Kꞌia̱ nga kichò Jesús ya̱ na̱xi̱nandá Nazaret
6
Jesús kitjo‑ni ya̱,
kꞌoa̱ jaꞌai ya̱ na̱xi̱nandá‑le̱,
kꞌoa̱ tje̱n‑ngitsao‑le̱ chjo̱ta̱ xi ya̱ kòtꞌayàtꞌa‑le̱.
2 Kꞌoa̱ kꞌia̱ nga kichò ni̱chrjin xotò,
ni̱chrjin nga bexkón Niná chjo̱ta̱ judío,
tsakꞌétsꞌia̱kao̱ nga tsakakóya ya̱ ndꞌia jña maxkia̱ xo̱n‑le̱ Niná;
kꞌoa̱ ngatsꞌi chjo̱ta̱ xi tsakincháñon‑le̱,
to̱ koanxkón‑le̱,
kꞌoa̱ i̱ kitsò:
—Jñá koan‑nile̱ jè kjoa̱ xo̱ tsò‑le̱. Kꞌoa̱ jñá kikjaꞌá‑ni nga kꞌoa̱síkji kjoa̱‑isen‑tokòn tjín‑nile̱, kao̱ jè kjoa̱xkón xi ma‑le̱ kꞌoa̱sꞌín.
3 Kꞌoa̱ ꞌyá‑ni xo̱kji,
a tsí tsà jè chji̱ne̱yá,
xi ti‑le̱ María ma,
a tsí tsà ndsꞌe̱ ma Jacobo,
José,
Judas kao̱ Simón.
A tsí tsà kꞌoa̱ti̱ i̱ tjiókao̱‑ná jè yánchjín ndichja.
—Jè chjo̱ta̱ xi nchja̱ya ngajao‑le̱ Niná ꞌyaxkón jña xìn ꞌnde,
to̱nga ya̱ ꞌnde‑le̱,
kao̱ ya̱ jin‑le̱ xínkjín kꞌoa̱ kao̱ ya̱ ndꞌia‑le̱ lìkoi ꞌya xi bexkón.
5 Kꞌoa̱ ni̱jme‑jìn kjoa̱xkón xi kisꞌin ya̱,
to̱ choaà chjo̱ta̱ xi chꞌin tjín‑le̱ kisindaya nga tsakánè‑le̱ ntsja.
6 Kꞌoa̱ to̱ koanxkón‑le̱ Jesús nga tsìꞌya xi koan‑kjaín‑le̱ ya̱.
Kꞌoa̱ kꞌia̱ tsakꞌamjen ya̱ na̱xi̱nandá-ꞌndí xi ya̱ chrian tjió,
nga tsakakóya.
Jè xá xi tsakꞌaì‑le̱ jè chjo̱ta̱ xi tejaò xi xá kiskoéjin‑ni xi ya̱ kiskótꞌayàtꞌa‑le̱ Jesús
7 Nga je koanskan‑ni kinchja̱‑le̱ chjo̱ta̱‑le̱ xi tejaò xi xá kiskoéjin‑ni Jesús,
kꞌoa̱ tsakꞌétsꞌia̱kao̱ nga jaò jaò kisikasén;
kꞌoa̱ kitsjoa‑le̱ kjoa̱tèxoma nga kꞌoa̱sjekajin sén ni̱chrjin xi tsì nda xi tjiójin‑le̱ chjo̱ta̱.
8 Kꞌoa̱ tsakꞌénè‑le̱ nga tsìjme xi kꞌoa̱ xi koa̱n‑chjén‑le̱ ya̱ yandia̱a,
ni̱ xijtsa‑jìn,
ni̱ nio̱xtìla̱‑jìn,
ni̱ tao̱n‑jìn kꞌoe̱etꞌanꞌió‑tꞌa ya̱ kjándiá‑le̱,
to̱ yánise‑le̱ xi kꞌoa̱;
9 kꞌoa̱ ni̱ jaò‑jìn chi̱nga kàtabꞌakjá to̱ jténꞌó‑le̱e kàtabáya.
