Kꞌia̱ nga jè nai̱i kiskòtꞌaya‑kao̱ Jesús
4
Kꞌoa̱ kꞌia̱ jè Sén Ni̱chrjin Tsje kikao̱ Jesús ya̱ ꞌnde tꞌaxìn‑tꞌa,
jmé‑ni nga ya̱ skótꞌayàkao̱‑ni jè nai̱i.
2 Kꞌoa̱ kꞌia̱ nga je ñachàn ni̱chrjin kao̱ ñachàn ni̱tje̱n tsakꞌèjna nchjan Jesús xi tꞌatsꞌe̱ Niná,
koanbao‑le̱.
3 Kꞌoa̱ ya̱ jaꞌaikòn‑le̱ jè nai̱i nga skótꞌayàkao̱,
kꞌoa̱ kitsò‑le̱:
—Tsà ji‑ní ꞌNdí‑le̱ Niná,
kꞌoa̱si nga jè la̱jao̱ xo̱kjoan nio̱xtìla̱ kàtamꞌóya.
4 Jesús kinchja̱ kꞌoa̱ i̱ kitsò:
—Kꞌoa̱asꞌìn tjítꞌa xo̱n‑le̱ Niná:
“Alì tsà to̱ nio̱xtìla̱‑jìn xi kꞌoéjnakon‑ni jè chjo̱ta̱,
to̱saà kao̱ ngayije én xi bitjo‑ni tsꞌoa Niná”.a
5 Kꞌia̱ jè nai̱i kikao̱ ya̱ na̱xi̱nandá‑nꞌión Jerusalén,
xi tsꞌe̱ Niná,
kꞌoa̱ ya̱ kisikꞌéjnasòn yo̱ngo̱,
jña nꞌión ngꞌa,
6 kꞌoa̱ kitsò‑le̱:
—Tsà ji‑ní ꞌNdí‑le̱ Niná,
ti̱kꞌatje̱njen‑ngi yao‑li̱;
nga̱ kꞌoa̱asꞌìn tjítꞌa xo̱n‑le̱ Niná:
“Jè cho̱ꞌnda ngꞌajmi‑le̱ si̱ikasén‑kon‑lì,”b
kꞌoa̱,
“Kao̱o ntsja jtsoa̱nꞌión‑nilì,
Jmé‑ni nga tsì tsà la̱jao̱ sa̱téngi‑ni ndso̱koi”.c
7 Jesús kitsò‑le̱:
—Kꞌoa̱ati̱ sꞌìn tjítꞌa xo̱n‑le̱ Niná:
“Alì Nai‑li̱ Niná‑li̱ jìn chòtꞌayàkoai̱”.d
8 Ngìjngokꞌà jè nai̱i kikao̱ ya̱ jngo nindo xi nꞌión ngꞌa,
kꞌoa̱ tsakakó‑le̱ ngayije na̱xi̱nandá‑yꞌai xi tjín i̱ soꞌnde kꞌoa̱ kao̱ kjoa̱jeya‑le̱,
9 kꞌoa̱ jè nai̱i kitsò‑le̱:
—Ngayije xo̱chon tsjoaà‑lè,
tsà ji xi sójnajten‑tꞌai nangi nga jcha̱xkón‑naí.
10 Kꞌia̱ Jesús kitsò‑le̱:
—Ti̱se̱nxìn,
nai̱i,
nga̱ kꞌoa̱asꞌìn tjítꞌa xo̱n‑le̱ Niná:
“To̱ jè Nai‑li̱ Niná‑li̱ jcha̱xkoín,
kꞌoa̱ to̱jngoò jè xi ti̱xá‑lai̱”.e
11 Kꞌoa̱ kꞌia̱ jè nai̱i tsakasènxìn‑le̱ Jesús,
kꞌoa̱ ki;
kꞌoa̱ kjoan kꞌia̱ nkjìn cho̱ꞌnda ngꞌajmi jaꞌai xi kisisin‑le̱.
