Jè kjoa̱ jao‑nkjaín‑le̱ chjo̱ta̱ fariseo
12
Kꞌia̱ nga kꞌoa̱ kjima,
xki̱ jmi koanxkó chjo̱ta̱‑nkjìn,
ñaki nga i̱ nga ján tsaotsjánè‑le̱ xínkjín,
Jesús tsakꞌétsꞌia̱kao̱ nga kitsò títjòn‑le̱ chjo̱ta̱ xi ya̱ kòtꞌayàtꞌa‑le̱:
«Ti̱koìnda̱‑lao̱o yao‑no jè na̱ꞌyo̱san‑le̱ chjo̱ta̱ fariseo,
nga koiì xi kjoa̱jaònkjaín.
2 Nga̱ ni̱jme‑jìn kjoa̱ xi bꞌéꞌmatꞌain chjo̱ta̱ xi tsì tsà jcha̱sòn‑tsen‑le̱;
kꞌoa̱ ni̱jme‑jìn xi tjióꞌmà xi tsì tsà jcha̱‑le̱.
3 Koiì kjoa̱ nga ngayije jmè xi tsakixón ya̱ jin njiòn,
ya̱a jña isen koi̱nóꞌyà‑le̱;
kꞌoa̱ to̱jña‑nile̱ én xi chrjoa̱ño xìngio̱o kinòkjoa̱sꞌaon ya̱ ya ndꞌia xi kjiosòn‑ngꞌa,
ya̱a sòn‑ngꞌa ndꞌia koi̱nókjoa̱ya.
ꞌYá‑ni xi tjínè‑le̱ nga koi̱jkón‑le̱e
4 »To̱nga kꞌoa̱axin‑no jòn ꞌndí mìyo̱‑na̱:
Alì jè‑jìn bijkon‑lao̱o chjo̱ta̱ xi to̱ yao‑ná síkꞌen,
kꞌoa̱ kꞌia̱ nga je maskan‑ni lìjme sa xi ma sꞌìn.
5 To̱nga koakòyà‑no ꞌyá‑ni xi machjén nga koi̱jkón‑lao̱o:
Jé ti̱jkón‑lao̱o jè xi koa̱nskan‑ni nga je kjoa̱ꞌàxin‑no kjoa̱bijnachon‑no,
tjín‑le̱ nganꞌión nga ya̱ si̱ikꞌatsaojin‑no ya jin lꞌí xi tsìkꞌia bitsꞌao;
jaon kꞌoa̱axin‑no,
jè Niná xi ti̱jkón‑lao̱o.
6 »A tsí tsà to̱ jaò tao̱n saténa‑ni xi aòn ni̱se.
Ni̱nga to̱ kꞌoa̱matꞌain ni̱jngo‑jìn xi tísíchajin Niná.
7 Nga̱ saꞌnda jè ntsja̱jko tjíxki̱i.
Alì bijkon‑jiòn,
nga̱ ngìsa̱a nꞌión tse chjí‑lao̱o jòn ti̱kꞌoa̱‑ni tsà nkjìn ni̱se ꞌndí.
Jè xi tsjoá én‑le̱ xi tꞌatsꞌa̱n ya̱ ngixko̱n chjo̱ta̱
8 »Kꞌoa̱axin‑no nga to̱ꞌya‑ni xi koi̱nchja̱ sòn‑tsèn ya̱ ngixko̱n chjo̱ta̱ nga an fìtꞌa‑na,
kꞌoa̱ati̱ jè ꞌNdí‑le̱ Chjo̱ta̱ koi̱nchja̱ sòn‑tsèn ya̱ ngixko̱n cho̱ꞌnda ngꞌajmi‑le̱ Niná nga jè fìtꞌa‑le̱;
9 to̱nga jè xi kꞌoa̱ koi̱tso̱ ya̱ ngixko̱n chjo̱ta̱ nga tsì bexkon‑na,
kꞌoa̱ati̱ xián an ya̱ ngixko̱n cho̱ꞌnda ngꞌajmi‑le̱ Niná nga tsì ꞌbexkoan.
