2 To̱nga Jesús kinchja̱ kitsò‑le̱:

«Kꞌia̱ nga je maxòn i̱i bixón:

“Ndaà koa̱n‑chon nchaon,

nga̱ nì chon ya̱ ngꞌajmi”.

3 Kꞌoa̱ kꞌia̱ nga ta̱njiòn i̱i bixón:

“Jtsí kꞌoa̱ ndꞌai̱ nga̱ yojbi kjia ya̱ ngꞌajmi kꞌoa̱ nì chon”.

¡Chjo̱ta̱ jaò‑nkjaín!

Maà‑no nga chòtsen‑lao̱o jochon ya̱ ngꞌajmi kꞌoa̱ bixónyao jó koa̱n‑chon,

¡to̱nga lìkoi macho̱ya‑no jè ni̱chrjin xi tiyoaà ndꞌai̱!

4 Jè chjo̱ta̱ xi tjín ndꞌai̱ chꞌaokjoan kꞌoa̱ kaì‑le̱ makjaín‑le̱ tꞌatsꞌe̱ Niná,

choa̱a síjé;

to̱nga lìjme choa̱ kꞌoai̱‑le̱,

to̱koiì choa̱‑le̱ Jonás,^a

chjo̱ta̱ xi kinchja̱ya ngajao‑le̱ Niná».

Kꞌoa̱ Jesús ya̱ kisikatió,

kꞌoa̱ ki.

5 Kꞌia̱ nga tjióbichò ya̱ xingoa‑ndá‑ni Jesús kao̱ chjo̱ta̱ xi ya̱ kòtꞌayàtꞌa‑le̱,

jè chjo̱ta̱ xi ya̱ kòtꞌayàtꞌa‑le̱ jaꞌaitsjen‑le̱ nga tsì tsakꞌa nio̱xtìla̱.

6 Kꞌoa̱ Jesús kitsò‑le̱:

—Chótsaon,

ti̱koìnda̱‑lao̱o yao‑no jè na̱ꞌyo̱san‑le̱ chjo̱ta̱ fariseo,

kao̱ na̱ꞌyo̱san‑le̱ chjo̱ta̱ saduceo.

7 Jè chjo̱ta̱ xi ya̱ kòtꞌayàtꞌa‑le̱ kitsò ya̱ jin kjoa̱faꞌaitsjen‑le̱ nga jngó jngó:

—Koiì kꞌoa̱títsò‑ni nga tsì kàchꞌà nio̱xtìla̱.

8 Kꞌoa̱ Jesús koanjin‑le̱ kjoa̱faꞌaitsjen‑le̱ chjo̱ta̱ xi ya̱ kòtꞌayàtꞌa‑le̱,

kitsò‑le̱:

—Án‑ni nga kꞌoa̱sꞌìn nìkjaꞌaitsjen‑nio nga bixón nga tsìn‑no nio̱xtìla̱,

chjo̱ta̱ xi choa makjaín‑no.

9 A to̱jo kjeè macho̱yajìn‑no.

A ni̱ faꞌaitsjenjìn‑no tꞌatsꞌe̱ jè nio̱xtìla̱ xi aòn ma‑ni,

xi tsakjèn xi aòn jmi,

kꞌoa̱ jótjín ni̱si̱nyá koan xi tsakꞌèxkó nga je koan.

10 A ni̱ koi‑jìn faꞌaitsjen‑no tꞌatsꞌe̱ nio̱xtìla̱ xi ñato,

xi tsakjèn chjo̱ta̱ xi ño jmi,

kꞌoa̱ jótjín ni̱si̱nyá koan xi tsakꞌèxkó nga je koan.

11 Án‑ni nga tsì macho̱ya‑nino nga tsì tsà tꞌatsꞌe̱ nio̱xtìla̱ nga kꞌoa̱kàxin‑no nga ti̱koìnda̱‑lao̱o yao‑no jè na̱ꞌyo̱san‑le̱ chjo̱ta̱ fariseo kao̱ tsꞌe̱ chjo̱ta̱ saduceo.

