Jesús kisikjaká‑le̱ chjo̱ta̱ fariseo kao̱ chjo̱ta̱ xi kji kjoa̱téxoma‑le̱ Niná xi kiski Moisés
23
Kꞌia̱ Jesús tsakjákao̱ chjo̱ta̱‑nkjìn kao̱ chjo̱ta̱ xi ya̱ kòtꞌayàtꞌa‑le̱,
kitsò‑le̱:
2 «Ngatsꞌi chjo̱ta̱ xi kji kjoa̱téxoma‑le̱ Niná xi kiski Moisés kao̱ chjo̱ta̱ fariseo,
ya̱a batiònè yáxìle̱‑le̱ Moisés nga bakóya ngajao‑le̱.
3 Koiì kjoa̱,
ngayije jme xi tsò‑no nga si̱kitjosòn,
ti̱kitjosòn,
kꞌoa̱ kꞌoa̱tꞌia̱on,
to̱nga lìkoi‑jìn kꞌoa̱nꞌiaòn jmé xi sꞌín jè,
nga̱ bꞌénè to̱nga lìkoi síkitjosòn jotsò xi bakóya.
4 Nga̱ bánꞌión chꞌá xi nꞌión ꞌaí,
xi tsìꞌya xi ma bꞌa,
kꞌoa̱ síkꞌami chjo̱ta̱,
to̱nga jè ni̱ kao̱‑jìn jngo na̱jmá-ntsja binchangi‑ni.
5 »To̱sa̱a koi kꞌoa̱sꞌìn ngayije jme xi sꞌín,
nga to̱joma‑ni nga jè chjo̱ta̱ kàtakòtsen‑le̱.
Nga̱ jè kàxa̱ ꞌndí xi batiótꞌa tòtjen kao̱ chrja‑le̱,a
jña batiòyà choa én‑le̱ Niná,
nga ngìsa̱ sa ꞌmbá síkjoan,
kꞌoa̱ síndotjòn‑sa ntsja̱ꞌa‑le̱b najño xi batiòjté,
6 kꞌoa̱ tsjoake nga koi batiònè yáxìle̱ xi nchatꞌa yámìxa̱ xi ncha títjòn jña tíbichi sꞌoí,
kꞌoa̱ kao̱ yáxìle̱ xi ncha títjòn ya̱ ndꞌia jña maxkia̱ xo̱n‑le̱ Niná,
7 kꞌoa̱ nga nìtìꞌnda ya̱ jin ndi̱tsi̱n,
kꞌoa̱ nꞌión tsjoake nga ꞌmì‑le̱:
“Ji xi bakòyai”.
8 »To̱nga jòn,
alì kꞌoa̱ jìn sꞌìn mame‑no nga “ji xi bakòyai” koi̱tso̱‑no chjo̱ta̱,
nga̱ to̱ jngoò ma xi bakóya‑no jòn,
Jè Xi Niná Kisikasén,
kꞌoa̱ ngatsꞌio ndsꞌeè ma‑lao̱o xìngio̱o.
9 Kꞌoa̱ ni̱ꞌya‑jìn xi “Nꞌai‑na̱ji̱n” ꞌmì‑lao̱o i̱ soꞌnde;
nga̱ to̱ jngoò ma Nꞌai‑no,
jè xi tíjna ya̱ ngꞌajmi.
10 Kꞌoa̱ati̱ alì bꞌaìnde‑jiòn nga “ji xi bakòyai” kꞌoín‑no,
nga̱ to̱ jngoò ma jè xi bakóya,
Jè Xi Niná Kisikasén.
11 Jè xi tíjna títjòn‑no jòn,
to̱sa̱a cho̱ꞌnda‑no kàtama.
12 Nga̱ jè xi ngꞌa bꞌasje yao‑le̱,
nangi si̱kꞌéjna,
kꞌoa̱ jè xi nangi bꞌasje yao‑le̱,
ngꞌa si̱kꞌéjna.
13 »To̱nga ma̱xó‑nilao̱o yao‑no chjo̱ta̱ jaò‑nkjaín xo̱kjoaon,
xi chjio kjoa̱téxoma‑le̱ Niná xi kiski Moisés kao̱ jòn chjo̱ta̱ fariseo.
Nga̱ bꞌèchjoà‑lao̱o xo̱ntjoa̱‑le̱ jña batéxoma jè xi tíjna ya̱ ngꞌajmi jè chjo̱ta̱ xi je ya̱ nchachrjo;
nga̱ ni̱ jòn‑jìn bitjasꞌao̱on,
kꞌoa̱ ni̱ bꞌaìꞌnde‑jìn‑lao̱o nga faꞌasꞌen jè chjo̱ta̱ xi je tjiófaꞌasꞌen.