10 »To̱ꞌya‑ni xi chꞌao tsò én koi̱nchja̱ tꞌatsꞌe̱ jè ꞌNdí‑le̱ Chjo̱ta̱,
jcha̱tꞌaà‑le̱;
to̱nga jè xi koi̱nchja̱ꞌaon‑le̱ jè Sén Ni̱chrjin Tsje,
lìkoi jcha̱tꞌa‑le̱.
11 »Kꞌia̱ nga koai̱kao̱‑no chjo̱ta̱ ya̱ ngixko̱n chjo̱ta̱ xi batéxoma ya̱ ndꞌia jña maxkia̱ xo̱n‑le̱ Niná,
kꞌoa̱ ya̱ ngixko̱n chjo̱ta̱ xi bꞌéndajin kjoa̱ kao̱ ngixko̱n chjo̱ta̱xá nga si̱ijtsòꞌa‑no,
alì nìkjájon‑jìn‑lao̱o yao‑no jósꞌìn koi̱nókjoa̱o axo̱ jmé‑ni xi kꞌoín‑lao̱o axo̱ jme‑ni xi koixón;
12 nga̱ jè Sén Ni̱chrjin Tsje kꞌia̱a koakóya‑no jmé‑ni én xi machjén nga koixón».
Jè chjo̱ta̱ nchi̱ná xi chi̱nì
13 Kitsò jngo xi ya̱ tíjnajin‑le̱ chjo̱ta̱‑nkjìn:
—Ji xi bakòyai,
kꞌoa̱tꞌìn‑lai̱ ndsꞌe nga katatsjoá‑na jme‑ni xi an bꞌakao̱‑na,
jè xi xijchá‑na̱ji̱n kisikatió‑naji̱n.
14 To̱nga Jesús kitsò‑le̱:
—Ji ꞌndí mìyo̱,
ꞌyá xi koi xá kitsjoa‑na nga an kꞌoendajin‑no kjoa̱‑no,
axo̱ nga an sijaòya‑no jme xi kisikatió‑no xijchá‑no.
15 Kꞌoa̱ kitsò‑le̱ jè chjo̱ta̱‑nkjìn:
—Chótsaon kꞌoa̱ ti̱koìnda̱‑lao̱o yao‑no nga tsì tsà jon kàtamame‑no jme xi tjín‑le̱ chjo̱ta̱ xi kja̱ꞌaí;
nga̱ jè kjoa̱bijnachon‑le chjo̱ta̱ alì tsà kꞌoa̱‑jìn kji chjí‑le̱ jokji nkjìn jko̱ya tsojmì xi tjín‑le̱.
16 Kꞌoa̱ati̱ tsakakóya‑le̱ jngo choa̱ xi mangósòn‑kao̱ jngo kjoa̱,
kitsò‑le̱:
—Ya̱ jin nangi‑le̱ jngo chjo̱ta̱ nchi̱ná nꞌión nkjìn tsojmì koanjchá‑le̱.
17 Kꞌoa̱ jè kisikꞌaitsjen kitsò ya̱ jin ni̱ma̱‑le̱:
“Jmé xi sꞌian,
nga̱ tsìn‑na jña koinchaxkoá jè tsojmì xi kjimajchá‑na”.
18 Kꞌoa̱ kitsò:
“Koiì jè xi sꞌian:
To̱saà sikixòya jè ningꞌa‑na̱,
kꞌoa̱ koiì kꞌoenda xi ngìsa̱ nꞌión ꞌmbá kjoan,
kꞌoa̱ ya̱ koinchaxkoá ngayije tsojmì xi kjimajchá‑na kao̱ ngayije tsojmì xi tjín‑na;
19 kꞌoa̱ i̱ xín‑le̱ yao‑na̱:
‹Nꞌión nkjìn ma‑ni jè tsojmì xi nchatjaò‑lì xi nkjìn nó koi̱jnachon‑ni;
ti̱kjáyai,
ti̱chi,
tꞌoi̱,
ti̱tsjoai›”.
