Xá xi yꞌa Jesús
20
Kꞌoa̱koan jngo ni̱chrjin kꞌia̱nga ya̱ tíjna Jesús,
nga tíbakóya‑le̱ chjo̱ta̱ ya̱ nditsin‑le̱ yo̱ngo̱,
kꞌoa̱ tínchja̱yajin‑le̱ én‑nda,
jaꞌai jè na̱ꞌmi xi tjió títjòn‑le̱ na̱ꞌmi kao̱ jè chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ jchínga,
2 kꞌoa̱ kinchja̱ kitsò‑le̱:
—Kꞌoa̱tꞌìn‑naíji̱n jmé xá xi tjín‑lì nga kꞌoa̱nꞌià‑síni ngayije kjoa̱ jè,
axo̱ ꞌyá‑ni xi koi xá kitsjoa‑lì.
3 Kꞌia̱ kinchja̱ Jesús,
kitsò‑le̱:
—Kꞌoa̱ati̱ jngo kjoa̱ skònangi‑no tsànda an;
kꞌoa̱tꞌìn‑naó:
4 Kꞌia̱ nga Juan kiskanìsꞌen‑ngindá,
a tsꞌe̱e Jè Xi Tíjna Ya̱ Ngꞌajmi,
axo̱ tsꞌe̱ chjo̱ta̱‑ní.
5 Jè chjo̱ta̱ xo̱kjoan kꞌia̱ tsakjaóya‑ni,
kitsò‑le̱ xínkjín:
«Tsà koixoán nga tsꞌe̱ Jè Xi Tíjna Ngꞌajmi,
kꞌoa̱a koi̱tso̱‑ná:
“Án‑ni nga tsì koan‑kjaín‑sínino én xi kinchja̱ya”.
6 Kꞌoa̱ tsà koixoán,
nga tsꞌe̱ chjo̱ta̱,
la̱jao̱‑jìn kꞌoe̱endonè‑ná nga si̱ikꞌen‑ná ngatsꞌi chjo̱ta̱;
nga̱ kꞌoa̱atjió kon nga Juan jé jngo chjo̱ta̱ xi kinchja̱ya ngajao‑le̱ Niná».
7 Kꞌoa̱ ngatsꞌi kitsò,
nga tsì be ꞌyá tꞌatsꞌe̱ kinchroa‑ni.
8 Kꞌia̱ Jesús kitsò‑le̱:
—Kꞌoa̱ati̱ an lìkoi kꞌoa̱xín‑no jmé xá xi yꞌa nga kꞌoa̱sꞌian ngayije kjoa̱ jè.
Jè chjo̱ta̱ tsꞌe̱n xi síxásòn
9 Ti̱kꞌia̱a tsakꞌétsꞌia̱kao̱‑ni nga tsakakóya‑le̱ ngatsꞌi chjo̱ta̱,
jè choa̱ xo̱kji xi mangósòn‑kao̱ jngo kjoa̱,
kitsò:
—Jngo chjo̱ta̱ xi totseè tsakántjè ya̱ jin nangi‑le̱,a
kisikìnyasòn‑le̱ chjo̱ta̱ xi síxásòn nangi,
kꞌoa̱ nꞌión nkjìn ni̱chrjin kikꞌamjen tꞌaxìn.
10 Kꞌia̱ nga kichò ni̱chrjin‑le̱ nga majchá totseè,
jngo cho̱ꞌnda‑le̱ kisikasén‑kon‑le̱ chjo̱ta̱ xi síxásòn nangi,
jmé‑ni nga kàtatsjoá‑nile̱ jotjín totseè xi bꞌakao̱‑le̱ jè nai‑le̱ nangi;
to̱nga jè chjo̱ta̱ xi síxásòn nangi to̱ tsakꞌé‑le̱ cho̱ꞌnda,
kꞌoa̱ to̱ kjitiaà ntsja nga kinìkasén ngìndia‑ni.
11 Kꞌia̱ kisikasén ngìjngo cho̱ꞌnda‑le̱;
to̱nga jè chjo̱ta̱ xo̱kjoan kꞌoa̱ati̱ kisikìꞌaon,
tsakꞌé‑le̱ kꞌoa̱ kao̱ kjoa̱soa kisikasén‑kon‑nile̱ nai‑le̱,
kꞌoa̱ to̱ kjitiaà‑ni ntsja.
