4 Kꞌia̱ nga je koan kinchja̱,

kitsò‑le̱ Simón:

—Simón tꞌin‑koai̱ chitso ya̱ jña nꞌión sa na̱nga̱ kijna jè nandá,

kꞌoa̱ ti̱kꞌatsao‑ngindaó na̱ꞌya‑no jmé‑ni nga koi̱ndoa̱‑nio jti̱.

5 Kꞌia̱ kinchja̱ Simón kitsò‑le̱:

—Ji xi bakòyai,

jeè kàbꞌajndá‑naji̱n ni̱tje̱n nga kànìxaì‑ji̱n;

kꞌoa̱ ni̱jme‑jìn jti̱ kàsokó‑naji̱n;

to̱koiì nga ji xo̱ tisi,

sikꞌatje̱n‑ngindá jè na̱ꞌya.

6 Kꞌia̱ nga je kꞌoa̱kisꞌin,

nꞌión nkjìn jti̱ kitjoé‑le̱,

kꞌoa̱ jè na̱ꞌya‑le̱ ñaki tíxijndàkao̱o.

7 Kꞌia̱ kisikꞌatji‑le̱ ntsja xínkjín xi ya̱ tjióyà chitso xi ngìjngo,

jmé‑ni nga kàtanchroákincha‑kao̱‑ni;

kꞌoa̱ jaꞌai,

kꞌoa̱ ñaki kisꞌeyo kitseè jti̱ ngajaò chitso,

kꞌoa̱ ñaki jeè tjiótsaosꞌen‑ngindá.

8 Kꞌia̱ nga tsabe Simón Pedro jè kjoa̱xkón xo̱kji,

kiskaxkónchꞌin‑tꞌa‑le̱ Jesús,

kitsò‑le̱:

—Ti̱se̱nxìn‑naí,

Nai,

nga̱ chjo̱ta̱jé‑nià an.

9 Koiì nga nꞌión nkjìn jti̱ xi kitjoé‑le̱,

nga nꞌión kitsokjòn‑ni Pedro kꞌoa̱ kao̱ ngatsꞌi xi ya̱ tjióyàkao̱ chitso,

10 kꞌoa̱ti̱ koan‑le̱ Jacobo kao̱ Juan xti‑le̱ Zebedeo,

jè xi ya̱ ñatje̱n síxá Simón.

To̱nga Jesús kitsò‑le̱ Simón:

—Alì bijkon‑jìn;

bꞌétsꞌia̱‑ni ndꞌai̱ koa̱an‑lì kꞌoéxkoí chjo̱ta̱ xi tsꞌa̱n koa̱n,

jo nìkao̱ jti̱ nga ndoa.

11 Kꞌia̱ nga jaꞌaikao̱ ngajaò chitso ya̱ jña nangi,

kisikatió ngayije jme xi tjín‑le̱,

kꞌoa̱ tsakꞌétsꞌia̱kao̱ nga tsakꞌèmatje̱n‑ngi‑le̱ Jesús.

12 Kꞌoa̱koan kꞌia̱ nga Jesús tíjna ya̱ jngo na̱xi̱nandá‑nꞌión,

jaꞌai jngo chjo̱ta̱ xi jtsé biꞌndojon kji,

kꞌia̱ nga tsabe Jesús,

tsakajnajten‑tꞌa nangi ya̱ ngi ndso̱ko̱ kꞌoa̱ tsakꞌétsꞌoa‑le̱,

kitsò‑le̱:

—Nai,

tsà me‑lì koa̱an si̱ndaya‑naí.

13 Kꞌia̱ Jesús tsakjén ntsja,

kisikao̱,

kitsò‑le̱:

—Meè‑na;

kàtamandayaì.

Kꞌoa̱ ti̱ꞌa kꞌia̱ kitjoxìn‑nile̱ jè jtsé biꞌndojon.

14 Kꞌoa̱ Jesús kꞌoa̱sꞌìn tsakꞌénè‑le̱ nga tsìꞌya xi kàtatsòya‑le̱ josꞌìn koan‑ndaya,

kitsò‑le̱:

—To̱sa̱a tꞌin,

tꞌin‑ka̱kò‑lai̱ yao‑li̱ jè na̱ꞌmi,

kꞌoa̱ tꞌaìtꞌa‑jìn jme xi bꞌénè jè kjoa̱téxoma‑le̱ Niná xi kiski Moisés^a xi tꞌatsꞌe̱ nga je kàmatsje‑jìn,

jmé‑ni nga kàtabe‑ni ngatsꞌi na̱ꞌmi nga je kàmatsjai.

15 To̱nga to̱ si to̱ nda kisòn én xi tꞌatsꞌe̱ Jesús,

kꞌoa̱ nꞌión nkjìn chjo̱ta̱ maxkó jmé‑ni nga bincháñon‑nile̱,

kꞌoa̱ jmé‑ni nga jè síndaya‑ni tꞌatsꞌe̱ ngayije chꞌin xi tjín‑le̱.