10 Kꞌoa̱ kitsò‑le̱:
—To̱jña‑ni nga kꞌoai̱ꞌnde‑nò nga koi̱tjásꞌa̱on jngo ndꞌia,
ya̱ ti̱yo jo saꞌnda nga koìtjo̱‑nio ya̱ ꞌnde jè.
11 Kꞌoa̱ tsà jngo ꞌnde jña nga tsìꞌya xi skoétjaò‑no,
kꞌoa̱ tsà tsìꞌya xi koi̱nchàño‑no,
tìtjo̱‑nio ya̱,
kꞌoa̱ tꞌètsaojnao chaoꞌnde‑le̱ ndso̱ko,
nga̱ koiì jè choa̱‑le̱ nga kàbꞌasjengi‑no.
Ñaki kjoa̱kìxi̱i xi xin‑no, ni̱chrjin kꞌia̱ nga Niná si̱ijtsòꞌa chjo̱ta̱, ngìsa̱a tse kjoa̱ñꞌain kꞌoai̱‑le̱ na̱xi̱nandá jè, ti̱kꞌoa̱‑ni na̱xi̱nandá‑nꞌión Sodoma kao̱ na̱xi̱nandá‑nꞌión Gomorra.
12 Kꞌoa̱ kꞌia̱ nga ki jè chjo̱ta̱ xi tejaò xi xá kiskoéjin‑ni Jesús,
kinchja̱ya nga kàtasíkꞌantjaìya kjoa̱faꞌaitsjen‑le̱ chjo̱ta̱.
13 Kꞌoa̱ nꞌión nkjìn sén ni̱chrjin xi tsꞌe̱ nai̱i tsakꞌasjejin,
kꞌoa̱ sìti̱ tsakꞌéjtenjòn jko̱ nkjìn chjo̱ta̱ xi chꞌin tjín‑le̱,
kꞌoa̱ kisindaya̱.
Kꞌia̱ nga kinìkꞌen jè Juan xi Kanísꞌen‑ngindá
14 Jè chjo̱ta̱xá ngajko̱ Herodes Antipas kinchrꞌoé xi tꞌatsꞌe̱ Jesús,
nga̱ ngakijndà kinoꞌyà‑le̱ tꞌatsꞌe̱ Jesús;
kꞌoa̱ kitsò:
«Jé Juan xi Kanísꞌen‑ngindá,
xi jaꞌáyajin‑nile̱ kꞌen,
kꞌoa̱ koiì nga tse nganꞌión tjín‑nile̱ nga ma‑nile̱ sꞌín kjoa̱xkón».
15 To̱nga tjín kꞌa xi kitsò:
«Jé Elías».
Kꞌoa̱ tjín kꞌa xi kitsò:
«Jngoò chjo̱ta̱ xi nchja̱ya ngajao‑le̱ Niná, axo̱ jngoò chjo̱ta̱ xi kinchja̱ya ngajao‑le̱ Niná ngasꞌa̱».
16 Kꞌia̱ nga kinchrꞌoé Herodes Antipas én jè,
kitsò:
«Jé Juan xi an tsakatesian xi jaꞌáyajin‑nile̱ kꞌen».
17 Nga̱ jè soaà Herodes Antipas tsakꞌénè nga kindoa Juan,
xi nꞌó ki̱cha̱ tàja tsakꞌétꞌanꞌión‑ni ya̱ ya ndo̱yá xi to̱ tꞌatsꞌe̱ Herodías,
chjo̱on‑le̱ Felipe xi ndsꞌe̱ ma jè Herodes;
nga̱ jé chixàn‑kao̱ chjo̱on‑le̱ Felipe.
18 Nga̱ Juan i̱i kitsò‑le̱ Herodes Antipas:
«Lìkoi tiꞌndè‑lì nga ji koi̱xan‑koai̱ chjo̱on‑le̱ ndsꞌai».
