Kꞌia̱ nga Jesús tsꞌantjaìya sén‑le̱
17
Kꞌia̱ nga je jaon ni̱chrjin jaꞌato kꞌia̱ nga Jesús tsakjákao̱ én‑jè chjo̱ta̱ xi ya̱ kòtꞌayàtꞌa‑le̱,
kitjokao̱ Pedro,
Jacobo kao̱ Juan ndsꞌe̱ Jacobo,
kꞌoa̱ kikao̱‑tꞌaxìn ya̱ jngo nindo ngꞌa;
2 kꞌoa̱ Jesús tsꞌantjaìya sén‑le̱ kꞌia̱ nga tjiókòtsen chjo̱ta̱ xi jàn xi ya̱ kòtꞌayàtꞌa‑le̱,
kꞌoa̱ koanfate nkjaín joni tsà tsꞌoí,
kꞌoa̱ jè najño‑le̱ nꞌión koan‑chroa joni tsà lꞌí isen.
3 Kꞌoa̱ to̱ i̱i koan koan‑tsen Moisés kao̱ Elías,
nga tjiófákao̱ Jesús.
4 Kꞌia̱ Pedro kitsò‑le̱ Jesús:
—Nai,
jó to̱nda‑naji̱n nga i̱ tiyoi‑ji̱n;
tsà me‑lì,
jàn xkójndà kꞌoéndai‑ji̱n i̱ bi̱,
jngo xi tsi̱,
jngo xi tsꞌe̱ Moisés,
kꞌoa̱ jngo xi tsꞌe̱ Elías.
5 Kꞌia̱ nga tínchja̱ sa Pedro jngo yojbi xi fate kji tsakꞌéjtsanè ngatsꞌi;
kꞌoa̱ to̱ i̱i koan jngo jta̱ kinòꞌyà‑nile̱ ya̱ jin yojbi,
xi kitsò:
«Jé ꞌNdí‑na̱ xo̱kji,
nꞌión tsjoake̱,
nꞌión nda tjín koan xi tꞌatsꞌe̱;a
jé‑ní xi ti̱nchaño‑lao̱o».
6 Kꞌia̱ nga kinchrꞌoé én xo̱ tsò jè chjo̱ta̱ xi jàn xi ya̱ kòtꞌayàtꞌa‑le̱ Jesús,
tsakjayojten‑tꞌa nangi ya̱ ngi ndso̱ko̱ Jesús,
kꞌoa̱ nꞌión kitsokjòn.
7 Kꞌia̱ Jesús tsakasèn‑tꞌachrian‑le̱ kꞌoa̱ kisikao̱,
kꞌoa̱ kitsò:
—Ti̱sòtjao̱on,
kꞌoa̱ alì bijkon‑jiòn.
8 Kꞌoa̱ kꞌia̱ nga kiskòtsen‑ngꞌà,
lìꞌya xi tsabe to̱ jé sa Jesús xi ya̱ tíjna.
9 Kꞌia̱ nga kinchroajen‑ni ya̱ nindo,
Jesús tsakꞌénè‑le̱,
kitsò‑le̱:
—Ni̱ꞌya‑jìn xi ꞌmìya‑lao̱o jme xi kàꞌyao,
kꞌia̱a saꞌnda nga jè ꞌNdí‑le̱ Chjo̱ta̱ kjoa̱ꞌáyajin‑nile̱ kꞌen.
10 Kꞌia̱ jè chjo̱ta̱ xi ya̱ kòtꞌayàtꞌa‑le̱ kiskònangi‑le̱,
kitsò:
—Án‑ni nga kꞌoa̱tsò‑ni jè chjo̱ta̱ xi kji kjoa̱téxoma‑le̱ Niná xi kiski Moisés nga machjén nga jè Elías títjòn kjoa̱ꞌaí.b
11 Kꞌia̱ kinchja̱ Jesús,
kitsò‑le̱:
—Kjoa̱kìxi̱i nga jè Elías tjínè‑le̱ nga títjòn kjoa̱ꞌaí,
kꞌoa̱ kꞌoe̱endaya ngayije kjoa̱.