16 To̱nga Jesús bꞌasjetꞌaxín yao‑le̱ nga fì ya̱ ꞌnde tꞌaxìn‑tꞌa,

kꞌoa̱ ya̱ fákao̱ Niná.

17 Kꞌoa̱koan jngo ni̱chrjin kꞌia̱ nga Jesús tíbakóya,

kꞌoa̱ ya̱ tjió chjo̱ta̱ fariseo kao̱ chjo̱ta̱ xi bakóya kjoa̱téxoma‑le̱ Niná xi kiski Moisés,

xi ya̱ jaꞌai‑ni ngakijndà na̱xi̱nandá‑ꞌndí xi nchja̱‑ni ya̱ ꞌnde Galilea,

kao̱ xi ya̱ tsꞌe̱ ꞌnde Judea kꞌoa̱ xi ya̱ na̱xi̱nandá‑nꞌión Jerusalén tsꞌe̱;

kꞌoa̱ jè nganꞌión‑le̱ Niná ya̱ tíjnakao̱ Jesús jmé‑ni nga síndaya‑ni xi chꞌin tjín‑le̱.

18 Kꞌoa̱ kꞌia̱ jaꞌai kꞌa chjo̱ta̱ xi yꞌangꞌangi jngo chjo̱ta̱ xi to̱ kjiyá yao‑le̱,

kijnasòn‑le̱ na̱chanyá,

kꞌoa̱ tsakásjai‑le̱ josꞌìn kjoa̱ꞌasꞌen‑kao̱ kꞌoa̱ nga ya̱ si̱ikájna ngixko̱n Jesús.

19 To̱nga lìkoi koansjai‑le̱ josꞌìn jaꞌasꞌen‑kao̱ ya̱ ndꞌia,

nga̱ nꞌión nkjìn chjo̱ta̱ kitseꞌyà,

tsakijon ya̱ sòn‑ngꞌa ndꞌia kꞌoa̱ kiskoꞌaìkjá,

ya̱ kiskanìjen‑nèni kao̱ na̱chanyá jè xi kjiyá yao‑le̱,

ya̱ kisikájnajin basen‑le̱ chjo̱ta̱ ya̱ ngixko̱n Jesús.

20 Kꞌia̱ nga Jesús tsabe kjoa̱makjaín‑le̱ chjo̱ta̱ xi kjiyá yao‑le̱ kao̱ tsꞌe̱ chjo̱ta̱ xi yꞌangꞌangi,

kitsò‑le̱ jè chjo̱ta̱ xi kjiyá:

—Ji mìyo̱,

jeè kàchatꞌa‑lì jé‑li̱.

21 Kꞌia̱ jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo tsakꞌétsꞌia̱kao̱ nga kisikꞌaitsjen,

kitsò:

«ꞌYá‑ni xo̱kji nga Niná nchja̱ꞌaon‑nile̱.

ꞌYá‑ni xi koa̱n‑le̱ si̱ichatꞌa jé,

a tsí tsà to̱ jngo jè Niná».

22 Kꞌia̱nga Jesús tsabe kjoa̱faꞌaitsjen‑le̱ chjo̱ta̱ xo̱kjoan,

kinchja̱ kitsò‑le̱:

—Jmé xi nìkjaꞌaitsjaon ya̱ jin ni̱ma̱‑no.

23 Jmé‑ni xi ngìsa̱ choa ñꞌain tjín nga koixoán,

a jé nga koixoán:

“Jeè kàchatꞌa‑lì jé‑lì,”

axo̱ koi nga koixoán:

“Ti̱sótjai̱n kꞌoa̱ ti̱tómjain”.

24 Ngo̱ jmé‑ni nga kàtaꞌya‑nio nga jè ꞌNdí‑le̱ Chjo̱ta̱ tjín‑le̱ nganꞌión i̱ soꞌnde nga síchatꞌa jé —kꞌia̱ kitsò‑le̱ jè chjo̱ta̱ xi kjiyá—:

«Jiì xi kꞌoa̱xin‑lè:

Ti̱sótjai̱n,

chjoaí na̱chanyá‑li̱ kꞌoa̱ tꞌin ndꞌia‑li̱».

25 Kꞌoa̱ ti̱ꞌa kꞌia̱a tsakisótje̱n‑ni ya̱ ngixko̱n ngatsꞌi chjo̱ta̱,

kꞌoa̱ kiskoé na̱chanyá‑le̱ xi kijnasòn,

ki ndꞌia‑le̱,

tíbꞌasjejeya Niná.

26 Kꞌoa̱ ngatsꞌi chjo̱ta̱,

nꞌión koanxkón‑le̱,

kꞌoa̱ tsakꞌétsꞌia̱kao̱ nga tsakꞌasjejeya Niná;

kꞌoa̱ nꞌión kitsokjòn,

kitsò:

—Ndꞌai̱,

nkjìn kjoa̱ kaꞌyaà xi ñaki to̱kꞌoa̱a ma‑niná.