20 To̱nga Niná kitsò‑le̱:
“Chjo̱ta̱ chi̱nì,
koi ni̱tje̱n jè kjoa̱ꞌaí nìjé‑lì kjoa̱bijnachon‑li̱;
kꞌoa̱ ngayije tsojmì xi to̱ngi‑ni kàbatiòndai,
ꞌyá tsꞌe̱ koa̱n”.
21 Ya̱a mangósòn‑kao̱ chjo̱ta̱ jè,
jngo chjo̱ta̱ xi sínchi̱ná yao‑le̱,
kꞌoa̱ lìkoi tsà nchi̱ná xi kao̱ Niná».
Jè kjoa̱nìkjájon kao̱ jè kjoa̱ xi nꞌión mame‑ná
22 Xi je koan Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:
«Koiì kjoa̱ nga kꞌoa̱xin‑nino jòn,
alì nìkjájon‑jìn‑lao̱o yao‑no tꞌatsꞌe̱ kjoa̱bijnachon‑no,
jmè xi koi̱chio;
ni̱ tꞌatsꞌe̱‑jìn yao‑no,
jmè xi chꞌa̱kjaó.
23 Jè kjoa̱bijnachon‑no ngìsa̱a nꞌión chjí‑le̱ ti̱kꞌoa̱‑ni jme xi chinao,
kꞌoa̱ jè yao‑no ti̱kꞌoa̱‑ni jè najño xi chꞌàkjaó.
24 Chótsen‑lao̱o ni̱se nchra̱a,
xi ni̱ bꞌéntjè‑jìn,
ni̱ bꞌéxkó‑jìn;
ni̱ bincháxkó‑jìn jme xi kjine,
kꞌoa̱ ni̱ ningꞌa‑jìn tjín‑le̱,
kꞌoa̱ jè Niná síkjèn.
Kꞌoa̱ jòn,
a tsí ngìsa̱ nꞌión chjí‑no ti̱kꞌoa̱‑ni jè ni̱se.
25 Kꞌoa̱ ꞌyá‑ni jòn,
ni̱nga nꞌión si̱kjájon‑lao̱o yao‑no,
a koa̱an‑no si̱ngꞌa jngo xkóndsa̱o yao‑no.
26 Tsà tsì ma‑no kjoa̱ xi to̱ choa ñꞌain tjín,
án‑ni nga nꞌión nìkjájon‑nilao̱o yao‑no tꞌatsꞌe̱ kjoa̱ xi kja̱ꞌaí.
27 »Chótsen‑lao̱o naxójñá,
jósꞌìn mantjè;
lìkoi síxá,
ni̱ najño‑jìn sínda‑le̱ yao‑le̱;
to̱nga kꞌoa̱axin‑no,
nga ni̱ jè‑jìn Salomón kao̱ ngayije kjoa̱nchi̱ná‑le̱,a
lìkꞌia tsakꞌakjá najño xi kꞌoa̱kjoan joni tsà jè naxó.
28 Kꞌoa̱ tsà Niná kꞌoa̱ síkjoan jè naxó xi tjín ndꞌai̱ ya̱ jin jñá ján,
kꞌoa̱ nchaon ya̱ ni̱kꞌatsaojin lꞌí,
a tsí ngìsa̱ nda si̱ikoìnda̱‑no jòn,
chjo̱ta̱ xi choa kjoa̱makjaín tjín‑no.
29 Kꞌoa̱ jòn alì koi‑jìn nìkjájon‑lao̱o yao‑no tꞌatsꞌe̱ jme xi chi̱na̱o,
ni̱ koi‑jìn jme xi sꞌio̱o,
kꞌoa̱ ni̱ bꞌaiꞌnde‑jiòn nga jè kjoa̱nìkjájon‑no kjoa̱ꞌàxìn‑no kjoa̱nchꞌán‑no.
30 Nga̱ koiì ngayije kjoa̱ jè xi nꞌión básjai chjo̱ta̱ soꞌnde;
to̱nga jè Nꞌai‑no beè nga machjén‑no tsojmì xo̱kjoan.
