Jesús kisindaya jngo chjo̱ta̱ xi chꞌin chji̱ndá tjín‑le̱
14
Kꞌoa̱koan kꞌia̱ nga jngo xotò,
ni̱chrjin nga bexkón Niná chjo̱ta̱ judío,
kꞌia̱ nga je jaꞌasꞌen Jesús ya̱ ndꞌia‑le̱ jngo chjo̱ta̱ títjòn‑le̱ chjo̱ta̱ fariseo nga koa̱kje̱n,
jè chjo̱ta̱ fariseo xi ngìkꞌa,
nꞌión nda tjiósíkoìnda̱ jme xi sꞌi̱in Jesús.
2 Kꞌoa̱ to̱ i̱i koan jngo chjo̱ta̱ xi chꞌin chji̱ndá tjín‑le̱,
kichò kasènjnatꞌa‑le̱.
3 Kꞌia̱ Jesús tsakjákao̱ ngatsꞌi chjo̱ta̱ xi síkꞌatoya jmè xi tsòya‑ni kjoa̱téxoma‑le̱ Niná xi kiski Moisés kao̱ chjo̱ta̱ fariseo,
kitsò‑le̱:
—A tjoꞌndeè nga nìndayaà chjo̱ta̱ kꞌia̱ nga xotò ni̱chrjin nga ꞌyaxkón Niná.
4 To̱nga jè chjo̱ta̱ xo̱kjoan to̱ jyó tsakatiò.
Kꞌoa̱ Jesús tsakánèntsja jè xi chꞌin chji̱ndá tjín‑le̱,
kisindaya,
kꞌoa̱ kꞌia̱ kisixan‑tꞌa.
5 Kꞌia̱ tsakjákao̱ xi ya̱ tjió,
kitsò‑le̱:
—ꞌYá‑ni jòn,
tsà xi bórró‑le̱ axo̱ tsà nchra̱ja̱‑le̱ ska̱sꞌen jngo nga̱jao̱,
xi tsì tsà kjitꞌanangi kꞌoa̱sje,
ni̱nga tsà xotò,
ni̱chrjin nga ꞌyaxkón Niná.
6 Kꞌoa̱ ni̱ꞌya‑jìn xi ti̱ koan‑nile̱ jo kitsò xi tꞌatsꞌe̱ kjoa̱ jè.
Chjo̱ta̱ xi xá kìnòkjoa̱‑nile̱ nga koai̱ jña tjín kjoa̱bixan
7 Kꞌoa̱ Jesús tíkòtsen jo tjiósꞌín chjo̱ta̱ nga tjiófaꞌájin yáxìle̱ xi tjió títjòn ya̱ tꞌa yámìxa̱,
kꞌia̱ kao̱ choa̱ xi mangósòn‑kao̱ jngo kjoa̱ tsakjákao̱ jè chjo̱ta̱ xi xá kinòkjoa̱‑nile̱ ya̱ ndꞌia‑le̱ chjo̱ta̱ fariseo,
kitsò‑le̱:
8 «Kꞌia̱ nga xá koi̱nókjoa̱‑nilì jña tjín kjoa̱bixan,
alì koi‑jìn bijnanaì yáxìle̱ xi nchatꞌa yámìxa̱‑le̱ xi tjióbixan,
nga̱ tsà tjín‑ni ngìjngo chjo̱ta̱ xi xá kinòkjoa̱‑nile̱,
xi ngìsa̱ xkón ꞌya ti̱kꞌoa̱‑ni ji,
9 kꞌia̱ kjoa̱ꞌaí jè xi xá kinchja̱‑nino,
koi̱tso̱‑lì:
“Ti̱xìn,
tꞌaì‑lai̱ yáxìle̱‑li̱ jè chjo̱ta̱ xo̱kji”;
kꞌoa̱ kꞌia̱ kao̱ kjoa̱soa kꞌoín‑kijnai ya̱ ꞌnde xi fetꞌa‑ni.
10 To̱nga kꞌia̱ nga xá koi̱nókjoa̱‑nilì,
tꞌin kꞌoa̱ ya̱ ti̱jnai ya̱ ꞌnde xi fetꞌa‑ni,
jmé‑ni kꞌia̱ nga kjoa̱ꞌaí jè xi xá kinchja̱‑nilì,
koi̱tso̱‑lì:
“Mìyo̱,
tꞌin ki̱jnatꞌai yámìxa̱ ya̱ jña tjió xi tjióbixan”;
kꞌoa̱ kꞌiaà kao̱ kjoa̱xkótokòn skótsen‑lì chjo̱ta̱ xi ya̱ ñatje̱n tiyotꞌao yámìxa̱.
11 Nga̱ to̱ꞌya‑ni xi ngꞌa bꞌasje yao‑le̱,
nangiì si̱kꞌéjna;
kꞌoa̱ jè xi nangi bꞌasje yao‑le̱,
ngꞌaà si̱kꞌéjna».
