Yánchjín xi tsakinchakao̱ Jesús
8
Kꞌoa̱koan nga koanskan‑ni,
kꞌia̱ nga Jesús fìkꞌamjesòn ngakijndà na̱xi̱nandá‑nꞌión kao̱ ya̱ na̱xi̱nandá‑ꞌndí,
nga nchja̱ya kꞌoa̱ tsòya jè én nda xi tꞌatsꞌe̱ jña batéxoma Niná kꞌoa̱ ya̱ tje̱n‑kao̱ jè chjo̱ta̱‑le̱ xi tejaò xi xá kiskoéjin‑ni Jesús,
2 kꞌoa̱ tje̱n‑kao̱ kꞌa yánchjín xi sén ni̱chrjin xi chꞌao̱kjoa̱n kitjokajin‑le̱ kꞌoa̱ kao̱ yáchjín xi koan‑ndaya tꞌatsꞌe̱ chꞌin xi kisꞌe‑le̱:
Jè María xi Magdalena ꞌmì,
xi ñato sén ni̱chrjin xi tsꞌe̱ nai̱i kitjokajin‑le̱;
3 Juana,
chjo̱on‑le̱ Chuza jè xi kjinèntsja ngayije tsojmì xi tjín‑le̱ chjo̱ta̱xá Herodes Antipas;
kao̱ Susana;
kꞌoa̱ nkjìn‑sa yánchjín xi tsakinchakao̱ Jesús kao̱ tsojmì xi tjín‑le̱.
Choa̱ xi mangósòn‑kao̱ jngo chjo̱ta̱ xi kjojndì na̱xi̱n
4 Nꞌión nkjìn chjo̱ta̱ koanña,
xi jaꞌai‑ni nga jngó jngó na̱xi̱nandá‑nꞌión nga jaꞌaikòn‑le̱ Jesús,
kꞌoa̱ tsakakóya‑le̱ jngo choa̱ xi mangósòn‑kao̱ jngo kjoa̱,
kitsò‑le̱:
5 «Jè chjo̱ta̱ xi na̱xi̱n kjojndì ki kjojndì na̱xi̱n‑le̱;
kꞌia̱ nga tíkjojndì,
tjín kꞌa na̱xi̱n xi ya̱ ndai ndia̱a kitsao,
kꞌoa̱ jè chjo̱ta̱ tsakinchanè,
kꞌoa̱ jè ni̱se kiskine.
6 Kꞌoa̱ tjín kꞌa na̱xi̱n xi ya̱ la̱jao̱ kitsaosòn;
kꞌia̱nga je chisò,
kixì,
nga̱ tsì ꞌnchi̱ꞌnde.
7 Tjín kꞌa na̱xi̱n xi ya̱ jin naꞌyá kitsaojin,
kꞌoa̱ ñatje̱n chisò kao̱ naꞌyá,
kꞌoa̱ jè naꞌyá kisikꞌen‑ngi.
8 Kꞌoa̱ tjín kꞌa na̱xi̱n xi ya̱ kitsao jña nda chon nangi,
kꞌoa̱ chisò,
koan‑ngꞌa kꞌoa̱ tsaka‑le̱ to,
xi jngo ciento̱ nga jngó jngó».
Kꞌia̱ nga kꞌoa̱ títsò kjoa̱ jè,
nꞌión kinchja̱,
kitsò:
«Jè xi tjín chrjoa̱‑ño xi nchrꞌoé‑ni,
nda kàtabasén‑ño».
9 Kꞌoa̱ jè chjo̱ta̱ xi ya̱ kòtꞌayàtꞌa‑le̱ kiskònangi‑le̱ kitsò:
«Jmé xi tsòya‑nile̱ jè choa̱ xi mangósòn‑kao̱ jngo kjoa̱ xi kàbakòyai».
