nkjìn xi kjoa̱bitjontjaì koa̱n‑le̱ kꞌoa̱ nkjìn xi kjoa̱ñꞌain koa̱n‑le̱ i̱ Israel,
kꞌoa̱ jè choa̱a koa̱n,
kꞌoa̱ nkjìn chjo̱ta̱ kꞌoe̱etꞌa‑le̱
35 jmé‑ni nga jcha̱sòn‑tsen‑nile̱ jè kjoa̱faꞌaìtsjen xi tjín jin ni̱ma̱‑le̱ chjo̱ta̱ (kꞌoa̱ joni tsà jngo ki̱cha̱ndo kjoa̱ꞌatokjá ya̱ jin ni̱ma̱‑li̱).
36 Kꞌoa̱ti̱ ya̱ tíjna Ana,
jè chjo̱on xi nchja̱ya ngajao‑le̱ Niná,
tsòti‑le̱ Fanuel jè xi ntje̱‑le̱ Aser,
jeè nꞌión chjo̱on jchínga.
Kꞌia̱nga chixàn nga sꞌa̱ tsòti xo̱ngó to̱ ñatoò nó tsakꞌèjnakao̱ xꞌi̱n‑le̱,
37 kꞌoa̱ jeè ñokan kao̱‑ni ño nó nga chjo̱on kꞌàn;
kꞌoa̱ lìkoi tsakasènxìn‑le̱ ya̱ nditsin‑le̱ yo̱ngo̱ nga kisixá‑le̱ Niná nga ni̱chrjin kao̱ nga ni̱tje̱n,
kꞌoa̱ ngatsjaì ni̱chrjin nga tsakꞌèjna‑nchjan xi tꞌatsꞌe̱ Niná kꞌoa̱ tsakjákao̱.
38 Kꞌoa̱ jè chjo̱on xo̱kji kꞌoa̱ti̱ koi choa̱ jaꞌai,
kitsjoá‑le̱ kjoa̱nda Niná,
kꞌoa̱ tsakjákao̱ xi tꞌatsꞌe̱ ꞌndí ngatsꞌi xi tjiókoya‑le̱ kjoa̱bitontjaì ya̱ Jerusalén.
Kꞌia̱ nga ki ngìndia‑ni ya̱ Nazaret
39 Kꞌia̱ nga jè xijchá‑le̱ ꞌndí je kisikitjosòn ngayije jme xi bꞌénè jè kjoa̱téxoma‑le̱ Niná xi kiski Moisés,
ki ngìjngokꞌà‑ni kao̱ ꞌndí ya̱ na̱xi̱nandá‑le̱ ya̱ Nazaret,
xi ya̱ ꞌnde Galilea nchja̱‑ni.
40 Kꞌoa̱ jè ꞌndí koan‑jchínga‑sa kꞌoa̱ kisꞌe sa‑le̱ nganꞌión,
kꞌoa̱ nꞌión kisꞌe sa‑le̱ kjoa̱‑isen‑tokòn;
kꞌoa̱ jè kjoa̱nda‑le̱ Niná ya̱a tsakꞌèjnakao̱.
Kꞌia̱ nga Jesús koansjai ya̱ nditsin‑le̱ yo̱ngo̱
41 Jè xijchá‑le̱ Jesús xki̱ nó fì ya̱ Jerusalén kꞌia̱ nga bitjo jè sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío;f
42 kꞌoa̱ kꞌia̱ nga Jesús kichò‑le̱ tejaò nó,
kimi kao̱ xijchá‑le̱ ya̱ Jerusalén josꞌìn be‑ni tꞌatsꞌe̱ sꞌoí jè‑bi̱.
43 Kꞌia̱ nga je jetꞌa sꞌoí ki‑ni xijchá‑le̱,
kꞌoa̱ Jesús tsakꞌèjna ya̱ Jerusalén,
to̱nga José kao̱ María lìkoi tjiójin‑le̱.
44 Kꞌoa̱ kꞌoa̱sꞌìn kisikꞌaitsjen nga ya̱ tje̱njin‑le̱ chjo̱ta̱ xi ya̱ ñatje̱n tje̱n,
jngo ni̱chrjin tsakꞌèma;
kꞌoa̱ tsakásjaitꞌa‑le̱ xínkjín kao̱ xi bexkon;
45 to̱nga kꞌia̱ nga tsì koansjai‑le̱,
ki ngìjngokꞌà ya̱ Jerusalén nga tjióbásjai.
46 Kꞌoa̱ xi koan‑ni jàn ni̱chrjin koansjai‑le̱ ya̱ nditsin‑le̱ yo̱ngo̱,
ya̱ tíjnajin basen‑le̱ ngatsꞌi chjo̱ta̱ xi bakóya kjoa̱téxoma‑le̱ Niná xi kiski Moisés,
tínchrꞌoé‑le̱,
kꞌoa̱ tíkjònangi‑le̱.
47 Kꞌoa̱ ngatsꞌi xi tjiónchrꞌoé‑le̱,
to̱kꞌoa̱a kjima‑le̱ tꞌatsꞌe̱ kjoa̱nkjìn‑tokòn‑le̱ kꞌoa̱ josꞌìn nga nchja̱.
48 Kꞌia̱ nga xijchá‑le̱ tsabe,
to̱kꞌoa̱a koa̱n‑le̱;
kꞌoa̱ na̱‑le̱ kitsò‑le̱:
—ꞌNdí,
án‑ni nga kꞌoa̱ kinìkao̱-síni-naíji̱n.
Koe̱e‑ni,
nꞌai‑li̱ kao̱ an,
kao̱o kjoa̱ba tifasjailaì‑ji̱n.
49 Kꞌia̱ jè kitsò‑le̱:
—Án‑ni nga an tifasjai‑ninaó.
A tsí ꞌyao nga machjén nga ya̱ xá‑le̱ Nꞌai‑na̱ koàte̱jnajian.
50 To̱nga jè xijchá‑le̱ lìkoi koan‑cho̱ya‑le̱ jè én xi tsakjákao̱.