Kꞌia̱ nga jè nai̱i kiskòtꞌaya‑kao̱ Jesús
4
Ñaki to̱ jé Sén Ni̱chrjin Tsje tíbatéxomajin ni̱ma̱‑le̱ Jesús,
nga kinchroa‑ni ya̱ xo̱ngá nandá Jordán,
kꞌoa̱ jè Sén Ni̱chrjin Tsje kikao̱ ya̱ ꞌnde tꞌaxìn‑tꞌa,
2 ñachàn ni̱chrjin ya̱ tsakꞌèjna Jesús,
kꞌoa̱ jè nai̱i kiskòtꞌayàkao̱.
Kꞌoa̱ ni̱jme‑jìn xi kiskine kꞌia̱ nga koi ni̱chrjin,
kꞌia̱ nga je jaꞌato ni̱chrjin jè,
koanbao‑le̱ Jesús.
3 Kꞌia̱ jè nai̱i kitsò‑le̱:
—Tsà ji‑ní ꞌNdí‑le̱ Niná,
kꞌoa̱tꞌìn‑lai̱ jè la̱jao̱ xo̱kji nga nio̱xtìla̱ kàtamꞌòya.
4 Jesús kinchja̱ kitsò‑le̱:
—Kꞌoa̱asꞌìn tjítꞌa xo̱n‑le̱ Niná:
“Lìtsà to̱ nio̱xtìla̱ kꞌoéjnakon‑ni jè chjo̱ta̱,a
to̱saà kao̱o ngayije jè én‑le̱ Niná”.
5 Kꞌoa̱ jè nai̱i kikao̱ ya̱ jngo nindo jña nꞌión ngꞌa,
kꞌoa̱ jngotjò tsakakó‑nile̱ ngayije na̱xi̱nandá‑yꞌai xi tjín i̱ soꞌnde.
6 Kꞌoa̱ jè nai̱i kitsò‑le̱:
—Jiì tsjoa‑lè nga koa̱tèxoma‑lai̱ ngayije na̱xi̱nandá xo̱ chon,
kꞌoa̱ kao̱ ngayije kjoa̱jeya xi tjín‑le̱;
nga̱ aàn kinìntsja‑na,
kꞌoa̱ aàn tsjoa‑le̱ ꞌya‑ni xi an me‑na.
7 Tsà ji xi sójnajten‑tꞌai nangi nga jcha̱xkón‑naí,
tsi̱i koa̱n ngayije.
8 Jesús kinchja̱ kitsò‑le̱:
—Ti̱se̱nxìn‑naí nai̱i,
nga̱ kꞌoa̱asꞌìn tjítꞌa xo̱n‑le̱ Niná:
“Jè Nai‑li̱ xi Niná‑li̱ ma jcha̱xkoín,
kꞌoa̱ to̱jngoò jè xi ti̱xá‑lai̱”.b
9 Kꞌia̱ jè nai̱i kikao̱ Jesús ya̱ Jerusalén,
kꞌoa̱ ya̱ kisikꞌéjnasòn yo̱ngo̱ jña nꞌión ngꞌa,
kꞌoa̱ kitsò‑le̱:
“Jé cho̱ꞌnda ngꞌajmi‑le̱ kꞌoe̱exá‑le̱
Jmé‑ni nga si̱ikoìnda̱‑nilì”;c
11 kꞌoa̱
“Kao̱o ntsja jtsoa̱‑nꞌión‑nilì,
Jmé‑ni nga tsì la̱jao̱ sa̱téngi‑ni ndso̱koi”.d
12 Jesús kinchja̱ kitsò‑le̱:
—Kꞌoa̱asꞌìn tjítꞌa xo̱n‑le̱ Niná:
“Alì Nai‑li̱ Niná‑li̱ jìn chòtꞌayàkoai̱”.e
13 Kꞌoa̱ kꞌia̱ nga jè nai̱i jetꞌa‑le̱ ngayije josꞌìn nga kiskòtꞌayà‑kao̱ Jesús,
tsakasènxìn choatse‑le̱.