10 Kꞌoa̱ Jesús kitsò‑le̱:
«Jòn títsjoá‑no Niná nga jchao̱o kjoa̱ꞌma‑le̱ jña batéxoma;
to̱nga jè chjo̱ta̱ xikꞌa to̱ kao̱o choa̱ xi mangósòn‑kao̱ jngo kjoa̱ tìbakoyà‑le̱,
jmé‑ni
»“Ni̱nga tjiókòtsen lìkoi skoe̱,
Kꞌoa̱ ni̱nga tjióbincháñon lìkoi koa̱n‑cho̱ya‑le̱”.a
11 »Koiì jè xi tsòya‑nile̱ jè choa̱ xi mangósòn‑kao̱ jngo kjoa̱:
Jè na̱xi̱n jè‑ní én‑le̱ Niná.
12 Kꞌoa̱ jè na̱xi̱n xi ndai ndia̱a kitsao,
jè‑ní chjo̱ta̱ xi nchrꞌoé jè én‑nda,
kꞌoa̱ kꞌia̱ faꞌai jè nai̱i kꞌoa̱ faꞌáxìnjin ni̱ma̱‑le̱ jè én nda,
jmé‑ni nga tsì koa̱n‑kjaín‑nile̱ kꞌoa̱ tsì koi̱tjontjaì‑síni.
13 Jè na̱xi̱n xi ya̱ la̱jao̱ kitsaosòn,
jè‑ní chjo̱ta̱ xi bincháñon,
kao̱o kjoa̱tsjoa kjoétjaò én‑nda;
to̱nga jè‑bi̱ tsìn‑le̱ ja̱ma̱;
to̱ choatseè makjaín‑le̱,
kꞌoa̱ ni̱chrjin nga chòtꞌayàkao̱ binchaxìn‑ni.
14 Jè na̱xi̱n xi ya̱ kitsaojin naꞌyá,
jè‑ní chjo̱ta̱ xi bincháño,
to̱nga kꞌia̱ nga tífaꞌa ni̱chrjin,
jè kjoa̱nìkjaòjin kao̱ kjoa̱nchi̱ná kao̱ kjoa̱tsjoa xi tsꞌe̱ soꞌnde síkꞌen‑ngi,
kꞌoa̱ lìkoi ba‑le̱ to.
15 To̱nga jè na̱xi̱n xi ya̱ kitsao jña nda chon nangi,
jè‑ní chjo̱ta̱ xi nda kꞌoa̱ kìxi̱ tjió ni̱ma̱‑le̱ nga kjoétjaò jè én xi bincháñon,
kꞌoa̱ ba ꞌndeè‑le̱ to,
nga̱ tsìkꞌia binchaxìn‑le̱ Niná.
Lìjme kjoa̱ xi sꞌe̱ꞌma xi tsì jcha̱‑le̱
16 »Ni̱ꞌya‑jìn xi ti̱i bꞌétsakjàn‑nè jè lꞌí xi bꞌétꞌa‑í,
kꞌoa̱ ni̱ ya̱‑jìn síkꞌéjnangi na̱chan,
to̱saà ngꞌa síkꞌéjna jmé‑ni nga ma-isen‑nile̱ jè xi faꞌasꞌen ya̱ ndꞌia.
17 Nga̱ tsìjme xi ꞌma tjín xi tsì sꞌe̱jnasòn‑tsen;
kꞌoa̱ ni̱jme‑jìn xi tíjnaꞌma xi tsì jcha̱‑le̱ kꞌoa̱ xi tsì jcha̱sòn‑tsen‑le̱.
18 Ti̱koìndao̱o yao‑no josꞌìn binchaño;
nga̱ to̱ꞌya‑ni xi tjín‑le̱,
kꞌoa̱i sa‑le̱;
kꞌoa̱ to̱ꞌya‑ni xi tsìn‑le̱,
saꞌnda jmè‑ni xi síkꞌaitsjen nga tsꞌe̱,
to̱sa̱a tjóꞌa‑le̱».
