—Nai,

ta̱kòya‑naíji̱n josꞌìn koi̱nókjoa̱koai̱‑ji̱n Niná,

jo kisꞌin Juan xi kiskanìsꞌen‑ngindá nga tsakakóya‑le̱ chjo̱ta̱ xi ya̱ kiskòtꞌayàtꞌa‑le̱.

2 Kꞌoa̱ Jesús kitsò‑le̱:

—Kꞌia̱ nga nòkjoa̱kao̱o Niná,

i̱sꞌìn tixón:

5 Kꞌoa̱ kitsò sa‑le̱:

—ꞌYá‑ni jòn xi tíjna jngo‑le̱ mìyo̱ xi koai̱kon‑le̱ kꞌia̱ nga basen‑ni̱tje̱n,

kꞌoa̱ koi̱tso̱‑le̱:

“Mìyo̱,

jàn‑là nio̱xtìla̱ ti̱kìnya‑naí,

6 nga̱ jngo mìyo̱‑na̱ kàfaꞌaikòn‑na xi kjin kàfaꞌai‑ni,

kꞌoa̱ lìjme xi tjín‑na xi tsjoa‑le̱”;

7 a koi̱tso̱o‑no jè mìyo̱‑no,

nga koi̱nchja̱‑ni saꞌnda ya̱ ya ndꞌia‑le̱:

“Alì an‑jìn nìsi‑naí;

jeè tíchjoà xo̱ntjoa̱,

kꞌoa̱ jè xti ꞌndí‑na̱ i̱i kjiosòn‑kao̱‑na na̱chan;

lìkoi koa̱n koiso̱tje̱n,

kꞌoa̱ nga tsjoa‑lè nio̱xtìla̱”.

8 Kꞌoa̱axin‑no:

Nda tsà tsì koi̱sótje̱n nga tsjoá‑le̱ nga to̱koi‑ni nga mìyo̱‑le̱ ma,

to̱koiì nga si tísíkao̱,

koi̱sótje̱n kꞌoa̱ tsjoá‑le̱ ngayije xi machjén‑le̱.

9 »Kꞌoa̱ an kꞌoa̱a xin‑no:

Ti̱jaó,

kꞌoa̱ kꞌoai̱i‑no;

ti̱jnchísjao,

kꞌoa̱ koa̱nsjai‑no;

ti̱kjanetꞌao xo̱ntjoa̱ kꞌoa̱ tjóꞌaí‑no,

10 nga̱ to̱ꞌya‑ni xi síjé,

bꞌaí‑le̱;

kꞌoa̱ jè xi básjai,

masjaì‑le̱;

kꞌoa̱ jè xi síkjanetꞌa xo̱ntjoa̱ tjóꞌaí‑le̱.

11 »Yá‑ni jòn xi nꞌai mao,

tsà nio̱xtìla̱ si̱ijé‑le̱ ꞌndí‑le̱,

a la̱jao̱o tsjoá‑le̱.

Kꞌoa̱ tsà jti̱ si̱ijé‑le̱,

ngajao‑le̱ jti̱,

a ye̱e tsjoá‑le̱.

12 Kꞌoa̱ tsà chjao̱o si̱ijé‑le̱,

a cho̱naꞌyá tsjoá‑le̱.

13 Nga̱ tsà jòn ni̱nga chjo̱ta̱ chꞌaokjoan‑jiòn maà‑no bꞌaì‑lao̱o tsojmì xi nda jè xti‑no,

kꞌoa̱ jè Nꞌai‑no xi tíjna ya̱ ngꞌajmi,

a tsí ngìsa̱ koan‑le̱ tsjoá‑le̱ Sén Ni̱chrjin Tsje ꞌya‑ni xi si̱ijé‑le̱».

14 Kꞌia̱nga Jesús tímꞌaonsjejin jngo sén ni̱chrjin xi tsꞌe̱ nai̱i xi tsì ma‑le̱ nchja̱;

kꞌoa̱koan kꞌia̱ nga je kitjojin‑le̱ jè sén ni̱chrjin xi tsꞌe̱ nai̱i,

jè chjo̱ta̱ xi tsì ma‑le̱ nchja̱ koaàn kinchja̱‑ni;

kꞌoa̱ jè chjo̱ta̱ to̱kꞌoa̱a koan‑le̱.

