Kꞌia̱ nga kinchja̱ya Juan xi Kanísꞌen‑ngindá
3
Kꞌia̱ nga je chrjaꞌaòn nó tíbatéxoma Tiberio César xi chjo̱ta̱xá títjòn‑le̱ Roma,
kꞌoa̱ jè Poncio Pilato tíbatéxoma ya̱ ꞌnde Judea,
kꞌoa̱ Herodes Antipas tíbatéxoma ya̱ ꞌnde Galilea,
kꞌoa̱ Felipe xi ndsꞌe̱ Herodes tíbatéxoma ya̱ ꞌnde Iturea kao̱ ya̱ ꞌnde Traconite,
kꞌoa̱ Lisanias tíbatéxoma ya̱ ꞌnde Abilinia,
2 kꞌoa̱ kꞌia̱ nga na̱ꞌmi títjòn ma Anás kao̱ Caifás,
Niná kitsjoa‑le̱ én‑le̱ jè Juan ti‑le̱ Zacarías,
ya̱ ꞌnde tꞌaxìn‑tꞌa.
3 Kꞌoa̱ Juan ki ngakijndà ꞌnde xi tjió chrian‑le̱ ya̱ xo̱ngá nandá Jordán,
kinchja̱ya tꞌatsꞌe̱ nga kàtasíkꞌantjaìya kjoa̱faꞌaitsjen‑le̱ chjo̱ta̱,
jmé‑ni nga kàtachatꞌa‑nile̱ jé‑le̱ kꞌoa̱ kàtakanísꞌen‑ngindá yao‑le̱,
4 josꞌìn tjítꞌa ya̱ xo̱n xi kiski Isaías jè xi kinchja̱ya ngajao‑le̱ Niná,
xi tsò:
«Jta̱ xi nꞌión nchja̱ya ya̱ ꞌnde tꞌaxìn‑tꞌa:
“Tjandao ndia̱a‑le̱ Nai‑ná;
Tjakìxio̱o ndia̱a‑le̱.
5 Ngakijndà ꞌnde jña konga chon koa̱n‑nga̱sòn‑ní,
Kꞌoa̱ koi̱xo̱jen ngayije nindo xi yꞌai kao̱ xi ꞌndí kjoan;
Ngayije ndia̱a xi bꞌétin koa̱n‑kìxi̱i,
Kꞌoa̱ jè ndia̱a xi na̱nga̱ya chon sꞌe̱ngósòn;
6 Kꞌoa̱ skoe̱e ngatsꞌi chjo̱ta̱ ngakijnda soꞌnde jè kjoa̱bitjontjaì xi tsꞌe̱ Niná”».a
7 Kꞌoa̱ Juan kitsò‑le̱ chjo̱ta̱‑nkjìn xi koi xá jaꞌaikòn‑nile̱ nga me‑le̱ nga jè ska̱nìsꞌen‑ngindá:
«¡Jòn ntje̱‑le̱ ye̱!,
jñá tsangìnchꞌà‑nilao̱o nga koan tóka‑lao̱o kjoa̱ñꞌain xi sꞌa̱ nchroá.
8 Kꞌoa̱tꞌia̱on‑ni jè kjoa̱ xi bakìn‑le̱ nga je kinìkꞌantjaìyao kjoa̱faꞌaitsjen‑no,
kꞌoa̱ alì koi‑jìn nìkjaꞌaitsjaon ya̱ jin ni̱ma̱‑no én xi tsò:
“Ntje̱‑le̱ Abraham‑nìji̱n”;
nga̱ an kꞌoa̱axin‑no nga Niná koa̱an‑le̱ nga jè la̱jao̱ xo̱kjoan ntje̱‑le̱ Abraham si̱ikao̱.
9 Kꞌoa̱ati̱ jè jàcha̱ jeè ya̱ kijnatꞌa‑le̱ ja̱ma̱‑le̱ yá;
kꞌoa̱ koiì kjoa̱ nga ngayije yá xi tsì nda to ba‑le̱ jtísòn‑ní kꞌoa̱ ya̱a lꞌí sꞌe̱tsaojin».
10 Kꞌoa̱ jè chjo̱ta̱ kiskònangi‑le̱,
kitsò:
—Kꞌoa̱ jmé xi machjén nga sꞌia̱in‑ji̱n.
11 Kꞌoa̱ kinchja̱ kitsò‑le̱:
—Jè xi jaò ma chi̱nga‑le̱,
kàtatsjoá‑le̱ jè xi tsìn‑le̱;
kꞌoa̱ jè xi tjín‑le̱ jme xi kjèn,
kꞌoa̱ti̱ kàtasꞌín.