ꞌYá‑ni xi ñaki ndsꞌe̱ kao̱ na̱‑le̱ Jesús
19 Kꞌia̱ jè na̱‑le̱ kao̱ ngatsꞌi ndsꞌe̱ Jesús jaꞌaikòn‑le̱;
to̱nga lìkoi koan kichònchrꞌoè nga̱ nkjìn chjo̱ta̱ tjiókao̱ Jesús.
20 Kꞌoa̱ kinìkinchrꞌoé,
tsakꞌìn‑le̱:
—Jè na̱‑li̱ kao̱ ndsꞌai tjió nditsin ján,
kꞌoa̱ meè‑le̱ nga skoe̱‑lì.
21 Kꞌia̱ kinchja̱ Jesús kitsò‑le̱:
—Jè na̱‑na̱ kꞌoa̱ kao̱ jè ndsꞌe,
jè‑ní xi nchrꞌoé én‑le̱ Niná,
kꞌoa̱ síkitjosòn.
Kꞌia̱ nga Jesús kisikꞌéjnajyo ntjao̱‑nꞌión
22 Kꞌoa̱koan jngo ni̱chrjin nga Jesús jaꞌasꞌen jngo chitso kao̱ chjo̱ta̱ xi ya̱ kòtꞌayàtꞌa‑le̱,
kꞌoa̱ i̱ kitsò‑le̱:
—Tjián ya̱ xingoa‑nile̱ ndáchikon.
Kꞌoa̱ ki.
23 To̱nga kꞌia̱ nga tjiófìya chitso ya̱ sòn ndáchikon,
tsakajnafè Jesús.
Kꞌoa̱ jngo ntjao̱ xkón kitjo ya̱ sòn ndáchikon;
kꞌoa̱ jaꞌasꞌen‑ndá chitso kꞌoa̱ meè kisꞌen‑ngindá.
24 Kꞌoa̱ jè chjo̱ta̱ xi ya̱ kòtꞌayàtꞌa‑le̱ jaꞌai‑nchrꞌoè kꞌoa̱ kisikjaꞌá‑le̱,
kitsò‑le̱:
—Ji xi bakòyai,
kjitꞌajàn‑nangi ti̱sótjai̱n,
jeè tífìsꞌen‑ngindá‑jián.
Kꞌia̱ nga jaꞌá‑le̱ Jesús,
kinchja̱tikao̱ ntjao̱‑xkón kao̱ jè ndáchikon xi nꞌión tísíkjan;
kꞌoa̱ kisꞌejyò ntjao̱ kao̱ ndáchikon kꞌoa̱ koan‑ndachon‑ni.
25 Kꞌoa̱ Jesús kitsò‑le̱:
—Jñá tíjna jè kjoa̱makjaín‑no.
Kꞌoa̱ nꞌión kitsokjòn,
ñaki to̱kꞌoa̱a koan‑le̱,
kꞌoa̱ kitsò ngañá‑le̱ xínkjín:
—ꞌYá‑ni xo̱kji,
nga saꞌnda jè ntjao̱‑xkón kao̱ jè ndáchikon batéxoma‑nile̱,
kꞌoa̱ síkitjosòn‑le̱.
Jè chjo̱ta̱ xi Gadara tsꞌe̱ xi sén ni̱chrjin xi tsꞌe̱ nai̱i kitjojin‑le̱
26 Kꞌoa̱ Jesús kao̱ chjo̱ta̱ xi kòtꞌayàtꞌa‑le̱ jaꞌai ya̱ nangi jña tsꞌe̱ chjo̱ta̱ Gadara,
xi ya̱ xingoa‑nile̱ ndáchikon Galilea tíjna.