Kꞌia̱ nga Jesús tsakꞌétsꞌia̱kao̱ xá‑le̱
14 Kꞌoa̱ Jesús kao̱ nganꞌión‑le̱ Sén Ni̱chrjin Tsje jaꞌai ngìjngokꞌà‑ni ya̱ ꞌnde Galilea,
kꞌoa̱ kisòn én xi tꞌatsꞌe̱ ngakijndà ꞌnde xi ya̱ jngotjondai‑le̱.
15 Kꞌoa̱ Jesús bakóya ngakijndà ndꞌia jña maxkia̱ xo̱n‑le̱ Niná,
kꞌoa̱ ngatsꞌi chjo̱ta̱ bꞌasjejeya.
Jesús kichò ya̱ Nazaret
16 Jesús jaꞌai ya̱ Nazaret ya̱ na̱xi̱nandá‑nꞌión jña koanjchínga;
kꞌoa̱ kꞌia̱ nga ni̱chrjin xotò,
ni̱chrjin nga bexkón Niná chjo̱ta̱ judío,
jaꞌasꞌen ya̱ ndꞌia jña maxkia̱ xo̱n‑le̱ Niná,
josꞌìn nga be‑ni,
kꞌoa̱ tsakasèn‑ndo nga kꞌoe̱exkia̱.
17 Kꞌoa̱ tsakꞌaì‑le̱ xo̱n xi kiski Isaías jè chjo̱ta̱ xi kinchja̱ya ngajao‑le̱ Niná;
kꞌoa̱ kꞌia̱ nga Jesús kiskondáya xo̱n,
koansjai‑le̱ kꞌoa̱ tsakꞌéxkia̱ ya̱ jña tjítꞌa jè én xi tsò:
18 «Jè Sén Ni̱chrjin‑le̱ Niná i̱i tíjnakao̱‑na,
Nga̱ aàn kiskoéjin‑na nga koinchjàyajin‑le̱ én nda ngatsꞌi chjo̱ta̱ xi yo̱ma̱ sꞌìn tjió;
Kisikasén‑na nga sindayà ngatsꞌi xi kjoa̱ꞌaon tokòn tjiójin ni̱ma̱‑le̱;
Nga koinchjàyajin‑le̱ kjoa̱ndaì ngatsꞌi chjo̱ta̱ xi ndo̱yá tjió,
Kꞌoa̱ an kꞌoa̱sꞌian nga ngatsꞌi chjo̱ta̱ xi xka̱ kàtama‑tsen‑le̱;
Nga sikatióndaí‑ña ngatsꞌi xi to̱ taon tíꞌya;
19 Nga koinchjàya tꞌatsꞌe̱ nó
Xi koa̱kó kjoa̱nda‑le̱ Nai‑ná».f
20 Kꞌoa̱ Jesús tsakáxkóya‑ni jè xo̱n,
kitsjoa‑le̱ jè xi koi xá tjín‑le̱,
kꞌoa̱ tsakꞌèjna;
kꞌoa̱ ngatsꞌi chjo̱ta̱ xi ya̱ tjió ya̱ ndꞌia jña maxkia̱ xo̱n‑le̱ Niná ñaki nda kiskòtsen‑le̱.
21 Kꞌoa̱ Jesús tsakꞌétsꞌia̱kao̱ nga kitsò‑le̱:
—Ndꞌai̱,
i̱i ngixkòn kàbitjosòn jotsò én jè xi tjítꞌa Xo̱n‑le̱ Niná.
22 Kꞌoa̱ ngatsꞌi chjo̱ta̱ ndaà tsò én xi kitsjoa xi tꞌatsꞌe̱,
kꞌoa̱ ñaki to̱kꞌoa̱a koan‑le̱ nga nda tsò én xi kinchja̱,
kꞌoa̱ kitsò:
—A tsí tsà jè xo̱kji ti‑le̱ José.
23 Kꞌia̱ Jesús kitsò‑le̱:
—Ñaki kìxi̱i xi xin‑no,
kꞌoa̱jìn kꞌoín‑naó jè én xi tsò:
“Chji̱ne̱xki,
ti̱ji ti̱xki‑nilai̱ yao‑li̱;
xi tꞌatsꞌe̱ ngayije kjoa̱ xi kinòꞌyà‑lai̱ji̱n xi koan ya̱ na̱xi̱nandá‑nꞌión Capernaum,
kꞌoa̱ti̱ tꞌiai̱n i̱ na̱xi̱nandá‑li̱”.
