Jesús tjín‑le̱ nganꞌión nga kꞌoa̱tsò jme xi tiꞌndè nga ni̱chrjin xotò
12
Kꞌia̱ nga koi ni̱chrjin,
nga ni̱chrjin xotò,
ni̱chrjin nga bexkón Niná chjo̱ta̱ judío,
ya̱ tífaꞌa Jesús ya̱ jña kjintjè trigo;
kꞌoa̱ jè chjo̱ta̱ xi ya̱ kòtꞌayàtꞌa‑le̱ Jesús koanbao‑le̱ kꞌoa̱ tsakꞌétsꞌia̱kao̱ nga tsakate natín‑le̱ trigo kꞌoa̱ kiskine.
2 Kꞌia̱ nga tsabe jè chjo̱ta̱ fariseo,
kitsò‑le̱ Jesús:
—Chòtsen‑lai̱ jè chjo̱ta̱ xi ya̱ kòtꞌayàtꞌa‑lì,
koiì kꞌoa̱tjiósꞌín jña‑nile̱ xi tsì tiꞌndè nga kꞌoa̱sꞌia̱an kꞌia̱ nga ni̱chrjin xotò,
ni̱chrjin nga ꞌyaxkoán Niná xi chjo̱ta̱ judío‑jiàn.a
3 To̱nga Jesús kitsò‑le̱:
—A kjeè bꞌexkia̱o jme xi kisꞌin David,
kꞌia̱ nga jè kao̱ chjo̱ta̱ xi ya̱ tje̱n‑kao̱ koanbao‑le̱;
4 jó kisꞌin nga jaꞌasꞌen ya̱ ndꞌia najño jña ꞌyaxkón Niná,
kꞌoa̱ tsakjèn nio̱xtìla̱ xi tjiósòn yámìxa̱ xi jè Niná bꞌaìtꞌa‑le̱,b
xi tsì tiꞌndè‑le̱ nga ni̱ jè‑jìn koa̱kje̱n kꞌoa̱ ni̱ jè‑jìn xi ya̱ tjiókao̱,
to̱ jé na̱ꞌmi xi tiꞌndè‑le̱ nga koi kjèn.c
5 Axo̱ kjeè bꞌèxkia̱‑jiòn ya̱ kjoa̱téxoma‑le̱ Niná xi kiski Moisés,
jósꞌìn faꞌatontjaì‑le̱ na̱ꞌmi jè ni̱chrjin xotò nga síxá ya̱ ya yo̱ngo̱,
kꞌoa̱ a tsí tjióbajngijé.d
6 An,
kꞌoa̱axin‑no nga i̱ tíjna jngo xi ngìsa̱ nꞌión chjí‑le̱ ti̱kꞌoa̱‑ni tsà jè yo̱ngo̱.
7 Kꞌoa̱ tsà kjimacho̱yalà‑nino jmé xi tsòya‑ni jè én xi tsò:
“Kjoa̱ma̱tokòn xi me‑na,
lìtsà koi‑jìn nga cho̱ si̱kꞌen‑naó xi kꞌoai̱tꞌa‑naó,”e
lìkoi‑jìn kjoa̱ñꞌain si̱jé‑naó chjo̱ta̱ xi tsìjme kjoa̱ xi chꞌao tjín kisꞌin;
8 nga̱ jè ꞌNdí‑le̱ Chjo̱ta̱ tjín‑le̱ nganꞌión nga kꞌoa̱koi̱tso̱ jme xi tiꞌndè nga ni̱chrjin xotò,
ni̱chrjin nga bexkón Niná chjo̱ta̱ judío.
Jesús kisindaya jngo chjo̱ta̱ xi kixìtꞌa jngo ntsja
9 Kꞌia̱ nga je jaꞌatojin Jesús ya̱ jña kjintjè trigo,
jaꞌai ya̱ ndꞌia jña maxkia̱ xo̱n‑le̱ Niná,
xi tsꞌe̱ chjo̱ta̱ judío xi ya̱ nchja̱‑ni ꞌnde jè.
10 Kꞌoa̱ koe̱e‑ni ya̱ tíjna jngo chjo̱ta̱ xi kixìtꞌa jngo ntsja;
kꞌoa̱ jè chjo̱ta̱ xi ya̱ tjió kiskònangi‑le̱ Jesús,
jmé‑ni nga koa̱n koa̱angi‑ni,
kitsò‑le̱:
—A tiꞌndè nga koa̱n si̱ndayá chjo̱ta̱ kꞌia̱ nga ni̱chrjin xotò,
ni̱chrjin nga ꞌyaxkoán Niná xi chjo̱ta̱ judío‑jiàn.
