Jè kjoa̱bixan xi kisꞌe ya̱ Caná
2
Xi koan jàn‑ni ni̱chrjin kisꞌe jngo kjoa̱bixan ya̱ na̱xi̱nandá Caná xi ꞌnde Galilea nchja̱‑ni;
kꞌoa̱ ya̱ tíjna jè na̱‑le̱ Jesús.
2 Jesús kao̱ chjo̱ta̱ xi ya̱ kòtꞌayàtꞌa‑le̱,
kꞌoa̱ti̱ xá kinòkjoa̱‑nile̱ ya̱ jña tíjna kjoa̱bixan.
3 Kꞌia̱ nga je jetꞌa ndá totseè xi tjióꞌbi chjo̱ta̱,
jè na̱‑le̱ Jesús kitsò‑le̱:
—Jeè tsìn‑le̱ ndá totseè.
4 Jesús kitsò‑le̱:
—Án‑ni nga an kꞌoa̱ꞌmì‑ninaí.
Nga̱ kje‑sa bichó‑jìn ni̱chrjin‑na̱.
5 Jè na̱‑le̱ Jesús kitsò‑le̱ jè cho̱ꞌnda xi ya̱ tjiósísin:
—Kꞌoa̱tꞌia̱on ngayije jme xi jè kꞌoa̱koi̱tso̱‑no.
6 Kꞌoa̱ ya̱ tjió jaon ti̱i tsian xi la̱jao̱ koanda‑ni,
xi nandá sꞌeya,
xi síchjén chjo̱ta̱ judío,
josꞌìn bꞌénè kjoa̱téxoma‑le̱ Niná xi kiski Moisés,
nga sítsje yao‑le̱ ngixko̱n Niná,
nga jngó jngó ti̱i jchóya‑la̱ tsà jaò kꞌoa̱ tsà jàn nisa nandá.
7 Jesús kitsò‑le̱:
—Ti̱nchao nandá jè ti̱i xo̱kjoan.
Kꞌoa̱ ñaki ndaà tsakꞌékitse nandá jè ti̱i xo̱kjoan.
8 Kꞌoa̱ kꞌia̱ kitsò‑le̱ jè cho̱ꞌnda xi ya̱ tjiósísin:
—Chꞌa̱sje choa‑jiòn,
kꞌoa̱ tangíkao̱‑lao̱o jè xi síchja̱ꞌa̱.
Kꞌoa̱ kikao̱‑le̱.
9 Kꞌia̱ nga jè xi síchja̱ꞌa̱ kiskòtꞌa jè nandá xi ndá totseè tsakꞌòn‑ya,
kꞌoa̱ jè lìkoi be jña jaꞌai‑ni ndá totseè,
to̱nga jè cho̱ꞌnda xi tsakꞌasje nandá tsabeè jókoan‑ni,
jè xi síchja̱ꞌa̱ kinchja̱‑le̱ jè chjo̱ta̱ xi tíbixan,
10 kꞌoa̱ i̱ kitsò‑le̱:
—Ngatsꞌi chjo̱ta̱ koiì títjòn tsjoá ndá totseè xi nda,
kꞌoa̱ kꞌia̱ nga je tse kàꞌbi chjo̱ta̱,
kꞌia̱a tsjoá jè xi choa chjí‑le̱;
to̱nga ji kàbꞌèyatjaó‑nì saꞌnda ndꞌai̱ jè ndá totseè xi nda.
11 Ya̱a na̱xi̱nandá Caná xi ꞌnde Galilea nchja̱‑ni,
tsakꞌétsꞌia̱kao̱ Jesús choa̱ xi kisꞌin,
kꞌoa̱ tsakakó kjoa̱jeya‑le̱;
kꞌoa̱ jè chjo̱ta̱ xi ya̱ kòtꞌayàtꞌa‑le̱ koan‑kjaín‑le̱ tꞌatsꞌe̱.
12 Xi koanskan‑nile̱ kjoa̱ jè,
kijen Jesús ya na̱xi̱nandá‑nꞌión Capernaum kao̱ jè na̱‑le̱ kao̱ ndsꞌe̱ kꞌoa̱ kao̱ chjo̱ta̱ xi ya̱ kòtꞌayàtꞌa‑le̱,
kꞌoa̱ ya̱ tsakatiò jotjín ni̱chrjin.