12 Kꞌia̱a koan‑ncho̱ya‑le̱ nga tsì tsà koi xi kitsò‑le̱ nga kàtasíkoìnda̱‑le̱ yao‑le̱ tꞌatsꞌe̱ jè na̱ꞌyo̱san xi tsꞌe̱ nio̱xtìla̱,

to̱saà koi xi kitsò‑le̱ nga kàtasíkoìnda̱‑le̱ yao‑le̱ jè kjoa̱chòtꞌayà‑le̱ chjo̱ta̱ fariseo kao̱ tsꞌe̱ chjo̱ta̱ saduceo.

13 Kꞌia̱ nga Jesús jaꞌai ya̱ ꞌnde xi nchja̱‑ni na̱xi̱nandá‑nꞌión Cesarea xi tsꞌe̱ Filipo,

kiskònangi‑le̱ chjo̱ta̱ xi ya̱ kòtꞌayàtꞌa‑le̱,

kitsò:

—Jótsò chjo̱ta̱,

ꞌyá‑la̱ni jè ꞌNdí‑le̱ Chjo̱ta̱.

14 Kꞌoa̱ jè chjo̱ta̱ xi ya̱ kòtꞌayàtꞌa‑le̱ kitsò:

—Tjín kꞌa xi tsò nga jè xó Juan xi Kanísꞌen-ngindá;

kꞌoa̱ tjín kꞌa xi tsò nga jè xó Elías;

kꞌoa̱ tjín xi tsò nga jè xó Jeremías,

axo̱ jngo chjo̱ta̱ xi kinchja̱ya ngajao‑le̱ Niná ni̱chrjin jchá.

15 Jesús kitsò‑le̱:

—Kꞌoa̱ jòn,

jó bixón,

ꞌyá‑nia an.

16 Kꞌia̱ kinchja̱ Simón Pedro,

kitsò:

—Ji‑ní Jè Xi Niná Kisikasén,

jè ꞌNdí‑le̱ Niná xi tíjnakon.

17 Kꞌia̱ kitsò Jesús:

—Jó to̱ nda‑lì ya̱ ngixko̱n Niná,

Simón,

ꞌndí‑le̱ Jonás,

nga̱ lìtsà chjo̱ta̱‑jìn xi tsakakósòn‑tsen‑lì,

to̱saà jé Nꞌai‑na̱ xi tíjna ya̱ ngꞌajmi.

18 Kꞌoa̱ koiì kjoa̱ nga an tìxin‑nilè,

nga ji‑ní Pedro,

kꞌoa̱ koiì la̱jao̱ xo̱kji kꞌoendasoan jè na̱xi̱nandá‑na̱;

kꞌoa̱ jè nganꞌión‑le̱ kjoa̱biya kao̱ tsꞌe̱ nai̱i lìkoi chókjoa̱‑le̱ kꞌia̱ nga na̱xi̱nandá‑na̱ si̱itoán.

19 Kꞌoa̱ jiì tsjoa‑lè jè xi tjoꞌaì‑ni kꞌoa̱ xi sꞌechjoà‑ni xo̱ntjoa̱‑le̱ jña batéxoma jè xi tíjna ya̱ ngꞌajmi;

kꞌoa̱ ngayije jme kjoa̱ xi tsì kꞌoai̱ꞌnde‑lai̱ chjo̱ta̱ i̱ soꞌnde kꞌoa̱ati̱ tsì tjóꞌnde‑le̱ ya̱ ngꞌajmi;

kꞌoa̱ ngayije jme kjoa̱ xi kꞌoa̱iꞌnde‑lai̱ chjo̱ta̱ i̱ soꞌnde kꞌoa̱ati̱ tjóꞌnde‑le̱ ya̱ ngꞌajmi.

20 Kꞌia̱ Jesús tsakꞌénè‑le̱ chjo̱ta̱ xi ya̱ kòtꞌayàtꞌa‑le̱ nga ni̱ꞌya‑jìn xi kàtatsòya‑le̱ nga jé‑ní Jesús Jè Xi Niná Kisikasén.