14 »¡Ma̱xó‑nilao̱o yao‑no chjo̱ta̱ jaò‑nkjaín xo̱kjoaon,
xi chjio kjoa̱téxoma‑le̱ Niná xi kiski Moisés kao̱ jòn chjo̱ta̱ fariseo!
Nga̱ ñaki soyontjaí‑niò ndꞌia‑le̱ yánchjín kꞌàn,
kꞌoa̱ xá nꞌián‑nio nga jo tse nòkjoa̱kao̱o Niná;
koiì kjoa̱ nga ngìsa̱ tse kjoa̱ñꞌain nijéné‑no.
15 »¡Ma̱xó‑nilao̱o yao‑no chjo̱ta̱ jaò‑nkjaín xo̱kjoaon,
xi chjio kjoa̱téxoma‑le̱ Niná xi kiski Moisés kao̱ jòn chjo̱ta̱ fariseo!
Nga bimasòn ngakijndà ya̱ ndáchikon,
kao̱ i̱ soꞌnde,
nga nìkinjaon jngo chjo̱ta̱ xi ya̱ fìtꞌa‑no,
kꞌia̱ nga je tjoꞌndò‑no,
kꞌoa̱anꞌiaòn nga jaòya kꞌoa̱kji kjoa̱ñꞌain nìkakìn‑le̱ ya̱ jin lꞌí xi tsìkꞌia bitsꞌao jokji kjoa̱ñꞌain bakìn‑no jòn.
16 »¡Ma̱xó‑nilao̱o yao‑no jòn chjo̱ta̱ xka̱ xi chjo̱ta̱ fandia̱a‑lao̱o!
xi bixón:
“Tsà ꞌya‑ni xi jè yo̱ngo̱ koa̱se̱n‑nꞌión‑ni nga tsjoá én‑le̱,
lìjme xi koa̱n‑le̱;
to̱nga tsà ꞌya‑ni xi jè tao̱n‑sinè xi tsꞌe̱ yo̱ngo̱ koa̱se̱n‑nꞌión‑ni nga tsjoá én‑le̱,
tjínè‑le̱ nga síkitjosòn én‑le̱”.
17 ¡Jòn xi chi̱nio kꞌoa̱ xi xkao̱o!
Nga̱,
jñá‑nile̱ xi ngìsa̱ títjòn tíjna,
a jé tao̱n‑sinè,
axo̱ jé yo̱ngo̱ jña fichó jè tao̱n‑sinè nga tsꞌe̱ Niná ma.
18 »Kꞌoa̱ti̱ bixón:
“Tsà ꞌya‑ni xi jè chrjaó la̱jao̱ jña tìsòn jè kjoa̱tjaò xi bꞌaìtꞌa‑le̱ Niná koa̱se̱n‑nꞌión‑ni nga tsjoá én‑le̱,
lìjme xi koa̱n‑le̱;
to̱nga tsà ꞌya‑ni xi koi cho̱ xi tìsòn ya̱ chrjaó la̱jao̱ nga bꞌaitꞌa-le̱ Niná koa̱se̱n‑nꞌión‑ni nga tsjoá én‑le̱,
tjínè‑le̱ nga síkitjosòn én‑le̱”.
19 ¡Jòn xi chi̱nio kꞌoa̱ xi xkao̱o!
Nga̱,
jñá‑nile̱ xi ngìsa̱ títjòn tíjna,
a jè cho̱ xi nìkꞌen nga bꞌaìtꞌa‑le̱ Niná,
axo̱ jè chrjaó jña tìsòn jè kjoa̱tjaò xi bꞌaìtꞌa‑le̱ Niná.
20 Kꞌoa̱ jè xi chrjaó la̱jao̱ jña tìsòn jè kjoa̱tjaò xi bꞌaìtꞌa‑le̱ Niná basèn‑nꞌión‑ni nga tsjoá én‑le̱,
kꞌoa̱ati̱ tíbasèn‑nꞌión‑ni ngayije jme xi ya̱ tjiósòn;
21 kꞌoa̱ jè xi yo̱ngo̱ basèn‑nꞌión‑ni nga tsjoá én‑le̱,
kꞌoa̱ati̱ basèn‑nꞌión‑ni jè xi ya̱ tíjna;
22 kꞌoa̱ jè xi ngꞌajmi basèn‑nꞌión‑ni nga tsjoá én‑le̱,
jé yáxìle̱ jña batéxoma Niná tíbasèn‑nꞌión‑ni,
kꞌoa̱ kꞌoa̱ati̱ tíbasèn‑nꞌión‑ni jè xi ya̱ tíjnasòn.