12 Kꞌia̱ kisikasén ngìjngo cho̱ꞌnda‑le̱ xi ma‑ni jàn;
to̱nga jè xi síxásòn nangi,
kꞌoa̱ati̱ kisikìꞌaon cho̱ꞌnda xo̱kji kꞌoa̱ tsakꞌaonsjejin ya̱ jin tsojmì ntjè.
13 »Kꞌia̱ jè nai‑le̱ nangi jña kjintjè totseè kitsò:
“Jmé xi sꞌian.
To̱saà jè ꞌndí‑na̱ xi nꞌión tsjoake̱ sikasén;
tsà koi ni̱chrjin kꞌia̱ nga skoe̱ nga ꞌndí‑na̱ ma,
to̱sa̱‑ni skoe̱xkón”.
14 To̱nga jè chjo̱ta̱ xi síxásòn nangi kꞌia̱ nga tsabe jè ꞌndí‑le̱ xi tsꞌe̱ nangi,
tsakjaótiya‑ni kitsò:
“Jé xo̱kji xi tsꞌe̱ koa̱n ngayije nangi jña kjintjè totseè;
nchroaó,
si̱kꞌeèn,
jmé‑ni nga tsa̱an kàtama‑ni nangi‑le̱”.
15 Kꞌoa̱ tsakꞌaonsjejin nangi jña kjintjè totseè,
kꞌoa̱ kisikꞌen.
»Jó bixón jòn,
jmé xi si̱ikao̱ jè nai‑le̱ nangi jña kjintjè totseè jè chjo̱ta̱ xo̱kjoan.
16 Kjoa̱ꞌaí kꞌoa̱ si̱ikꞌen jè chjo̱ta̱ xi síxásòn nangi,
kꞌoa̱ kja̱ꞌaí chjo̱ta̱ tsjoásòn‑le̱ nangi jña kjintjè totseè».
Kꞌia̱nga kinchrꞌoé ngatsꞌi chjo̱ta̱ xi ya̱ tjió jè én xo̱ tsò,
kitsò:
—Ni̱kꞌia‑jìn kꞌoa̱ kàtama.
17 To̱nga Jesús,
kiskòtsen‑le̱ chjo̱ta̱ xo̱kjoan,
kitsò:
—Jótsò‑nile̱ én xi tjítꞌa xo̱n‑le̱ Niná nga tsò:
“Jè la̱jao̱ xi tsakꞌasjengi jè chjo̱ta̱ xi bꞌénda ndꞌia chrjaó,
Jè‑ní xi la̱jao̱ ngajko̱ kjima”.b
18 Kꞌoa̱ to̱ꞌya‑ni xi ya̱ ska̱sòn la̱jao̱ xo̱kji,
ñaki koa̱nxkoa̱a yao‑le̱;
to̱nga tsà ꞌya xi ya̱ ska̱nè‑le̱,
ñaki koa̱n‑teè.
Tao̱n xi machjí‑le̱ César
19 Jè na̱ꞌmi xi tjió títjòn‑le̱ na̱ꞌmi kao̱ chjo̱ta̱ xi kji kjoa̱téxoma‑le̱ Niná xi kiski Moisés,
tsakásjai josꞌìn nga jtsoa̱ Jesús nga ti̱ꞌa kꞌia̱‑ni,
nga̱ koan‑cho̱yaà‑le̱ nga tꞌatsꞌe̱ nga kꞌoa̱kitsò jè choa̱ xi mangósòn‑kao̱ kjoa̱ jè;
to̱nga jé chjo̱ta̱ kitsokjòn‑le̱.
20 Kꞌoa̱ kisikasén chjo̱ta̱ xi kisikoìnda̱ché xi jo chjo̱ta̱ kìxi̱ sꞌìn matsen,
jmé‑ni nga koa̱n koi̱nchrꞌoé‑ni én‑le̱ Jesús xi ti̱ koi skoénè‑ni nga koa̱angi,
nga koa̱n ska̱nìtꞌa‑le̱ kꞌoa̱ si̱intsja chjo̱ta̱xá títjòn‑le̱ Roma xi tíbatéxoma ꞌnde Judea.
21 Kꞌoa̱ kiskònangi‑le̱,
kitsò‑le̱:
—Ji xi bakòyai,
ꞌya‑nìji̱n nga ñaki kìxi̱ én xi nòkjoai̱ kao̱ én xi bakòyai,
kꞌoa̱ nga tsì tsà chjo̱ta̱ chjaꞌàjin,
to̱saà kao̱ kjoa̱kìxi̱ bakòyai ndia̱a‑le̱ Niná.