12 To̱nga an kꞌoa̱axìn‑no nga Elías jeè jaꞌai,
kꞌoa̱ jè chjo̱ta̱ lìkoi tsabexkon,
to̱sa̱a kꞌoa̱ kisikao̱ ngayije josꞌìn koanme‑le̱;
kꞌoa̱ati̱ sꞌìn jè chjo̱ta̱ si̱ikjaꞌá kjoa̱ñꞌain jè ꞌNdí‑le̱ Chjo̱ta̱.
13 Kꞌia̱ jè chjo̱ta̱ xi ya̱ kòtꞌayàtꞌa‑le̱ koan‑cho̱ya‑le̱ nga Jesús koiì tínchja̱‑ni tꞌatsꞌe̱ Juan xi Kanísꞌen-ngindá.
Jesús kisindaya jngo ti xi chꞌin‑xín tjín‑le̱
14 Kꞌia̱ nga Jesús kao̱ chjo̱ta̱ xi kòtꞌayàtꞌa‑le̱ kichòkajin‑le̱ chjo̱ta̱‑nkjìn,
jngo chjo̱ta̱ jaꞌaikòn‑le̱ Jesús,
xi ya̱ tsakasènxkónchꞌin‑tꞌale̱,
kitsò‑le̱:
15 —Nai,
jcha̱ma̱tokoìn jè ti‑na̱,
nga̱ chꞌin‑xín tjín‑le̱,
kꞌoa̱ nꞌión tse kjoa̱ñꞌain tífaꞌá;
nꞌión nkjìn kꞌa nga lꞌí kajin,
kꞌoa̱ nkjìn kꞌa nga nandá kajin.
16 Kꞌoa̱ kàfàꞌai̱kao̱o‑le̱ jè chjo̱ta̱ xi ya̱ kòtꞌayàtꞌa‑lì,
to̱nga lìkoi kjima‑le̱ nga tjiósíndaya.
17 Kinchja̱ Jesús,
kitsò:
—Jòn chjo̱ta̱ xi tsì makjaín‑no,
kꞌoa̱ xi chꞌao kjoaon.
Kꞌiá saꞌnda tjínè‑na nga i̱ koate̱jnakao̱‑no.
Kꞌoa̱ kꞌiá saꞌnda tjínè‑na nga ska̱‑na xi tꞌatsao̱on.
Nchroákao̱‑naó i̱ jè ti.
18 Kꞌia̱ Jesús kinchja̱tikao̱ jè sén ni̱chrjin xi tsꞌe̱ nai̱i,
kꞌia̱ kitjojin‑le̱ ti,
kꞌoa̱ ti̱ꞌa kꞌia̱ koan‑ndaya‑ni jè ti.
19 Kꞌia̱ jè chjo̱ta̱ xi ya̱ kòtꞌayàtꞌa‑le̱ Jesús jaꞌaikòn‑tꞌaxìn‑le̱,
kitsò:
—Án‑ni nga tsì kàmasíninaji̱n nga kàchꞌasjejin‑ji̱n jè sén ni̱chrjin xi tsꞌe̱ nai̱i.
20 Jesús kitsò‑le̱:
—Koiì nga choa kjoa̱makjaín‑no;
nga̱ ñaki kìxi̱i xi xin‑no,
ni̱ sì to̱ kꞌoa̱kji kjoa̱makjaín‑no jokji jngo na̱xi̱n‑le̱ mostaza,
koa̱an‑no kꞌoín‑lao̱o jè nindo xo̱kji:
“Ti̱tjaí xingoa‑ni ján,”
kꞌoa̱ jè nindo kjoa̱ꞌaà;
kꞌoa̱ ni̱jme‑jìn xi tsì koa̱n‑no kꞌoa̱sꞌia̱on.