27 Kꞌia̱ nga je jaꞌai Jesús ya̱ jña nangi,
jngo chjo̱ta̱ jaꞌainchrꞌoè xi ya̱ na̱xi̱nandá‑nꞌión Gadara tsꞌe̱,
xi je nꞌión kjoatse nga sén ni̱chrjin xi tsꞌe̱ nai̱i tjiójin‑le̱;
kꞌoa̱ lìkoi ti̱ najño bꞌakjá‑ni,
ni̱ ti̱ ndꞌia‑jìn bꞌèjnaꞌya‑ni,
to̱saà ya̱ bꞌèjna jña tjió ngijao xi sꞌeyoyà kꞌen.
28 Jè chjo̱ta̱ xo̱kji kꞌia̱ nga tsabe Jesús,
nꞌión kiskiꞌndiáxá,
kꞌoa̱ tsakajnajten‑tꞌa nangi ya̱ ngi ndso̱ko̱ Jesús,
nꞌión kinchja̱,
kitsò:
—Jmé xi tjín‑lì xi kao̱ an,
ji Jesús ꞌNdí‑le̱ Niná Xi Nꞌión Ngꞌa Tíjna.
Bꞌetsꞌoaà‑lè alì kjoa̱ñꞌain‑jìn bꞌaì‑naí.
29 (Nga̱ Jesús tíbꞌénè‑le̱ jè sén ni̱chrjin xi tsì nda nga kàtabitjojin‑nile̱ chjo̱ta̱ xo̱kji,
nga̱ je kjoatse nga tíbatéxoma‑le̱;
ni̱nga nꞌó ki̱cha̱ tàja sꞌe̱tꞌanꞌión‑ni ntsja kao̱ ndso̱ko̱,
síxkoa̱a,
kꞌoa̱ jè sén ni̱chrjin xi tsꞌe̱ nai̱i fìkao̱ ya̱ ꞌnde tꞌaxìn‑tꞌa).
30 Kꞌoa̱ Jesús kiskònangi‑le̱,
kitsò‑le̱:
—Jóꞌmì‑lì.
Kꞌoa̱ jè kitsò:
—Legión ꞌmì‑na.
Nga̱ nkjìn sén ni̱chrjin xi tsꞌe̱ nai̱i jaꞌasꞌejin‑le̱.
31 Kꞌoa̱ ngatsꞌi sén ni̱chrjin xi tsꞌe̱ nai̱i tsakꞌétsꞌoa‑le̱ Jesús nga tsì tsà ya̱ ꞌnde kjoa̱ñꞌain kàtasíkasén.
32 Kꞌoa̱ ya̱ tjióma jngo jtín chi̱nga̱ xi nꞌión nkjìn ma xi ya̱ tjiókjèn ya̱ tꞌa nindo;
kꞌoa̱ jè sén ni̱chrjin xi tsꞌe̱ nai̱i tsakꞌétsꞌoa‑le̱ Jesús nga kàtatsjoáꞌnde‑le̱ nga ya̱ kjoa̱ꞌasꞌenjin‑le̱ chi̱nga̱ xi ya̱ tjióma;
kꞌoa̱ jè kitsjoaꞌndè‑le̱.
33 Kꞌoa̱ ngatsꞌi sén ni̱chrjin xi tsꞌe̱ nai̱i,
xi tsitjojin‑nile̱ chjo̱ta̱ xo̱kji,
ya̱ jaꞌasꞌenjin‑le̱ ngatsꞌi chi̱nga̱;
kꞌoa̱ ngatsꞌi kitòka kꞌoa̱ kitsaojen‑tjòn ya̱ na̱xi̱ saꞌnda ya̱ jin‑ndáchikon,
kꞌoa̱ ya̱ kꞌenjin‑ndá.
34 Kꞌoa̱ jè chjo̱ta̱ xi tjiókoꞌnda chi̱nga̱,
kꞌia̱ nga tsabe jme xi koan,
tsakanga,
kꞌoa̱ nga tjiófì ya̱ na̱xi̱nandá‑nꞌión tjiótsòya jme xi koan,
kao̱ ya̱ ꞌnde jña kjio choa ndꞌia.