23 »¡Ma̱xó‑nilao̱o yao‑no chjo̱ta̱ jaò‑nkjaín xo̱kjoa̱on,
xi chjio kjoa̱téxoma‑le̱ Niná xi kiski Moisés kao̱ jòn chjo̱ta̱ fariseo!
nga̱ ma‑no bꞌaì‑lao̱o Niná jè xi jngo‑yà síjé kꞌia̱ nga te ya,
xi tsꞌe̱ xoxka,
eneldo kao̱ comino,c
kꞌoa̱ njion‑tokòn jè kjoa̱ xi ngìsa̱ nꞌión machjén xi bꞌénè kjoa̱téxoma xi kiski Moisés,
joni tsà jè‑bi̱:
Nga kꞌoa̱sꞌìn jcha̱tokòn chjo̱ta̱ xìngi̱ josꞌìn me‑le̱ Niná,
nga kàtasꞌe‑no kjoa̱ma̱tokòn kꞌoa̱ nga kao̱ kjoa̱kìxi̱ ti̱kitjosòn én xi bꞌaì‑lao̱o chjo̱ta̱.
Koiì jè xi machjén nga kꞌoa̱sꞌia̱on tsàkai,
kꞌoa̱ nga lìkoi koi̱njión‑tokòn jme xi je tìnìkitjosòn.
24 ¡Chjo̱ta̱ xka̱ xi chjo̱ta̱ fandia̱a‑lao̱o,
xi nìkꞌao nandá xi ꞌyò,
nga chjaꞌàxìn‑lao̱o jè na̱tse̱,
kꞌoa̱ to̱sa̱a chjòjaon jè cho̱ camello!
25 »¡Ma̱xó‑nilao̱o yao‑no chjo̱ta̱ jaò‑nkjaín xo̱kjoaon,
xi chjio kjoa̱téxoma‑le̱ Niná xi kiski Moisés kao̱ jòn chjo̱ta̱ fariseo!
nga nìtsjejòn‑niò ya̱ sòngꞌa‑le̱ cho̱tsín kao̱ chroa̱,
to̱nga ya̱ jin ni̱ma̱‑no ñaki tjiókitseè kjoa̱ché kꞌoa̱ kjoa̱ xi tsì tsà kìxi̱.
26 ¡Chjo̱ta̱ fariseo xi xka̱ kjoa̱on!
Ya̱ títjòn ti̱tsjao ya̱ ya‑le̱ cho̱tsín kao̱ chroa̱,
jmé‑ni kꞌoa̱ti̱ tsje koa̱n‑ni ya̱ sòngꞌa‑le̱.
27 »¡Ma̱xó‑nilao̱o yao‑no chjo̱ta̱ jaò‑nkjaín xo̱kjoaon,
xi kjoa̱téxoma‑le̱ Niná xi kiski Moisés chjio kao̱ jòn chjo̱ta̱ fariseo!
nga̱ kꞌoa̱a kjoaon joni tsà ngijao xi koan‑chroa‑jon xi sꞌeyoyà kꞌen,
xi kjoa̱kìxi̱ ya̱ sòngꞌa‑le̱ na̱ská na̱sꞌìn matsen,
to̱nga ya̱ ya‑le̱ ncha kitse ninda‑le̱ kꞌen kao̱ ngayije kjoa̱jndí.
28 Kꞌoa̱ati̱ sꞌìn kjoaon jòn xi to̱ ya̱ sòngꞌa‑no,
xi kjoa̱kìxi̱,
kìxi̱i sꞌìn bakò‑lao̱o yao‑no jè chjo̱ta̱,
to̱nga ya̱ ni̱ma̱‑no ñaki tjió kitse kjoa̱jaò‑nkjaín kao̱ kjoa̱ xi chꞌao tjín.