21 To̱nga jè sén ni̱chrjin xi kꞌoa̱kjoan joni tsà jè xi ya̱ kàbitjojin‑le̱ ti xo̱kji,
lìkoi koi̱tjo tsà tsì koi̱nókjoa̱koa̱a Niná kꞌoa̱ tsà tsì koi̱jnanchjaàn xi tꞌatsꞌe̱ Niná.
Jesús kitsòya ngìjngokꞌa tꞌatsꞌe̱ kjoa̱biya‑le̱ kao̱ kjoa̱faꞌáya‑le̱
22 Kꞌia̱ nga tjió ya̱ ꞌnde Galilea,
Jesús kitsò‑le̱ jè chjo̱ta̱ xi ya̱ kòtꞌayàtꞌa‑le̱:
—Jè ꞌNdí‑le̱ Chjo̱ta̱ ya̱a koa̱ntsjatꞌa chjo̱ta̱ xi tike,
23 kꞌoa̱ si̱ikꞌen,
to̱nga xi koa̱n‑jàn‑ni ni̱chrjin kjoa̱ꞌáyajin‑nile̱ kꞌen.
Kꞌoa̱ jè chjo̱ta̱ xi ya̱ kòtꞌayàtꞌa‑le̱ nꞌión koanba‑le̱.
Jesús tsakꞌéchjí tao̱n xi machjén ya̱ yo̱ngo̱
24 Kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ kichò ya̱ na̱xi̱nandá‑nꞌión Capernaum,
ngatsꞌi chjo̱ta̱ xi síkꞌéchjí tao̱n xi tsꞌe̱ yo̱ngo̱ jaꞌaikòn‑le̱ Pedro,
kitsò‑le̱:
—Jè xi bakóya‑no,
a tsí bꞌéchjí tao̱n xi xki̱ nó sꞌechjí xi ya̱ machjén ya̱ yo̱ngo̱.
25 Pedro kitsò:
—Jaon bꞌéchjí‑ní.
Kꞌoa̱ kꞌia̱ nga jaꞌasꞌen ya̱ ndꞌia Pedro,
jé Jesús títjòn kinchja̱‑le̱,
kitsò:
—Jósi Simón,
jè chjo̱ta̱xá ngajko̱ xi tjín i̱ soꞌnde,
ꞌyá‑ni xi síkꞌéchjí tao̱n‑sá axo̱ ꞌyá‑ni xi síkꞌéchjíntjaì tsojmì.
A jé chjo̱ta̱ xi ya̱ tsꞌe̱ na̱xi̱nandá‑je‑le̱,
axo̱ jè xi xìn na̱xi̱nandá‑je tsꞌe̱.
26 Pedro kitsò‑le̱:
—Jé chjo̱ta̱ xi xìn na̱xi̱nandá‑je‑le̱ xi níkꞌéchjí.
Jesús kitsò‑le̱:
—Kꞌoa̱a ma‑ni nga jè chjo̱ta̱ xi ya̱ tsꞌe̱ ꞌnde‑le̱ lìkoi tjínè‑le̱ nga bꞌéchjí.
27 To̱nga kꞌia̱ nga kai‑ná nga kjoa̱faꞌaisjen‑le̱ si̱kìꞌoaàn,
tꞌin ya̱ jin ndáchikon,
kꞌoa̱ ti̱kꞌatje̱njin‑ndaí ki̱cha̱ꞌba̱‑li̱,
kꞌoa̱ jè jti̱ xi títjòn tjoé‑lì,
chjoaí,
kꞌoa̱ kꞌia̱ nga chjóxꞌai̱ tsꞌoa ya̱a koa̱nsjai jngo‑lì tao̱n;
chjoaí,
kꞌoa̱ tꞌèchjí xi tsꞌa̱n kꞌoa̱ti̱ tꞌèchjí xi tsi̱.