—Bakìn‑le̱ nga koi̱se̱n‑koai̱ xi tꞌatsꞌe̱ kjoa̱ jè,

5 nga̱ tsjoakeè‑ná ñá xi chjo̱ta̱ judío maà,

kꞌoa̱ tsakꞌénda jngo‑ná ndꞌia jña maxkia̱ xo̱n‑le̱ Niná.

6 Kꞌoa̱ Jesús kikao̱ chjo̱ta̱ jchínga xo̱kjoan.

To̱nga kꞌia̱ nga je tsì ti̱ kjin tjió‑nile̱ ndꞌia,

jè chjo̱ta̱ kjoa̱jchán ngajko̱ kisikasén‑kon kꞌa‑le̱ mìyo̱‑le̱,

nga i̱ kàtatsò‑le̱ Jesús:

«Nai,

alì nìkjájon‑jìn‑lai̱ yao‑li̱,

nga̱ lìkoi bakìn‑na an nga ndꞌia‑na̱ koi̱tjásꞌai̱n;

7 kꞌoa̱ koiì kꞌoa̱kàsꞌin‑ña nga ni̱ koijìn‑là bakìn‑na nga an soa kàfa‑ai̱kon‑lè;

to̱nga tꞌai̱ én‑lì,

kꞌoa̱ jè cho̱ꞌnda‑na̱ koa̱n‑ndaya‑nì.

8 Nga̱ an kꞌoa̱ati̱ tjín‑na xi batéxoma‑na,

kꞌoa̱ati̱ tjín‑na chjo̱ta̱ kjoa̱jchán xi an batèxoma‑le̱;

kꞌia̱ nga jngo xi xin‑le̱:

“Tꞌin,”

fì‑ní;

kꞌoa̱ tsà xi ngìjngo xin‑le̱:

“Nchroaí,”

nchroá‑ní;

kꞌoa̱ jè cho̱ꞌnda‑na̱ nga xin‑le̱:

“Kꞌoa̱‑tꞌiai̱n jè,”

kꞌoa̱asꞌín».

9 Kꞌia̱ nga kinchrꞌoé én xo̱ tsò,

Jesús ñaki to̱kꞌoa̱a koan‑le̱ xi tꞌatsꞌe̱ chjo̱ta̱ kjoa̱jchán ngajko̱ xi jngo ciento̱ chjo̱ta̱ kjoa̱jchán kjinè ntsja,

kisikꞌófaya kitsò‑le̱ chjo̱ta̱‑nkjìn xi tje̱n‑ngi‑le̱:

—Kꞌoa̱axin‑no nga ni̱ ya̱ jìn jin‑le̱ chjo̱ta̱ judío tísokó‑na chjo̱ta̱ xi kꞌoa̱sꞌìn nꞌión nda makjaín‑le̱.

10 Kꞌoa̱ kꞌia̱ nga jaꞌai ngìndia‑ni ya̱ ndꞌia jè chjo̱ta̱ xi kinìkasén,

tsabe nga je koan‑ndaya jè cho̱ꞌnda xi chꞌin tjín‑le̱ tsàkai.

11 Kꞌia̱nga koanskan‑ni,

nga tífì Jesús ya̱ na̱xi̱nandá‑nꞌión Naín,

nkjìn ma chjo̱ta̱ xi ya̱ kòtꞌayatꞌa‑le̱ xi ya̱ tje̱n‑kao̱,

kꞌoa̱ kao̱ chjo̱ta̱‑nkjìn.

12 Kꞌia̱ nga je tjiófaꞌasꞌen ya̱ na̱xi̱nandá‑nꞌión,

tsabe nga jngo kꞌen kꞌia̱ tífìsꞌeñen,

ti‑le̱ jngo chjo̱on kꞌàn xi to̱ jngo ma ti‑le̱;

kꞌoa̱ nꞌión nkjìn chjo̱ta̱ tje̱n‑kao̱ xi ya̱ tsꞌe̱ na̱xi̱nandá‑nꞌión.

13 Kꞌoa̱ kꞌia̱ nga jè Nai‑ná tsabe ꞌndí chjo̱on kꞌàn,

koanma̱ke,

kitsò‑le̱:

—Alì chjíꞌndiá‑jìn.