24 Kꞌoa̱ kitsò sa‑le̱:
—Ñaki kìxi̱i xi xin‑no,
nga ni̱jngo‑jìn chjo̱ta̱ xi nchja̱ya ngajao‑le̱ Niná,
xi nda ꞌyatjaò ya̱ na̱xi̱nandá‑le̱.
25 Kꞌoa̱ ñaki kìxi̱i xi xin‑no nga nkjìn yánchjín kꞌàn tjió ya̱ Israel ni̱chrjin nga tsakꞌèjna Elías,
kꞌia̱ nga jàn nó basen kisꞌechjoà ngꞌajmi nga lìkoi ti̱ tsakꞌa‑ni jtsí,
kꞌoa̱ nꞌión tse kjinchrá kisꞌe ngakijndà nangi Israel;g
26 to̱nga Elías lìtsà ya̱‑jìn kinìkasén jña tjió yánchjín kꞌàn xo̱kjoan,
to̱saà ya̱ kinìkasén‑kon‑le̱ jngo chjo̱on kꞌàn xi ya̱ na̱xi̱nandá‑nꞌión Sarepta tsꞌe̱,
xi ꞌnde Sidón nchja̱‑ni.h
27 Kꞌoa̱ nꞌión nkjìn chjo̱ta̱ xi jtsé fiꞌndojon kjima‑le̱ ya̱ Israel ni̱chrjin nga tsakꞌèjna Eliseo chjo̱ta̱ xi kinchja̱ya ngajao‑le̱ Niná;
to̱nga ni̱jngo‑jìn xi koan‑ndayà,
to̱ jé Naamán chjo̱ta̱ xi ya̱ ꞌnde Siria tsꞌe̱.i
28 Kꞌia̱ nga kinchrꞌoé jè én xo̱ tsò,
ngatsꞌi chjo̱ta̱ xi tjió ya̱ ndꞌia jña maxkia̱ xo̱n‑le̱ Niná nꞌión koan‑jti‑le̱;
29 kꞌoa̱ tsisótje̱n ngatsꞌi,
tsakꞌaonsjejin Jesús ya̱ na̱xi̱nandá‑le̱,
kꞌoa̱ kikao̱ saꞌnda ya̱ jko̱ nindo jña tíjnasòn na̱xi̱nandá‑nꞌión Nazaret,
nga me‑le̱ nga ya̱ si̱ikꞌatje̱njen‑ngi na̱xi̱.
30 To̱nga Jesús jaꞌatojin‑basen‑le̱ ngatsꞌi,
kꞌoa̱ ki.
Jesús tsakꞌasjejin sén ni̱chrjin xi tsì nda
31 Jesús kijen ya̱ Capernaum,
na̱xi̱nandá‑nꞌión xi nchja̱‑ni ya̱ ꞌnde Galilea;
kꞌoa̱ bakóya‑le̱ chjo̱ta̱ kꞌia̱ nga ni̱chrjin xotò,
ni̱chrjin nga bexkón Niná chjo̱ta̱ judío.
32 Kꞌoa̱ to̱ maxkón‑le̱ xi tꞌatsꞌe̱ jòsꞌìn tjín én xi bakóya,
nga̱ jè én xi nchja̱ kao̱o kjoa̱téxoma nchja̱.
33 Ya̱ ndꞌia jña maxkia̱ xo̱n‑le̱ Niná,
tíjna jngo chjo̱ta̱ xi sén ni̱chrjin xi tsì nda xi tsꞌe̱ nai̱i tíjnajin‑le̱,
xi nꞌión kiskiꞌndiáxá,
34 kitsò:
—Alì ji̱n jìn nìkao̱‑naíji̱n;
jmé xi tjín‑lì xi kao̱ ji̱n‑ji̱n,
ji Jesús xi Nazaret tsi̱.
A kàfàꞌai̱ nìkjesòn‑naíji̱n.
An ꞌbeè‑lè ꞌya‑ni ji,
ji‑ní xi Nꞌión Xkón Tijnai xi tsꞌe̱ Niná.
35 Kꞌoa̱ Jesús kinchja̱tikao̱,
kitsò‑le̱:
—Jyó ti̱jnai,
kꞌoa̱ tìtjo̱jin‑lai̱ chjo̱ta̱ xo̱kji.