22 A tiꞌndè‑ná nga kꞌoéchjí‑leè tao̱n xi síkꞌéchjí jè César chjo̱ta̱xá títjòn‑le̱ Roma,
axo̱ maì.
23 To̱nga Jesús koan‑cho̱yaà‑le̱ jè kjoa̱màña̱‑le̱ chjo̱ta̱ xo̱kjoan,
kitsò‑le̱:
—Án‑ni nga an chòtꞌayàkao̱‑ninaó.
24 —Ta̱kò‑naó jè tao̱n:
ꞌYá tsꞌe̱ sén xi yꞌa kꞌoa̱ jaꞌaín xi tjítꞌa.
Kꞌia̱ kinchja̱ kitsò:
—Tsꞌe̱e César.
25 Kꞌia̱ Jesús kitsò‑le̱:
—Ngo̱ tꞌaì‑lao̱o César jè xi tsꞌe̱ César,
kꞌoa̱ jè Niná tꞌaì‑lao̱o jè xi tsꞌe̱ Niná.
26 Kꞌoa̱ lìkoi jmé én‑le̱ Jesús kinchrꞌoé ya̱ ngixko̱n chjo̱ta̱ xi koan tsakángi‑ni,
to̱saà to̱kꞌoa̱ koan‑le̱ jo kitsò‑le̱,
to̱ jyó tsakatiò ngatsꞌi.
Kjoa̱chjònangi xi tꞌatsꞌe̱ kjoa̱faꞌáya‑le̱ kꞌen
27 Kꞌia̱ kichòkon kꞌa‑le̱ chjo̱ta̱ saduceo,
jè xi kꞌoa̱tsò nga tsì kjoa̱ꞌáya‑le̱ kꞌen,
kiskònangi‑le̱ Jesús,
28 kitsò‑le̱:
—Ji xi bakòyai,
Moisés kiskiì‑naji̱n én xi tsò:
“Tsà jngo chjo̱ta̱ xi koi̱yá ndsꞌe̱ kꞌoa̱ si̱ikꞌéjna chjo̱on‑le̱,
kꞌoa̱ tsà tsì kisꞌe‑le̱ xti,
jé ndsꞌe̱ kàtabixan‑kao̱ chjo̱on,
kꞌoa̱ kàtasꞌe‑le̱ xti xi si̱intje̱ ngajao‑le̱ ndsꞌe̱”.c
29 »I̱i koan‑ni,
ni̱chrjin kjoatse,
ñato chjo̱ta̱ tsakatiò xi ndsꞌe̱ tsakjaó,
kꞌoa̱ jè xi majchínga kisꞌe‑le̱ chjo̱on,
kꞌoa̱ kꞌen,
to̱nga lìkoi kisꞌe‑le̱ xti.
30 Kꞌoa̱ jè ndsꞌe̱ xi ma‑ni jaò tsakꞌèjnakao̱ chjo̱on,
kꞌoa̱ti̱ kꞌen tsànda jè,
kꞌoa̱ati̱ lìkoi kisꞌe‑le̱ xti.
31 Jè ndsꞌe̱ xi ma‑ni jàn tsakꞌèjnakao̱ chjo̱on kꞌoa̱ti̱ kꞌen,
kꞌoa̱ kꞌoa̱asꞌìn tsakatiòkao̱ ndia̱a ndia̱a jè chjo̱on nga ñato chjo̱ta̱ xo̱kjoan,
kꞌoa̱ nga jngó jngó kꞌen,
kꞌoa̱ ni̱jngo‑jìn xi kisꞌe‑le̱ xti.
32 Xi jetꞌa‑ni,
kꞌoa̱ati̱ kꞌen jè chjo̱on.
33 Kꞌia̱ nga sꞌe̱‑ni kjoa̱faꞌáya,
jókji chjo̱ta̱ xo̱kjoan xi xꞌi̱n‑le̱ chjo̱on koa̱n,
nga̱ tsakatiòkao̱o nga ñato.
