«A kꞌoa̱asꞌìn nìkjaꞌaitsjaon nga jè chjo̱ta̱ xo̱kjoan,

nga koi kꞌoa̱koan‑tꞌain‑ni kjoa̱ jè,

nga ngìsa̱ nꞌión chjo̱ta̱jé ti̱kꞌoa̱‑ni ngatsꞌi chjo̱ta̱ xi ya̱ ꞌnde Galilea tsꞌe̱.

3 Kꞌoa̱axin‑no nga mai,

tsà tsì si̱kꞌantjaìyao kjoa̱faꞌaitsjen‑no,

ngatsꞌio jòn,

kꞌoa̱ati̱ koi̱yaó joni tsà jè chjo̱ta̱ xo̱kjoan.

4 Axo̱ jè chjo̱ta̱ xi chrjaꞌaòn‑jàn xi ndꞌia chrjaó ngꞌa kitsaonè‑le̱ ya̱ ndia̱a Siloé xi nchja̱‑ni Jerusalén,

kꞌoa̱ kisikꞌen.

A nìkjaꞌaitsjen‑niò nga ngìsa̱ tse jé tjín‑le̱ ti̱kꞌoa̱‑ni ngatsꞌi chjo̱ta̱ xi tjió ya̱ Jerusalén.

5 Kꞌoa̱axin‑no nga mai;

tsà tsì si̱kꞌantjaìyao kjoa̱faꞌaitsjen‑no,

ngatsꞌio jòn kꞌoa̱ati̱ koi̱yaó joni tsà jè chjo̱ta̱ xo̱kjoan».

6 Jesús kꞌoa̱ati̱ kitsòya jè choa̱ xo̱kji,

xi mangósòn‑kao̱ jngo kjoa̱:

«Jngo chjo̱ta̱ xi tjíntjè‑le̱ ya̱ jin tsojmì ntjè‑le̱ jngo yá higo,

kꞌoa̱ jaꞌai kòtsen‑le̱ tsà ya‑le̱ to,

kꞌoa̱ lìjme to kisoko‑le̱.

7 Kꞌia̱ kitsò‑le̱ jè xi síkoìnda̱ tsojmìntjè:

“Koe̱e‑ni,

jeè jàn nó nga tìfàꞌai̱kòtsen‑le̱ yá higo xo̱kji tsà ya‑le̱ to,

kꞌoa̱ ni̱sajme‑jìn to̱ so̱kó‑na;

to̱sa ti̱chásoìn;

án‑ni nga kꞌoa̱ti̱ to̱ kjoa̱tjaò nangi tìsikitsón‑ni”.

8 Kꞌia̱ jè chjo̱ta̱ xi síkoìnda̱ tsojmìntjè,

kitsò‑le̱:

“Nai,

kàtabasènjna‑là ngìjngo nó‑lì,

jo saꞌnda nga skoꞌngindai‑le̱ kꞌoa̱ koinchangì‑le̱ niꞌnde‑jto.

9 Kꞌoa̱ tsà koa̱‑le̱ to,

ndaà‑ni;

kꞌoa̱ tsà mai,

kꞌia̱ koi̱chásoìn”».

10 Jesús tíbakóya kꞌia̱ nga ni̱chrjin xotò,

ni̱chrjin nga bexkón Niná chjo̱ta̱ judío,

ya̱ jngo ndꞌia jña maxkia̱ xo̱n‑le̱ Niná;

11 kꞌoa̱ ya tíjna jngo chjo̱on xi je chrjaꞌaòn‑jàn nó nga jaꞌasꞌenjin‑le̱ jngo sén ni̱chrjin xi tsì nda,

xi kitsjoachꞌìn‑le̱,

kꞌoa̱ ndsitin yátsꞌi̱n kji,

kꞌoa̱ ni̱jojìn‑là koan kisikao̱ nga kisikìxi̱ yátsꞌi̱n.

12 Kꞌia̱ nga Jesús tsabe,

kinchja̱‑le̱ kꞌoa̱ kitsò‑le̱:

—ꞌNdí chjo̱on,

jeè tìjnandaì‑lai̱ kjoa̱ñꞌain xi títjsoá‑lì chꞌin xi tjín‑lì.

13 Kꞌoa̱ tsakásòn‑le̱ ntsja;

kꞌoa̱ kjoan kisꞌe kìxi̱i‑ni yátsꞌi̱n chjo̱on,

kꞌoa̱ tsakꞌétsꞌia̱kao̱ nga tsakꞌasjejeya Niná.