11 Jesús kitsò‑le̱:
—ꞌYá‑ni jòn,
tsà xi jngo barrè tíjna‑le̱,
xi nga̱jao̱ ska̱sꞌen,
kꞌia̱ nga ni̱chrjin xotò,
ni̱chrjin nga bexkón Niná chjo̱ta̱ judío,
a tsí koai̱kꞌasje barrè‑le̱ ni̱nga ni̱chrjin xotò.
12 Kꞌoa̱ a tsí ngìsa̱ chjí‑le̱ jngo chjo̱ta̱ ti̱kꞌoa̱‑ni tsà jngo barrè.
Kꞌoa̱ koiì nga tiꞌndè‑ni nga kꞌoa̱sꞌia̱an kjoa̱ xi nda tjín kꞌia̱ nga ni̱chrjin xotò,
ni̱chrjin nga bexkón Niná chjo̱ta̱ judío.
13 Kꞌia̱ Jesús kitsò‑le̱ jè chjo̱ta̱ xi kixìtꞌa jngo ntsja:
—Tjain ndsai̱.
Kꞌoa̱ jè tsakjén ntsja,
kꞌoa̱ koan‑ndaya‑ni,
kꞌoa̱ kꞌoa̱asꞌìn nda kisꞌe‑ni jokji ntsja xi ngìjngo.
14 Kꞌia̱ nga je kitjo jè chjo̱ta̱ fariseo,
tsakatiòjtín nga tsakjaóya‑ni jmé xi koa̱n sꞌìn nga si̱ikꞌen Jesús.
Jesús jè cho̱ꞌnda xi xá kiskoéjin‑ni Niná
15 Kꞌia̱ nga Jesús kisꞌejin‑le̱ nga jè chjo̱ta̱ fariseo me‑le̱ si̱ikꞌen,
tsakasènxìn‑ni ya̱;
kꞌoa̱ nkjìn chjo̱ta̱ kitje̱n‑ngi‑le̱,
kꞌoa̱ síndaya ngatsꞌi xi chꞌin tjín‑le̱,
16 kꞌoa̱ nꞌión bꞌénè‑le̱ nga tsì kàtatsòya nga jè kisindaya;
17 jmé‑ni nga koi̱tjosòn‑síni én xi kiski jè chjo̱ta̱ xi kinchja̱ya ngajao‑le̱ Niná,
xi Isaías tsakꞌìn,
kꞌia̱ nga kitsò:
18 «Koe̱e‑ni,
jè‑ní jè cho̱ꞌnda‑na̱ xi an kiskoéjian;
Jè xi nꞌión tsjoake̱,
jo nda sꞌe koan xi tꞌatsꞌe̱;
Kao̱ Sén Ni̱chrjin‑na̱ kꞌoèjtsanè,
Kꞌoa̱ jé chjo̱ta̱ xi tsì tsà judío‑jìn koi̱nchja̱yajin‑le̱
Nga an kìxi̱i sijtsòꞌa chjo̱ta̱.
19 Lìkoi ꞌya xi kao̱ skaàn‑tì,
kꞌoa̱ ni̱ kꞌoe̱esonxá‑jìn,
Kꞌoa̱ ni̱ꞌya‑jìn xi koi̱nchrꞌoé‑le̱ jta̱‑le̱ ya̱ ya ndia̱a.
20 Jè yá na̱xo̱ xi chikjan lìkoi tsà jè skótꞌaó,
Kꞌoa̱ jè lꞌí nachjón xi títjoꞌndi̱ lìkoi tsà jè si̱ikitsꞌao,
Jo saꞌnda nga jè xo̱ sꞌi̱in nga kìxi̱ si̱ijtsòꞌa ngatsꞌi chjo̱ta̱.
