Juan xi Kanísꞌen‑ngindá kisikasénkon‑le̱ Jesús chjo̱ta̱
11
Kꞌia̱ nga Jesús je kꞌoa̱kitsò‑le̱ jme xi tjínè‑le̱ nga sꞌi̱in jè chjo̱ta̱‑le̱ xi tejaò xi xá kiskoéjin‑ni xi ya̱ kòtꞌayàtꞌa‑le̱,
ki‑ni ya̱,
nga kikakóya kꞌoa̱ nga kinchja̱ya ngakijndà na̱xi̱nandá‑nꞌión xi ya̱ nchja̱‑ni ꞌnde Galilea.
2 Kꞌia̱ nga tíjnaꞌya ndo̱yá Juan xi kanìsꞌen‑ngindá,
kinchrꞌoé ngayije kjoa̱ xi tísꞌín Jè Xi Niná Kisikasén,
jaò chjo̱ta̱ xi ya̱ kòtꞌayàtꞌa‑le̱ kisikasén‑kon‑le̱,
3 jmé‑ni nga skónangi‑nile̱ Jesús én xi tsò:
—A ji‑ní jè xi tjín‑ni nga kjoa̱ꞌaí xi tꞌatsꞌe̱ Niná,
axo̱ chóyà‑sa ngìjngo‑lai̱ji̱n xi kja̱ꞌaí.
4 Kinchja̱ Jesús,
kitsò‑le̱:
—Tangión,
kꞌoa̱ tꞌìnya‑lao̱o Juan jè kjoa̱ xi tinoꞌyaò kao̱ xi tiꞌyao.
5 Jè chjo̱ta̱ xi xka̱ kjoan matseèn‑le̱,
jè xi chi̱ꞌngé bꞌèma,
jè xi jtsé biꞌndojon kjoan kjimandayaà,
jè xi jtaya nchrꞌoé,a
jè kꞌen tínìkjaꞌáyaà‑le̱,
kꞌoa̱ jè chjo̱ta̱ yo̱ma̱ tínòkjoa̱yajiìn‑le̱ jè én nda;b
6 kꞌoa̱ jó to̱nda‑le̱ ya̱ ngixko̱n Niná jè chjo̱ta̱ xi tsì tsà to̱ tꞌatsꞌa̱n saténgi.
7 Kꞌia̱ nga tjiófì‑ni jè chjo̱ta̱ xi ya̱ kòtꞌayàtꞌa‑le̱ Juan,
Jesús tsakꞌétsꞌia̱kao̱ nga kitsò‑le̱ chjo̱ta̱ xi tꞌatsꞌe̱ Juan:
«Jmé‑ni xi kìtjo̱ chòtsen‑lao̱o ya̱ ꞌnde tꞌaxìn‑tꞌa.
A jngo yá na̱xo̱ xi matìnya kꞌia̱ nga ntjao̱ faꞌa.
8 Axo̱ jmé xi kìtjo̱ chòtsen‑lao̱o.
A jngo chjo̱ta̱ xi nꞌión nda kjoan najño yꞌakjá.
Koe̱e‑ni,
ya̱a ndꞌia‑le̱ ngatsꞌi chjo̱ta̱xá ngajko̱ tjió jè chjo̱ta̱ xi nꞌión nda kjoan najño yꞌakjá.
9 To̱nga,
jmé xi kìtjo̱ chòtsen‑lao̱o.
A jngo chjo̱ta̱ xi nchja̱ya ngajao‑le̱ Niná.
Jaon,
kꞌoa̱axin‑no,
kꞌoa̱ tsꞌato‑nile̱ jngo chjo̱ta̱ xi kinchja̱ya ngajao‑le̱ Niná.
10 Nga̱ tꞌatsꞌe̱e Juan xi tjítꞌa ya̱ xo̱n én‑le̱ Niná jña tsò:
»“Koe̱e‑ni,
an sikasén títjòn‑lè jè cho̱ꞌnda‑na̱ xi koai̱kao̱ én,
Jè xi koa̱anda títjòn‑lì ndia̱a‑li̱”.c
11 »Ñaki kìxi̱i xi xin‑no:
Nga ni̱sajngo‑jìn chjo̱ta̱ tsin i̱ soꞌnde xi ngìsa̱ tíjna títjòn joni Juan xi Kanísꞌen-ngindá;
to̱nga jè xi ngìsa̱ nangi tíjna ya̱ jña batéxoma jè xi tíjna ya̱ ngꞌajmi,
ngìsa̱a títjòn tíjna ti̱kꞌoa̱‑ni tsà jè Juan.