34 Kꞌia̱ kinchja̱ Jesús,
kitsò‑le̱:
—Jè chjo̱ta̱ xi tjín ndꞌai̱ bixaàn,
kꞌoa̱ bꞌénꞌión kjoa̱bixan;
35 to̱nga ꞌya‑ni xi Niná koi̱tso̱ nga bakìn‑le̱ nga tjoé‑le̱ jè kjoa̱bijnachon xi sꞌa̱ nchroá kꞌoa̱ nga kjoa̱ꞌáyajin‑nile̱ kꞌen,
lìkoi koi̱xan,
ni̱ kjoa̱bixan‑jìn ti̱ kꞌoe̱enꞌión‑ni,
36 nga̱ tsì ti̱ koa̱n ti̱ koi̱yá‑ni,
ya̱a mangósòn‑kao̱ jè cho̱ꞌnda ngꞌajmi,
nga̱ kjoa̱ꞌáya‑le̱ chjo̱ta̱ xo̱kjoan,
nga xti‑le̱ Niná ma.
37 To̱nga xi tꞌatsꞌe̱ nga kjoa̱ꞌáya‑le̱ kꞌen,
saꞌnda Moisés kꞌoa̱ati̱ sꞌìn tsakakóya,
ya̱ jña tjítꞌa xi tꞌatsꞌe̱ yá naꞌyá xi títì,d
kꞌia̱ nga Moisés i̱ sꞌìn kisikꞌaxki̱ Niná:
“Niná‑le̱ Abraham,
Niná‑le̱ Isaac,
kꞌoa̱ Niná‑le̱ Jacob”.
38 Nga̱ Niná lìtsà Niná‑le̱ kꞌen‑jìn,
to̱sa̱a Niná‑le̱ chjo̱ta̱ xi tjiókòn,
nga̱ xi kao̱ Niná tjiókòn‑ní ngatsꞌi chjo̱ta̱.
39 Kinchja̱ kꞌa chjo̱ta̱ xi kji kjoa̱téxoma‑le̱ Niná xi kiski Moisés,
kitsò:
—Ji xi bakòyai,
ndaà sꞌìn kànòkjoai̱.
40 Kꞌoa̱ nga je koan,
lìꞌya xi ti̱ koan‑nꞌión‑ni kon nga jme xi kiskònangi sa‑le̱.
Jè Xi Niná Si̱ikasén, Nai‑le̱ David
41 Kꞌia̱ Jesús kitsò‑le̱:
—Án‑ni nga tsò‑ni chjo̱ta̱ nga Jè Xi Niná Si̱ikasén nga ntje̱‑le̱ David nchroá‑ni.
42 Nga̱ jè soaà David xi kꞌoa̱kitsò josꞌìn tjítꞌa én‑le̱ Niná ya̱ xo̱n Salmos:
“Jè Nai kitsò‑le̱ Nai‑na̱:
Ti̱jnatꞌa‑naí i̱ ngakìxi̱‑na̱,
43 Saꞌnda kꞌia̱ nga ya̱ sikatioá ngi ndso̱koi
Jè xi chꞌao sꞌìn fìkao̱‑lì”.e
44 Jè David,
Nai‑na̱ kitsò‑le̱ni;
jósꞌìn‑ni nga ntje̱‑le̱ ma‑ni.
Jesús kitsòya tꞌatsꞌe̱ kjoa̱ xi sꞌìn chjo̱ta̱ xi kji kjoa̱téxoma‑le̱ Niná xi kiski Moisés
45 Kꞌia̱ nga ngatsꞌi chjo̱ta̱ tjióbincháñon Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:
46 «Ti̱koìnda̱‑lao̱o yao‑no jè chjo̱ta̱ xi kji kjoa̱téxoma‑le̱ Niná xi kiski Moisés,
xi tsjoake nga síxkón kjoan najño jnchro bꞌakjá nga bꞌèma,
xi koi tsjoake nga nìtìꞌnda ya̱ jin ndi̱tsi̱n,
kao̱ nga batiònè yáxìle̱ xi ncha títjòn ya̱ ndꞌia jña maxkia̱ xo̱n‑le̱ Niná,
kao̱ nga koi batiònè yáxìle̱ xi nchatꞌa yámìxa̱ xi ncha títjòn jña tíbichi sꞌoí;
47 xi fayontjaì ndꞌia‑le̱ yánchjín kꞌàn,
kꞌoa̱ to̱ xá sꞌín‑ni nga jo tse fákao̱ Niná;
jè chjo̱ta̱ xo̱kjoan ngìsa̱a tse kjoa̱ñꞌain kꞌoai̱‑le̱».