35 Kꞌoa̱ jè chjo̱ta̱ xi ya̱ tsꞌe̱ kitjokòtsen jme xi koan;
kꞌoa̱ jaꞌainchrꞌoè Jesús,
kꞌoa̱ tsabe jè chjo̱ta̱ xi nꞌión nkjìn sén ni̱chrjin xi tsꞌe̱ nai̱i kitjojin‑nile̱,
nga tíjna ngi ndso̱ko̱ Jesús,
nga je yꞌakjá‑ni najño,
kꞌoa̱ nga nda tjín kon;
kꞌoa̱ jè chjo̱ta̱ xi ya̱ tsꞌe̱ kitsokjòn.
36 Kꞌoa̱ jè xi tsabe,
tsakꞌé‑le̱ na̱jmí josꞌìn nga kitjontjaì jè chjo̱ta̱ xi sén ni̱chrjin xi tsꞌe̱ nai̱i tsakatiòjin‑le̱.
37 Kꞌia̱ ngatsꞌi chjo̱ta̱ xi ya̱ tsꞌe̱ jngotjondai‑le̱ na̱xi̱nandá‑nꞌión Gadara tsakꞌétsꞌoa‑le̱ Jesús nga kàtafì‑ni,
nga̱ nꞌión tjiótsokjón.
Kꞌia̱ Jesús kao̱ chjo̱ta̱ xi kòtꞌayàtꞌa‑le̱ jaꞌasꞌen ya̱ chitso nga je tjiófì‑ni.
38 Kꞌoa̱ jè chjo̱ta̱ xi nꞌión nkjìn sén ni̱chrjin xi tsꞌe̱ nai̱i kitjojin‑le̱,
tsakꞌétsꞌoa‑le̱ Jesús nga kàtatsjoáꞌnde‑le̱ nga ya̱ kꞌoámjen‑kao̱;
to̱nga Jesús kisixan‑tꞌa kitsò‑le̱:
39 —Tꞌin ngìndia‑ni ndꞌia‑li̱,
kꞌoa̱ siyai jókji tse kjoa̱xkón xi kàsꞌín Niná xi tꞌatsi̱.
Kꞌoa̱ jè,
ki,
kisòn‑kao̱ én ya̱ na̱xi̱nandá‑nꞌión jókji tse kjoa̱xkón xi kisꞌin Jesús xi tꞌatsꞌe̱.
Jè tsòti‑le̱ Jairo, kao̱ chjo̱on xi najño‑le̱ Jesús kisikao̱
40 Kꞌia̱nga jaꞌai ngìndia‑ni Jesús ya̱ ꞌnde Galilea,
ngatsꞌi chjo̱ta̱‑nkjìn kao̱o kjoa̱tsjoa kikꞌáya‑ni;
nga̱ ngatsꞌi tjiókoyaà‑le̱.
41 Kꞌoa̱ to̱ i̱i koan jaꞌai jngo chjo̱ta̱ xi Jairo ꞌmì,
jè xi chjo̱ta̱ títjòn‑le̱ ya̱ ndꞌia jña maxkia̱ xo̱n‑le̱ Niná,
kꞌoa̱ tsakajnajten‑tꞌa nangi ya̱ ngi ndso̱ko̱ Jesús,
tsakꞌétsꞌoa‑le̱ nga kàtafìkon‑le̱ ya̱ ndꞌia‑le̱;
42 nga̱ jeè meè mꞌen tsòti‑le̱ xi to̱jngo ma‑ni,
xi tejaò‑la̱le̱ nó.
Kꞌia̱nga tífì,
jè chjo̱ta̱‑nkjìn tjióbꞌéꞌnchò‑nꞌión kao̱‑ni Jesús.
