Én nda‑le̱ Jesucristo josꞌìn kiski
Juan
Jè Én chjo̱ta̱a koan
1
Kꞌia̱ nga kitsꞌia‑ni ngayije,
Jè Én jeè tíjna,
Kꞌoa̱ jè Én ya̱a tíjnakao̱ Niná,
kꞌoa̱ jè Én Niná‑ní.
2 Jeè ya̱ tíjnakao̱ Niná nga kitsꞌia ngayije.
3 Ngayije jme xi tjín jè soaà kisinda,
Kꞌoa̱ ni̱jme‑jìn xi tjín ndꞌai̱ koan koanda tsà tsìn jè.
4 Jè soaà xi kjoa̱bijnachon saꞌnda nga kitsꞌia ngayije,
Kꞌoa̱ jè kjoa̱bijnachon jé xi lꞌí koan‑le̱ ngatsꞌi chjo̱ta̱.
5 Jè lꞌí sí-isen jña kijna kjoa̱njiòn,
Kꞌoa̱ jè kjoa̱njiòn lìkoi síkinjen‑le̱.
6 Jngo chjo̱ta̱ tsakꞌèjna xi Niná kisikasén,
xi Juan tsakꞌìn.
7 Juan jaꞌai joni jngo chjo̱ta̱ xi tsjoá én‑le̱,
jmé‑ni nga kitjsoa‑ni én xi tꞌatsꞌe̱ lꞌí,
jmé‑ni nga ngatsꞌi chjo̱ta̱ koankjaín‑nile̱ xi to̱ tꞌatsꞌe̱ én xi kinchja̱.
8 Alì tsà jè‑jìn xi lꞌí,
to̱saà jè xi kitsjoa én‑le̱ xi tꞌatsꞌe̱ lꞌí.
9 Jé lꞌí jè xi ñaki kjoa̱kìxi̱,
xi sí‑isen‑le̱ ngatsꞌi chjo̱ta̱,
jaꞌai i̱ soꞌnde.
10 Jè lꞌí
To̱kꞌoa̱ tíjnaà i̱ soꞌnde,
Kꞌoa̱ jè soꞌnde jé tsakꞌénda;
To̱nga jè chjo̱ta̱ soꞌnde lìkoi tsabexkon.
11 Ya̱a jaꞌainchrꞌoè jme xi tsꞌe̱,
To̱nga jè chjo̱ta̱ xi ti̱koi‑ni ntje̱‑le̱ lìkoi kiskoétjaò.
12 To̱nga ngatsꞌi xi kiskoétjaò,
jè xi makjaín‑le̱ tꞌatsꞌe̱,
Kitsjoaà‑le̱ kjoa̱nda nga ꞌndí‑le̱ Niná ma;
13 Jè xi tsì tsà kꞌoa̱sꞌìn tsin josꞌìn tsin chjo̱ta̱,
Ni̱ kao̱ kjoa̱tsjoa‑le̱ yao‑jìn,
Kꞌoa̱ ni̱ koi‑jìn nga chjo̱ta̱ me‑le̱,
To̱saà tꞌatsꞌe̱ Niná tsin‑ni.
14 Kꞌoa̱ jè Én jè,
chjo̱ta̱a koan,
kꞌoa̱ i̱i tsakꞌèjnajin‑ná
(Kꞌoa̱ tsaꞌya‑ñá jè kjoa̱jeya‑le̱,
Jè kjoa̱jeya xi tsꞌe̱ ꞌNdí to̱jngo‑le̱ Nꞌai),
Xi to̱makji tse kjoa̱nda kao̱ xi ñaki én kìxi̱ tjín‑le̱.
15 Juan kitsjoa én xi tꞌatsꞌe̱,
kꞌoa̱ nꞌión kinchja̱,
kitsò:
«Tꞌatsꞌe̱e chjo̱ta̱ xo̱kji xi kixian:
“Jè xi skan kjoa̱ꞌaí,
jè ngìsa̱a ngꞌa tíjna ti̱kꞌoa̱‑ni an;
nga̱ jè títjòn tíjna‑na”».