19 To̱nga Herodías koanjtike Juan,
koanme‑le̱ nga si̱ikꞌen,
kꞌoa̱ lìkoi koan‑le̱;
20 nga̱ Herodes Antipas kitsokjòn‑le̱ Juan,
nga̱ tsabeè nga jè,
jngoò chjo̱ta̱ xi kìxi̱ kꞌoa̱ xi Niná kiskoé‑tꞌaxín,
kꞌoa̱ kisikoìnda̱a nga tsí jme xi kàtamatꞌain;
kꞌia̱ nga nchrꞌoé‑le̱ to̱ maxkón‑le̱,
kꞌoa̱ kao̱o kjoa̱nda kinchrꞌoé‑le̱.
21 To̱nga jaꞌai ni̱chrjin xi tíkoya‑le̱ Herodías,
kꞌia̱ nga tsakꞌasje sꞌoí‑le̱ jè Herodes Antipas nga je‑le̱ nó,
kꞌia̱ nga koanxòn tsakjèn‑kao̱ chjo̱ta̱‑le̱ xi xá títjòn tjín‑le̱,
kao̱ ngajko̱‑le̱ chjo̱ta̱ kjoa̱jchán kao̱ xi chjo̱ta̱ xi kja̱ꞌaí xi kꞌoa̱ti̱ xá títjòn tjín‑le̱ ya̱ ꞌnde Galilea,
22 kꞌia̱ jaꞌasꞌen tsòti‑le̱ Herodías,
kitè,
kꞌoa̱ Herodes Antipas kao̱ xi ya̱ tjiótꞌakao̱ yámìxa̱ nꞌión nda kisasen‑le̱;
kꞌoa̱ jè chjo̱ta̱xá ngajko̱ kitsò‑le̱ jè tsòti xo̱ngó:
—Ti̱jé‑naí jme‑ni xi me‑lì,
kꞌoa̱ tsjoaà‑lè.
23 Kꞌoa̱ Niná tsakasènꞌión‑ni nga kitsjoa én‑le̱ kitsò‑le̱:
—Ngayije xi si̱jé‑naí tsjoaà‑lè,
saꞌnda basen ꞌnde jña an batèxoma.
24 Kꞌia̱ kitjo jè tsòti xo̱ngó,
kitsò‑le̱ na̱‑le̱:
—Jmé xi sijé‑le̱.
Kꞌoa̱ jè na̱‑le̱ tsòti kitsò‑le̱:
—Ti̱jé‑lai̱ jè jko̱ Juan xi Kanísꞌen‑ngindá.
25 Jè tsòti xo̱ngó kjitꞌa nangi jaꞌasꞌen‑nchrꞌoè chjo̱ta̱xá ngajko̱,
kꞌoa̱ kitsò‑le̱:
—Koiì xi me‑na nga ndꞌai̱ kjoàn ndꞌai̱, tꞌai̱‑naí jko̱ Juan xi kanìsꞌen‑ngindá kꞌoa̱ jngo chroa̱ ti̱kꞌéjnayai.
26 Kꞌoa̱ jè chjo̱ta̱xá ngajko̱ nꞌión koanba‑le̱;
to̱nga to̱koiì nga je kitsjoa én‑le̱,
kꞌoa̱ koiì nga chjo̱ta̱ tjiótꞌakao̱ yámìxa̱,
lìkoi koanme‑le̱ nga mai kitsò‑le̱.
27 Kꞌoa̱ jè chjo̱ta̱xá ngajko̱, kjoan kisikasén jngo chjo̱ta̱ kjoa̱jchán‑le̱ nga kàtafikjaꞌá jko̱ Juan.
28 Jè chjo̱ta̱ kjoa̱jchán ki,
tsakatesin Juan ya̱ ya ndo̱yá,
kꞌoa̱ jngo chroa̱ tíjnaya‑le̱ jko̱ kꞌia̱ nga jaꞌaikao̱ kꞌoa̱ kitsjoa‑le̱ tsòti xo̱ngó,
kꞌoa̱ jè tsòti xo̱ngó kitsjoa‑le̱ na̱‑le̱.