14 Kꞌoa̱ tsakasèn‑tꞌachrian‑le̱,

kisikao̱ jè kàxa̱‑le̱ kꞌen,

kꞌoa̱ jè xi yꞌangꞌangi tsakincha.

Kꞌoa̱ Jesús kitsò:

—Ti,

jiì xi xin‑lè,

ti̱sótjai̱n.

15 Kꞌia̱ tsakꞌèjna kìxi̱ jè ti xi kijnakꞌen tsàkai,

kꞌoa̱ kitjo‑nchja̱.

Kꞌoa̱ kꞌia̱ Jesús kisintsja na̱‑le̱.

16 Kꞌoa̱ ngatsꞌi chjo̱ta̱ kitsokjòn,

kꞌoa̱ tsakꞌasjejeya Niná,

kitsò:

—Jngo chjo̱ta̱ xi tse nganꞌión tjín‑le̱ xi nchja̱ya ngajao‑le̱ Niná kàbisótje̱njin‑ná.

Kꞌoa̱ kitsò sa:

—Niná kàfaꞌaikòn‑le̱ na̱xi̱nandá‑le̱.

17 Kꞌoa̱ kisòn én xi tꞌatsꞌe̱ Jesús ngakijndà ꞌnde Judea,

kao̱ ngakijndà ꞌnde xi tjió ya̱ jngotjondai‑le̱.

18 Jè chjo̱ta̱ xi ya̱ kòtꞌayàtꞌa‑le̱ Juan kitsòya‑le̱ ngayije kjoa̱ xi tísꞌín Jesús.

Kꞌoa̱ Juan jaò chjo̱ta̱ xi ya̱ kòtꞌayàtꞌa‑le̱ kinchja̱‑le̱,

19 kꞌoa̱ kisikasén‑kon‑le̱ Jesús,

jmé‑ni nga skónangi‑nile̱:

—A ji‑ní xi tjín‑ni nga kjoa̱ꞌaí xi tꞌatsꞌe̱ Niná,

axo̱ chóya‑sa ngìjngo‑lai̱ji̱n xi kja̱ꞌaí.

20 Kꞌia̱ nga jè chjo̱ta̱ jaꞌaikòn‑le̱ Jesús,

kitsò‑le̱:

—Jé Juan xi Kanísꞌen‑ngindá kàsíkasén‑naji̱n nga kjoàꞌai̱chon‑laìji̱n,

jmé‑ni nga chjónangini‑laìji̱n:

“A ji‑ní xi tjín‑ni nga kjoa̱ꞌaí xi tꞌatsꞌe̱ Niná,

axo̱ chóyà‑sa ngìjngo‑lai̱ji̱n xi kja̱ꞌaí”.

21 Nga ti̱kꞌia̱‑ni nꞌión nkjìn xi kisindaya xi chꞌin tjín‑le̱ kꞌoa̱ xi tse kjoa̱ñꞌain tjiófaꞌá,

kao̱ xi sén ni̱chrjin xi chꞌao̱kjoa̱n tjiójin‑le̱,

kꞌoa̱ nkjìn chjo̱ta̱ xi xka̱ kiskoxꞌángi xko̱n.

22 Kꞌoa̱ kinchja̱ Jesús,

kitsò‑le̱:

—Tangión,

tꞌìnya‑lao̱o Juan jè kjoa̱ xi kàꞌyao kao̱ xi kànòꞌyaò:

jè xi xka̱ matseèn‑le̱,

jè xi chi̱ꞌngé maà fì‑ni,

jè xi jtsé biꞌndojon kjoan kjimandayaà,

jè xi jtaya nchrꞌoé,^a

jè kꞌen tínìkjaꞌáyaà‑le̱,

kꞌoa̱ jè chjo̱ta̱ yo̱ma̱ tínòkjoa̱yajiìn‑le̱ én‑nda;^b

23 kꞌoa̱ jó to̱nda‑le̱ ya̱ ngixko̱n Niná jè chjo̱ta̱ xi tsì tsà to̱ tꞌatsꞌa̱n saténgi.

24 Kꞌia̱nga je ki‑ni jè chjo̱ta̱ xi Juan kisikasén,

kꞌia̱ tsakꞌétsꞌia̱kao̱ nga kitsò‑le̱ chjo̱ta̱‑nkjìn xi tꞌatsꞌe̱ Juan:

«Jmé‑ni xi kìtjo̱ chòtsen‑lao̱o ya̱ ꞌnde tꞌaxìn‑tꞌa.