16 Nga̱ ngayije jme xi jè tjín‑le̱,
ya̱a tichjoé‑ñá ngatsꞌiaà,
Kꞌoa̱ jè kjoa̱nda‑le̱ to̱sa tse to̱sa tseè tíbꞌaí‑ná.
17 Nga̱ jè kjoa̱téxoma‑le̱ Niná,
jé Moisés kisikꞌatoya,
To̱nga jè kjoa̱nda kao̱ én xi ñaki kìxi̱,
Jé Jesucristo jaꞌaikao̱.
18 Jè Niná ni̱saꞌya‑jìn xi tsabe;
To̱nga jè ꞌNdí to̱jngo‑le̱ Nꞌai,
Jè xi ya̱ tíjnakao̱ Nꞌai,
Jé‑ní xi bakó ꞌyá‑ni Niná.
Én xi kinchja̱ Juan, jè xi Kanísꞌen‑ngindá
19 Koiì jè én xi kitsjoa Juan xi kiskanìsꞌen‑ngindá,
kꞌia̱ nga jè chjo̱ta̱ jchínga‑le̱ chjo̱ta̱ judío kisikasén‑kon kꞌa‑le̱ na̱ꞌmi kao̱ chjo̱ta̱ xi ntje̱‑le̱ Leví kitje̱n‑ni xi Jerusalén kinchroa‑ni,
jmé‑ni nga skónangi‑sínile̱,
kitsò‑le̱:
—ꞌYá‑ni ji.
20 Kꞌoa̱ Juan lìkoi tsakꞌéꞌma to̱saà kitsòyasòn‑tsen,
kitsò:
—Alì an‑jiàn Jè Xi Niná Kisikasén.
21 Kꞌoa̱ kꞌia̱ kichjònangi‑le̱:
—Kꞌoa̱ ꞌyá‑nini ji.
A ji‑ní Elías.a
Juan kitsò:
—Mai,
alì an‑jiaàn.
Ngìjngo kꞌà kichjònangi‑le̱:
—A ji‑ní jè chjo̱ta̱ xi koi̱nchja̱ya ngajao‑le̱ Niná xi tjín‑ni nga kjoa̱ꞌaí.b
Kꞌia̱ jè kitsò:
—Majaìn.
22 Kꞌia̱ jè chjo̱ta̱ xi jaꞌaikòn‑le̱ kitsò‑le̱:
—Ngo̱ ꞌyá‑nini ji,
kꞌoa̱ jósi xi tꞌatsi̱,
jmé‑ni nga koi én chꞌa̱ni‑lai̱ji̱n jè chjo̱ta̱ xi kàsíkasén‑naji̱n.
23 Kꞌia̱ Juan kitsò:
—An‑nià jè jta̱ xi nꞌión nchja̱ ya̱ ꞌnde tꞌaxìn‑tꞌa,
xi tsò:
“Tjakìxio̱o ndia̱a‑le̱ Nai‑ná,”
josꞌìn nga kitsò Isaías jè chjo̱ta̱ xi kinchja̱ya ngajao‑le̱ Niná.c
24 Kꞌoa̱ jè chjo̱ta̱ xi kinìkasén‑kon‑le̱ Juan,
chjo̱ta̱ fariseo‑ní.
25 Kꞌoa̱sꞌìn kiskònangi‑le̱ kꞌoa̱ kitsò‑le̱:
—Án‑nini nga chjo̱ta̱ chanìsꞌen‑ngindá‑ni,
tsà tsì tsà ji‑jìn Jè Xi Niná Kisikasén,
tsà ni̱ Elías‑jiìn,
kꞌoa̱ tsà tsì ji‑jìn chjo̱ta̱ xi tjín‑ni nga kjoa̱ꞌaí xi koi̱nchja̱ya ngajao‑le̱ Niná.
26 Juan kinchja̱,
kitsò‑le̱:
—An nandá kanisꞌèn‑ngindá‑jiàn chjo̱ta̱;
to̱nga ya̱ tíjnajin jngo‑no xi tsì ꞌyaxkon.
27 Jè xi kixin‑no nga skan kjoa̱ꞌaí,
jé tíjna títjòn‑na,
xi tsì an bakìn‑na nga skojndá jténꞌó‑le̱.