31 To̱saà koi ti̱jnchísjao jña batéxoma Niná,
kꞌoa̱ ngayije tsojmì xo̱kjoan kꞌoai̱sòn‑no.
Kjoa̱nchi̱ná xi tsꞌe̱ ngꞌajmi
32 »Alì bijkon‑jiòn,
barrè‑na̱ xi to̱ choa ma‑nio nga tiyojtión,
nga̱ jè Nꞌai‑no kjaínga nda kisꞌe‑le̱ nga títsjoá‑no ya̱ jña batéxoma.
33 Ta̱tènao jme xi tjín‑no,
kꞌoa̱ tꞌaì kjoa̱tjaò‑lao̱o xi yo̱ma̱ sꞌìn tjió;
ti̱ndá‑lao̱o yao‑no xijtsa tao̱n xi tsì koa̱njchá,
kꞌoa̱ kàtasꞌe‑no ya̱ ngꞌajmi kjoa̱nchi̱ná xi ni̱kꞌia‑jìn kjoe̱tꞌa,
jña‑ni nga tsì ché fichó,
ni̱ cho̱ kixo‑jìn síkitsón.
34 Nga̱ ya̱ jña tíjna kjoa̱nchi̱ná‑no,
kꞌoa̱ati̱ ya̱ kꞌoéjna ni̱ma̱‑no.
Jè cho̱ꞌnda xi tjiókònꞌnda ngantsjaì
35 »Ti̱yondao ngantsjaì ni̱chrjin,
kꞌoa̱ tꞌètì isaon jè lꞌí‑no;
36 kꞌoa̱ jòn ya̱ kàtamangósòn‑kao̱o jè chjo̱ta̱ xi koya‑le̱ nai‑le̱ nga kjoa̱ꞌaí‑ni jña tjín xi kàbixan,
jmé‑ni kꞌia̱ nga kjoa̱ꞌaí kꞌoa̱ koi̱nchja̱,
ngatsꞌi ndi̱to̱n skóꞌaì‑le̱ xo̱ntjoa̱ nai‑le̱.
37 Jó to̱nda‑le̱ ya̱ ngixko̱n Niná jè cho̱ꞌnda xi tjiókònꞌnda kꞌia̱ nga kjoa̱ꞌaí jè nai‑le̱;
ñaki kìxi̱i xi xin‑no nga jè nai‑le̱ koe̱exkóngi najño‑le̱,
kꞌoa̱ si̱ikatiótꞌa yámìxa̱ cho̱ꞌnda‑le̱,
kꞌoa̱ kꞌoe̱eya‑le̱ xi si̱ikjèn‑ni.
38 Kꞌoa̱ ni̱nga kꞌia̱ kjoa̱ꞌaí jè nai‑le̱ kꞌia̱ nga je basenya‑ni̱tje̱n,
kꞌoa̱ nda tsà kꞌia̱ kjoa̱ꞌaí nga njiònya sa,
kꞌoa̱ tsà tjiókòn nga tjiókoya‑le̱ nga kjoa̱ꞌaíkanchrꞌoè,
jó to̱nda‑le̱ ya̱ ngixko̱n Niná jè cho̱ꞌnda xo̱kjoan.
39 To̱nga kàtaꞌyao jè‑bi̱,
tsà jè nai‑le̱ ndꞌia sꞌe̱jin‑le̱ jóchon kjoa̱ꞌaí ché,
kꞌoéjnakonꞌnda,
kꞌoa̱ lìkoi tsjoáꞌnde‑le̱ nga kjoa̱ꞌasꞌen ya̱ ndꞌia‑le̱.
40 Kꞌoa̱ti̱ jon,
kꞌoa̱sꞌìn ti̱yondao,
nga̱ jè ꞌNdí‑le̱ Chjo̱ta̱ kꞌoa̱achon kjoa̱ꞌaí jochon nga tsì koi tinìkꞌaitsjaon».
