Kꞌia̱ nga kinchja̱ya Juan xi Kanìsꞌen‑ngindá
3
Kꞌia̱ nga koi ni̱chrjin jaꞌai Juan xi Kanísꞌen‑ngindá,
kinchja̱ya ya̱ ꞌnde tꞌaxìn‑tꞌa xi nchja̱‑ni ya̱ ꞌnde Judea,
2 kꞌoa̱ i̱ kitsò:
«Ti̱kꞌantjaìyao kjoa̱faꞌaisjen‑no,
nga̱ jeè nchroá machrian ni̱chrjin nga kjoa̱ꞌaí kàtéxoma jè xi tíjna ngꞌajmi».a
3 Nga̱ jè Isaías xi kinchja̱ya ngajao‑le̱ Niná,
kinchja̱ xi tꞌatsꞌe̱ Juan,
kꞌia̱ nga kitsò:
«Jta̱ xi nꞌión nchja̱ya ya̱ ꞌnde tꞌaxìn‑tꞌa:
“Tjandao jè ndia̱a‑le̱ Niná,
Tjakìxio̱o ndia̱a‑le̱”».b
4 Kꞌoa̱ Juan yꞌakjá najño xi ntsja̱‑le̱ cho̱ camello koan‑nda‑ni,
kꞌoa̱ jngo chrjoa̱xín tjíkjá kjándiá‑le̱;c
kꞌoa̱ cho̱ba̱ kiskine kao̱ ntsjén‑le̱ cho̱ ntsjén xi tjín ya̱ ngijñá.
5 Kꞌoa̱ kitjonchrꞌoé chjo̱ta̱ xi Jerusalén tsꞌe̱,
kao̱ ngatsꞌi xi ya̱ nchja̱‑ni ꞌnde Judea,
kao̱ ngatsꞌi xi ya̱ tsꞌe̱ jngotjondai‑le̱ xo̱ngá nandá Jordán,
6 kꞌoa̱ ngatsꞌi chjo̱ta̱ xi kitsòya jé‑le̱,
Juan kiskanìsꞌen‑ngindá ya̱ xo̱ngá nandá Jordán.
7 Kꞌia̱ nga tsabe Juan nga nkjìn chjo̱ta̱ fariseo kao̱ chjo̱ta̱ saduceo jaꞌaikòn‑le̱ xi me‑le̱ nga Juan kàtakanísꞌen‑ngindá,
kitsò‑le̱:
«¡Ntje̱‑le̱ ye̱!,
jñá tsan-ngìchꞌà‑nilao̱o nga koa̱n koi̱yó‑lao̱o kjoa̱ñꞌain xi sꞌa̱ nchroá.
8 Kꞌoa̱tꞌia̱on‑ni jè kjoa̱ xi bakìn‑le̱ nga je kinìkꞌantjaìyao kjoa̱faꞌaisjen‑no,
9 kꞌoa̱ alì koi‑jìn nìkjaꞌaitsjaon ya̱ jin ni̱ma̱‑no én xi tsò:
“Ntje̱‑le̱ Abraham‑nìji̱n”;
nga̱ an kꞌoa̱axin‑no nga Niná koa̱an‑le̱ nga jè la̱jao̱ xo̱kjoan nga ntje̱‑le̱ Abraham si̱ikao̱.
10 Kꞌoa̱ kꞌoa̱ati̱ jè jàcha̱ jeè ya̱ kijnatꞌa‑le̱ ja̱ma̱‑le̱ yá;
kꞌoa̱ koiì nga ngayije yá xi tsì nda to ba‑le̱ jtísòn‑ní kꞌoa̱ ya̱a lꞌí sꞌe̱tsaojin.
11 An xi kjoa̱kìxi̱ nandá tìbꞌejtsanè‑no nga je tinìkꞌantjaìyao kjoa̱faꞌaitsjen‑no;
to̱nga jè xi sꞌa̱ nchroá,
ngìsa̱a tse nganꞌión tjín‑le̱ ti̱kꞌoa̱‑ni an,
saꞌnda lìkoi bakìn‑na nga an kꞌoatje̱n‑ngi‑le̱ jténꞌó‑le̱;
jè kꞌoe̱ejtsanè‑no kao̱o Sén Ni̱chrjin Tsje kꞌoa̱ kao̱ lꞌí.
12 Jeè kjiantsja yá nchrji̱ xi kꞌoe̱engi trigo nga ska̱nìtje̱n tjé‑le̱,
kꞌoa̱ kꞌia̱ si̱itsje ꞌnde jña sꞌenè trigo;
kꞌoa̱ koi̱nchaxkó jè trigo ya̱ ningꞌa‑le̱,
kꞌoa̱ jè tjé‑le̱ koa̱kà ya̱ jin lꞌí xi ni̱kꞌia‑jìn bitsꞌao».
Kꞌia̱ nga Juan kiskanìsꞌen‑ngindá Jesús
13 Kꞌoa̱ kꞌia̱ Jesús jaꞌai‑ni ꞌnde Galilea nga kikon‑le̱ Juan ya̱ xo̱ngá nandá Jordán,
jmé‑ni nga jè katakanísꞌen‑ngindá‑ni.
14 To̱nga Juan tsakꞌèjnachjoá‑le̱,
kitsò:
—Aàn xi machjén‑na nga ji cha̱nìsꞌen‑ngindá‑naí,
kꞌoa̱,
a to̱sa̱a ji kàfaꞌai̱nchrꞌoè‑naí.
15 To̱nga Jesús kitsò‑le̱:
—Alì mai‑jìn ꞌmì‑naí,
nga̱ kꞌoa̱asꞌìn machjén nga sikitjosoàn ngayije xi kjoa̱kìxi̱.
Kꞌia̱ Juan kitsjoaꞌndè‑le̱.
16 Kꞌoa̱ kꞌia̱ nga je koan kichanìsꞌen‑ngindá Jesús,
kjoan kitjojin‑ni nandá;
kꞌoa̱ koe̱e‑ni kitjoꞌaì‑le̱ ngꞌajmi,
kꞌoa̱ tsabe jè Sén Ni̱chrjin‑le̱ Niná xi jo ni̱se chroa kji kꞌoa̱ jaꞌaijen‑nè‑le̱.
17 Kꞌoa̱ ya̱ ngꞌajmi kinòꞌyà‑nile̱ jngo jta̱ xi kitsò:
«Jé jè ꞌNdí‑na̱,
nꞌión tsjoake̱,
jo nda sꞌe koan xi tꞌatsꞌe̱».