5 Jesús kisikasén jè chjo̱ta̱ xo̱kjoan xi tejaò xi xá kiskoéjin‑ni,

kꞌoa̱ kitsòya‑le̱ jme xi tjínè‑le̱ nga sꞌi̱in,

kitsò‑le̱:

«Alì ya̱‑jìn mangín‑nchrꞌoaò jè chjo̱ta̱ xi tsì tsà judío,

kꞌoa̱ ni̱ ya̱‑jìn bitjasꞌao̱on ngakijndà na̱xi̱nandá‑nꞌión xi nchja̱‑ni ꞌnde Samaria,

6 to̱sa̱a ya̱ títjòn tangíchón‑lao̱o jè chjo̱ta̱ xi ntje̱‑le̱ Israel,

xi kicha joni tsà barrè.

7 Kꞌia̱ nga tìmangión ti̱nókjoa̱yao,

kꞌoa̱ tixón:

“Jeè koan‑chrian‑le̱ ni̱chrjin nga kjoa̱ꞌaí katéxoma jè xi tíjna ya̱ ngꞌajmi”.

8 Ti̱ndayao xi chꞌin tjín‑le̱ kao̱ jè xi jtsé biꞌndojon kjima‑le̱,

ti̱kjaꞌáya‑lao̱o xi kjiokꞌèn,

ti̱chonsjejion jè sén ni̱chrjin xi tsí nda;

jè xi to̱ kjoa̱tjaò tìtsjoa‑no kꞌoa̱ati̱ to̱ kjoa̱tjaò tꞌai̱‑nio.

9 Alì tao̱n sinè‑jìn,

ni̱ tao̱n chroa‑jìn,

kꞌoa̱ ni̱jngo jko̱yajìn tao̱n chꞌaò xi kꞌoètꞌanꞌión‑tꞌaò ya̱ kjándiá‑no;

10 ni̱ xijtsa‑jìn chꞌàtje̱n‑ngi‑lao̱o yao‑no,

ni̱ jaò jìn‑la̱ chi̱nga,

ni̱ jténꞌó‑jìn,

kꞌoa̱ ni̱ yánise‑jìn chꞌaò;

nga̱ jè cho̱ꞌnda xi síxá bakìn‑le̱ nga xá‑le̱ koa̱kje̱nya‑ni.

11 »To̱nga to̱jokji na̱xi̱nandá‑nꞌión axo̱ na̱xi̱nandá‑ꞌndí jña koi̱tjásꞌao̱on,

ti̱jnchísjaiyao ꞌya‑ni xi bakìn‑le̱ nga si̱nꞌión‑tꞌao,

kꞌoa̱ ya̱ ti̱yokao̱o jo saꞌnda nga koìtjo̱‑nio.

12 Kꞌoa̱ kꞌia̱ nga koi̱tjásꞌao̱on ya̱ ndꞌia,

ti̱tìꞌndao jè chjo̱ta̱ xi ya̱ tjió.

13 Kꞌoa̱ tsà jè chjo̱ta̱ xi ya̱ tjió ya̱ ndꞌia kꞌoa̱sꞌìn bakìn‑le̱ nga si̱nꞌión‑tꞌao nga ya̱ koi̱yokao̱o,

jè kjoa̱nchꞌán‑no ya̱a kꞌoéjnakao̱;

to̱nga tsà tsì bakìn‑le̱,

jè kjoa̱nchꞌán‑no jòn kꞌoéjnakao̱‑no.

14 Kꞌoa̱ tsà ꞌya‑ni xi tsì skoétjaò‑no,

kꞌoa̱ tsà kai‑le̱ nga koi̱nchrꞌoé én‑no,

tìtjo̱‑nio ya̱ ndꞌia axo̱ ya̱ na̱xi̱nandá‑nꞌión,

kꞌoa̱ tꞌètsaojnao chaoꞌnde‑le̱ ndso̱ko.

15 Ñaki kìxi̱i xi xin‑no,

kꞌia̱ nga koi̱chò ni̱chrjin nga Niná si̱ijtsòꞌa chjo̱ta̱,

ngìsa̱a choa kjoa̱ñꞌain kꞌoai̱‑le̱ chjo̱ta̱ xi ya̱ na̱xi̱nandá‑nꞌión Sodoma tsꞌe̱,

kao̱ xi ya̱ na̱xi̱nandá‑nꞌión Gomorra tsꞌe̱,^a

ti̱kꞌoa̱‑ni jè chjo̱ta̱ na̱xi̱nandá xi tsì skoétjaò‑no.

16 »Koe̱e‑ni,

an tìsikasén‑no joni tsà barrè ya̱ jin‑le̱ tse̱en;

kàtama‑no nga ti̱koìndao̱o yao‑no joni tsà jè ye̱,

kꞌoa̱ to̱xkia̱ ꞌndí chjo̱ta̱ kàtamao joni tsà ni̱se chroa.