28 Ngayije kjoa̱ jè,
ya̱a kꞌoa̱koan ya̱ na̱xi̱nandá‑ꞌndí Betábara,
ya̱ xingoa‑le̱ xo̱ngá nandá Jordán,
jña‑ni nga Juan tíkanìsꞌen‑ngindá chjo̱ta̱.
Jè Barrè ꞌNdí‑le̱ Niná
29 Xi koanchaon‑ni Juan tsabe nga Jesús ya̱ tínchroánchrꞌoè,
kꞌia̱ kitsò:
«Koe̱e‑ni jè Barrè ꞌNdí xi tsꞌe̱ Niná,
jè‑ní xi bꞌáxìn jé‑le̱ chjo̱ta̱.
30 Tꞌatsꞌe̱e jè xi kixin‑no:
“Skaàn kjoa̱ꞌaí jngo chjo̱ta̱ xꞌi̱n xi ngìsa̱ ngꞌa tíjna ti̱kꞌoa̱‑ni an;
nga̱ jé xi tíjna títjòn saꞌnda ngasꞌa̱,
to̱nga xi an mai”.
31 Kꞌoa̱ an lìkoi ꞌbexkoan tsàkai;
to̱nga jmé‑ni nga kàtabe‑ni na̱xi̱nandá Israel ꞌyá‑ni jè,
koiì xá jàꞌai̱‑nia nga kanisꞌèn‑ngindá chjo̱ta̱».
32 Kꞌoa̱ti̱ Juan kitsjoa én‑le̱ kitsò:
«An tsabe jè Sén Ni̱chrjin Tsje xi kinchroajen‑ni ya̱ ngꞌajmi,
joni jngo ni̱se chroa,
jaꞌaijen‑nè‑le̱ Jesús kꞌoa̱ ya tsakꞌèjnakao̱.
33 Kꞌoa̱ an lìkoi ꞌbexkoan tsàkai;
to̱nga jè xi kisikasén‑na nga skanisꞌèn‑ngindá chjo̱ta̱,
jé xi i̱ kitsò‑na:
“Jè xi jchai̱ nga kjoa̱ꞌaíjen‑nèle̱ jè Sén Ni̱chrjin Tsje kꞌoa̱ ya̱ kꞌoéjnakao̱,
jè‑ní xi kꞌoe̱ejtsanè‑no kao̱ Sén Ni̱chrjin Tsje”.
34 Kꞌoa̱ aàn tsabe,
kꞌoa̱ tìtsjoa‑nià én‑na̱ nga jé‑ní xi ꞌNdí‑le̱ Niná».
Jè chjo̱ta̱ xi títjòn kiskòtꞌayàtꞌa‑le̱ Jesús
35 Xi koanchaon‑ni ti̱ya̱ tíjna ngá‑ni Juan ya̱ ndai xo̱ngá nandá Jordán,
kao̱ jaò chjo̱ta̱ xi ya̱ kòtꞌayàtꞌa‑le̱.
36 Kꞌia̱ nga tsabe nga Jesús ya̱ tsòꞌba,
kitsò:
—Chótsaon,
tíjna ya̱ jè Barrè ꞌNdí xi tsꞌe̱ Niná.
37 Kinchrꞌoé ngajaò chjo̱ta̱ xi ya̱ kòtꞌayàtꞌa‑le̱ Juan nga kꞌoa̱kitsò,
kꞌoa̱ kitje̱n‑ngi‑le̱ Jesús.
38 Kꞌia̱ kisikꞌófaya Jesús,
kꞌoa̱ kꞌia̱ nga tsabe nga ya̱ tje̱n‑ngi‑le̱,
kitsò‑le̱:
—Jmé xi tìbijnchisjaò.
Kꞌia̱ kinchja̱ ngajaò kitsò:
—Ji xi bakòyai,
jñá tijna‑ni.
39 Kꞌia̱ Jesús kitsò‑le̱:
—Nchroaó kꞌoa̱ chótsaon.
Ki,
kꞌoa̱ tsabe jña bꞌèjna‑ni,
kꞌoa̱ ya̱ tsakatiòkao̱ nga koi ni̱chrjin,
nga̱ jeè koanxòn nga kꞌia̱.
