Kꞌia̱ nga Jesús jaꞌasꞌen ya̱ Jerusalén
21
Kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ kichò chrian ya̱ Jerusalén,
kꞌoa̱ jaꞌai ya̱ na̱xi̱nandá‑ꞌndí Betfagé,
ya̱ nindo Yá Olivo,
Jesús kisikasén jaò chjo̱ta̱ xi ya̱ kòtꞌayàtꞌa‑le̱,
2 kitsò‑le̱:
«Tangión ya̱ na̱xi̱nandá‑ꞌndí xi matsen‑tꞌa‑ni i̱,
kꞌoa̱ kjoan koa̱nsjai jngo‑no bórró chjo̱on xi tjítꞌanꞌión kao̱ jngo bórró ꞌndí;
chjójndáꞌñó,
kꞌoa̱ nchroákao̱‑naó ngajaò.
3 Kꞌoa̱ tsà ꞌya xi jo koi̱tso̱‑no,
i̱ tixón:
“Jé Nai‑ná koa̱n‑chjén‑le̱;
kꞌoa̱ kꞌia̱ si̱ikasén‑ni”».
4 Ngayije kjoa̱ jè,
kꞌoa̱akoan jmé‑ni nga kitjosòn‑ni én xi to̱ngi‑ni kinchja̱ jè chjo̱ta̱ xi kinchja̱ya ngajao‑le̱ Niná,
kꞌia̱ nga kitsò:
5 «Kꞌoa̱tꞌìn‑lao̱o na̱xi̱nandá xi Sion tsꞌe̱:
“Chótsaon,
i̱i nchroákon‑no Chjo̱ta̱xá Ngajko̱‑no,
Xi ndꞌé,
kꞌoa̱ jngo bórró chjo̱on tíjnasòn,
Jngo bórró ꞌndí xi ꞌndí‑le̱ cho̱ chꞌá”».a
6 Kꞌoa̱ jè chjo̱ta̱ xi jaò xi ya̱ kòtꞌayàtꞌa‑le̱ ki,
kꞌoa̱kisꞌin josꞌìn nga Jesús tsakꞌénè‑le̱;
7 kꞌoa̱ jaꞌaikao̱ bórró chjo̱on kao̱ bórró ꞌndí,
kꞌoa̱ tsakájtsa‑le̱ ngajaò bórró najño xi batiòjté chjo̱ta̱,
kꞌoa̱ Jesús tsakꞌèjnasòn‑le̱.
8 Kꞌoa̱ jè chjo̱ta̱‑nkjìn,
xi nꞌión nkjìn ma‑ni,
tsakánda‑le̱ ya̱ yandia̱a najño xi batiòjté;
kꞌoa̱ tjín kꞌa xi tsakate yántsja yá kꞌoa̱ tsakánda‑le̱ ya̱ yandia̱a.
9 Kꞌoa̱ jè chjo̱ta̱ xi tje̱n títjòn‑le̱ kao̱ jè xi tje̱n‑ngi‑le̱,
nꞌión kinchja̱,
kitsò:
—¡Kàtasꞌe‑le̱ kjoa̱jeya jè xi ntje̱‑le̱ David kitje̱n‑ni!b
¡Jó to̱nda‑le̱ ya̱ ngixko̱n Niná jè chjo̱ta̱xá ngajko̱ xi kàfaꞌai ngajao‑le̱ Niná!c
¡Kàtasꞌe‑le̱ kjoa̱jeya Niná saꞌnda jña fetꞌa‑ni ngꞌajmi!
10 Kꞌia̱ nga Jesús jaꞌasꞌen ya̱ Jerusalén,
ngatsꞌi chjo̱ta̱ xi ya̱ tsꞌe̱ koankjan‑le̱,
kitsò:
—ꞌYá‑ni xo̱kji.