15 To̱nga tjín kꞌa xi kitsò:

«Kao̱o nganꞌión‑le̱ Beelzebú,

jè ngajko̱‑le̱ sén ni̱chrjin xi tsꞌe̱ nai̱i mꞌaosjejin‑ni jè sén ni̱chrjin xi tsꞌe̱ nai̱i».

16 Kꞌoa̱ tjió kꞌa chjo̱ta̱ xi kja̱ꞌaí xi me‑le̱ kiskòtꞌayàkao̱,

kisijé jngo‑le̱ choa̱ xi tsꞌe̱ ngꞌajmi.

17 To̱nga Jesús tsabe kjoa̱faꞌaitsjen‑le̱ chjo̱ta̱ xo̱kjoan,

kitsò‑le̱:

«To̱ jokji‑ni na̱xi̱nandá xi ti̱jè síjaòya‑ni xínkjín,

fesòn‑ní;

kꞌoa̱ jngo ndꞌia jña‑ni ti̱jè síjaòya‑ni xínkjín bixòya‑ní.

18 Kꞌoa̱ tsà kꞌoa̱ti̱ jè nai̱i ti̱jè síjaòya‑ni yao‑le̱,

jósꞌìn koa̱n‑ni nga tse koa̱n‑le̱ jña tíbatéxoma,

nga̱ jòn kꞌoa̱a bixón nga kao̱ nganꞌión‑le̱ Beelzebú bꞌasjèjin‑nia jè sén ni̱chrjin xi tsꞌe̱ nai̱i.

19 Nga tsà an kao̱ nganꞌión‑le̱ Beelzebú mꞌaosjejin‑nia jè sén ni̱chrjin xi tsꞌe̱ nai̱i,

kꞌoa̱ jè xti‑no,

ꞌyá tsꞌe̱ nganꞌión mꞌaosjejin‑ni.

Koiì kjoa̱ nga ti̱jè xti‑no si̱ijénè‑nino kjoa̱ñꞌain.

20 To̱nga tsà an,

kao̱ nganꞌión‑le̱ Niná bꞌasjèjin‑nia jè sén ni̱chrjin xi tsꞌe̱ nai̱i,

xi ñaki kjoa̱kìxi̱ jeè jaꞌainchrꞌoè‑no jña batéxoma Niná.

21 »Kꞌia̱ nga jè chjo̱ta̱ xi tjín‑le̱ nganꞌión,

kjionda‑le̱ ki̱cha̱ kjoa̱jchán‑le̱ nga síkoìnda̱ ndꞌia‑le̱,

tjíjngoò kon nga lìjme xi koa̱n‑le̱ jme xi tjín‑le̱.

22 To̱nga kꞌia̱ nga faꞌai ngìjngo chjo̱ta̱ xi ngìsa̱ tse nganꞌión tjín‑le̱ ti̱kꞌoa̱‑ni jè,

kꞌoa̱ síkinjen‑le̱,

fáꞌa‑le̱ ngayije ki̱cha̱ kjoa̱jchán‑le̱ xi sínꞌión‑tꞌa,

kꞌoa̱ síkꞌabí tsojmì xi fáꞌa‑le̱.

23 »Jè xi tsì an fìtꞌa‑na,

fìtje̱n‑ngikeè‑na;

kꞌoa̱ jè xi tsì an bꞌéxkókao̱‑na,

to̱ bꞌétsaoba‑ní.

24 »Kꞌia̱ nga jngo sén ni̱chrjin xi tsì nda bitjojin‑nile̱ chjo̱ta̱,

ya̱a bꞌamjen ya̱ ꞌnde kixì,

nga básjai jña si̱ikjáya,

kꞌoa̱ kꞌia̱nga lìkoi masjai‑le̱,

kꞌoa̱atsò:

“Kjoí ngìndia‑nia ya̱ ndꞌia‑na̱ jña kitjo̱‑nia”.

25 Kꞌoa̱ kꞌia̱nga faꞌai‑ni,

be nga je kisatechà kꞌoa̱ nga je koan‑ndachon.