Jè cho̱ꞌnda xi lìkoi kisikitjosòn
41 Kꞌia̱ Pedro kitsò‑le̱ Jesús:
—Nai,
a to̱ ji̱in xo̱ ꞌmì‑naíji̱n jè choa̱ mangósòn xo̱kji,
axo̱ ngatsꞌi xo̱ tiꞌmì‑lai̱.
42 Kꞌia̱ kitsò jè Nai‑ná:
—ꞌYá‑ni jè cho̱ꞌnda xi ma nìnꞌiótꞌa kꞌoa̱ xi nkjìn‑kon xi kjinèntsja tsojmì xi tjín‑le̱ nai‑le̱,
xi jè nai‑le̱ tsjoá xá‑le̱ nga si̱ikoìnda̱ cho̱ꞌnda xínkjín,
jmé‑ni nga tsjoá‑nile̱ tsojmì xi koa̱kje̱n nga jngó jngó,
jotjín xi bꞌakao̱‑le̱ nga bichò choa̱‑le̱.
43 Jó to̱nda‑le̱ ya̱ ngixko̱n Niná jokji cho̱ꞌnda xi kꞌoa̱tísꞌín kꞌia̱ nga kjoa̱ꞌaí jè nai‑le̱.
44 Ñaki kìxi̱i xi xin‑no,
jè si̱ikánèntsja ngayije jme xi tjín‑le̱.
45 To̱nga tsà jè cho̱ꞌnda xo̱kji koi̱tso̱ ya̱ jin ni̱ma̱‑le̱:
“Jè nai‑na̱ kꞌoa̱chrjin‑sale̱ nga kjoa̱ꞌaí”;
kꞌoa̱ kꞌoe̱etsꞌia̱kao̱ nga kꞌoe̱e‑le̱ jè cho̱ꞌnda xikꞌa kao̱ jè yánchjín cho̱ꞌnda,
kꞌoa̱ koa̱kje̱n,
kꞌoa̱ skꞌoí,
kꞌoa̱ kꞌoéjnachꞌi̱,
46 kꞌia̱ kjoa̱ꞌaí jè nai‑le̱ cho̱ꞌnda xo̱kji ni̱chrjin kꞌia̱ nga tsì tíkoya‑le̱,
kꞌoa̱ jochon nga tsì kjijin‑kon,
kꞌoa̱ tseè kjoa̱ñꞌain tsjoá‑le̱,
kꞌoa̱ ya̱a si̱ikꞌéjnakao̱ jña tjió chjo̱ta̱ xi tsì makjaín‑le̱ tꞌatsꞌe̱ Niná.
47 Jè cho̱ꞌnda xi be jme xi me‑le̱ nai‑le̱,
kꞌoa̱ lìkoi tsakꞌèjnanda,
ni̱ kꞌoa̱‑jìn‑là kisꞌin josꞌìn me‑le̱ jè nai‑le̱,
tseè kjoa̱ñꞌain kꞌoai̱‑le̱.
48 To̱nga jè cho̱ꞌnda xi tsì be nga kꞌoa̱kisꞌin jè kjoa̱ xi kjoa̱ñꞌain bakìn‑le̱,
choaà kjoa̱ñꞌain kꞌoai̱‑le̱;
nga̱ ngatsꞌi jokjoan xi tse tsakꞌaì‑le̱ kꞌoa̱ati̱ tse si̱jé‑le̱;
kꞌoa̱ jè xi tse koa̱ntsja,
kꞌoa̱ati̱ tse si̱jé‑le̱.
Jesús síjaòya chjo̱ta̱
49 Lꞌí jàꞌai̱kꞌetsè i̱ soꞌnde;
kꞌoa̱ jmé xi me‑na,
nga̱ jeè tíbꞌájnga.
50 Jngo kjoa̱sꞌejtsanè tjínè‑le̱ sꞌe̱jtsanè an;
kꞌoa̱,
¡lì kꞌoa̱akji títsokjón ni̱ma̱‑na̱ jo saꞌnda nga koi̱tjosòn kjoa̱ jè!