A jngoò yána̱xo̱ xi matìnya kꞌia̱nga ntjao̱ fa‑a.

25 To̱nga jmé xi kìtjo̱ chòtsen‑lao̱o.

A jngoò chjo̱ta̱ xi yꞌakjá najño xi nꞌión nda kjoan.

Ndaà ꞌyao nga jè chjo̱ta̱ xi na̱ská na̱kjoan najño bꞌakjá kꞌoa̱ xi nꞌión nda sꞌìn tjió,

ya̱a ndꞌia‑le̱ chjo̱ta̱xá ngajko̱ tjió.

26 To̱nga jmé xi kìtjo̱ chòtsen‑lao̱o.

A jngo chjo̱ta̱ xi nchja̱ya ngajao‑le̱ Niná.

Jaon,

kꞌoa̱axin‑no,

nga tsꞌato‑le̱ jngo chjo̱ta̱ xi nchja̱ya ngajao‑le̱ Niná.

27 Tꞌatsꞌe̱e Juan xi tjítꞌa ya̱ Xo̱n‑le̱ Niná jña tsò:

29 Kꞌoa̱ ngatsꞌi chjo̱ta̱ na̱xi̱nandá kao̱ chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma kꞌia̱ nga kinchrꞌoé‑le̱ Juan,

kꞌoa̱kitsò nga kìxi̱ tjín ndia̱a‑le̱ Niná kꞌia̱ nga Juan kiskanìsꞌen‑ngindá.

30 To̱nga chjo̱ta̱ fariseo kao̱ chjo̱ta̱ xi síkꞌatoya jme xi tsòya‑ni kjoa̱téxoma‑le̱ Niná xi kiski Moisés tsakꞌasjengi jme xi Niná me‑le̱ xi tꞌatsꞌe̱,

koan‑kai‑le̱ nga Juan kiskanìsꞌen‑ngindá.

31 Kꞌia̱ kitsò jè Nai‑ná:

—ꞌYá‑ni xi singósòn‑koa̱ jè chjo̱ta̱ xi tjín ndꞌai̱,

kꞌoa̱ jmé‑ni xi mangósòn‑kao̱.

32 Ya̱a mangósòn jè xti xi ya̱ batiò ya̱ jin ndi̱tsi̱n,

xi nchja̱‑le̱ xínkjín kꞌoa̱ tsò:

36 Jngo chjo̱ta̱ fariseo xi Simón ꞌmì tsakꞌétsꞌoa‑le̱ Jesús nga ya̱ koa̱kje̱n‑kao̱.

Kꞌia̱ nga jaꞌasꞌen Jesús ya̱ ndꞌia‑le̱ chjo̱ta̱ fariseo,

tsakꞌèjnatꞌa yámìxa̱.

37 Kꞌoa̱ kꞌia̱ jngo chjo̱on xi ya̱ tsꞌe̱ na̱xi̱nandá‑nꞌión,

xi chjo̱on‑jé,

kꞌia̱ nga kisꞌejin‑le̱ nga Jesús tíjnatꞌa yámìxa̱ ya̱ ndꞌia‑le̱ jè chjo̱ta̱ fariseo,

kichokao̱ jngo lamìta̱ xi la̱jao̱ koan‑nda‑ni xi sìti̱ chjí xi na̱ská na̱nje̱n tjiá‑le̱;

38 kꞌoa̱ kꞌia̱ nga tsakasèn ya̱ jto̱n yátsꞌi̱n Jesús,

tsakꞌèjnatꞌa nangi ya̱ tꞌa ndso̱ko̱,

tíkjiꞌndiá kꞌoa̱ ndáxko̱n ya̱ tísíkjaijon ndso̱ko̱ Jesús,

kꞌoa̱ tísíxìjon‑ni kao̱ ntsja̱jko̱;

kꞌoa̱ jngotjò ngosá tíbꞌétꞌatsꞌoà‑le̱ ndso̱ko̱,

kꞌoa̱ kitsjòjon sìti̱ chjí xi na̱ská na̱nje̱n.