12 Saꞌnda ni̱chrjin nga tsakꞌétsꞌia̱kao̱ nga kinchja̱ya Juan xi Kanísꞌen-ngindá saꞌnda ndꞌai̱,
ya̱ jña batéxoma jè xi tíjna ya̱ ngꞌajmi kao̱o nganꞌión tífìsòn,
kꞌoa̱ jè chjo̱ta̱ xi tjín‑le̱ nganꞌión tjióbásjai nga kjoa̱nꞌión kjoa̱ꞌasen.
13 Nga̱ ngatsꞌi chjo̱ta̱ xi kinchja̱ya ngajao‑le̱ Niná kao̱ jè kjoa̱téxoma xi kiski Moisés,
kinchja̱ya ngajaoò‑le̱ Niná saꞌnda Juan.
14 Kꞌoa̱ tsà me‑no nga koa̱n‑kjaín‑no én jè,
Juan jé‑ní Elías xi tjín‑ni nga kjoa̱ꞌaí.d
15 Jè xi tjín chrjoa̱‑ño xi nchrꞌoé‑ni,
nda kàtabasén‑ño.
16 »To̱nga,
ꞌyá xi singósòn‑koa̱ jè chjo̱ta̱ xi tjín ndꞌai̱.
Ya̱a mangósòn jè xti xi ya̱ batiò ya̱ jin ndi̱tsi̱n,
xi nchja̱‑le̱ xínkjín,
17 tsò‑le̱:
»“Kinìkjane‑laìji̱n xi na̱skátsò,
Kꞌoa̱ lìkoi kichaoò;
Kijnda‑ná‑laìji̱n xi tsꞌe̱ kjoa̱ba,
Kꞌoa̱ lìkoi kichiꞌndiaó”.
18 »Nga̱ jaꞌai Juan xi Kanísꞌen-ngindá,
xi ni̱ tsakjèn‑jìn nio̱xtìla̱ ni̱ ndá totseè jchá‑jìn tsakꞌi,
kꞌoa̱ bixón:
“Sén ni̱chrjin xi tsꞌe̱ nai̱i tíjnajin‑le̱”.
19 Kꞌoa̱ jaꞌai jè ꞌNdí‑le̱ Chjo̱ta̱,
xi kjèn kꞌoa̱ ꞌbi,
kꞌoa̱ bixón jòn:
“Koe̱e‑ni chjo̱ta̱ xo̱kji to̱maàkji kjèn kꞌoa̱ ꞌbi ndá totseè jchá,
nꞌión símìyo̱ chjo̱ta̱jé kao̱ chjo̱ta̱ xi tao̱n síkꞌéchjí xi tꞌatsꞌe̱ chjo̱ta̱xá títjòn‑le̱ Roma”.
To̱nga jè chjo̱ta̱ xi kòtsen,
beè nga nda tjín kjoa̱nkjìn‑tokòn,
kꞌia̱ nga be josꞌìn fìkao̱ kjoa̱bijnachon‑le̱ chjo̱ta̱ xi fìtꞌa‑le̱ kjoa̱nkjìn‑tokòn».
Kjoa̱ñꞌain xi kꞌoai̱‑le̱ ngatsꞌi na̱xi̱nandá‑nꞌión xi tsì kisikꞌantjaìya kjoa̱faꞌaitsjen‑le̱
20 Kꞌia̱ Jesús tsakꞌétsꞌia̱kao̱ nga kinchja̱tikao̱ jè chjo̱ta̱ na̱xi̱nandá,
jña‑ni nga nꞌión nkjìn kjoa̱xkón kisꞌin,
nga̱ tsì kisikꞌantjaìya kjoa̱faꞌaitsjen‑le̱,
kitsò‑le̱:
21 «Ma̱xó‑nilao̱o yao‑no,
jòn chjo̱ta̱ na̱xi̱nandá‑nꞌión xi Corazín tsao̱on.
Ma̱xó‑nilao̱o yao‑no,
jòn chjo̱ta̱ na̱xi̱nandá‑nꞌión xi Betsaida tsao̱on.