51 A nìkꞌaitsjen‑nió nga kjoa̱nchꞌán xi jaꞌai̱koa̱ i̱ soꞌnde.
Kꞌoa̱axin‑no nga mai,
to̱sa̱a koi kjoa̱ xi síjaòya chjo̱ta̱ jaꞌai̱koa̱.
52 Nga̱ bꞌétsꞌia̱‑ni ndꞌai̱,
tsà aòn ma‑ni chjo̱ta̱ ya̱ jngo ndꞌia koa̱n‑jaòyaà,
jàn xi koai̱tje̱n‑ngike xi jaò,
kꞌoa̱ jaò xi koai̱tje̱n‑ngike‑le̱ xi jàn.
53 Jè xi nꞌai koai̱tje̱n‑ngike‑le̱ ti‑le̱,
Kꞌoa̱ jè xi ti koai̱tje̱n‑ngike‑le̱ nꞌai‑le̱;
Jè xi na̱ koai̱tje̱n‑ngike‑le̱ tsòti‑le̱,
Kꞌoa̱ jè xi tsòti koai̱tje̱n‑ngike‑le̱ na̱‑le̱;
Kꞌoa̱ jè xi na̱chá koai̱tje̱n‑ngike‑le̱ ꞌnda‑le̱,
Kꞌoa̱ jè xi ꞌnda koai̱tje̱n‑ngike‑le̱ na̱chá‑le̱.b
Án‑ni nga tsìꞌya‑nio ni̱chrjin jè
54 Kꞌoa̱ Jesús,
kꞌoa̱ti̱ i̱ kitsò‑le̱ chjo̱ta̱‑nkjìn:
—Kꞌia̱ nga ꞌyao jè yojbi xi bitjo‑ni ya̱ jña kantjaì‑ni tsꞌoí,
kjoan bixón:
“Jtsí kꞌoa̱”;
kꞌoa̱ bitjosòn.
55 Kꞌoa̱ kia̱nga ꞌyao nga faꞌai ntjao̱ kixì xi nchroá‑ni ya̱ ngaskón‑le̱ jña kantjai‑ni tsꞌoí,
bixón:
“Koa̱nsjè”,
kꞌoa̱ kꞌoa̱a ma.
56 ¡Chjo̱ta̱ jaò‑nkjaín!
Maà‑no chòtsen‑lao̱o jóchon ya̱ ngꞌajmi kao̱ i̱ soꞌnde,
kꞌoa̱ bixónyao jó koa̱n‑chon;
kꞌoa̱ án‑ni nga tsì macho̱ya‑sínino jè ni̱chrjin xi tiyoaà ndꞌai̱.
Tꞌèndajin jè kjoa̱ xi tjín‑lì kao̱ xi tje̱n‑ngike‑lì
57 »Kꞌoa̱ án‑ni nga tsì ti̱ jon chòtꞌajin‑nio kjoa̱ xi kìxi̱ tjín.
58 Kꞌia̱ nga kꞌoín ji kao̱ jè xi tje̱n‑ngike‑lì ya̱ ngixko̱n ngajko̱‑le̱ chjo̱ta̱xá xi bꞌéndajin kjoa̱,
tjasjai‑lai̱ josꞌìn kꞌoèndajin kjoa̱‑li̱ kao̱ chjo̱ta̱ xi tje̱n‑ngike‑lì ngasꞌa̱ ya̱ tje̱nyao yandia̱a,
jmé‑ni nga tsì tsà kꞌoendójbe‑nilì nga koai̱kao̱‑lì ya̱ ngixko̱n chjo̱ta̱xá xi bꞌéndajin kjoa̱,
kꞌoa̱ jè ya̱ si̱intsjatꞌa‑lì chjo̱ta̱ xi síkatió ndo̱yá chjo̱ta̱,
kꞌoa̱ jè ya̱ si̱ikꞌéjnaꞌya‑lì ndo̱yá.
59 Kꞌoaàxin‑lè nga lìkoi ti̱ koa̱n koìtjo̱‑ni ya̱,
jo saꞌnda nga kꞌoéchjí nga si̱kjai ngayije tao̱n‑li̱.