12 Kꞌoa̱ti̱ kitsò‑le̱ jè chjo̱ta̱ fariseo xi xá kinchja̱‑nile̱:
—Kꞌia̱ nga ꞌya xi me‑lì koi̱chikao̱ sꞌoí‑jìn,
alì jè‑jìn mìyo̱‑li̱ nòkjoa̱‑lai̱,
ni̱ jè‑jìn ndsꞌai nòkjoa̱‑lai̱,
ni̱ jè‑jìn xìngi̱ nòkjoa̱‑lai̱,
ni̱ jè‑jìn chjo̱ta̱ nchi̱ná xi ya̱ ndai ndꞌia‑li̱ tsꞌe̱;
tsà mai,
jè koa̱an‑le̱ nga kꞌoa̱ti̱ sꞌìn koi̱nchja̱‑ngajao‑nilì,
kꞌoa̱ kꞌoe̱echjí‑ngajao‑nilì.
13 To̱nga kꞌia̱ nga koi̱chi sꞌoí,
ti̱nókjoa̱‑lai̱ chjo̱ta̱ xi yo̱ma̱ sꞌìn tjió,
xi yo̱ma̱ kjoan ntsja,
xi chji̱ꞌngé kao̱ xi xka̱;
14 kꞌoa̱ so̱kó‑lì kjoa̱nda ya̱ ngixko̱n Niná;
nga̱ jè chjo̱ta̱ xo̱kjoan lìkoi koa̱n‑le̱ kꞌoe̱echjí‑ngajao‑nilì,
to̱nga kꞌia̱a kꞌoai̱‑lì chjí‑lì kꞌia̱ nga kjoa̱ꞌáyajin‑le̱ kꞌen chjo̱ta̱ xi kìxi̱.
Choa̱ xi mangósòn tꞌatsꞌe̱ xi kjèn‑sꞌoí ya̱ jña batéxoma Niná
15 Kꞌia̱ nga kinchrꞌoé én xo̱ tsò jngo xi ya̱ tjiótꞌakao̱ yámìxa̱,
kitsò‑le̱:
—Jó to̱nda‑le̱ ya̱ ngixko̱n Niná jè xi koa̱kje̱n ya̱ jña batéxoma Niná.
16 Kꞌia̱ Jesús kitsò‑le̱:
—Jngo chjo̱ta̱ xi sꞌoí‑je tsakꞌéjna,
kꞌoa̱ nꞌión nkjìn xi xá kinchja̱‑nile̱.
17 Kꞌia̱ nga je kichòka choa̱‑le̱ nga koa̱kje̱n sꞌoí,
kisikasén cho̱ꞌnda‑le̱ nga ki̱nchja̱‑le̱ ngatsꞌi chjo̱ta̱ xi xá kinòkjoa̱‑nile̱,
kitsò‑le̱:
“Nchroaó nga̱ jeè tjiónda ngayije tsojmì xi koi̱chi‑niá”.
18 Kꞌoa̱ ngatsꞌi tsakꞌétsꞌia̱kao̱ nga kitsò nga lìkoi koa̱n‑a‑le̱.
Jè xi títjòn kitsò:
“Jngoò nangi kàbatse,
kꞌoa̱ tjínè‑na nga kjoíkòtsen‑le̱;
sijé‑lè kjoa̱nda nga ti̱chatꞌa‑naí lìkoi kꞌoa̱koan‑na nga kjoíkon‑lè”.
19 Xi ngìjngo kitsò:
“Aòn nga nchra̱ja̱ bꞌènchi kàbatse,
kꞌoa̱ koiì tìfikòtꞌayàkoa̱;
sijé‑lè kjoa̱nda nga ti̱chatꞌa‑naí,
lìkoi kꞌoa̱koan‑na nga kjoíkon‑lè”.
20 Kꞌoa̱ jè xi ngìjngo kitsò:
“Sꞌa̱ kjoán je kàbixan‑jiàn,
kꞌoa̱ koiì kjoa̱ nga tsì kꞌoa̱koa̱n‑nina nga kjoíkon‑lè”.
21 Kꞌia̱ nga jaꞌai‑ni jè cho̱ꞌnda,
kitsòya‑le̱ nai‑le̱ jo kitsò jè chjo̱ta̱ xi xá kinòkjoa̱‑nile̱.
Kꞌia̱ koan‑jti‑le̱ jè nai‑le̱ ndꞌia,
kitsò‑le̱ cho̱ꞌnda‑le̱:
“Xítíya tꞌin ya̱ ngakijndà ndi̱tsi̱n,
kao̱ ya̱ ndia̱a nchrꞌoèya‑le̱ na̱xi̱nandá‑nꞌión,
kꞌoa̱ nchroákoai̱ i̱ jè xi yo̱ma̱ sꞌìn tjió,
kao̱ xi yo̱ma̱ kjoan ntsja,
xi chi̱ꞌngé kao̱ xi xka̱ kjoan”.
22 Kꞌia̱ nga je kꞌoa̱kisꞌin jè cho̱ꞌnda,
kitsò:
“Nai,
jeè kꞌoa̱sꞌìn kàbitjosòn josꞌìn nga kàsi,
to̱nga sꞌa̱a tiꞌndè‑sa”.
23 Kꞌoa̱ jè nai‑le̱ cho̱ꞌnda kitsò‑le̱:
“Tꞌin ngakijndà ndia̱até,
kao̱ ngakijndà ndia̱ajñá,
kꞌoa̱ nꞌión ti̱jé‑lai̱ chjo̱ta̱ nga kàtafaꞌasꞌen ya̱ ndꞌia‑na̱ jmé‑ni nga kàtatse‑ni.
24 Nga̱ kꞌoa̱axin‑no nga ni̱jngo‑jìn jè chjo̱ta̱ xi xá kinòkjoa̱‑nile̱ koa̱kje̱n‑kao̱‑na”.
Jókji ñꞌain tjín‑le̱ nga mangíntje̱n‑ngi‑leè Jesucristo
25 Nꞌión nkjìn chjo̱ta̱ xi ya̱ tje̱n‑kao̱ Jesús;
kꞌoa̱ kisikꞌófaya,
kitsò‑le̱:
26 «Tsà ꞌya‑ni xi an nchroátje̱n‑ngi‑na,
kꞌoa̱ tsì koan‑chꞌaoke jè nꞌai‑le̱,
na̱‑le̱,
chjo̱on‑le̱,
xti‑le̱,
ndsꞌe̱,
ndichja,
kꞌoa̱ saꞌnda kjoa̱bijnachon‑le̱,
lìkoi koa̱n nga tꞌatsꞌa̱n skótꞌayà.
27 Kꞌoa̱ ꞌya‑ni xi tsì kꞌoa̱bꞌé kon,
ni̱nga krò kàtanìkꞌen‑tꞌa kꞌoa̱ an nchroátje̱n‑ngi‑na,
lìkoi koa̱n nga tꞌatsꞌa̱n skótꞌayà.
28 »Nga̱ ꞌyá‑ni jòn,
xi me‑le̱ nga kꞌoe̱enda jngo ndꞌia chrjaó ngꞌa,
xi tsì títjòn skósòn‑nile̱ jótjín sꞌe̱ngi‑le̱,
tsà tíjna‑le̱ jotjín xi koa̱n‑chjén‑le̱ nga koa̱njngo‑le̱.
29 Tsà mai,
kꞌia̱ nga je kàbꞌéjna chrjaó ja̱ma̱,
lìkoi‑ni koa̱njngo‑le̱,
kꞌoa̱ ngatsꞌi chjo̱ta̱ xi skoe̱ kꞌoe̱etsꞌia̱kao̱ nga koi̱jnòke,
30 koi̱tso̱:
“Jè chjo̱ta̱ xo̱kji ndꞌiaà tsakꞌétsꞌia̱kao̱ nga tsakꞌénda to̱nga lìkoi‑ni koanjngo‑le̱”.
31 »Axo̱ ꞌyá chjo̱ta̱xá ngajko̱‑ni,
xi kꞌia̱ nga tífì kjoa̱jchán nga koai̱kján‑kao̱ xi kja̱ꞌaí chjo̱ta̱xá ngajko̱,
xi tsì títjòn si̱ikꞌaitsjen kꞌoa̱ skósòn‑nile̱ tsà chókjoa̱‑le̱ nga skaàn,
tsà to̱ te jmi ma‑ni chjo̱ta̱ kjoa̱jchán‑le̱ kꞌoa̱ tsà kan jmi ma‑ni chjo̱ta̱ kjoa̱jchán‑le̱ chjo̱ta̱xá ngajko̱ xi ngìjngo.
32 Kꞌoa̱ tsà tsì chókjoa̱‑le̱,
ti̱ꞌa‑ni nga sꞌa̱ kjin nchroá jè xi ngìjngo,
si̱ikasén chjo̱ta̱ xi koai̱ ngajao‑le̱,
nga kjaòya‑ni josꞌìn nga nchꞌán koa̱tiò‑kao̱ xínkjín.
33 »Kꞌoa̱ati̱ sꞌìn‑ni,
to̱ꞌya‑ni jòn xi tsì tsà si̱ikatió ngayije jme xi tjín‑le̱,
lìkoi koa̱n nga tꞌatsꞌa̱n skótꞌayà.
Kꞌia̱ nga jè na̱xa̱ cha̱jta