43 To̱nga jngo chjo̱on xi je tejaò nó tífa‑á kjoa̱ñꞌain nga njín tíxìjten‑le̱,
kꞌoa̱ nga kisikjeya ngayije jme xi tjín-le̱ nga to̱ chi̱jne̱xki tsakꞌéchjí-le̱,
kꞌoa̱ ni̱jngo‑jìn xi koan‑le̱ kisindaya,
44 jaꞌaikasèn‑tꞌa chrian‑le̱ ya̱ jto̱n yátsꞌi̱n kꞌoa̱ kisikao̱ tjòn‑le̱ najño‑le̱ Jesús;
kꞌoa̱ ti̱ꞌa kꞌia̱ koan‑xa̱n‑nile̱ njín xi tíxìjten‑le̱.
45 Kꞌia̱ Jesús kitsò:
—ꞌYá‑ni xi an kàsíkao̱‑na.
Kꞌoa̱ ngatsꞌi kitsò nga ni̱jngo‑jìn xi jè kisikao̱,
kꞌia̱ kitsò Pedro kao̱ xi ya̱ ñatje̱n tjió:
—Ji xi bakòyai,
jè chjo̱ta̱‑nkjìn bꞌéꞌnchònꞌión‑lì kꞌoa̱ kanítsjá‑lì,
kꞌoa̱ ji si:
“ꞌYá‑ni xi kàsíkao̱‑na”.
46 To̱nga Jesús kitsò:
—Tjín xi kàsíkao̱‑na;
nga̱ tseèn kàma‑na nga nganꞌión kàbitjojin yao‑na̱.
47 Kꞌia̱ nga jè chjo̱on tsabe nga tsì kisꞌeꞌma jme xi kisꞌin,
tíbꞌatsékao̱‑ni nga jaꞌai,
kꞌoa̱ tsakajnajten‑tꞌa nangi ya̱ ngi ndso̱ko̱ Jesús,
kꞌoa̱ kitsòya‑le̱ ya̱ ngixko̱n ngatsꞌi chjo̱ta̱‑nkjìn jmé kjoa̱‑ni nga najño‑le̱ kisikao̱‑ni,
kꞌoa̱ jókoan‑ni nga ti̱ꞌa koan‑ndaya‑ni.
48 Kꞌoa̱ Jesús kitsò‑le̱:
—ꞌNdí chjo̱on,
jé kjoa̱makjaín‑li̱ kàbꞌasjentjaì‑lì;
nchꞌán tꞌin‑ni.
49 To̱jo tínchja̱a Jesús,
nga jaꞌai‑ni ya̱ ndꞌia‑le̱ Jairo jngo chjo̱ta̱ xi jaꞌai tsò‑le̱:
—Jè tsòti‑li̱ jeè kàmꞌen,
alì jè‑jìn xi bakóya ti̱ nìsi‑nilai̱.
50 Kꞌia̱nga kinchrꞌoé Jesús,
kitsò‑le̱ Jairo:
—Alì bijkon‑jìn;
to̱ kàtamakjaín‑lì,
kꞌoa̱ koa̱n‑ndayà tsòti‑li̱.
51 Kꞌia̱ nga jaꞌasꞌen Jesús ya̱ ndꞌia‑le̱ Jairo,
lìꞌya xi kitsjoaꞌndè‑le̱ nga jaꞌasꞌen‑kao̱,
to̱jè Pedro,
Jacobo,
Juan,
kao̱ nꞌai‑le̱ kao̱ na̱‑le̱ tsòti.
52 Kꞌoa̱ ngatsꞌi chjo̱ta̱ tjiókjiꞌndiá kꞌoa̱ nꞌión tjiósíba xi tꞌatsꞌe̱ tsòti.
To̱nga Jesús kitsò:
—Alì chjíꞌndiá‑jiòn;
alì tsà kijnakꞌen‑jìn,
to̱ kijnafè tsòti.
53 Kꞌoa̱ jè chjo̱ta̱ to̱ tsakijnòkeè Jesús,
nga̱ beè nga je kijnakꞌen jè tsòti.
54 To̱nga Jesús kiskoé ntsja tsòti,
nꞌión kinchja̱,
kitsò:
—Tsòti,
ti̱sótjai̱n.