17 Kꞌoa̱ ti̱koìnda̱‑lao̱o yao‑no jè chjo̱ta̱,

nga̱ ya̱a ska̱nìtꞌa‑no ya̱ jña tjió jtín xi kjinentsja kjoa̱téxoma‑le̱ chjo̱ta̱ judío,

kꞌoa̱ ya̱ ndꞌia jña maxkia̱ xo̱n‑le̱ Niná koi̱chon‑no chrjoa̱xín;

18 kꞌoa̱ saꞌnda ngixko̱n chjo̱ta̱xá títjòn kao̱ ya̱ ngixko̱n chjo̱ta̱xá ngajko̱ cha̱nìtꞌa‑no xi to̱ tꞌatsꞌe̱ nga an mangín‑tꞌa‑naó,

jmé‑ni nga koi̱nókjoa̱‑nio xi tꞌatsꞌa̱n ya̱ ngixko̱n chjo̱ta̱xá kao̱ ya̱ ngixko̱n chjo̱ta̱ xi tsì tsà judío‑jìn.

19 To̱nga kꞌia̱ nga koi̱chòkao̱tꞌa‑no ya̱,

alì nìkjájon‑jìn‑lao̱o yao‑no jósꞌìn koi̱nókjoa̱o axo̱ jmé‑ni xi koixón;

nga̱ kꞌia̱a kꞌoai̱‑no én xi koi̱nókjoa̱o.

20 Nga̱ tsì tsà jòn‑jiòn xi koi̱nókjoa̱o,

jé Sén Ni̱chrjin‑le̱ Nꞌai‑no xi si̱ikinchja̱‑no.

21 »Jè xi ti̱ ndsꞌe̱‑ni tsjoátꞌa ndsꞌe̱ jmé‑ni nga si̱kꞌen‑ni,

kꞌoa̱ jè xi nꞌai ma koi̱sótje̱n‑nè ti‑le̱;

kꞌoa̱ jè xi xti koai̱nè xijchá‑le̱,

kꞌoa̱ si̱ikꞌen.

22 Kꞌoa̱ koa̱n‑chꞌaokeè‑no ngatsꞌi chjo̱ta̱ xi to̱ tꞌatsꞌa̱n;

to̱nga jè xi chókjoa̱jin‑le̱ saꞌnda nga kjoe̱tꞌa‑ni,

jè‑ní xi koi̱tjontjaì.

23 Kꞌia̱ nga koai̱tje̱n‑ngike‑no chjo̱ta̱ i̱ na̱xi̱nandá‑nꞌión xo̱kji,

ti̱yó ya̱ na̱xi̱nandá‑nꞌión xi ngìjngo;

nga̱ ñaki kìxi̱i xi xin‑no,

ti̱ kje bimajìn‑nio ngayije ꞌnde xi tsꞌe̱ Israel,

kꞌia̱ nga kjoa̱ꞌaí ngìndia jè ꞌNdí‑le̱ Chjo̱ta̱.

24 »Jè xi kòtꞌayà alì tsà ngìsa̱‑jìn ngꞌa tíjna ti̱kꞌoa̱‑ni jè xi bakóya‑le̱,

ni̱ jè‑jìn cho̱ꞌnda ngìsa̱ ngꞌa tíjna ti̱kꞌoa̱‑ni jè nai‑le̱.

25 To̱koa̱n‑nile̱ jè xi kòtꞌayà nga kꞌoa̱sꞌìn kàtaꞌyatokòn josꞌìn ꞌyatokòn jè xi bakóya‑le̱,

kꞌoa̱ to̱koa̱n‑nile̱ jè cho̱ꞌnda nga kꞌoa̱sꞌìn kàtaꞌyatokòn joni jè nai‑le̱.

Tsà jè xi nꞌai‑le̱ ndꞌia “Beelzebú” tsakꞌìn‑le̱,

a tsí ngìsa̱ to̱ kꞌoín‑le̱ jè xi tjióꞌyà ndꞌia‑le̱.

26 »Kꞌoa̱ koiì nga alì chjo̱ta̱‑jìn bijkon‑nilao̱o;

nga̱ tsìjme kjoa̱ꞌma tjín,

xi tsì tsà jcha̱sòn‑tsen‑le̱;

kꞌoa̱ ni̱jme‑jìn xi tjióꞌmà,

xi tsì jcha̱‑le̱.

27 Jè kjoa̱ xi ya̱ kꞌoa̱xin‑no jña njiòn chon,

ya̱a kꞌoa̱ti̱xón jña isen chon,

kꞌoa̱ jña‑nile̱ én xi chrjoa̱ño kinòkjoa̱sꞌen,

ya̱a ti̱nókjoa̱yao ya̱ saꞌnda sòn‑ngꞌa ndꞌia.

28 Kꞌoa̱ alì jè jìn bijkon‑lao̱o chjo̱ta̱ xi yao‑no síkꞌen,

to̱nga lìkoi koa̱n‑le̱ si̱ikꞌen jè sén ni̱chrjin‑no;

to̱sa̱a jè ti̱jkón‑lao̱o jè xi koa̱n‑le̱ si̱ikixòya sén ni̱chrjin‑no kao̱ yao‑no ya̱ jin lꞌí xi tsìkꞌia bitsꞌao.