12 Kꞌoa̱ti̱ jaꞌai kꞌa chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma,
xi me‑le̱ nga cha̱nìsꞌen‑ngindá,
kꞌoa̱ kitsò‑le̱:
—Ji xi bakòyai,
jmé xi sꞌia̱in‑ji̱n.
13 Juan kitsò‑le̱:
—Alì ngìsa̱‑jìn tse nìjaó jotjín tjínè‑le̱ nga si̱kꞌéchjió.
14 Kꞌoa̱ati̱ kiskònangi kꞌa jè chjo̱ta̱ kjoa̱jchán,
kitsò:
—Kꞌoa̱ ji̱n‑ji̱n,
jmé xi sꞌia̱in‑ji̱n.
Kꞌia̱ kitsò‑le̱:
—Alì kjoa̱nꞌión‑jìn chjàꞌa‑lao̱o tsojmì‑le̱ chjo̱ta̱,
kꞌoa̱ alì jè‑jìn én xi chꞌao tsò fanaò;
kꞌoa̱ to̱ kàtamajngo‑ni tokòn jotjín machjí‑no.
15 Kꞌoa̱ koí nga jè chjo̱ta̱ na̱xi̱nandá tjiókoya‑le̱,
nga tjiókjònangi ya̱ jin ni̱ma̱‑le̱ tsà jè‑ni Juan Jè Xi Niná Kisikasén,
16 nga kinchja̱‑ni Juan,
kitsò‑le̱ ngatsꞌi:
«An xi kjoa̱kìxi̱ nandá tìbꞌejtsanè‑nino kꞌia̱ nga tìkanìsꞌen‑ngindá‑no;
to̱nga nchroá jngo xi ngìsa̱ tse nganꞌión tjín‑le̱ ti̱kꞌoa̱‑ni an,
xi tsì bakìn‑na nga skojndá jténꞌó‑le̱,
jè kao̱o Sén Ni̱chrjin Tsje kꞌoa̱ kao̱ lꞌí kꞌoe̱ejtsanè‑nino.
17 Jeè kjiantsja jè yá nchrji̱ xi kꞌoe̱engi trigo nga ska̱nìtje̱n tjé‑le̱,
kꞌoa̱ kꞌia̱ si̱itsje ꞌnde jña sꞌenè trigo,
kꞌoa̱ koi̱nchàxkó jè trigo ya̱ ningꞌa‑le̱,
kꞌoa̱ jè tjé‑le̱ koa̱kà ya̱ jin lꞌí xi ni̱kꞌia‑jìn bitsꞌao».
18 Kao̱ choa̱ jè‑bi̱,
kꞌoa̱ kao̱ nꞌión nkjìn‑sa én xi kisinꞌión‑ni kon chjo̱ta̱‑nkjìn nga kinchja̱yajin‑le̱ én‑nda.
Kjoa̱ chꞌao tjín xi kisꞌin Herodes Antipas
19 Kꞌia̱ Juan kinchja̱tikao̱ jè Herodes Antipas xi tíbatéxoma ya̱ ꞌnde Galilea,
xi to̱ tꞌatsꞌe̱ jme xi kisꞌin kao̱ Herodías,
jè xi chjo̱on‑le̱ ma Felipe ndsꞌe̱ Herodes Antipas,
kꞌoa̱ kao̱ tꞌatsꞌe̱ ngayije kjoa̱ xi chꞌao tjín xi kisꞌin,
20 tꞌatsꞌe̱ ngayije kjoa̱ jè‑bi̱,
ngíjngosa kjoa̱ kisꞌin xi ngìsa̱ sa chꞌao tjín:
ndo̱yá kisikꞌéjnaꞌya Juan.
Kꞌia̱ nga Juan kiskanìsꞌen‑ngindá Jesús
21 Kꞌoa̱koan kꞌia̱ nga Juan tíkanìsꞌen‑ngindá ngatsꞌi chjo̱ta̱‑nkjìn,
kꞌoa̱ati̱ kiskanìsꞌen‑ngindá Jesús;
kꞌoa̱ kꞌia̱ nga Jesús tífàkao̱ Niná,
jè ngꞌajmi kitjoꞌaì,
22 kꞌoa̱ jè Sén Ni̱chrjin Tsje jaꞌaijen‑nè‑le̱ Jesús,
jo ni̱se chroa kji,
kꞌoa̱ jngo jta̱ jaꞌai‑ni ya̱ ngꞌajmi xi kitsò:
—Ji‑ní ꞌNdí‑na̱ kꞌoa̱ nꞌión tsjoake̱‑lè;
nꞌión nda sꞌe koan xi tꞌatsi̱.