21 Kꞌoa̱ to̱ jngo jè xi si̱inꞌión‑tꞌa ngatsꞌi chjo̱ta̱ xi tsì tsà judío‑jìn».f
Kꞌia̱ nga nòkjoa̱ꞌaon‑le̱ jè Sén Ni̱chrjin Tsje
22 Kꞌia̱ jaꞌaichanìtꞌa‑le̱ Jesús jngo chjo̱ta̱ xi sén ni̱chrjin xi tsꞌe̱ nai̱i tíjnajin‑le̱,
xi xka̱ kꞌoa̱ cha̱sín;
kꞌoa̱ Jesús kisindaya,
kꞌoa̱ jè chjo̱ta̱ xo̱kji xi xka̱ kꞌoa̱ xi cha̱sín koan‑tsen‑le̱ kꞌoa̱ koaàn kinchja̱.
23 Kꞌoa̱ ngatsꞌi chjo̱ta̱ to̱ tsakatiòjndà,
kitsò:
«A jè tsòkꞌoa̱ chjo̱ta̱ xo̱kji xi kjoa̱ꞌaí‑là xi ntje̱‑le̱ David kitje̱n‑ni».
24 To̱nga jè chjo̱ta̱ fariseo,
kꞌia̱ nga kinchrꞌoé én xo̱ tsò,
kitsò:
«Jè chjo̱ta̱ xo̱kji,
lìꞌya‑jìn sa tsꞌe̱ nganꞌión xi síchjén nga mꞌaosjejin sén ni̱chrjin xi tsꞌe̱ nai̱i,
to̱sa̱a kao̱o nganꞌión‑le̱ Beelzebú xi ngajko̱‑le̱ sén ni̱chrjin xi tsꞌe̱ nai̱i mꞌaosjejin‑ni».
25 Kꞌia̱ nga tsabe Jesús jè kjoa̱faꞌaitsjen‑le̱ chjo̱ta̱ fariseo,
kitsò‑le̱:
«To̱jokji na̱xi̱nandá‑je xi ti̱jè síjaòya‑ni xínkjín,
kjoe̱sòn‑ní,
kꞌoa̱ to̱ꞌya chjo̱ta̱ na̱xi̱nandá‑nꞌión‑ni axo̱ chjo̱ta̱ xi jngo ndꞌia ma xi ti̱jè síjaòya‑ni xínkjín,
lìkoi tse koa̱n‑le̱.
26 Kꞌoa̱ tsà ti̱jè nai̱i kꞌoa̱sjejin‑ni nai̱i,
ti̱jè tísíjaòya‑ni yao‑le̱;
jó koa̱n‑ni nga tse koa̱n‑le̱ jña tíbatéxoma.
27 Kꞌoa̱ tsà an kao̱ nganꞌión‑le̱ Beelzebú mꞌaosjejin‑nia jè sén ni̱chrjin xi tsꞌe̱ nai̱i,
kꞌoa̱ ꞌyá tsꞌe̱ nganꞌión mꞌaosjejin‑ni jè xti‑no,
koiì kjoa̱ nga ti̱jè xti‑no si̱ijénè‑nino kjoa̱ñꞌain.
28 To̱nga tsà an kao̱ nganꞌión‑le̱ jè Sén Ni̱chrjin‑le̱ Niná mꞌaosjejin‑nia jè sén ni̱chrjin xi tsꞌe̱ nai̱i,
koiì jè xi ꞌya kìxi̱‑nile̱ nga je i̱ tíjnakao̱‑no jña batéxoma Niná.
29 »Nga̱ jósꞌìn koa̱n‑nile̱ jngo chjo̱ta̱ nga kjoa̱ꞌasꞌen ya̱ ndꞌia‑le̱ chjo̱ta̱ xi tse nganꞌión tjín‑le̱,
nga si̱iché ngayije tsojmì xi tjín‑le̱,
tsà tsì títjòn kꞌoe̱etꞌanꞌión,
kꞌoa̱ kꞌia̱a koa̱n koai̱kao̱ ngayije tsojmì xi tjín ya̱ ndꞌia‑le̱.
30 Jè xi tsì an fìtꞌa‑na,
fìtje̱n‑ngikeè‑na;
kꞌoa̱ jè xi tsì an bꞌéxkókao̱‑na,
to̱ bꞌétsaoba‑ní.
31 »Koiì kjoa̱ nga xin‑nino:
Ngayije jé‑le̱ chjo̱ta̱,
kao̱ xi koi̱nchja̱ꞌaon‑le̱ Niná jcha̱tꞌaà‑le̱;
to̱nga ꞌya‑ni xi jè Sén Ni̱chrjin Tsje koi̱nchja̱ꞌaon‑le̱ lìkoi jcha̱tꞌa‑le̱.