Kꞌia̱ nga Jesús tsakꞌétsꞌia̱kao̱ xá‑le̱
12 Kꞌia̱ nga Jesús kinchrꞌoé nga ndo̱yá tíjnaꞌya Juan xi Kanísꞌen‑ngindá,
kꞌia̱ ki ngìndia‑ni ya̱ ꞌnde Galilea;
13 kꞌoa̱ kjitjo‑ni ya̱ na̱xi̱nandá‑nꞌión Nazaret,
jaꞌai kꞌoa̱ ya̱ tsakꞌèjna‑ni ya̱ na̱xi̱nandá‑nꞌión Capernaum xi ya̱ tíjna ya̱ ndai ndáchikon xi nchja̱‑ni ꞌnde Zabulón kao̱ ꞌnde Neftalí,
14 jmé‑ni nga kàtabitjosòn‑ni josꞌìn kiski Isaías jè xi kinchja̱ya ngajao‑le̱ Niná,
kꞌia̱ nga kitsò:
15 “Nangi Zabulón kao̱ nangi Neftalí,
Ndia̱a xi kijna ndai ndáchikon,
ya̱ xingoa‑nile̱ xo̱ngá nandá Jordán,
ꞌNde Galilea jña tjió chjo̱ta̱ xi tsì tsà chjo̱ta̱ judío‑jìn;
16 Jè chjo̱ta̱ xi kjoa̱njiòn tjiójin jngo lꞌí xi nꞌión sí-isen tsabe;
Kꞌoa̱ jè xi ya̱ tjió ya̱ ꞌnde jña kijna ngꞌián‑le̱ kjoa̱biya,
Lꞌí kisi-isen‑le̱”.f
17 Kꞌia̱a saꞌnda tsakꞌétsꞌia̱kao̱‑ni Jesús nga kinchja̱ya kꞌoa̱ nga kitsò:
«Ti̱kꞌantjaìyao kjoa̱faꞌaitsjen‑no nga̱ jeè nchroá machrian ni̱chrjin nga kjoa̱ꞌaí kàtéxoma jè xi tíjna ya̱ ngꞌajmi».
18 Kꞌia̱ nga tsòꞌba Jesús ya̱ ndai ndáchikon xi Galilea nchja̱‑ni,
tsabe jaò chjo̱ta̱ xi ndsꞌe̱ faó,
Simón xi Pedro ꞌmì kao̱‑ni,
kao̱ Andrés xi ndsꞌe̱ ma,
nga tjiósíkꞌatje̱njin na̱ꞌya‑le̱ ya̱ ndáchikon;
nga̱ jti̱i tsoa.
19 Kꞌoa̱ kitsò‑le̱:
—Nchroátje̱n‑ngi‑naó,
kꞌoa̱ aàn kꞌoa̱sꞌian nga koa̱n‑no kꞌoéxkó chjo̱ta̱ xi tsꞌa̱n koa̱n,
josꞌìn ma‑no ndoa jti̱.
20 Kꞌoa̱ kꞌia̱ Pedro kao̱ Andrés kjitꞌanangi kisikatió na̱ꞌya‑le̱ kꞌoa̱ kitje̱n‑ngi‑le̱ Jesús.
21 Kꞌia̱ nga tjiófì,
Jesús tsabe ngìjaò chjo̱ta̱ xi ndsꞌe̱ faó,
Jacobo kao̱ Juan,
jè xti‑le̱ Zebedeo,
tjióyà chitso kao̱ Zebedeo nꞌai‑le̱,
xi na̱ꞌya‑le̱ tjióbꞌéjchro;
kꞌoa̱ kinchja̱‑le̱ nga kàtanchroátje̱n‑ngi‑le̱.
22 Kꞌoa̱ Jacobo kao̱ Juan kjitꞌanangi kisikatió chitso kao̱ jè nꞌai‑le̱,
kꞌoa̱ kitje̱n‑ngi‑le̱ Jesús.
23 Kꞌoa̱ Jesús tsakꞌamjen ngakijndà ꞌnde Galilea,
tsakakóya ngakijndà ya̱ jña‑ni nga tjió ndꞌia jña maxkia̱ xo̱n‑le̱ Niná,
xi tsꞌe̱ chjo̱ta̱ judío,
kꞌoa̱ kinchja̱ya jè én nda xi tꞌatsꞌe̱ jña batéxoma xi tíjna ya̱ ngꞌajmi,
kꞌoa̱ kisindaya ngatsꞌi chjo̱ta̱,
to̱jme chꞌin xi tjín‑le̱,
kꞌoa̱ kao̱ ngayije kjoa̱ñꞌain xi tjiófaꞌá chjo̱ta̱.
24 Kꞌoa̱ kisòn én xi tꞌatsꞌe̱ Jesús ngakijndà ꞌnde Siria;
kꞌoa̱ chjo̱ta̱ jaꞌaikao̱‑le̱ ngatsꞌi xi kjoa̱ñꞌain tjiófaꞌá,
jè xi nꞌión tse tjiófaꞌákon xi to̱ tꞌatsꞌe̱ nga nkjìn jko̱ya chꞌin tjín-le̱ kꞌoa̱ xi tjióbatéjé:
jè xi sén ni̱chrjin xi tsꞌe̱ nai̱i tjiójin‑le̱,
jè xi chꞌin xín tjín‑le̱ kao̱ jè xi yo̱ma̱ kjoan yao‑le̱;
kꞌoa̱ kisindaya ngatsꞌi.
25 Kꞌoa̱ nꞌión nkjìn chjo̱ta̱ kitje̱n‑ngi‑le̱ xi ya̱ ꞌnde Galilea tsꞌe̱ kao̱ xi ya̱ ꞌnde Decápolis tsꞌe̱,
xi ya̱ Jerusalén kao̱ xi ya̱ ꞌnde Judea tsꞌe̱,
kao̱ xi ya̱ tsꞌe̱ xingoa‑nile̱ xo̱ngá nandá Jordán.