Nga̱ tsà ya̱‑làni na̱xi̱nandá‑nꞌión Tiro kao̱ ya̱ na̱xi̱nandá‑nꞌión Sidóne nga kꞌoa̱koan jè kjoa̱xkón xi kjima i̱ tsao̱on,
jeè‑la̱ kjoatse kisikꞌantjaìya kjoa̱faꞌaitsjen‑le̱,
tsakꞌakjá‑la̱ najño naxá kꞌoa̱ tsakꞌéjtenjòn‑la̱ chao‑lꞌí yao‑le̱.
22 Koiì kjoa̱ nga xin‑nino,
ni̱chrjin kꞌia̱ nga Niná si̱ijtsòꞌa ngatsꞌi chjo̱ta̱,
ngìsa̱a choa kjoa̱ñꞌain kꞌoai̱‑le̱ chjo̱ta̱ xi ya̱ tsꞌe̱ Tiro kao̱ Sidón,
ti̱kꞌoa̱‑ni jòn.
23 Kꞌoa̱ jòn chjo̱ta̱ na̱xi̱nandá‑nꞌión Capernaum,
xi saꞌnda ngꞌajmi tsakin‑ngꞌao,
ya̱a saꞌnda jña kijna lꞌí xi tsìkꞌia bitsꞌao koi̱choje̱n‑ngi‑no;f
nga̱ tsà ya̱‑làni na̱xi̱nandá‑nꞌión Sodomag kꞌoa̱koan ngayije kjoa̱xkón xi koan i̱ jin‑li̱,
tíjna‑la̱ tsàkai saꞌnda ndꞌai̱.
24 Koiì kjoa̱ kꞌoa̱xin‑nino,
ni̱chrjin kꞌia̱ nga Niná si̱ijtsòꞌa ngatsꞌi chjo̱ta̱,
ngìsa̱a choa kjoa̱ñꞌain kꞌoai̱‑le̱ na̱xi̱nandá‑nꞌión Sodoma ti̱kꞌoa̱‑ni jòn».
Nchroáchon‑naó kꞌoa̱ an sikatiókjáya‑no
25 Kꞌia̱ nga koi ni̱chrjin,
kinchja̱ Jesús,
kitsò:
«Bꞌasjèjeya‑lè,
Nꞌai,
ji xi Nai‑le̱ ngꞌajmi kao̱ soꞌnde mai,
nga̱ tsakꞌèꞌma‑lai̱ ngayije kjoa̱ xo̱kjoan jè chjo̱ta̱ xi tjín‑le̱ kjoa̱nkjìn‑tokòn kao̱ chjo̱ta̱ xi macho̱ya‑le̱,
kꞌoa̱ jé tsakakòsò‑tsen‑lai̱ jè xi to̱xkia̱ chjo̱ta̱.
26 Jaon,
Nꞌai,
nga̱ kꞌoa̱asꞌìn nda kisasen‑lì.
27 »Ngayije jme xi tjín jé Nꞌai‑na̱ kisintsja‑na;
kꞌoa̱ ni̱ꞌya‑jìn xi be ꞌyá‑ni jè ꞌNdí to̱ jé Nꞌai,
kꞌoa̱ ni̱ꞌya‑jìn xi be ꞌyá‑ni jè Nꞌai,
to̱ jé ꞌNdí,
kꞌoa̱ati̱ koa̱n‑cho̱ya‑le̱ ꞌyá‑ni jè Nꞌai,
ꞌya‑ni xi jè ꞌNdí skoéjin nga si̱icho̱ya‑le̱.
28 »Nchroáchon‑naó ngatsꞌio xi kijtà‑no nga nꞌión tinìxaó kao̱ xi tse chꞌá kichꞌaò,
kꞌoa̱ aàn sikatiókjáya‑no.
29 Ti̱xákao̱‑naó josꞌìn síxá nchra̱ja̱ bꞌénchi nga jngo yá sꞌeyosòn‑le̱ yásin nga síxá ñanga,
kꞌoa̱ chjéngi‑naó,
nga ndꞌé‑nià kꞌoa̱ nangiì tíjna ni̱ma̱‑na̱;
kꞌoa̱ so̱kò‑le̱ kjoa̱nìkjáya ni̱ma̱‑no;h
30 nga̱ jè xi an síxákao̱‑na̱,
choaà ñꞌain ma‑le̱ xá‑na̱,
kꞌoa̱ tja̱a ma‑le̱ chꞌá‑na̱».