27 Kꞌia̱ nga koanskan‑ni kjoa̱ jè,

kitjo Jesús,

kꞌoa̱ tsabe jngo chjo̱ta̱ xi Leví ꞌmì xi tao̱n síkꞌéchjí tꞌatsꞌe̱ chjo̱ta̱xá títjòn‑le̱ Roma,

ya̱ tíjna jña machjí tao̱n basen,

kꞌoa̱ Jesús kitsò‑le̱:

—Nchroátje̱n‑ngi‑naí.

28 Kꞌoa̱ Leví kisikꞌéjna xá‑le̱,

tsakasèn‑ndo kꞌoa̱ kitje̱n‑ngi‑le̱ Jesús.

29 Kꞌoa̱ jè Leví jngo sꞌoí‑je tsakꞌasje‑le̱ Jesús nga tsakjèn‑kao̱ ya̱ ndꞌia‑le̱;

kꞌoa̱ nꞌión nkjìn chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ xi kja̱ꞌaí chjo̱ta̱ xi tjiótꞌakao̱ yámìxa̱.

30 Kꞌoa̱ jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo kisikꞌaxki̱ chjo̱ta̱ xi kòtꞌayàtꞌa‑le̱ Jesús,

kitsò:

—Án‑ni nga ya̱ bichikao̱‑nio kꞌoa̱ nga ꞌyòkao̱‑nio jè chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma,

kꞌoa̱ kao̱ chjo̱ta̱jé.

31 Jesús kinchja̱ kitsò‑le̱:

—Jè chjo̱ta̱ xi tsìn‑le̱ chꞌin alì chji̱ne̱xki‑jìn machjén‑le̱,

to̱ jé xi chꞌin tjín‑le̱.

32 Alì tsà jè‑jìn chjo̱ta̱ xi kìxi̱ xi jàꞌai̱ nchjà‑le̱,

to̱sa̱a jè xi chjo̱ta̱jé jmé‑ni nga kàtasíkꞌantjaìya‑ni kjoa̱faꞌaitsjen‑le̱.

33 Kꞌia̱ jè chjo̱ta̱ fariseo kao̱ chjo̱ta̱ xi kji kjoa̱téxoma‑le̱ Niná xi kiski Moisés,

kitsò‑le̱:

—Án‑ni nga jè chjo̱ta̱ xi ya̱ kòtꞌayàtꞌa‑le̱ Juan nkjìn kꞌa batiònchjan‑ni xi tꞌatsꞌe̱ Niná kꞌoa̱ nkjìn kꞌa fákao̱ Niná,

kꞌoa̱ kꞌoa̱ati̱ sꞌín chjo̱ta̱ xi ya̱ kòtꞌayàtꞌa‑le̱ chjo̱ta̱ fariseo,

to̱nga jè chjo̱ta̱ xi kòtꞌayàtꞌa‑lì kjèn‑ní kꞌoa̱ ꞌbi‑ní.

34 Jesús kitsò‑le̱:

—A koa̱an‑no nga si̱katiónchjaon ngatsꞌi mìyo̱‑le̱ xi tíbixan,

kꞌia̱ nga̱ ya tíjnakao̱sa jè xꞌi̱n xi tíbixan.

35 To̱nga kjoa̱ꞌaí ni̱chrjin kꞌia̱ nga jè xꞌi̱n xi tíbixan tjóxìn‑le̱,

kꞌoa̱ kꞌia̱a koa̱tiònchjan nga koi ni̱chrjin.

36 Kꞌoa̱ti̱ tsakakóya jngo‑le̱ choa̱ xi mangósòn‑kao̱ jngo kjoa̱,

kitsò‑le̱:

—Lìꞌya xi najño chjo̱tse̱ bate kꞌoa̱ koi bꞌéjchro‑ni najño jchá;

tsà kꞌoa̱sꞌi̱in,

alì tsà to̱jè‑jìn najño chjo̱tse̱ kꞌoe̱ejnda,

kꞌoa̱ati̱ koi nga jè najño chjo̱tse̱ lìkoi nda koa̱n‑tsen kao̱ jè najño jchá.

37 Kꞌoa̱ ni̱ꞌya‑jìn xi ndá totseè chjo̱tse̱ bꞌéya chrjoa̱ jchá‑le̱ cho̱;

tsà kꞌoa̱sꞌiìn,

jè ndá totseè chjo̱tse̱ kꞌoe̱ejndaà chrjoa̱ jchá kꞌoa̱ xíjteèn,

kꞌoa̱ jè chrjoa̱ to̱ koi̱tsón.

38 To̱nga jè ndá totseè chjo̱tse̱ chrjoa̱ chjo̱tse̱e tjínè‑le̱ sꞌe̱ya;

kꞌoa̱ nga jngó jngó tseè koa̱n‑le̱.

39 Kꞌoa̱ ni̱jngo‑jìn xi skꞌoí ndá totseè jchá kꞌoa̱ skan koanme‑le̱ xi sꞌa̱ chjo̱tse̱;

nga̱ koi̱tso̱‑ní:

“Jè xi jchá ngìsa̱a nda ꞌyò”.