Jesús tsakꞌaonsje chjo̱ta̱ xi baténa ya̱ nditsin‑le̱ yo̱ngo̱
13 Kꞌia̱ nga je machrian‑le̱ sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío;a
Jesús kao̱ chjo̱ta̱ xi ya̱ kòtꞌayàtꞌa‑le̱ kimi ya̱ Jerusalén,
14 kꞌoa̱ tsabe ya̱ nditsin‑le̱ yo̱ngo̱ ngatsꞌi xi tjióbaténa nchra̱ja̱,
barrè,
kao̱ to̱nia̱,
kꞌoa̱ kao̱ chjo̱ta̱ xi tao̱n síkꞌantjaì nga tjiótꞌa yámìxa̱‑le̱.
15 Kꞌoa̱ jngo nꞌó tsinb kisinda,
tsakꞌaonsje ngatsꞌi chjo̱ta̱ xo̱kjoan xi tjió ya̱ nditsin‑le̱ yo̱ngo̱,
kao̱ barrè kao̱ nchra̱ja̱;
kꞌoa̱ tsakꞌétsaoba tao̱n‑le̱ xi tao̱n síkꞌantjaì,
kꞌoa̱ kiskanìtíkjá yámìxa̱‑le̱;
16 kꞌoa̱ kitsò‑le̱ jè xi tjióbaténa to̱nia̱:
—Chꞌa̱sjao xo̱chon‑no,
kꞌoa̱ alì ndꞌia ndi̱tsi̱n‑jìn nìkꞌónyao ndꞌia‑le̱ Nꞌai‑na̱.
17 Kꞌia̱ kitjokjaꞌaitsjen‑le̱ chjo̱ta̱ xi ya̱ kòtꞌayàtꞌa‑le̱ nga kꞌoa̱sꞌìn tjítꞌa xo̱n‑le̱ Niná:
«Jè kjoa̱tsjoacha xi tjín‑na tꞌatsꞌe̱ ndꞌia‑li̱ koiì xi si̱ikꞌen‑na».c
18 Kꞌoa̱ jè chjo̱ta̱ jchínga‑le̱ chjo̱ta̱ judío kinchja̱,
kꞌoa̱ i̱ kitsò‑le̱:
—Jmé choa̱ xi bakò‑naíji̱n nga xá kichꞌaì,
nga kꞌoa̱nꞌiaìn kjoa̱ jè.
19 Kinchja̱ Jesús kꞌoa̱ kitsò‑le̱:
—Ti̱kixòyao jè yo̱ngo̱ xo̱kji,
kꞌoa̱ to̱ jàn ni̱chrjin skomitje̱n ngìndia‑nia.
20 Kꞌoa̱ kꞌia̱ kitsò jè chjo̱ta̱ judío:
—Ñachàn‑jaoòn nó koan kisꞌenda‑ni yo̱ngo̱ xo̱kji,
kꞌoa̱ ji,
a to̱ jàn ni̱chrjin chjómitje̱n‑ni.
21 To̱nga Jesús jè yo̱ngo̱ xi kitsò‑le̱ jé yao‑le̱.
22 Koiì kjoa̱,
kꞌia̱ nga jè jaꞌáyajin‑nile̱ kꞌen Jesús,
jè chjo̱ta̱ xi ya̱ kòtꞌayàtꞌa‑le̱ jaꞌaitsjen‑le̱ kꞌia̱ nga kꞌoa̱kitsò én jè;
kꞌoa̱ koan‑kjaín‑le̱ josꞌìn tsò jè Xo̱n Én‑le̱ Niná kao̱ én xi Jesús kinchja̱.
Jesús bexkoòn jókjoan ngatsꞌi chjo̱ta̱
23 Kꞌia̱ nga Jesús tíjna ya̱ Jerusalén,
kꞌia̱ nga tíbìtjo sꞌoí xi tꞌatsꞌe̱ nga tsì tsꞌakao̱‑le̱ kjoa̱biya chjo̱ta̱ judío,
nꞌión nkjìn xi koan‑kjaín‑le̱ tꞌatsꞌe̱ Jesús,
nga tsabe jè choa̱ xi kisꞌin.
24 To̱nga Jesús lìkoi ki‑ni jókjoan chjo̱ta̱,
nga̱ bexkoòn ngatsꞌi,
25 kꞌoa̱ lìkoi koan‑chjén‑le̱ nga ꞌya xi kitsòya‑le̱ jókjoan chjo̱ta̱,
nga̱ jè,
nꞌión nda be jó tjió kjoa̱faꞌaitsjen‑le̱ ngatsꞌi.