40 Jngo xi kinchrꞌoé‑le̱ Juan kꞌoa̱ kitje̱n‑ngi‑le̱ Jesús,
jè‑ní Andrés,
jè ndsꞌe̱ Simón Pedro.
41 Andrés,
títjòn koansjai‑le̱ Simón jè ndsꞌe̱,
kꞌoa̱ kitsò‑le̱:
—Jeè kàmasjai‑naji̱n jè Mesías (én xi tsò‑ni:
“Jè Xi Niná Kisikasén”).
42 Kꞌoa̱ jaꞌaikao̱tꞌa‑le̱ Jesús.
Kꞌia̱ Jesús kiskòtsen‑le̱,
kitsò:
—Ji‑ní Simón,
ꞌndí‑le̱ Jonás;
Cefas kꞌoín‑lì ndꞌai̱ (én xi Pedro tsò‑nile̱).
Jesús kinchja̱‑le̱ Felipe kao̱ Natanael
43 Xi koan‑nchaon‑ni Jesús koanme‑le̱ ki ya̱ ꞌnde Galilea,
kꞌoa̱ kisatejin Felipe,
kꞌoa̱ kitsò‑le̱:
—Nchroátje̱n‑ngi‑naí.
44 Kꞌoa̱ Felipe ya̱a na̱xi̱nandá‑nꞌión Betsaida tsꞌe̱,
jña tsꞌe̱ Andrés kao̱ Pedro.
45 Felipe koansjai‑le̱ Natanael,
kꞌoa̱ kitsò‑le̱:
—Jeè kàmasjai‑naji̱n jè xi kinchja̱‑ni Moisés kꞌia̱ nga kiski ya kjoa̱téxoma‑le̱ Niná,
kꞌoa̱ tꞌatsꞌe̱ xi kinchja̱ya‑ni ngatsꞌi chjo̱ta̱ xi kinchja̱ya ngajao‑le̱ Niná:
Jè Jesús,
xi ya̱ na̱xi̱nandá‑nꞌión Nazaret tsꞌe̱,
xi ti‑le̱ José ma.
46 Natanael kitsò‑le̱:
—A koa̱an koi̱tjo‑ni ya̱ na̱xi̱nandá‑nꞌión Nazaret jngo kjoa̱ xi nda tjín.
Felipe kitsò‑le̱:
—Nchroaí kꞌoa̱ chótsain.
47 Kꞌia̱ nga Jesús tsabe nga Natanael tínchroánchrꞌoè,
kitsò xi tꞌatsꞌe̱:
—Koe̱e‑ni,
jngo chjo̱ta̱ xi ñaki kjoa̱kìxi̱ nga Israel tsꞌe̱,
xi tsìn‑le̱ kjoa̱chꞌàna̱cha̱.
48 Kꞌoa̱ jè Natanael kitsò‑le̱ Jesús:
—Jó ma ꞌyaxkon‑ninaí.
Kinchja̱ Jesús kitsò‑le̱:
—Ti̱ꞌa‑ni nga kje nchja̱‑lì Felipe,
kꞌia̱nga tijnangi ya̱ yá higo,
kàꞌbe‑lè.
49 Kinchja̱ Natanael kitsò:
—Ji xi bakòyai,
ji‑ní ꞌNdí‑le̱ Niná;
ji‑ní Chjo̱ta̱xá Ngajko̱‑le̱ na̱xi̱nandá Israel.
50 Kꞌia̱ kinchja̱ Jesús kitsò‑le̱:
—A to̱ koì‑ni nga kàxin‑lè:
“Kàꞌbeè‑lè nga ya̱ tijnangi ya̱ yá higo,”
makjaín‑nilì.
Jcha̱‑ní kjoa̱ xi ngìsa̱ xkón tjió ti̱kꞌoa̱‑ni jè.
51 Kꞌoa̱ kitsò‑sa:
—Ñaki kìxi̱i xi xin‑no:
Bꞌétsꞌia̱‑ni ndꞌai̱ jcha̱‑niò jè ngꞌajmi nga ti̱xꞌa̱,
kao̱ jè cho̱ꞌnda ngꞌajmi‑le̱ Niná xi fìmi kao̱ xi nchroájen‑kon‑le̱d ꞌNdí‑le̱ Chjo̱ta̱.