26 Kꞌia̱ fì,

kꞌoa̱ ngì ñato sén ni̱chrjin fìkjaꞌá xi ngìsa̱ nꞌión chꞌaokjoan ti̱kꞌoa̱‑ni jè;

kꞌoa̱ ngatsꞌi ya̱ faꞌasꞌenjin‑le̱,

ya̱ batiò;

kꞌoa̱ jè chjo̱ta̱ xo̱kji ngìsa̱a tse kjoa̱ñꞌain bꞌèjnajin ti̱kꞌoa̱‑ni nga títjòn».

27 Kꞌia̱ nga tínchja̱ Jesús én xo̱ tsò,

jngo chjo̱on xi ya̱ tíjnajin‑le̱ chjo̱ta̱‑nkjìn nꞌión kinchja̱,

kitsò‑le̱:

—Jó to̱nda‑le̱ ya̱ ngixko̱n Niná jè chjo̱on xi ya̱ koanjcháyai tsꞌoa̱ kꞌoa̱ kisikaki‑lì.

28 Kꞌoa̱ Jesús kitsò‑le̱:

—Ngìsa̱a to̱nda‑nile̱ ya̱ ngixko̱n Niná jè xi nchrꞌoé én‑le̱ Niná,

kꞌoa̱ síkitjosòn.

29 Kꞌia̱ nga koanñatꞌa‑le̱ chjo̱ta̱‑nkjìn,

Jesús tsakꞌétsꞌia̱kao̱ nga kitsò:

«Jè chjo̱ta̱ xi tjín ndꞌai̱ nꞌión chꞌaokjoan;

choa̱a síjé,

to̱nga lìjme choa̱ kꞌoai̱‑le̱,

to̱koiì choa̱‑le̱ Jonás xi skoe̱.

30 Nga̱ josꞌìn nga Jonás choa̱ koan‑le̱ jè chjo̱ta̱ xi ya̱ na̱xi̱nandá‑nꞌión Nínive kisꞌe,^a

kꞌoa̱ati̱ sꞌìn jè ꞌNdí‑le̱ Chjo̱ta̱ choa̱a koa̱n‑le̱ jè chjo̱ta̱ xi tjín ndꞌai̱.

31 Jè chjo̱on xi xá títjòn kisꞌe‑le̱ ya̱ ngaskón‑le̱ jña kantjaì‑ni tsꞌoí,

koa̱se̱n‑ndo kꞌia̱nga Niná si̱ijtsòꞌa chjo̱ta̱ xi tjín ndꞌai̱,

kꞌoa̱ tsjoá én‑le̱ nga kjoa̱ñꞌain bakìn‑le̱;

nga̱ jè ya̱a jaꞌai‑ni jña saꞌnda nga fetꞌa‑ni soꞌnde nga jaꞌai‑nchrꞌoé‑le̱ kjoa̱‑isen‑tokòn‑le̱ Salomón,^b

kꞌoa̱ i̱i tíjna i̱ jngo xi ngìsa̱ ngꞌa tíjna ti̱kꞌoa̱‑ni Salomón.

32 Kꞌia̱ nga Niná si̱ijtsòꞌa ngatsꞌi chjo̱ta̱,

jè chjo̱ta̱ xi kisꞌe ya̱ na̱xi̱nandá‑nꞌión Nínive koi̱nchando nga tsjoá én‑le̱ nga kjoa̱ñꞌain bakìn‑le̱ jè chjo̱ta̱ xi tjín ndꞌai̱;

nga̱ kꞌia̱nga kinchrꞌoé én xi kinchja̱yajin‑le̱ Jonás kisikꞌantjaìyaà kjoa̱faꞌaitsjen‑le̱,^c

kꞌoa̱ i̱i tíjna i̱ jngo xi ngìsa̱ ngꞌa tíjna ti̱kꞌoa̱‑ni Jonás.

33 »Ni̱ꞌya‑jìn xi síkꞌéjnaꞌma jè lꞌí xi títì,

ni̱ kàxa̱‑jìn síkꞌéjnaꞌmangi,

to̱sa̱a ya̱ síkꞌéjna jña ngꞌa chon,

jmé‑ni nga jè xi faꞌasꞌen ndꞌia ma-isen‑nile̱.