32 To̱ꞌya‑ni xi chꞌao tsò én xi koi̱nchja̱ tꞌatsꞌe̱ jè ꞌNdí‑le̱ Chjo̱ta̱,
jcha̱tꞌaà‑le̱;
to̱nga to̱ꞌya‑ni xi jè Sén Ni̱chrjin Tsje chꞌao koi̱tso̱‑le̱,
lìkoi jcha̱tꞌa‑le̱,
ni̱ ndꞌai̱‑jìn kꞌoa̱ ni̱ kꞌia̱‑jìn nga je kjoe̱tꞌa soꞌnde.
33 »Tsà jngo yá xi nda,
kꞌoa̱ati̱ nda to xi ba‑le̱,
to̱nga tsà tsì nda jè yá,
kꞌoa̱ati̱ tsì nda to xi ba‑le̱,
nga̱ jè yá koiì to‑le̱ ꞌya‑nile̱ jmé yá‑ni.
34 ¡Ntje̱‑le̱ ye̱!
jó koa̱n‑nile̱ nga én xi nda tsò koi̱nókjoa̱o,
nga̱ chꞌaokjoan‑jiòn,
nga̱ jè kjoa̱ xi nꞌión tjín ya̱ jin ni̱ma̱‑le̱ chjo̱ta̱ koiì xi bitjo‑ni tsꞌoa.
35 Jè xi chjo̱ta̱ nda,
ya̱a jin ni̱ma̱‑le̱ bꞌasje‑ni kjoa̱nda xi tjiótjaó‑le̱;
kꞌoa̱ jè chjo̱ta̱ xi chꞌaokjoan,
ya̱a jin ni̱ma̱‑le̱ bꞌasje‑ni kjoa̱ xi chꞌao tjín xi tjiótjaó‑le̱.
36 To̱nga an kꞌoa̱axin‑no nga ngayije én kjitia xi nchja̱ chjo̱ta̱,
kꞌia̱a koi̱tso̱ya xi tꞌatsꞌe̱ én jè kꞌia̱ nga Niná si̱ijtsòꞌa ngatsꞌi chjo̱ta̱.
37 Nga̱ jè én xi nòkjoai̱ koiì xi kꞌoa̱sje kìxi̱‑lì,
kꞌoa̱ ti̱koiì én xi nòkjoai̱ xi kjoa̱ñꞌain koai̱kao̱‑lì».
Jè chjo̱ta̱ tsꞌe̱n xi tjín ndꞌai̱ choa̱a síjé
38 Kꞌia̱ kinchja̱ kꞌa chjo̱ta̱ fariseo kao̱ chjo̱ta̱ xi kji kjoa̱téxoma‑le̱ Niná xi kiski Moisés,
xi kitsò‑le̱ Jesús:
—Ji xi bakòyai meè‑naji̱n nga ta̱kò‑naíji̱n jngo choa̱ xi ma‑lì nꞌiaìn.
39 Kinchja̱ Jesús kꞌoa̱ kitsò‑le̱:
—Jè chjo̱ta̱ xi tjín ndꞌai̱ chꞌaokjoan kꞌoa̱ chjo̱ta̱ chajngi‑nì,
choa̱a síjé;
to̱nga lìjme choa̱ kꞌoai̱‑le̱,
to̱koiì choa̱‑le̱ Jonás,
chjo̱ta̱ xi kinchja̱ya ngajao‑le̱ Niná.
40 Nga̱ josꞌìn nga jàn ni̱chrjin kao̱ jàn ni̱tje̱n tsakꞌèjna Jonás ya̱ ya tsꞌoa̱ jngo jti̱ ꞌmbá,g
kꞌoa̱ati̱ sꞌìn jè ꞌNdí‑le̱ Chjo̱ta̱ sꞌe̱jnajin ya̱ ngabasen‑le̱ nangi jàn ni̱chrjin kꞌoa̱ jàn ni̱tje̱n.
