Én nda‑le̱ Jesucristo josꞌìn kiski
Mateo
Jaꞌaín‑le̱ chjo̱ta̱ jchínga‑le̱ Jesús
1
I̱i tjiótꞌa i̱ jaꞌaín‑le̱ jè chjo̱ta̱ jchínga‑le̱ Jesucristo,
xi ntje̱‑le̱ David kitje̱n‑ni,
xi ntje̱‑le̱ Abraham kitje̱n‑ni.
2 Abraham jé xi nꞌai‑le̱ Isaac koan,
Isaac jé xi nꞌai‑le̱ Jacob koan,
Kꞌoa̱ Jacob nꞌai‑le̱ Judá koan kao̱ tsꞌe̱ ngatsꞌi ndsꞌe̱.
3 Judá jé xi nꞌai‑le̱ Fares kao̱ Zara koan,
kꞌoa̱ Tamar tsakꞌìn na̱‑le̱.
Fares jé xi nꞌai‑le̱ Esrom koan,
Kꞌoa̱ Esrom jé xi nꞌai‑le̱ Aram koan.
4 Aram jé xi nꞌai‑le̱ Aminadab koan.
Aminadab jé xi nꞌai‑le̱ Naasón koan,
Kꞌoa̱ Naasón jé xi nꞌai‑le̱ Salmón koan.
5 Salmón jé xi nꞌai‑le̱ Booz koan,
kꞌoa̱ Rahab tsakꞌìn na̱‑le̱,
Kꞌoa̱ Booz jé xi nꞌai‑le̱ Obed koan,
kꞌoa̱ Rut tsakꞌìn na̱‑le̱,
Obed jé xi nꞌai‑le̱ Isaí koan.
6 Isaí jé xi nꞌai‑le̱ David koan,
xi chjo̱ta̱xá ngajko̱ koan,
Kꞌoa̱ jé chjo̱ta̱xá ngajko̱ David jé xi nꞌai‑le̱ Salomón koan,
kꞌoa̱ jè xi chjo̱on‑le̱ Urías koan tsàkai jé xi na̱‑le̱ Salomón koan.
7 Salomón jé xi nꞌai‑le̱ Roboam koan,
Roboam jé xi nꞌai‑le̱ Abías koan,
Kꞌoa̱ Abías jé xi nꞌai‑le̱ Asa koan.
8 Asa jé xi nꞌai‑le̱ Josafat koan,
Josafat jé xi nꞌai‑le̱ Joram koan,
Kꞌoa̱ Joram jé xi nꞌai‑le̱ Uzías koan.
9 Uzías jé xi nꞌai‑le̱ Jotam koan,
Jotam jé xi nꞌai‑le̱ Acaz koan,
Kꞌoa̱ Acaz jé xi nꞌai‑le̱ Ezequías koan.
10 Ezequías jé xi nꞌai‑le̱ Manasés koan,
Manasés jé xi nꞌai‑le̱ Amón koan,
Kꞌoa̱ Amón jé xi nꞌai‑le̱ Josías koan.
11 Josías jé xi nꞌai‑le̱ Jeconías koan kao̱ tsꞌe̱ ngatsꞌi ndsꞌe̱,
kꞌia̱ ni̱chrjin nga tsangìkao̱ kjoa̱nꞌión chjo̱ta̱ judío ya̱ na̱xi̱nandá‑je Babilonia.a
12 Xi koan‑skan‑ni nga je tsangìkao̱ kjoa̱nꞌión chjo̱ta̱ judío ya̱ na̱xi̱nandá‑je Babilonia,
Jeconías jé xi nꞌai‑le̱ Salatiel koan.
Kꞌoa̱ Salatiel jé xi nꞌai‑le̱ Zorobabel koan.
13 Zorobabel jè xi nꞌai‑le̱ Abiud koan,
Abiud jé xi nꞌai‑le̱ Eliaquim koan,
Kꞌoa̱ Eliaquim jé xi nꞌai‑le̱ Azor koan.
14 Azor jé xi nꞌai‑le̱ Sadoc koan,
Sadoc jé xi nꞌai‑le̱ Aquim koan,
Kꞌoa̱ Aquim jé xi nꞌai‑le̱ Eliud koan.