Jaꞌaín‑le̱ chjo̱ta̱ jchínga‑le̱ Jesús
23 Kꞌia̱ nga Jesús tsakꞌétsꞌia̱kao̱ xá‑le̱ tjín‑la̱le̱ tsà kan‑tè nó,
kꞌoa̱asꞌìn tsaꞌya‑le̱ nga ꞌndí‑le̱ José koan,
José ꞌndí‑le̱ Elí koan,
24 Elí ꞌndí‑le̱ Matat koan,
Matat ꞌndí‑le̱ Leví koan,
Leví ꞌndí‑le̱ Melqui koan,
Melqui ꞌndí‑le̱ Jana koan,
Jana ꞌndí‑le̱ José koan,
25 José ꞌndí‑le̱ Matatías koan,
Matatías ꞌndí‑le̱ Amós koan,
Amós ꞌndí‑le̱ Nahum koan,
Nahum ꞌndí‑le̱ Esli koan,
Esli ꞌndí‑le̱ Nagai koan,
26 Nagai ꞌndí‑le̱ Maat koan,
Maat ꞌndí‑le̱ Matatías koan,
Matatías ꞌndí‑le̱ Semei koan,
Semei ꞌndí‑le̱ José koan,
José ꞌndí‑le̱ Judá koan,
27 Judá ꞌndí‑le̱ Joana koan,
Joana ꞌndí‑le̱ Resa koan,
Resa ꞌndí‑le̱ Zorobabel koan,
Zorobabel ꞌndí‑le̱ Salatiel koan,
Salatiel ꞌndí‑le̱ Neri koan,
28 Neri ꞌndí‑le̱ Melqui koan,
Melqui ꞌndí‑le̱ Adi koan,
Adi ꞌndí‑le̱ Cosam koan,
Cosam ꞌndí‑le̱ Elmodam koan,
Elmodam ꞌndí‑le̱ Er koan,
29 Er ꞌndí‑le̱ Josué koan,
Josué ꞌndí‑le̱ Eliezer koan,
Eliezer ꞌndí‑le̱ Jorim koan,
Jorim ꞌndí‑le̱ Matat koan,
30 Matat ꞌndí‑le̱ Leví koan,
Leví ꞌndí‑le̱ Simeón koan,
Simeón ꞌndí‑le̱ Judá koan,
Judá ꞌndí‑le̱ José koan,
José ꞌndí‑le̱ Jonán koan,
Jonán ꞌndí‑le̱ Eliaquim koan,
31 Eliaquim ꞌndí‑le̱ Melea koan,
Melea ꞌndí‑le̱ Mainán koan,
Mainán ꞌndí‑le̱ Matata koan,
Matata ꞌndí‑le̱ Natán koan,
32 Natán ꞌndí‑le̱ David koan,
David ꞌndí‑le̱ Isaí koan,
Isaí ꞌndí‑le̱ Obed koan,
Obed ꞌndí‑le̱ Booz koan,
Booz ꞌndí‑le̱ Salmón koan,
Salmón ꞌndí‑le̱ Naasón koan,
33 Naasón ꞌndí‑le̱ Aminadab koan,
Aminadab ꞌndí‑le̱ Aram koan,
Aram ꞌndí‑le̱ Esrom koan,
Esrom ꞌndí‑le̱ Fares koan,
Fares ꞌndí‑le̱ Judá koan,
34 Judá ꞌndí‑le̱ Jacob koan,
Jacob ꞌndí‑le̱ Isaac koan,
Isaac ꞌndí‑le̱ Abraham koan,
Abraham ꞌndí‑le̱ Taré koan,
Taré ꞌndí‑le̱ Nacor koan,
35 Nacor ꞌndí‑le̱ Serug koan,
Serug ꞌndí‑le̱ Ragau koan,
Ragau ꞌndí‑le̱ Peleg koan,
Peleg ꞌndí‑le̱ Heber koan,
Heber ꞌndí‑le̱ Sala koan,
36 Sala ꞌndí‑le̱ Cainán koan,
Cainán ꞌndí‑le̱ Arfaxad koan,
Arfaxad ꞌndí‑le̱ Sem koan,
Sem ꞌndí‑le̱ Noé koan,
Noé ꞌndí‑le̱ Lamec koan,
37 Lamec ꞌndí‑le̱ Matusalén koan,
Matusalén ꞌndí‑le̱ Enoc koan,
Enoc ꞌndí‑le̱ Jared koan,
Jared ꞌndí‑le̱ Mahalaleel koan,
Mahalaleel ꞌndí‑le̱ Cainán koan,
38 Cainán ꞌndí‑le̱ Enós koan,
Enós ꞌndí‑le̱ Set koan,
Set ꞌndí‑le̱ Adán koan,
Adán ꞌndí‑le̱ Niná koan.