34 Jè lꞌí xi sí-isen‑le̱ yao‑ná jé xkoaàn;

kꞌia̱ nga nda jè xkoin,

kꞌoa̱ati̱ isen‑le̱ ngayije yao‑li̱;

to̱nga kꞌia̱nga nga tsì nda jè xkoin,

kꞌoa̱ati̱ ngayije yao‑li̱ kjoa̱njiòn tìjnajin.

35 Ti̱koìndai̱ yao‑li̱ tsà kjoa̱njiòn‑ni jè lꞌí xi si nga tíjnajin‑lì.

36 Kꞌoa̱asꞌìn‑ni,

tsà ngayije yao‑li̱ isen‑le̱,

tsà tsìjme kjoa̱njiòn tíjnajin,

ñaki iseèn koa̱n‑le̱ ngayije yao‑li̱,

joni kꞌia̱ nga jngo lꞌí xi nꞌión sí-isen‑ná».

37 Kꞌia̱nga je kinchja̱ Jesús,

jngo chjo̱ta̱ fariseo tsakꞌétsꞌoa‑le̱ nga ya̱ koa̱kje̱n‑kao̱ ndꞌia‑le̱;

kꞌoa̱ kꞌia̱ Jesús jaꞌasꞌen ndꞌia‑le̱ tsakꞌèjnatꞌa ya̱ yámìxa̱.

38 To̱ koanxkón‑le̱ jè chjo̱ta̱ fariseo kꞌia̱ nga tsabe nga tsì títjòn tsakanéjon ntsja Jesús josꞌìn be‑ni chjo̱ta̱ jchínga‑le̱ chjo̱ta̱ judío kꞌia̱ nga kjen.

39 To̱nga jè Nai‑ná kitsò‑le̱:

—Jòn xi chjo̱ta̱ fariseo ꞌmì‑no,

to̱ ya̱a sòngꞌa‑le̱ cho̱tsín kao̱ chroa̱ nìtsjao,

to̱nga ya̱ jin ni̱ma̱‑no tjiókitseè kjoa̱ché kao̱ kjoa̱tsꞌe̱n.

40 Chjo̱ta̱ xíjin,

jè xi kisinda sòngꞌa‑le̱ yao‑ná,

a tsí kꞌoa̱ti̱ jè xi kisinda ni̱ma̱‑ná.

41 To̱nga tꞌai̱‑lao̱o kao̱ kjoa̱tjaòcha jme xi tjín‑no jè chjo̱ta̱ xi yo̱ma̱ sꞌìn tjió,

kꞌoa̱ kꞌia̱a tsje koa̱n ngayije kjoa̱bijnachon‑no.

42 »To̱nga ¡ma̱xó‑nilao̱o yao‑no jòn,

chjo̱ta̱ fariseo!

nga̱ ma‑no bꞌaì‑lao̱o Niná jè xi jngo‑yà síjé kꞌia̱ nga te ya,

xi tsꞌe̱ xka̱ menta kao̱ xka̱ ruda kao̱ ngayije xka̱ntjè xi majchá‑no,

to̱nga bitjatòntjaì‑lao̱o jè xi kjoa̱kìxi̱ kꞌoa̱ lìkoi tsjoachao Niná.

Koiì jè xi machjén nga kꞌoa̱sꞌia̱on tsàkai,

kꞌoa̱ nga lìkoi koi̱njiòn‑tokòn kjoa̱ xi je tìnìkitjosòn.

43 »¡Ma̱xó‑nilao̱o yao‑no jòn chjo̱ta̱ fariseo!

nga koi tsjoachao yáxìle̱ xi ncha títjòn ya̱ ndꞌia jña maxkia̱ xo̱n‑le̱ Niná,

kꞌoa̱ nga nìtìꞌnda‑no ya̱ jin ndi̱tsi̱n.

44 »¡Ma̱xó‑nilao̱o yao‑no jòn chjo̱ta̱ xi chjio kjoa̱téxoma‑le̱ Niná xi kiski Moisés kao̱ jòn chjo̱ta̱ fariseo,

xi jaònkjaín‑jiòn!

xi kꞌoa̱kjoaon joni tsà tsjó xi tsì matsen,

kꞌoa̱ jè chjo̱ta̱ xi ya̱ bꞌèmanè lìkoi be.