29 »¡Ma̱xó‑nilao̱o yao‑no chjo̱ta̱ jaò‑nkjaín xo̱kjoaon,
xi kjoa̱téxoma‑le̱ Niná xi kiski Moisés chjio kao̱ jòn chjo̱ta̱ fariseo!
nga bꞌèndasòn‑lao̱o tsjó‑le̱ chjo̱ta̱ xi kinchja̱ya ngajao‑le̱ Niná,
kꞌoa̱ nìnꞌión‑jon chrjaó‑le̱ chjo̱ta̱ xi kìxi̱ koa̱n,
30 kꞌoa̱ bixón:
“Tsà kꞌia̱‑làni tsakiyoaà ni̱chrjin nga tsakatiò jè chjo̱ta̱ jchínga‑ná,
lìkoi‑la̱ tsakinchakoa̱a kꞌia̱ nga kisikꞌen jè chjo̱ta̱ xi kinchja̱ya ngajao‑le̱ Niná”.
31 Kꞌoa̱ kꞌoa̱sꞌìn ti̱jòn bꞌaítꞌain‑nio én yao‑no nga ntje̱‑le̱ mao jè chjo̱ta̱ xi kisikꞌen chjo̱ta̱ xi kinchja̱ya ngajao‑le̱ Niná.
32 ¡Jòn ti̱jngo tsòkꞌoa̱ jme xi jè chjo̱ta̱ jchínga‑no tsakꞌétsꞌia̱kao̱!
33 »¡Ye̱ xo̱kjoaon,
ntje̱‑le̱ ye̱ mao!
Jósꞌìn tóka‑lao̱o kjoa̱ñꞌain xi tíjna ya̱ jin lꞌí xi tsìkꞌia bitsꞌao.
34 Koe̱e‑ni,
koiì kjoa̱ nga an sikasén‑no chjo̱ta̱ xi nchja̱ya ngajao‑le̱ Niná,
kao̱ chjo̱ta̱ xi tjín‑le̱ kjoa̱nkjìn‑tokòn,
kꞌoa̱ kao̱ chjo̱ta̱ xi kji kjoa̱téxoma‑le̱ Niná xi kiski Moisés;
to̱nga tjín kꞌa chjo̱ta̱ xo̱kjoan xi si̱kꞌaon,
kꞌoa̱ tjín kꞌa xi krò si̱ikꞌen‑tꞌao,
kꞌoa̱ tjín kꞌa xi kjoá‑lao̱o chrjoa̱xín ya̱ ndꞌia jña maxkia̱ xo̱n‑le̱ Niná,
kꞌoa̱ xki̱ na̱xi̱nandá‑nꞌión koa̱ngí‑ntje̱n‑ngicha‑lao̱o;
35 jmé‑ni nga jòn kàtanchroánè‑nino ngayije njín‑le̱ chjo̱ta̱ kìxi̱ xi kinìkꞌen i̱ soꞌnde,
bꞌétsꞌia̱kao̱‑ni tsꞌe̱ Abeld jè xi chjo̱ta̱ kìxi̱ koan,
saꞌnda jè njín‑le̱ Zacaríase ti‑le̱ Berequías,
xi ya̱ kinìkꞌaon ya̱ ngabasen‑le̱ ya̱ jña kijna yo̱ngo̱ kao̱ ya̱ jña tíjna chrjaó la̱jao̱ jña tìsòn kjoa̱tjaò xi bꞌaìtꞌa‑le̱ Niná.
36 Ñaki kìxi̱i xi xin‑no,
nga ngayije kjoa̱ñꞌain jè,
jé kjoa̱ꞌaínè‑le̱ jè chjo̱ta̱ xi tjín ndꞌai̱.
Jesús koanba‑le̱ xi tꞌatsꞌe̱ Jerusalén
37 »¡Jerusalén,
Jerusalén,
xi nìkꞌain jè chjo̱ta̱ xi nchja̱ya ngajao‑le̱ Niná,
kꞌoa̱ la̱jao̱ nìkꞌen‑ni chjo̱ta̱ xi Niná kisikasén‑kon‑lì!
¡Jótjín kꞌa koanme‑na nga tsakꞌexkoá xti‑li̱,
josꞌín jngo xo̱ꞌnda̱ nga ya̱ síkatióxkóngi jnga̱‑le̱ jè xo̱ꞌnda̱ ꞌndí‑le̱,
kꞌoa̱ koan‑kailì!
38 Koe̱e‑ni,
jè na̱xi̱nandá‑no to̱ sꞌe̱jna kjitiaà.
39 Nga̱ kꞌoa̱axin‑no nga bꞌétsꞌia̱kao̱‑ni ndꞌai̱ nga lìkoi ti̱ jcha̱‑ninaó saꞌnda ni̱chrjin nga koixón:
“Jó to̱nda‑le̱ ya̱ ngixko̱n Niná jè xi kao̱ nganꞌión‑le̱ Niná nchroá‑ni”».f