11 Kꞌoa̱ jè chjo̱ta̱‑nkjìn kitsò:
—Jè‑ní Jesús xi nchja̱ya ngajao‑le̱ Niná,
xi ya̱ na̱xi̱nandá‑nꞌión Nazaret tsꞌe̱,
xi ꞌnde Galilea nchja̱‑ni.
Jesús tsakꞌaonsje chjo̱ta̱ xi baténa ya̱ nditsin‑le̱ yo̱ngo̱
12 Kꞌoa̱ Jesús jaꞌasꞌen ya̱ nditsin‑le̱ yo̱ngo̱‑le̱ Niná,
kꞌoa̱ tsakꞌaonsje ngatsꞌi xi tjióbaténa kao̱ xi tjióbatse ya̱ nditsin‑le̱ yo̱ngo̱,
kꞌoa̱ kiskanìtíkjá ngayije yámìxa̱‑le̱ jè xi tao̱n tjiósíkꞌantjaì,
kao̱ ngayije yáxìle̱‑le̱ jè xi to̱nia̱ tjióbaténa;
13 kꞌoa̱ kitsò‑le̱:
—Kꞌoa̱asꞌìn tjítꞌa xo̱n‑le̱ Niná:
“Jè ndꞌia‑na̱,
ndꞌia jña nòkjoa̱kao̱ Niná kꞌoín”;d
to̱nga jòn ngijao‑le̱ ché kinìkꞌónyao.e
14 Kꞌoa̱ jaꞌaikòn‑le̱ Jesús ya̱ nditsin‑le̱ yo̱ngo̱ chjo̱ta̱ xi xka̱ kao̱ xi chi̱ꞌngé,
kꞌoa̱ Jesús kisindaya ngatsꞌi.
15 To̱nga jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés,
koan‑jti‑le̱,
kꞌia̱ nga tjióbe jè kjoa̱ xi to̱kꞌoa̱ kjima‑le̱ xi tísꞌín Jesús,
kꞌoa̱ nga jè xti tjióbꞌéjta ya̱ nditsin‑le̱ yo̱ngo̱ kꞌoa̱ nga tjiótsò:
«¡Kàtasꞌe‑le̱ kjoa̱jeya jè xi ntje̱‑le̱ David kintje̱n‑ni!»,
16 kꞌoa̱ jè chjo̱ta̱ xo̱kjoan kitsò‑le̱ Jesús:
—A tinòꞌyà‑ní jme xi tjiótsò jè xti.
Kꞌoa̱ Jesús kitsò‑le̱:
—Jaon,
a tsìkꞌia tsakꞌèxkia̱o ya̱ jña tsò jè xo̱n‑le̱ Niná:
Ya̱a tsꞌoa xti ꞌndí kao̱ ꞌndí xi sꞌa̱ baki
Kinikatoì jokjoátjín én xi bꞌasjejeya‑nilì.f
17 Kꞌoa̱ kisikatió,
kitjojin‑ni na̱xi̱nandá‑nꞌión Jerusalén,
ki ya̱ na̱xi̱nandá‑ꞌndí Betania,
kꞌoa̱ ya̱ kisikjáya.
Jesús kisíxì yá higo
18 Kꞌia̱ nga ta̱njiòn nga tífì ngìndia‑ni ya̱ Jerusalén,
koanbao‑le̱ Jesús.
19 Kꞌoa̱ tsabe jngo yá higo xi ya̱ sénjna chrian ndia̱a,
kikòtsen‑le̱,
kꞌoa̱ ni̱jngo‑jìn to koansjai‑le̱,
ñaki to̱ xka̱a tjín‑le̱;
kꞌoa̱ kitsò‑le̱:
—Ni̱ ngìjngo‑jìn ni̱chrjin nga to ti̱ kàtaba‑nilì.
Kꞌoa̱ kjoan kixì jè yá higo.
20 Kꞌia̱ nga tsabe kjoa̱ jè,
jè chjo̱ta̱ xi ya̱ kòtꞌayàtꞌa‑le̱ Jesús to̱kꞌoa̱a koan‑le̱,
kitsò:
—Jó kàma‑nile̱ nga kjoan kàxì‑ni jè yá higo.