29 »A tsí tsà to̱ jngo tao̱n saténa‑ni jaò ni̱se ꞌndí,

to̱nga ni̱jngo‑jìn ni̱se jcha̱ i̱ tꞌa nangi,

tsà tsì jè Nꞌai‑no xi kꞌoa̱sꞌìn me‑le̱.

30 Nga̱ saꞌnda ntsja̱jko̱ tjíxki̱i ngayije.

31 Koiì nga alì bijkon‑jiòn;

nga̱ jòn ngìsa̱a chjí‑lao̱o ti̱kꞌoa̱‑ni tsà nkjìn ni̱se ꞌndí.

32 »Kꞌoa̱ to̱ꞌya‑ni xi kꞌoa̱koi̱tso̱ ya̱ ngixko̱n chjo̱ta̱ nga an fìtꞌa‑na,

kꞌoa̱ati̱ xián an ya̱ ngixko̱n Nꞌai‑na̱ xi tíjna ya̱ ngꞌajmi nga an fìtꞌa‑na.

33 Kꞌoa̱ to̱ꞌya‑ni xi koi̱tso̱ ya̱ ngixko̱n chjo̱ta̱ nga tsì bexkon‑na,

an kꞌoa̱ati̱ xián ya̱ ngixko̱n Nꞌai‑na̱ xi tíjna ya̱ ngꞌajmi,

nga tsì ꞌbexkoan.

34 »Alì kꞌoa̱‑jìn sꞌìn nìkjaꞌaitsjen‑jiòn nga koi xá jàꞌai̱‑nia nga kjoa̱nchꞌán jaꞌai̱koa̱ i̱ soꞌnde;

lìtsà koi xá jàꞌai̱‑nia nga kjoa̱nchꞌán jaꞌai̱koa̱,

to̱sa̱a kjoa̱bixkàn.

35 Nga̱ koiì xá jàꞌai̱‑nia,

jmé‑ni nga jè xi ti ma koa̱n‑jtike nꞌai‑le̱,

kꞌoa̱ jè xi tsòti ma koa̱n‑jtike na̱‑le̱,

kꞌoa̱ jè xi ꞌnda ma koa̱n‑jtike na̱chá‑le̱;

36 kꞌoa̱ jè xi chꞌao sꞌìn koai̱kao̱ chjo̱ta̱,

ti̱ jé‑ni xínkjín xi tjió ya̱ ndꞌia‑le̱.^b

37 Jè xi ngìsa̱ nꞌión tsjoake nꞌai‑le̱ axo̱ na̱‑le̱ ti̱kꞌoa̱‑ni jokji tsjoake‑na an,

lìkoi bakìn‑le̱ nga chjo̱ta̱‑na̱ koa̱n;

kꞌoa̱ jè xi ngìsa̱ nꞌión tsjoake ti‑le̱ axo̱ tsòti‑le̱ ti̱kꞌoa̱‑ni jokji tsjoake‑na an,

lìkoi bakìn‑le̱ nga chjo̱ta̱‑na̱ koa̱n;

38 kꞌoa̱ ꞌya‑ni xi tsì kꞌoa̱bꞌé kon ni̱nga krò kàtanìkꞌen‑tꞌa,

kꞌoa̱ an nchroátje̱n‑ngi‑na,

lìkoi bakìn‑le̱ nga chjo̱ta̱‑na̱ koa̱n.

39 Jè xi me‑le̱ nga kꞌoa̱sjentjaì kjoa̱bijnachon‑le̱,

to̱saà si̱icha;

kꞌoa̱ jè xi si̱icha kjoa̱bijnachon‑le̱ xi to̱ tꞌatsꞌa̱n,

to̱saà so̱kò‑le̱ kjoa̱bijnachon.

40 »Jè xi jòn kjoétjaò‑no,

aàn xi kjoétjaò‑na;

kꞌoa̱ jè xi an kjoétjaò‑na,

jé xi kisikasén‑na kjoétjaò.

41 Jè xi kjoétjaò jngo chjo̱ta̱ xi nchja̱ya ngajao‑le̱ Niná,

nga to̱koi kjoétjaò‑ni nga Niná nchja̱ya ngajao‑le̱,

kꞌoa̱ati̱ kji sꞌe̱chjí‑le̱ jokji sꞌe̱chjí‑le̱ jè chjo̱ta̱ xi nchja̱ya ngajao‑le̱ Niná;

kꞌoa̱ jè xi kjoétjaò jngo chjo̱ta̱ xi kìxi̱ nga koi kjoétjaò‑ni nga kìxi̱,

kꞌoa̱ati̱ kji sꞌe̱chjí‑le̱ jokji sꞌe̱chjí‑le̱ jè chjo̱ta̱ xi kìxi̱.

42 Kꞌoa̱ to̱ꞌya‑ni xi ni̱nga to̱jngo niso nandá nchꞌán tsjoá‑le̱ jè chjo̱ta̱ xi nꞌión nangi tjió,

nga koi tsjoá‑nile̱ nga an kòtꞌayàtꞌa‑na,

ñaki kìxi̱i xi xin‑no nga lìkoi si̱icha chjí‑le̱».