29 Kꞌia̱ nga kinchrꞌoé chjo̱ta̱ xi ya̱ kòtꞌayàtꞌa‑le̱ Juan nga kꞌoa̱koan,
jaꞌai,
kiskoé yao‑le̱, kꞌoa̱ kisikájnaya jngo ngijao jña sꞌeyoyà kꞌen.
Kꞌia̱ nga Jesús kisikjèn chjo̱ta̱‑nkjìn
30 Kꞌia̱ nga jaꞌai‑ni jè chjo̱ta̱ xi xá kisikasén‑ni Jesús nga kàtanchja̱ya én‑le̱,
kitsòya‑le̱ Jesús ngayije jme xi kisꞌin kao̱ jme xi tsakakóya.
31 Kꞌoa̱ Jesús kitsò‑le̱:
—Nchroaó kꞌoa̱ tjián ya̱ ꞌnde tꞌaxìn‑tꞌa,
kꞌoa̱ ya̱ ti̱kjáya jngotjò.
Nga̱ nkjìn chjo̱ta̱ xi tjiófì,
kꞌoa̱ xi tjiófaꞌaikòn‑le̱,
saꞌnda lìkoi koan‑a‑le̱ nga tsakjèn Jesús kao̱ chjo̱ta̱ xi xá kisikasén‑ni nga koi̱nchja̱ya én‑le̱.
32 Kꞌoa̱ to̱jè Jesús kao̱ chjo̱ta̱ xi ya̱ kòtꞌayàtꞌa‑le̱ tsakatiòyà jngo chitso nga kisòn ndáchikon saꞌnda ya̱ ꞌnde tꞌaxìn‑tꞌa.
33 To̱nga nkjìn chjo̱ta̱ xi tsabe nga tjiófì,
kꞌoa̱ tsabe nga jè Jesús;
kꞌoa̱ nkjìn xi ndso̱ko̱ ki‑ni nga kitjo‑ni na̱xi̱nandá‑le̱,
kꞌoa̱ jé chjo̱ta̱ títjòn kichò,
kꞌoa̱ koanxkótꞌa‑le̱ Jesús.
34 Kꞌoa̱ nga kitjo Jesús ya̱ chitso,
tsabe chjo̱ta̱‑nkjìn,
koanma̱ke nga̱ kꞌoa̱akjoan jokoan barrè xi tsìn‑le̱ xi koꞌnda;a
kꞌoa̱ tsakꞌétsꞌia̱kao̱ nga nkjìn kjoa̱ tsakakóya‑le̱.
35 Kꞌia̱nga je koanxòn,
jè chjo̱ta̱ xi ya̱ kòtꞌayatꞌa‑le̱ jaꞌaikòn‑le̱ Jesús,
kitsò‑le̱:
—I̱‑bi̱ to̱ ꞌnde kjitia‑ní,
kꞌoa̱ jeè nꞌión koan‑xòn ndꞌai̱.
36 Ti̱xan‑tꞌai chjo̱ta̱ jmé‑ni nga kàtafì‑ni ya̱ jña tjín ndꞌia kao̱ ya̱ na̱xi̱nandá‑ꞌndí xi chrian‑tꞌa,
kꞌoa̱ kàtabatse nio̱xtìla̱,
nga̱ tsìn‑le̱ xi koa̱kje̱n.
37 Kꞌia̱ Jesús kinchja̱,
kitsò‑le̱:
—Jòn tꞌaì‑lao̱o xi koa̱kje̱n.
Jè chjo̱ta̱ xi ya̱ kòtꞌayàtꞌa‑le̱ kitsò‑le̱:
—Jmè‑ni ñè. Ñaki to̱xo̱kꞌoa̱a‑la̱ tisi. Jñá koangín kindaìji̱n nio̱xtìla̱ xi jaò ciento̱ chjí ni̱chrjin‑le̱ cho̱ꞌnda tjín‑ni, jmé‑ni nga koa̱n kꞌoai̱‑nilai̱ji̱n xi koa̱kje̱n chjo̱ta̱ xo̱chon.