21 Kinchja̱ Jesús,
kitsò‑le̱:
—Ñaki kìxi̱i xi xin‑no,
tsà tjín‑no kjoa̱makjaín,
kꞌoa̱ tsà tsì jaò kꞌoaó tokòn,
alì tsà to̱koi‑jìn xi koa̱n‑no kꞌoa̱sꞌia̱on jme xi kàsikoa̱ jè yá higo,
ꞌnda koa̱an kꞌoín‑laò jè nindo xo̱kji:
“Ti̱se̱nxìn,
kꞌoa̱ ti̱kꞌatje̱njin yao‑li̱ ya̱ ndáchikon,”
kꞌoa̱ kꞌoa̱a koa̱n.
22 Kꞌoa̱ to̱jme‑ni xi si̱jaó kꞌia̱ nga koi̱nókjoa̱kao̱o Niná,
tsà makjaín‑no,
kꞌoai̱i‑no.
ꞌYá xi kitsjoa‑le̱ xá xi yꞌa Jesús
23 Kꞌia̱ nga jaꞌai Jesús ya̱ nditsin‑le̱ yo̱ngo̱,
jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ jchínga‑le̱ chjo̱ta̱ judío kichò kinchachrian‑le̱ Jesús kꞌia̱ nga tíbakóya,
kꞌoa̱ kitsò‑le̱:
—Jmé xá xi tjín‑lì nga kꞌoa̱ kànꞌià‑síni ngayije kjoa̱ jè.
Kꞌoa̱ ꞌyá‑ni xi koi xá kitsjoa‑lì.
24 Kinchja̱ Jesús,
kitsò‑le̱:
—Kꞌoa̱ti̱ jngo kjoa̱ skònangi‑no an,
kꞌia̱ tsà kꞌoa̱kꞌoín‑naó,
kꞌoa̱ti̱ an kꞌoa̱axín‑no jmé xá xi yꞌa nga kꞌoa̱sꞌian kjoa̱ jè.
25 Jè kjoa̱chanìsꞌen‑ngindá xi kisꞌin Juan,
ꞌyá xi kitsjoa‑le̱,
a jé xi tíjna ya̱ ngꞌajmi,
axo̱ chjo̱ta̱a.
Kꞌia̱ jè chjo̱ta̱ xo̱kjoan tsakjaóya‑ni,
kitsò:
«Tsà koixoán nga tsꞌe̱ jè xi tíjna ngꞌajmi,
kꞌoa̱a koi̱tso̱‑ná:
“Án‑ni nga tsì koan‑kjaín‑nino én xi kinchja̱ya”.
26 Kꞌoa̱ tsà koixoán nga tsꞌe̱ chjo̱ta̱,
to̱nga jé chjo̱ta̱ bijkon‑le̱e;
nga̱ ngatsꞌi chjo̱ta̱ kꞌoa̱atsò nga Juan jé xi kinchja̱ya ngajao‑le̱ Niná».
27 Kꞌoa̱ kꞌia̱ kꞌoa̱kitsò‑le̱ Jesús:
—Lìkoi ꞌyai‑ji̱n.
Kꞌoa̱ Jesús kitsò‑le̱:
—Kꞌoa̱ti̱ an lìkoi kꞌoa̱xín‑no jmé xá xi yꞌa nga kꞌoa̱kàsꞌian ngayije kjoa̱ jè.
Choa̱ xi mangósòn‑kao̱ jè chjo̱ta̱ xi jaò xti xꞌi̱n tjió‑le̱
28 Jesús kitsò sa‑le̱ jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ jchínga‑le̱ chjo̱ta̱ judío:
—To̱nga jósꞌìn chòtsen‑lao̱o.