Kꞌia̱ jè sén ni̱chrjin xi tsꞌe̱ nai̱i,
kisikꞌatje̱n‑jinꞌndè ya̱ jin basen‑le̱ ngatsꞌi chjo̱ta̱,
kitjojin‑le̱,
kꞌoa̱ lìkoi kisikìꞌaon.
36 Kꞌoa̱ ngatsꞌi chjo̱ta̱ xi ya̱ tjió ñaki to̱kꞌoa̱a koan‑le̱,
kꞌoa̱ xi i̱ xi ján tsakjákao̱ xínkjín,
kitsò:
—Jmé én‑ni jè nga kao̱ kjoa̱téxoma kꞌoa̱ kao̱ nganꞌión mꞌaosjejin‑ni sén ni̱chrjin xi tsì nda,
kꞌoa̱ síkitjosòn‑le̱.
37 Kꞌoa̱ jè chjo̱ta̱ kisòn‑kao̱ én xi tꞌatsꞌe̱ Jesús nga jngotjondai ꞌnde xi ti̱ya̱‑ni.
Jesús kisindaya na̱chá‑le̱ Simón
38 Kꞌia̱ Jesús tsakasèn‑ndo kꞌoa̱ kitjo‑ni ya̱ ndꞌia jña maxkia̱ xo̱n‑le̱ Niná,
kꞌoa̱ jaꞌasꞌen ya̱ ndꞌia‑le̱ Simón.
Jè na̱chá‑le̱ Simón chꞌin‑ndꞌai̱ toán kjima‑le̱;
kꞌia̱ jè chjo̱ta̱ tsakꞌétsꞌoa‑le̱ Jesús nga kàtasíndayà.
39 Jesús tsakasèn‑tꞌachrian‑le̱ chjo̱on,
kinchja̱tikao̱ jè chꞌin;
kꞌoa̱ kitjoxìn‑le̱ chꞌin‑ndꞌai̱,
kꞌoa̱ ti̱ꞌa tsakisótje̱n‑ni chjo̱on,
kꞌoa̱ kisisin‑le̱ ngatsꞌi.
Nkjìn xi koan‑nda kꞌia̱ nga je tíkantjaì tsꞌoí
40 Kꞌia̱ nga je tíkantjaì tsꞌoí,
ngatsꞌi xi nkjìn jko̱ya chꞌin xkꞌén tjín‑le̱ xínkjín,
jaꞌaikao̱‑le̱ Jesús;
kꞌoa̱ jè tsakásòn‑le̱ ntsja nga jngó jngó,
kꞌoa̱ kisindaya.
41 Kꞌoa̱ati̱ nkjìn chjo̱ta̱ xi nkjìn sén ni̱chrjin xi tsꞌe̱ nai̱i tsakꞌaonsjejin‑le̱,
xi kiskiꞌndiáxá kꞌoa̱ kitsò:
—Ji‑ní ꞌNdí‑le̱ Niná.
To̱nga Jesús kiskan‑kao̱ kꞌoa̱ lìkoi kitsjoaꞌndè‑le̱ nga kinchja̱,
nga̱ jè sén ni̱chrjin xi tsꞌe̱ nai̱i beè nga jè Jesús Jè Xi Niná Kisikasén.
Jesús tsakꞌamjen ngakijndà ya̱ ꞌnde Galilea nga kinchja̱ya
42 Kꞌia̱ nga je kisꞌe sén,
kitjo Jesús,
kꞌoa̱ ki ya̱ ꞌnde tꞌaxìn‑tꞌa;
kꞌoa̱ jè chjo̱ta̱‑nkjìn tsakásjai,
kꞌia̱ nga kichò ya̱ jña tíjna Jesús meè‑le̱ kisikꞌéjnanꞌión jmé‑ni nga tsì xìn kàtafì‑ni.
43 To̱nga jè kitsò‑le̱:
—Machjén nga kꞌoa̱ti̱ koinchjàya ya̱ jña xìn na̱xi̱nandá jè én‑nda xi tsꞌe̱ josꞌìn batéxoma Niná;
nga̱ koiì xá kinìkasén‑nina.
44 Kꞌoa̱ bakóya ngakijndà ndꞌia jña maxkia̱ xo̱n‑le̱ Niná ya̱ ꞌnde Galilea.