14 To̱nga jè chjo̱ta̱ títjòn‑le̱ ndꞌia jña maxkia̱ xo̱n‑le̱ Niná,

koanjti‑le̱ nga Jesús kisindaya jè chjo̱on kꞌia̱ nga ni̱chrjin xotò,

ni̱chrjin nga bexkón Niná chjo̱ta̱ judío,

kꞌia̱ kitsò‑le̱ chjo̱ta̱:

—Jaoòn ni̱chrjin tiꞌndè nga ma nìxá;

kꞌia̱ koi ni̱chrjin,

nchroaó kꞌoa̱ kàtamandayaò,

alì kꞌia̱‑jìn nga ni̱chrjin xotò ni̱chrjin nga ꞌyaxkón Niná.

15 Kꞌia̱ jè Nai‑ná kinchja̱ kꞌoa̱ kitsò‑le̱ jè chjo̱ta̱ títjòn‑le̱ ndꞌia jña maxkia̱ xo̱n‑le̱ Niná:

—Chjo̱ta̱ jaò‑nkjaín xo tìsoi nga jngó jngó jòn a tsí chjojndáꞌñón nchra̱ja̱‑no axo̱ bórró‑no ya̱ jña binchatꞌanꞌión kꞌoa̱ mangín‑nìkꞌio nandá,

kꞌia̱ nga xotò,

ni̱chrjin nga ꞌyaxkón Niná.

16 Kꞌoa̱ jè ꞌndí chjo̱on xo̱kji xi ntje̱‑le̱ Abraham tje̱n‑ni,

xi je chrjaꞌaòn‑jàn nó tsakꞌétꞌanꞌión jè nai̱i,

án‑ni nga tsì koa̱n si̱kꞌéjnandaí‑ni kꞌia̱ nga xotò ni̱chrjin nga ꞌyaxkón Niná.

17 Kꞌia̱ nga je kꞌoa̱kitsò kjoa̱ jè,

ngatsꞌi xi fìtje̱n‑ngike‑le̱ koansoa‑le̱;

to̱nga ngatsꞌi chjo̱ta̱ na̱xi̱nandá koan‑tsjoa‑le̱ tꞌatsꞌe̱ ngayije kjoa̱jeya xi kisꞌin Jesús.

18 Kꞌoa̱ Jesús kitsò:

«Jmé xi mangósòn‑kao̱ jña batéxoma Niná,

kꞌoa̱ jmé‑ni xi singósòn‑koa̱.

19 Ya̱a mangósòn‑kao̱ na̱xi̱n‑le̱ mostaza,

xi jngo chjo̱ta̱ kiskoé kꞌoa̱ tsakꞌéntjèjin ya̱ tsojmì ntjè‑le̱;

kꞌoa̱ koan‑ngꞌa,

kꞌoa̱ yá ngꞌa koan,

kꞌoa̱ jè ni̱se jaꞌaikꞌéndaꞌà tjé‑le̱ ya̱ yántsja».

20 Ngìjngokꞌà kꞌoa̱kitsò Jesús:

«Jmé xi singósòn‑koa̱ jña batéxoma Niná.

21 Ya̱a mangósòn‑kao̱ na̱ꞌyo̱san xi kiskoé jngo chjo̱on kꞌoa̱ jàn niso skoa̱n nio̱xtìla̱ kisíkꞌéjnaꞌmajin,

jo saꞌnda nga tsakintjao̱ ngayije».

22 Jesús jaꞌato ya̱ na̱xi̱nandá‑nꞌión kao̱ ya̱ na̱xi̱nandá‑ꞌndí,

nga tíbakóya,

kꞌia̱ nga tífì ya̱ Jerusalén.

23 Kꞌoa̱ jngo xi kitsò‑le̱:

—Nai,

a to̱ choaà ma‑ni xi bitjontjaì.

Kꞌoa̱ Jesús kitsò‑le̱ chjo̱ta̱:

24 —Chꞌa̱sjao nganꞌión jmé‑ni nga koa̱n koi̱tjásꞌao̱on xo̱ntjoa̱ xi nchrꞌoèya kji;

nga̱ kꞌoa̱axin‑no nga nkjìn xi koa̱nme‑le̱ nga kjoa̱ꞌasꞌen,

to̱nga lìkoi koa̱n kjoa̱ꞌasꞌen.

25 Kꞌia̱ nga jè nai‑le̱ ndꞌia je koi̱sótje̱n kꞌoa̱ kꞌoe̱echjoà xo̱ntjoa̱,

kꞌoa̱ kꞌia̱ nga ya̱ nditsián tiyo kꞌoétsꞌia̱kao̱o nga si̱ikjanetꞌao xo̱ntjoa̱ kꞌoa̱ koixón:

“Nai,

Nai,

chjóꞌaì‑naíji̱n xo̱ntjoa̱,”

kꞌoa̱ jè koi̱tso̱‑no:

“Lìkoi ꞌbexkon‑no kꞌoa̱ lìkoi ꞌbe jñá‑ni tsao̱on”.