41 Kꞌia̱ nga Niná si̱ijtsòꞌa ngatsꞌi chjo̱ta̱,
jè chjo̱ta̱ xi ya̱ na̱xi̱nandá‑nꞌión Nínive tsakatiò,
koi̱nchando nga tsjoá én‑le̱ nga bakìn‑le̱ kjoa̱ñꞌain jè chjo̱ta̱ xi tjín ndꞌai̱;
nga̱ jè chjo̱ta̱ xi kisꞌe ya̱ na̱xi̱nandá‑nꞌión Nínive,
kisikꞌantjaìyaà kjoa̱faꞌaisjen‑le̱ kꞌia̱ nga kjinchrꞌoé én xi kinchja̱yajin‑le̱ Jonás,h
kꞌoa̱ koe̱e‑ni,
i̱i tíjna jngo xi ngìsa̱ ngꞌa tíjna ti̱kꞌoa̱‑ni Jonás.
42 »Kꞌia̱ nga Niná si̱ijtsòꞌa ngatsꞌi chjo̱ta̱,
jè chjo̱on xi xá títjòn kisꞌe‑le̱ ya̱ na̱xi̱nandá xi kisꞌe ya ngaskón‑le̱ jña kantjaì‑ni tsꞌoí,
koa̱se̱n‑ndo,
kꞌoa̱ tsjoá én‑le̱ nga si̱ijénè kjoa̱ñꞌain jè chjo̱ta̱ xi tjín ndꞌai̱;
nga̱ jè ya̱a jaꞌai‑ni saꞌnda jña fetꞌa‑ni soꞌnde nga jaꞌai‑nchrꞌoé‑le̱ kjoa̱‑isen‑tokòn‑le̱ Salomón,i
kꞌoa̱ koe̱e‑ni,
i̱i tíjna jngo i̱ xi ngìsa̱ ngꞌa tíjna ti̱kꞌoa̱‑ni Salomón.
Kꞌia̱ nga faꞌai ngìndia‑ni jè sén ni̱chrjin xi tsì nda
43 »Kꞌia̱ nga jè sén ni̱chrjin xi tsì nda bitjojin‑le̱ chjo̱ta̱,
bꞌamjen ngakijndà ꞌnde kixì,
nga básjai jña‑ni nga si̱ikjáya,
kꞌoa̱ lìkoi masjai‑le̱.
44 Kꞌia̱ tsò:
“Kjoí ngìndia‑nia ya̱ ndꞌia‑na̱ jña nga kìtjo̱‑nia”;
kꞌoa̱ kꞌia̱ nga faꞌai,
be nga kjitia,
nga je kisatechà kꞌoa̱ nga je koan‑ndachon.
45 Kꞌia̱ fì,
kꞌoa̱ nchroákao̱ ngìñato sén ni̱chrjin xi ngìsa̱ nꞌión chꞌaokjoan ti̱kꞌoa̱‑ni jè,
kꞌoa̱ kꞌia̱ faꞌasꞌen,
kꞌoa̱ ya̱ batiò,
kꞌoa̱ jè chjo̱ta̱ xo̱kji ngìsa̱a tse kjoa̱ñꞌain bꞌèjnajin ti̱kꞌoa̱‑ni nga títjòn.
Kꞌoa̱ati̱ sꞌìn koa̱n chjo̱ta̱ tsꞌe̱n xi tjín ndꞌai̱.
ꞌYá‑ni xi ñaki kjoa̱kìxi̱ nga ndsꞌe̱ kꞌoa̱ nga na̱‑le̱ Jesús
46 Kꞌia̱ nga sꞌa̱ tífàkao̱ Jesús jè chjo̱ta̱‑nkjìn,
to̱ i̱i koan jaꞌai jè na̱‑le̱ kao̱ ngatsꞌi ndsꞌe̱ ya̱ nditsin,
kꞌoa̱ koanmeè‑le̱ nga kinchja̱‑le̱ Jesús.
47 Kꞌoa̱ jngo chjo̱ta̱ kitsò‑le̱ Jesús:
—Koe̱e‑ni,
na̱‑li̱ kao̱ jè ndsꞌai ya̱a tjió nditsián,
kꞌoa̱ meè‑le̱ nga kjoakao̱‑lì.
48 Kꞌia̱ kinchja̱ Jesús kitsò‑le̱ jè chjo̱ta̱ xi kichòkao̱ én‑le̱:
—ꞌYá‑ni xi na̱‑na̱ ma,
kꞌoa̱ ꞌyá‑ni xi ndsꞌe ma.
49 Kꞌia̱ Jesús tsakjén ntsja ya̱ jña tjió jè chjo̱ta̱ xi ya̱ kòtꞌayàtꞌa‑le̱,
kitsò: