—Ñaki kjoa̱kìxi̱i xi xin‑no nga tjín kꞌa xi tjió i̱, xi tsì koi̱yá saꞌnda nga skoe̱ nga kjoa̱ꞌaíkatéxoma Niná kao̱ nganꞌión.

2 Kꞌia̱ nga je koan jaon‑ni ni̱chrjin Jesús kikao̱ Pedro,

Jacobo kao̱ Juan,

kꞌoa̱ kikao̱tꞌaxìn ya̱ jngo nindo ngꞌa;

kꞌoa̱ Jesús tsꞌantjaìya sén‑le̱, kꞌia̱ nga tjiókòtsen chjo̱ta̱ xi jàn, xi ya̱ kòtꞌayàtꞌa‑le̱.

3 Kꞌoa̱ najño‑le̱ koan‑fate,

nꞌión chroa sꞌìn koan‑tsen,

joni tsà nchꞌán xi tsꞌe̱ na̱xi̱ chroa̱,

kꞌoa̱ ni̱ꞌya‑jìn xi ma‑le̱ bané i̱ soꞌnde, xi koa̱n‑le̱ nga kꞌoa̱sꞌìn nꞌión chroa si̱ikjoan najño.

4 Kꞌoa̱ jè chjo̱ta̱ xi jàn xi ya̱ kòtꞌayàtꞌa‑le̱ Jesús,

tsabe Elías kao̱ Moisés chjo̱ta̱ xi kinchja̱ya ngajao‑le̱ Niná nga ya̱ tjiófákao̱ Jesús.

5 Kꞌia̱ Pedro kitsò‑le̱ Jesús:

—Ji xi bakòyai,

jó to̱nda‑ni nga i̱ tiyoi‑ji̱n;

jàn xkójndà kꞌoéndai‑ji̱n,

jngo xi tsi̱,

jngo xi tsꞌe̱ Moisés,

kꞌoa̱ jngo xi tsꞌe̱ Elías.

6 Nga̱ Pedro lìkoi be jme xi títsò,

nga̱ ngajàn nꞌión tjiótsokjón.

7 Kꞌoa̱ kꞌia̱ jaꞌai jngo yojbi xi kisingꞌián‑le̱,

kꞌoa̱ jngo jta̱ kinòꞌyà‑le̱ ya̱ jin yojbi xi kitsò:

«Jé ꞌNdí‑na̱ xo̱kji,

nꞌión tsjoake̱; jé xi ta̱sèño‑lao̱o».

8 Kꞌoa̱ kꞌia̱ nga je kiskòtsen,

ni̱ꞌya‑jìn xi ti̱ tsabe‑ni xi kja̱ꞌaí,

to̱ jé Jesús tíjna.

9 Kꞌoa̱ kꞌia̱ nga tjiónchroaàjen‑ni ya̱ nindo,

tsakꞌénè‑le̱ chjo̱ta̱ xi jàn xi ya̱ kòtꞌayàtꞌa‑le̱,

kitsò‑le̱:

10 Kꞌoa̱ to̱ jé tsakatiójin‑kon én jè,

tsakjaótiya‑ni ngajàn jmé‑ni xo̱ kitsò‑le̱ nga kjoa̱ꞌáyajin‑nile̱ kꞌen.

11 Kꞌoa̱ jè chjo̱ta̱ xi ya̱ kòtꞌayàtꞌa‑le̱ kiskònangi‑le̱,

kitsò‑le̱:

—Án‑ni nga kꞌoa̱tsò‑ni jè chjo̱ta̱ xi kji kjoa̱téxoma‑le̱ Niná xi kiski Moisés nga machjén nga jè Elías xi kinchja̱ya ngajao‑le̱ Niná kjoa̱ꞌaí títjòn.^a

12 Kinchja̱ Jesús,

kitsò‑le̱:

—Kjoa̱kìxi̱‑ní nga kꞌoa̱sꞌìn tjín‑ni nga jè Elías títjòn tjínè‑le̱ nga kjoa̱ꞌaí,

kꞌoa̱ nga jè tjínè‑le̱ kꞌoe̱endayà ngayije kjoa̱.

Kꞌoa̱,

án‑ni kꞌoa̱sꞌìn tjítꞌa‑ni xi tꞌatsꞌe̱ jè ꞌNdí‑le̱ Chjo̱ta̱, nga tse kjoa̱ñꞌain kjoa̱ꞌà, kꞌoa̱ nga to̱ taon jcha̱.

13 To̱nga kꞌoa̱axin‑no nga jè Elías xi kinchja̱ya ngajao‑le̱ Niná jeè jaꞌai,

kꞌoa̱ kꞌoa̱a kisikao̱ chjo̱ta̱ josꞌìn koanme‑le̱,

josꞌìn tjítꞌa xo̱n‑le̱ Niná xi tꞌatsꞌe̱.

14 Kꞌia̱ nga jaꞌai Jesús kao̱ jè chjo̱ta̱‑le̱ xi jàn ya̱ jña tjió jè chjo̱ta̱ xikꞌa xi ya̱ kòtꞌayàtꞌa‑le̱,

tsabe nga nꞌión nkjìn chjo̱ta̱ kitsendai‑le̱,

kꞌoa̱ jè chjo̱ta̱ xi kji kjoa̱téxoma‑le̱ Niná xi kiski Moisés tjiófaóti kao̱ jè chjo̱ta̱ xikꞌa xi ya̱ kòtꞌayàtꞌa‑le̱ Jesús.

15 Ti̱kꞌia̱‑ni nga ngatsꞌi chjo̱ta̱ tsabe Jesús to̱ koanxkón‑le̱,

kꞌoa̱ kitòkanchrꞌoè nga kisitìꞌnda.

16 Jesús kiskònangi‑le̱:

—Jmé kjoa̱ xi tichobàtiya‑nio.

17 Kꞌoa̱ kinchja̱ jngo xi ya̱ tíjnajin‑le̱ chjo̱ta̱‑nkjìn,

kitsò:

—Ji xi bakòyai,

ji kàfaꞌaikao̱‑lè ꞌndí‑na̱,

xi jngo sén ni̱chrjin xi tsì nda, xi tsì ma‑le̱ nchja̱ tíjnajin‑le̱,

18 to̱ jñà‑ni nga tsjoá‑le̱ kjoa̱ñꞌain,

bꞌétsaojneyà;

kꞌoa̱ ndáxó bitjo tsꞌoa,

mꞌaokjao ni̱ꞌño̱,

kꞌoa̱ jeè tíxìya;

kꞌoa̱a kàxin‑le̱ jè chjo̱ta̱‑li̱ xi ya̱ kòtꞌayàtꞌa‑lì nga kàtamꞌaonsjejin‑le̱,

to̱nga lìkoi kàma‑le̱.

19 Kꞌoa̱ kinchja̱ Jesús,

kitsò‑le̱:

—Jòn chjo̱ta̱ xi lìkoi makjaín‑no.

Kꞌiá saꞌnda nga i̱ koàte̱jnakao̱‑no.

Kꞌiá saꞌnda nga ska̱‑na xi tꞌatsao̱on.

Nchroákao̱‑naó.

20 Kꞌoa̱ jaꞌaikao̱‑le̱ jè ti;

kꞌoa̱ ti̱ꞌa kꞌia̱‑ni nga jè sén ni̱chrjin xi tsì nda tsabe Jesús,

kao̱ kjoa̱tsꞌe̱n tsakꞌétsaojne jè ti,

kiska ya̱ tꞌa nangi,

kisikꞌójinꞌndè yao‑le̱ kꞌoa̱ ndáxó kitjo tsꞌoa.

21 Jesús kiskònangi‑le̱ nꞌai‑le̱ ti:

—Jó je kji tse nga kꞌoa̱ma‑le̱.

Kꞌoa̱ jè nꞌai‑le̱ ti kitsò:

—Joò saꞌnda nga ꞌndí kji.

22 Nꞌión nkjìn‑kꞌa nga ya̱ síkꞌatje̱njin ya̱ jin lꞌí kao̱ ya̱ jin nandá,

nga me‑le̱ síkꞌen;

to̱nga tsà jme xi koa̱n si̱koai̱ jcha̱ma̱tokòn‑naíji̱n kꞌoa̱ ti̱se̱n‑kao̱‑naíji̱n.

23 Jesús kitsò‑le̱:

—Tsà koa̱n‑lì nga koa̱n‑kjaín‑lì,

jè xi makjaín‑le̱, tsà Niná me‑le̱ xá to̱ koa̱an‑nile̱ ngayije.

24 Kꞌoa̱ kꞌia̱ kjitꞌanangi nꞌión kinchja̱ jè nꞌai‑le̱ ti,

kꞌoa̱ i̱ kitsò:

—Makjaín‑na,

to̱nga ti̱se̱n‑kao̱‑naí nga ngìsa̱ sa nda kàtamakjaín‑na.

25 Kꞌoa̱ kꞌia̱ nga tsabe Jesús nga koanjtín‑nè‑le̱ chjo̱ta̱‑nkjìn,

kinchja̱tikao̱ jè sén ni̱chrjin xi tsì nda,

kitsò‑le̱:

—Sén ni̱chrjin xi tsì ma nòkjoai̱ kꞌoa̱ xi jtayai an bꞌenè‑lè nga tìtjo̱jin‑lai̱ jè ti,

kꞌoa̱ alì ti̱ya̱‑jìn bitjasꞌe̱njin‑nilai̱.

26 Kꞌia̱ jè sén ni̱chrjin xi tsì nda nꞌión kiskiꞌndiáxá,

kao̱ kjoa̱tsꞌe̱n tsakꞌétsaojne jè ti,

kitjojin‑le̱,

kꞌoa̱ jè ti kꞌen‑ya,

kꞌoa̱ nkjìn chjo̱ta̱ xi kitsò:

«Jeè kꞌen».

27 To̱nga Jesús,

kiskoé ntsja ti,

kisikasén kìxi̱; kꞌoa̱ jè ti tsakasèn‑ndo.

28 Kꞌia̱ nga Jesús jaꞌasꞌen ya̱ ndꞌia,

jè chjo̱ta̱ xi ya̱ kòtꞌayàtꞌa‑le̱ kiskònangitꞌaxìn‑le̱:

—Án‑ni nga tsì kàmasíninaji̱n kàchꞌàsjejin‑lai̱ji̱n ti xo̱kji jè sén ni̱chrjin xi tsì nda.

29 Kꞌia̱ Jesús kitsò‑le̱:

—Jè sén ni̱chrjin xi kꞌoa̱kjoan,

ni̱jme‑jìn xi koa̱n koi̱tjojin‑ni, to̱kꞌia̱ nga nòkjoa̱koaà Niná kꞌoa̱ kao̱ nga bijnanchjàn xi tꞌatsꞌe̱ Niná.

30 Kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ kitjo‑ni ya̱ ꞌnde jña tjió,

jaꞌatojin ya̱ ꞌnde Galilea;

kꞌoa̱ Jesús lìkoi me‑le̱ nga ꞌya xi sꞌe̱jin‑le̱,

31 nga̱ jè chjo̱ta̱ xi ya̱ kòtꞌayàtꞌa‑le̱ tíbakóya‑le̱,

kꞌoa̱ i̱ kitsò‑le̱:

«Jè ꞌNdí‑le̱ Chjo̱ta̱ ya̱a koa̱ntsjatꞌa chjo̱ta̱ xi tike;

kꞌoa̱ si̱ikꞌen;

kꞌia̱ nga je koi̱yá,

kjoa̱ꞌáya‑nile̱ nga koa̱n jàn‑ni ni̱chrjin».

32 To̱nga jè chjo̱ta̱ xi ya̱ kòtꞌayàtꞌa‑le̱ lìkoi koan‑cho̱ya‑le̱ én jè,

kꞌoa̱ kitsokjòn nga kiskònanginda‑le̱.

33 Kꞌoa̱ Jesús kao̱ chjto̱ta̱ xi ya̱ kòtꞌayàtꞌa‑le̱ kichò ya̱ na̱xi̱nandá‑nꞌión Capernaum.

Kꞌia̱ nga je tíjna ya̱ ya ndꞌia,

Jesús kiskònangi‑le̱ chjo̱ta̱ xi kòtꞌayàtꞌa‑le̱ kitsò‑le̱:

—Jmé‑ni xi kàchobàtiya‑nánio ya̱ yandia̱a.

34 To̱nga jè to̱ jyó tsakatiò;

nga̱ ya̱ yandia̱a koiì tsakjaótiyà‑ni jókji xi koa̱se̱njna títjòn.

35 Kꞌia̱ tsakꞌèjna Jesús kꞌoa̱ kinchja̱‑le̱ chjo̱ta̱‑le̱ xi tejaò xi xá kiskoéjin‑ni,

kꞌoa̱ kitsò‑le̱:

—Tsà ꞌyà‑ni xi me‑le̱ nga koa̱se̱njna títjòn,

to̱saà jè xi nangi kàtabꞌèjna‑le̱ ngatsꞌi,

kꞌoa̱ cho̱ꞌnda‑leè ngatsꞌi kàtama.

36 Kꞌoa̱ kiskoé jngo ti ꞌndí,

kisikꞌéjnaꞌnchòbasen‑le̱;

kꞌoa̱ tsakꞌéyachrja,

kitsò‑le̱:

37 —Jè xi tꞌatsꞌa̱n koétjaò‑ni jngo ti ꞌndí,

joni tsà xo̱kji,

aàn xi kjoétjaò‑na;

kꞌoa̱ jè xi an kjoétjaò‑na,

alì an‑jìn xi koétjaò‑na, jé xi kisikasén‑na kjoétjaò.