21 Kꞌia̱a saꞌnda tsakꞌétsꞌia̱kao̱‑ni Jesús nga kitsòya kìxi̱‑le̱ chjo̱ta̱ xi ya̱ kòtꞌayàtꞌa‑le̱ nga tjínè‑le̱ nga koai̱ ya̱ Jerusalén,

kꞌoa̱ nga nkjìn jko̱ya kjoa̱ñꞌain si̱ikjaꞌá chjo̱ta̱ jchínga‑le̱ chjo̱ta̱ judío,

kao̱ na̱ꞌmi xi tjió títjòn‑le̱ na̱ꞌmi,

kao̱ chjo̱ta̱ xi kji kjoa̱téxoma‑le̱ Niná xi kiski Moisés;

kꞌoa̱ nga si̱ikꞌen,

to̱nga kjoa̱ꞌáyajin‑nile̱ kꞌen nga koa̱n jàn‑ni ni̱chrjin.

22 Kꞌia̱ Pedro kikao̱tꞌaxìn Jesús,

tsakꞌétsꞌia̱kao̱ nga kinchja̱tikao̱,

kitsò‑le̱:

—Nai,

kàtamama̱‑lì yao‑li̱;

ni̱ nchroá‑jìnlà ni̱chrjin nga kꞌoa̱ kàtamatꞌain‑jìn.

23 To̱nga Jesús kisikꞌófaya,

kitsò‑le̱ Pedro:

—Ti̱se̱nxìn‑naí,

nai̱i;

ji to̱ bisènchjoá‑naí,

nga̱ tsì koi kjoa̱ xi tsꞌe̱ Niná ꞌmitje̱n‑ngi‑lai̱,

to̱saà to̱ kjoa̱faꞌaitsjen‑le̱ chjo̱ta̱ ꞌmitje̱n‑ngi‑lai̱.

24 Kꞌia̱ Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:

—Tsà ꞌya‑ni xi me‑le̱ nga an koi̱nchroatje̱n‑ngi‑na,

alì ti̱jè‑jìn batéxoma‑nile̱ yao‑le̱,

kꞌoa̱ kàtabꞌé kon ni̱nga krò ni̱kꞌen‑tꞌa kꞌoa̱ katanchroátje̱n‑ngi‑na.

25 Nga̱ to̱ꞌya‑ni xi me‑le̱ nga kꞌoa̱sjentjaì kjoa̱bijnachon‑le̱,

to̱sa̱a si̱icha kjoa̱bijnachon‑le̱;

kꞌoa̱ to̱ꞌya‑ni xi si̱icha kjoa̱bijnachon‑le̱ xi to̱ tꞌatsꞌa̱n,

so̱kò‑le̱ kjoa̱bijnachon ngantsjaì.

26 Nga̱ jmé xi sꞌi̱in‑ni chjo̱ta̱ ni̱nga koi̱nje̱n‑le̱ ngayije jme xi tjín i̱ soꞌnde,

kꞌoa̱ tsà si̱icha‑ni kjoa̱bijnachon‑le̱.

Axo̱ jmé xi koa̱n kꞌoe̱echjíntjaì‑ni kjoa̱bijnachon‑le̱ jè chjo̱ta̱.

27 Nga̱ jè ꞌNdí‑le̱ Chjo̱ta̱,

kjoa̱ꞌaí ngìndia kao̱ lꞌí isen xi koa̱kò nga tjín‑le̱ nganꞌión‑le̱ Nꞌai‑le̱,

kꞌoa̱ kjoa̱ꞌaí kao̱ cho̱ꞌnda ngꞌajmi‑le̱,

kꞌoa̱ kꞌia̱ kꞌoe̱echjí‑le̱ nga jngó jngó chjo̱ta̱ josꞌìn bakìn‑le̱ jme xi kisꞌin.

28 Ñaki kìxi̱i xi xin‑no,

nga tjín kꞌa xi tjió i̱,

xi tsì koi̱yá saꞌnda nga skoe̱ jè ꞌNdí‑le̱ Chjo̱ta̱ kꞌia̱ nga kjoa̱ꞌaí joni chjo̱ta̱xá ngajko̱.