45 Kꞌia̱ kinchja̱ jngo chjo̱ta̱ xi síkꞌatoya jmè xi tsòya‑ni kjoa̱téxoma‑le̱ Niná xi kiski Moisés,

kitsò‑le̱:

—Ji xi bakòyai,

kꞌia̱ nga kꞌoa̱si,

kꞌoa̱ati̱ bꞌètꞌa-naíji̱n.

46 Kꞌoa̱ Jesús kitsò:

—Ma̱xó‑nilao̱o yao‑no jòn chjo̱ta̱ xi nìkꞌatoyao jme xi tsòya‑ni kjoa̱téxoma‑le̱ Niná xi kiski Moisés,

nga̱ nìkꞌami‑niò chjo̱ta̱ jè chꞌá xi tsì ma fìkao̱,

to̱nga jòn,

saꞌnda ni̱ kao̱‑jìn jngo na̱jmá-ndsao̱o nìkao̱‑nio.

47 »Ma̱xó‑nilao̱o yao‑no jòn,

xi bꞌèndasòn‑lao̱o tsjó‑le̱ jè chjo̱ta̱ xi kinchja̱ya ngajao‑le̱ Niná,

xi jè chjo̱ta̱ jchínga‑no kisikꞌen.

48 Kꞌoa̱ kꞌoa̱asꞌìn bixón nga ya̱ tje̱n tìyokao̱o kꞌoa̱ nga bꞌaìnganꞌión‑lao̱o jme xi kisꞌin chjo̱ta̱ jchínga‑no;

xi kjoa̱kìxi̱ jè‑ní xi kisikꞌen,

kꞌoa̱ jòn bꞌèndasòn‑lao̱o tsjó‑le̱.

49 Koiì nga Niná kitsò‑ni kao̱ kjoa̱nkjìn‑tokòn‑le̱:

“Sikasén‑le̱ chjo̱ta̱ xi koi̱nchja̱ya ngajao‑na kao̱ chjo̱ta̱‑na̱ xi xá sikasén‑nia;

kꞌoa̱ tjín kꞌa xi si̱ikꞌen kꞌoa̱ tjín kꞌa xi koai̱tje̱n-ngike,”

50 jmé‑ni nga jè chjo̱ta̱ xi tjín ndꞌai̱,

sikꞌéchjí‑nia njín xi tíxìjten,

xi tsꞌe̱ ngatsꞌi chjo̱ta̱ xi kinchja̱ya ngajao‑na xi tínìkꞌen jo saꞌnda nga kisꞌenda soꞌnde,

51 fìtsꞌia‑ni njín‑le̱ Abel^d saꞌnda njín‑le̱ Zacarías,^e

xi kinìkꞌen ya̱ ngabasen‑le̱ jña bꞌaìtꞌa-le̱ kjoa̱tjaò Niná kao̱ ya̱ jña kijna yo̱ngo̱;

jaon,

kꞌoa̱axin‑no nga jè si̱kꞌéchjí chjo̱ta̱ xi tjín ndꞌai̱.

52 »Ma̱xó‑nilao̱o yao‑no jòn chjo̱ta̱ xi nìkꞌatoyao jmè xi tsòya‑ni kjoa̱téxoma‑le̱ Niná xi kiski Moisés,

nga jòn kichjaꞌàxiòn jè ki̱cha̱ xi kjoꞌaì xo̱ntjoa̱ xi bitjasꞌe̱n‑nià jña nga ꞌyaxkoaàn Niná;

kꞌoa̱ ni̱ jòn‑jìn bitjasꞌao̱on,

kꞌoa̱ jè xi tjiófaꞌasꞌen bꞌèchjoà‑lao̱o.

53 Kꞌia̱ nga Jesús kꞌoa̱títsò‑le̱ ngayije kjoa̱ jè,

jè chjo̱ta̱ xi kji kjoa̱téxoma‑le̱ Niná xi kiski Moisés kao̱ jè chjo̱ta̱ fariseo tsakꞌétsꞌia̱kao̱ nga nꞌión kisitsꞌe̱n‑kao̱,

kꞌoa̱ tsakꞌétꞌa‑le̱ jmé‑ni nga nꞌión nkjìn kjoa̱ kàtanchja̱‑ni;

54 tjiókoꞌnda kꞌoa̱ tjiókoya tsà jme én xi chꞌao tsò koi̱nchja̱,

jmé‑ni nga koa̱n koa̱angi‑ni.