15 Eliud jé xi nꞌai‑le̱ Eleazar koan,
Eleazar jé xi nꞌai‑le̱ Matán koan,
Matán jé xi nꞌai‑le̱ Jacob koan;
16 Kꞌoa̱ Jacob jé xi nꞌai‑le̱ José koan,
José jé xi xꞌi̱n‑le̱ María koan,
Kꞌoa̱ jé María xi na̱‑le̱ Jesús koan,
kꞌoa̱ Jesús,
Jé Xi Niná Kisikasén ꞌmì.
17 Koiì jè jaꞌaín‑le̱ ngatsꞌi chjo̱ta̱ jchínga‑le̱ Jesús,
xi fìtsꞌia‑ni Abraham saꞌnda David teño jko̱ ma‑ni;
kꞌoa̱ ngatsꞌi chjo̱ta̱ jchínga‑le̱ Jesús xi fìtsꞌia‑ni David saꞌnda nga tsangìkao̱ kjoa̱nꞌión chjo̱ta̱ judío ya̱ na̱xi̱nandá‑je Babilonia teño jko̱ ma‑ni;
kꞌoa̱ fìtsꞌia‑ni nga tsangìkao̱ kjoa̱nꞌión chjo̱ta̱ judío ya̱ na̱xi̱nandá‑je Babilonia saꞌnda nga kitsin Jè Xi Niná Kisikasén,
ngìteño jko̱ ma‑ni.
Kꞌia̱ nga kitsin Jesucristo
18 Kꞌia̱ nga kitsin Jesucristo,
i̱i koan:
Jè María na̱‑le̱ Jesús,
tjínꞌión‑le̱ kjoa̱bixan kao̱ José,
kꞌia̱ nga kje sa batiòkao̱ xínkjín,
tsaꞌyaà‑le̱ nga María ꞌndí tjiáꞌma‑le̱ xi kao̱ nganꞌión‑le̱ Sén Ni̱chrjin Tsje.
19 José jè xꞌi̱n‑le̱ María,
koiì nga síkitjosòn kjoa̱téxoma‑le̱ Niná nga koan‑kai‑nile̱ nga kjoa̱soa si̱ikꞌéjnajin María,
koanmeè‑le̱ nga kitsjionꞌma.
20 Kꞌoa̱ kꞌia̱ nga kꞌoa̱tsò xi tísíkꞌaitsjen,
to̱ i̱i koan jngo cho̱ꞌnda ngꞌajmi‑le̱ Niná jaꞌatsen ya̱ ya nijñá‑le̱ kꞌoa̱ kitsò‑le̱:
«José,
xi ntje̱‑le̱ David kitje̱n‑ni,
alì bijkon‑jìn nga koi̱xan‑koai̱ María jè chjo̱on‑li̱,
nga̱ jè ꞌndí xi yꞌa,
tꞌatsꞌe̱e nganꞌión‑le̱ Sén Ni̱chrjin Tsje kinchroa‑ni.
21 Kꞌoa̱ jngo ꞌndí xꞌi̱n sꞌe̱‑le̱,
kꞌoa̱ Jesús kꞌoín‑lai̱,
nga̱ jé kꞌoa̱sjentjaì chjo̱ta̱‑le̱ xi tꞌatsꞌe̱ jé‑le̱».b
22 Kꞌoa̱koan ngayije jè‑bi̱,
jmé‑ni nga kꞌoa̱sꞌìn kitjosòn‑ni jè xi Niná kitsò josꞌìn nga kinchja̱ jè chjo̱ta̱ xi kinchja̱ya ngajao‑le̱,
kꞌia̱ nga kitsò:
23 «Koe̱e‑ni,
jngo chjo̱on xo̱ngó xi ꞌndí sꞌe̱jnayaꞌma‑le̱,
kꞌoa̱ jngo ꞌndí xꞌi̱n sꞌe̱‑le̱,
Kꞌoa̱ Emanuel kꞌoín‑lai̱».c
Én xi tsò‑ni:
«Niná tíjnakao̱‑ná».