39 Kꞌia̱ nga tsabe jè chjo̱ta̱ fariseo xi xá kinchja̱‑nile̱ Jesús,

kitsò kjoa̱faꞌaisjen‑le̱:

«Jè chjo̱ta̱ xo̱kji,

tsà kjoa̱kìxi̱ nga nchja̱ya ngajao‑le̱ Niná,

tíbe‑jìn ꞌyá‑ni kꞌoa̱ jmé xá xi sꞌín jè chjo̱on xi tísíkao̱,

nga chjo̱on‑jé».

40 Kꞌia̱ kinchja̱ Jesús kitsò‑le̱:

—Simón,

jngo kjoa̱ xi xín‑lè.

Kꞌoa̱ jè Simón kitsò:

—Kꞌoa̱si ji xi bakòyai.

41 Jesús kitsò‑le̱:

—Jngo chjo̱ta̱ xi tao̱n síkìnya,

jaò koan chjo̱ta̱ xi kitsjen‑le̱ tao̱n‑le̱:

Jngo xi aòn ciento̱ chjí ni̱chrjin‑le̱ cho̱ꞌnda tjín‑ni xi kitsjen‑le̱,

kꞌoa̱ xi ngìjngo ñachàn‑te chjí ni̱chrjin‑le̱ cho̱ꞌnda tjín‑ni xi kitsjen‑le̱;

42 kꞌoa̱ nga tsìn‑le̱ chjo̱ta̱ xo̱kjoan josꞌìn si̱ijndà‑ni jotjín kitje̱n‑le̱,

kisichatꞌa‑le̱ ngajaò.

Kꞌoa̱tꞌìn‑naì,

ꞌyá‑ni ngajaò xi ngìsa̱ nꞌión koa̱n‑tsjoake chjo̱ta̱ xi tao̱n síkìnya.

43 Kinchja̱ Simón kitsò:

—Kꞌoa̱asꞌìn sikꞌaitsjen an nga jè xi ngìsa̱ tse kisichatꞌa‑le̱.

Kꞌoa̱ Jesús kitsò‑le̱:

—Kìxi̱i tjín jo kàsi.

44 Kꞌia̱ Jesús kiskòtsen‑le̱ chjo̱on‑jé,

kitsò‑le̱ Simón:

—Simón,

a tichòtsen‑lai̱ jè chjo̱on xo̱kji.

Kꞌia̱ nga kàfàꞌa̱sꞌe̱n ndꞌia‑li̱,

lìkoi kàbꞌaì‑naí nandá xi kàbanejòn‑nia ndso̱koa;

to̱nga jè chjo̱on kao̱o ndáxko̱n tíbanèjon‑ni ndso̱koa,

kꞌoa̱ kao̱o ntsja̱jko̱ tísíxìjon‑ni.

45 Lìkoi kabꞌètꞌatsꞌoà‑naí;

to̱nga jè jo saꞌnda nga kàfaꞌa̱sꞌe̱n ndꞌia‑li̱,

tíbꞌétꞌatsꞌoà ndso̱koa.

46 Lìkoi kànòjoin jkoa sìti̱;

to̱nga jè chjo̱on xo̱kji,

kàtsjòjoòn ndso̱koa sìti̱ chjí xi na̱ská‑nje̱n.

47 Koiì kꞌoa̱xin‑nilè nga ngayije jé xi tjín‑le̱ kàchatꞌà‑le̱,

nga̱ nꞌión tse kjoa̱tsjoacha kàbakó;

to̱nga jè xi choa jé chatꞌa‑le̱ choaà kjoa̱tsjoacha bakó.

48 Kꞌia̱ Jesús kitsò‑le̱ jè chjo̱on:

—Jeè kàchatꞌa‑lì jé‑li̱.

49 Kꞌoa̱ jè xi ya̱ ñatje̱n tjiótꞌakao̱ yámìxa̱,

tsakꞌétsꞌia̱kao̱ nga kꞌoa̱kitsò‑le̱ xínkjín:

—ꞌYá‑ni xo̱kji nga kꞌoa̱ti̱ síchatꞌa‑ni jé.

50 To̱nga Jesús kitsò‑le̱ chjo̱on:

—Jè kjoa̱makjaín‑li̱ kàbꞌasjentjaì‑lì,

nchꞌán tꞌin‑ni.