Jngo chjo̱ta̱ xi jaò xti xꞌi̱n tjió‑le̱,
kꞌoa̱ kisichrian‑le̱ jè ti xi majchínga,
kitsò‑le̱:
“ꞌNdí tá,
tꞌin ni̱xá‑jìn ndꞌai̱ ya̱ jña kjintjè‑na totseè”.
29 Kinchja̱ jè ti kitsò:
“Mai,
lìkoi me‑na kjoiá”;
to̱nga xi koanskan‑ni kisikꞌantjaìya kjoa̱faꞌaitsjen‑le̱,
ki,
kꞌoa̱ kisíxá.
30 Kꞌoa̱ kisichrian‑le̱ ti xi ngìjngo kꞌoa̱ti̱ sꞌìn kitsò‑le̱;
kꞌoa̱ kinchja̱ kitsò:
“Nda tjín‑ni,
nꞌai,
tìfia”.
To̱nga lìkoi‑ni ki.
31 Jókji ngajaò xi kꞌoa̱kisꞌin josꞌìn koanme‑le̱ jè nꞌai‑le̱.
Jè chjo̱ta̱ xo̱kjoan kitsò:
—Jè ti xi majchínga.
Jesús kitsò‑le̱:
—Ñaki kìxi̱i xi xin‑no,
nga jè chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ jè yánchjín xi baténa yao‑le̱,
tje̱n títjòn‑no nga tjiófaꞌasꞌen ya̱ jña batéxoma Niná.
32 Nga̱ jaꞌaikòn‑no Juan nga jaꞌai kakóya‑no ndia̱a xi tsꞌe̱ kjoa̱kìxi̱,
kꞌoa̱ jòn lìkoi koankjaín‑no én‑le̱;
to̱nga jè chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kao̱ yánchjín xi baténa yao‑le̱ koan‑kjaín‑le̱;
kꞌoa̱ jòn,
kꞌia̱ nga tsaꞌyao jè‑bi̱,
xi koan‑ni lìkoi kinìkꞌantjaìyao kjoa̱faꞌaitsjen‑no nga koan koankjaín‑no én‑le̱.
Jè chjo̱ta̱ tsꞌe̱n xi síxásòn
33 »Ti̱nóꞌyà-laoo̱ ngìjngo choa̱ xi mangósòn‑kao̱ jngo kjoa̱:
Tsakꞌèjna jngo chjo̱ta̱ xi nai‑le̱ ma jngo nangi,
totseè tsakántjè ya̱ jin nangi‑le̱,g
tsakꞌénchꞌoándai‑le̱,
kꞌoa̱ tsakꞌénda jngo ꞌnde jña kisitsꞌion totseè,
tsakꞌénda jngo ndꞌia chrjaó ngꞌa,
kꞌoa̱ kisikìnyasòn‑le̱ nangi‑le̱ chjo̱ta̱ xi síxásòn nangi,
kꞌoa̱ kjin ki.
34 Kꞌoa̱ kꞌia̱ nga je kichò ni̱chrjin‑le̱ nga koanjchá totseè,
jè nai‑le̱ nangi kisikasén‑kon kꞌa‑le̱ cho̱ꞌnda‑le̱ jè chjo̱ta̱ xi síxásòn nangi,
jmé‑ni nga si̱ijé‑ni jotjín xi nai‑le̱ nangi bꞌakao̱‑le̱.
35 To̱nga jè chjo̱ta̱ xi síxásòn nangi,
kitsoa ngatsꞌi jè cho̱ꞌnda xi kinikasénkon‑le̱,
jngo xi tsakꞌé‑le̱,
xi ngìjngo kisikꞌen,
kꞌoa̱ xi ngìjngo la̱jao̱ tsakasén‑le̱.
36 Ngìjngokꞌà jè nai‑le̱ nangi kisikasén cho̱ꞌnda xi kja̱ꞌaí,
xi ngìsa̱ nkjìn ma‑ni ti̱kꞌoa̱‑ni xi títjòn;
kꞌoa̱ jè chjo̱ta̱ xi síxásòn nangi kꞌoa̱ati̱ kisikao̱ tsànda jè.