38 Juan kitsò‑le̱:

—Ji xi bakòyai,

jngo chjo̱ta̱ tsaꞌyai‑ji̱n xi tsì tsà i̱ bꞌamjen‑kao̱‑ná,

xi kao̱ nganꞌión‑le̱ jaꞌaín‑li̱ bꞌasjejin‑nile̱ chjo̱ta̱ jè sén ni̱chrjin xi tsꞌe̱ nai̱i,

kꞌoa̱ tsakꞌèchjoà‑lai̱ji̱n nga̱ tsì tsà i̱ tsòꞌbakao̱‑ná.

39 To̱nga Jesús kitsò:

—Alì bꞌèchjoàjìn‑lao̱o;

nga̱ ni̱ꞌya‑jìn xi tjín xi koa̱n‑le̱ sꞌi̱in kjoa̱xkón kao̱ nganꞌión‑le̱ jaꞌaín‑na̱ xi ti̱ꞌa chꞌao koi̱tso̱‑nina.

40 Nga̱ ngatsꞌi xi tsì fìtje̱n‑ngike‑ná,

tꞌatsꞌa̱an tjió.

41 Kꞌoa̱ to̱ꞌya‑ni xi tꞌatsꞌa̱n tsjoá jngo niso‑no nandá xi ma ꞌyò,

nga tsꞌe̱‑jiòn Jè Xi Niná Kisikasén, xi kjoa̱kìxi̱ xi xin‑no lìkoi si̱icha chjí‑le̱.

42 »To̱ꞌya‑ni xi si̱ikajngijé jè xi choa kjoa̱makjaín‑le̱,

to̱ ngìsa̱a nda tsà jngo natsí sꞌe̱tꞌanꞌión‑ngi yásin,

kꞌoa̱ si̱kꞌatje̱njin ya̱ ndáchikon.

43 Tsà ndsai̱ síkajngijé‑lì,

to̱sa ti̱chátꞌai;

to̱ ngìsa̱a nda nga kotontsja tìsoiì nga koi̱tjásꞌai̱n ya̱ jña tjín kjoa̱binachon,

ti̱kꞌoa̱‑ni tsà jaò ma‑ni ndsai̱,

nga ya̱ kꞌoín ya̱ jin lꞌí xi ni̱kꞌia‑jìn bitsꞌao,

44 jña nga tsì mꞌen cho̱ndo‑le̱,

kꞌoa̱ jè lꞌí ni̱kꞌia‑jìn bitsꞌao.

45 Kꞌoa̱ tsà ndso̱koi síkajngijé‑lì,

to̱sa ti̱chátꞌai;

to̱ ngìsa̱a nda‑ni nga koi̱tjásꞌai̱n ya̱ jña tjín kjoa̱bi̱jnachon ni̱nga chi̱ꞌngé tìsoiì,

ti̱kꞌoa̱‑ni tsà jaò ma‑ni ndso̱koi nga si̱kꞌatje̱njin‑lì ya̱ jin lꞌí xi ni̱kꞌia‑jìn bitsꞌao,

46 jña nga tsì mꞌen cho̱ndo‑le̱,

kꞌoa̱ jña nga ni̱kꞌia‑jìn bitsꞌao jè lꞌí.

47 Kꞌoa̱ tsà xkoin síkajngijé‑lì,

chꞌa̱sjai;

to̱ ngìsa̱a nda nga koi̱tjásꞌai̱n jña batéxoma Niná nga to̱ jngo ma xkoin,

ti̱kꞌoa̱‑ni tsà jaò ma kꞌia̱ nga si̱kꞌatje̱njin‑lì ya̱ lꞌí xi ni̱kꞌia‑jìn bitsꞌao,

48 jña nga tsì mꞌen cho̱ndo‑le̱,

kꞌoa̱ jña nga ni̱kꞌia‑jìn bitsꞌao jè lꞌí.

49 Nga̱ ngatsꞌi kao̱o lꞌí koa̱n-tsje‑ni,

josꞌìn kao̱ na̱xa̱ matsje‑ni kjoa̱tjaò xi bꞌaìtꞌa‑le̱ Niná.

50 Nda‑nì jè na̱xa̱;

to̱nga tsà jè na̱xa̱ koa̱njtón,

jókoa̱n koa̱n‑jnchra ngìndia‑ni.

Kꞌoa̱kàtamakjoaon joni tsà jè na̱xa̱ xi nda;

kꞌoa̱ nchꞌán tiyokao̱ ngañaó xìngio̱o.