26 Kꞌoa̱ kꞌia̱ kꞌoétsꞌia̱kao̱o nga koixón:

“Ya̱ná tsakichikao̱‑laìji̱n kꞌoa̱ ya̱ná tsakiyokao̱‑laìji̱n,

kꞌoa̱ ya̱a ndi̱tsi̱n‑na̱ji̱n tsakakòyai”.

27 To̱nga jè kꞌoa̱a koi̱tso̱‑no:

“Kꞌoa̱axin‑no nga lìkoi ꞌbexkon‑no kꞌoa̱ lìkoi be jñá‑ni tsao̱on;

ti̱nchaxìn‑naó ngatsꞌio,

chjo̱ta̱ xi koi kꞌoa̱nꞌiaò kjoa̱ xi chꞌao tjín”.^a

28 Ya̱a chjíꞌndiaó kꞌoa̱ jtsao̱kjao niꞌño kꞌia̱ nga jcha̱o Abraham,

Isaac,

Jacob kꞌoa̱ kao̱ ngatsꞌi chjo̱ta̱ xi kinchja̱ya ngajao‑le̱ Niná nga ya̱ tjió jña batéxoma Niná,

kꞌoa̱ jòn lìkoi koa̱n ya̱ koi̱yo.

29 Nga̱ nkjìn chjo̱ta̱ kjoa̱ꞌaí‑ni ya̱ jña tjo‑ni tsꞌoí kao̱ ya̱ jña kantjaì‑ni,

kꞌoa̱ kao̱ ngakìxi̱‑le̱ jña tjo‑ni tsꞌoí kao̱ ngaskón‑le̱,

kꞌoa̱ kꞌoa̱tiòtꞌa yámìxa̱ ya̱ jña batéxoma Niná.

30 Koe̱e‑ni,

tjín kꞌa chjo̱ta̱ xi fetꞌa‑ni xi jè koa̱tiò títjòn,

kꞌoa̱ tjín kꞌa xi tjió títjòn xi jè kjoe̱tꞌa‑ni.

31 Kꞌia̱nga ti̱koi‑ni ni̱chrjin jaꞌai kꞌa chjo̱ta̱ fariseo xi kitsò‑le̱ Jesús:

—Títjo̱jin i̱ ꞌnde xo̱kji,

kꞌoa̱ xìn tꞌin,

nga̱ jè Herodes Antipas meè‑le̱ si̱ikꞌen‑lì.

32 Kꞌia̱ Jesús kitsò‑le̱:

—Tangión,

kꞌoa̱tꞌìn‑lao̱o ni̱nda̱ xo̱kji:

“Koe̱e‑ni,

ndꞌai̱‑bi̱ kao̱ nchaon kꞌoasjejian sén ni̱chrjin xi tsꞌe̱ nai̱i,

kꞌoa̱ sindayà chjo̱ta̱ xi chꞌin tjín‑le̱,

kꞌoa̱ xi koa̱n jàn‑ni ni̱chrjin sikjètꞌa xá‑na̱”.

33 To̱nga machjén nga sꞌian xá‑na̱ ndꞌai̱‑bi̱,

nchaon kao̱ jngi;

nga̱ lìkoi koa̱n nga jngo chjo̱ta̱ xi nchja̱ya ngajao‑le̱ Niná xi tsì ya̱ na̱xi̱nandá‑nꞌión Jerusalén si̱kꞌen.

34 »¡Jerusalén,

Jerusalén,

ji xi nìkꞌain chjo̱ta̱ xi nchja̱ya ngajao‑le̱ Niná,

kꞌoa̱ la̱jao̱ nìkꞌen‑ni jè chjo̱ta̱ xi Niná síkasén‑kon‑lì!

¡Jótjín kꞌa nga koanme‑na nga tsakꞌexkoá xti‑li̱ josꞌín jngo xo̱ꞌnda̱,

nga ya̱ síkatióxkóngi jnga̱‑le̱ jè xo̱ꞌnda̱ ꞌndí‑le̱,

kꞌoa̱ koan‑kai‑lì!

35 Koe̱e‑ni,

jè na̱xi̱nandá‑nꞌión‑no ni̱kixòyaà;

to̱nga kꞌoa̱axin‑no nga lìkoi ti̱ jcha̱‑ninaó,

jo saꞌnda nga koi̱chò ni̱chrjin nga koixón:

“Jó to̱nda‑le̱ ya̱ ngixko̱n Niná jè xi kao̱ nganꞌión‑le̱ Niná nchroá‑ni”».^b