37 »Xi jetꞌa‑ni jè nai‑le̱ nangi kisikasén jè ti‑le̱,
kitsò:
“Jè chjo̱ta̱ xi tjiósíxásòn nangi‑na̱ skoe̱xkón‑jìn xi jè ti‑na̱”.
38 To̱nga jè chjo̱ta̱ xi síxásòn nangi,
kꞌia̱ nga tsabe jè ti,
kitsò‑le̱ xínkjín:
“Jé xo̱kji xi tsꞌe̱ koa̱n ngayije nangi jña kjintjè totseè;
nchroaó,
si̱kꞌeèn,
kꞌoa̱ tsa̱an kꞌoín‑lé jè nangi‑le̱”.
39 Kꞌoa̱ kitsoa,
tsakꞌaonsjejin ya̱ nangi jña kjintjè totseè,
kꞌoa̱ kisikꞌen.
40 »Kꞌia̱ nga kjoa̱ꞌaí jè nai‑le̱ nangi jña kjintjè totseè,
jmé xi si̱ikao̱ jè chjo̱ta̱ xi kisixásòn nangi‑le̱.
41 Kꞌia̱ jè chjo̱ta̱ xi tjiónchrꞌoé‑le̱ kitsò:
—Jè chjo̱ta̱ tsꞌe̱n si̱ikꞌen lìkoi koa̱nma̱ke,
kꞌoa̱ jè nangi‑le̱ kja̱ꞌaí chjo̱ta̱ tsjoásòn‑le̱ xi kꞌoeèchjísòn‑le̱ jotjín xi jè bꞌakao̱‑le̱ kꞌia̱ nga koi̱chò ni̱chrjin‑le̱.
42 Jesús kitsò‑le̱:
—A ni̱ kꞌia̱‑jìn tsakꞌèxkia̱o Xo̱n Én‑le̱ Niná nga tsò:
“Jè la̱jao̱ xi tsakꞌasjengi jè chjo̱ta̱ xi bꞌénda ndꞌia chrjaó,
Jè‑ní xi la̱jao̱ ngajko̱ kjima.
Jé Nai‑ná xi kꞌoa̱ tísꞌín jè‑bi̱,
Kꞌoa̱ kꞌia̱ nga ꞌyaà kao̱ xkoaàn kjoa̱ jè to̱kꞌoa̱a ma‑ná”.h
43 Koiì kjoa̱ kꞌoa̱xin‑no,
nga ya̱ jña batéxoma Niná tjóxìn‑no jòn,
kꞌoa̱ jé kꞌoai̱‑le̱ chjo̱ta̱ xi tjín‑le̱ jè kjoa̱nda xi tsꞌe̱ ya̱ jña batéxoma xi tíjna ya̱ ngꞌajmi.
44 Kꞌoa̱ to̱ꞌya‑ni xi ya̱ ska̱sòn la̱jao̱ xo̱kji,
ñaki koa̱n‑xkoa̱a yao‑le̱;
kꞌoa̱ tsà ꞌya‑ni xi ska̱nè‑le̱ la̱jao̱ xo̱kji,
ñaki koa̱n‑teè.
45 Kꞌia̱ nga kinchrꞌoé jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ fariseo ngayije choa̱ xi mangósòn‑kao̱ jngo kjoa̱ xi títsòya Jesús,
koan‑cho̱yaà‑le̱ nga jè xo̱ tíꞌmì‑le̱.
46 To̱nga kꞌia̱ nga tjióbásjai josꞌìn nga jtsoa̱ Jesús,
jè chjo̱ta̱‑nkjìn tjiótsokjón‑le̱,
nga̱ ngatsꞌi chjo̱ta̱ makjaín‑le̱ nga Jesús jè xi nchja̱ya ngajao‑le̱ Niná.