38 Jesús kitsò‑le̱:
—Jótjín ma nio̱xtìla̱ xi tjió‑no.
Tangión kꞌoa̱ chótsen‑lao̱o.
Kꞌia̱ nga tsabe,
kitsò:
—Aòn ma‑ni nio̱xtìla̱,
kꞌoa̱ jaò ma jti̱ xi tjió‑naji̱n.
39 Kꞌoa̱ Jesús tsakꞌénè‑le̱ chjo̱ta̱ xi ya̱ kòtꞌayàtꞌa‑le̱ nga ngatsꞌi chjo̱ta̱ xki jtín kàtabatiònè li̱ji̱ xkoén.
40 Kꞌoa̱ xki̱ jtín tsakatiò,
xi jngó jngó ciento̱, kao̱ xi ñachàn‑te ñachàn‑te nga jngó jtín.
41 Jesús kiskoé nio̱xtìla̱ xi aòn kao̱ jti̱ xi jaò,
kiskòtsen ngꞌà,
kitsjoa‑le̱ kjoa̱nda Niná,
kꞌoa̱ kisixkoa̱ nio̱xtìla̱,
kꞌia̱ kitsjoa‑le̱ chjo̱ta̱ xi ya̱ kòtꞌayàtꞌa‑le̱ jmé‑ni nga kisikꞌabí‑ni;
kꞌoa̱ti̱ kisikꞌabíjin‑le̱ jti̱ xi jaò.
42 Kꞌoa̱ tsakjèn ngatsꞌi chjo̱ta̱ kꞌoa̱ koanski.
43 Kꞌoa̱ xi je koan tsakꞌéxkó xkoa̱‑le̱ nio̱xtìla̱ kao̱ xkoa̱‑le̱ jti̱ xi kinjèn‑ngi,
kꞌoa̱ tejaò ni̱si̱nyá koan.
44 Kꞌoa̱ jè xi tsakjèn aòn jmi ma‑ni xi to̱jè chjo̱ta̱xꞌi̱n.
Kꞌia̱ nga Jesús tsakꞌamjesòn ya̱ ndáchikon
45 Xi ti̱kꞌia̱‑ni Jesús tsakꞌénè‑le̱ chjo̱ta̱‑le̱ xi ya̱ kòtꞌayàtꞌa‑le̱ nga kàtasíxítíya nga kàtafaꞌasꞌen ya̱ chitso,
kꞌoa̱ kàtafì títjòn‑le̱ saꞌnda na̱xi̱nandá‑nꞌión Betsaida,
ya̱ xingoa‑nile̱ ndáchikon,
jè kꞌia̱a tísíxan‑tꞌa chjo̱ta̱‑nkjìn nga kàtafì‑ni ndꞌia‑le̱.
46 Kꞌoa̱ kꞌia̱ nga je koan kisixan‑tꞌa chjo̱ta̱,
ki ya̱ nindo nga kikjákao̱ Niná;
47 kꞌoa̱ kꞌia̱ nga je koan‑njiòn,
jè chitso xi tjióyà jè chjo̱ta̱ xi ya̱ kotꞌayàtꞌa‑le̱ jeè ya̱ tje̱nsòn ngabasen‑le̱ ndáchikon,
kꞌoa̱ to̱jè Jesús tíjna ya̱ jña nangi.
48 Kꞌoa̱ Jesús tsabe nga je tjióbijta‑le̱ chjo̱ta̱ xi ya̱ kotꞌayàtꞌa‑le̱ nga tjiókjen‑ndá‑le̱ chitso,
nga̱ jè ntjao̱‑nꞌión ya̱a tínchroánè‑le̱,
sꞌa̱a njiònya sa nga tsòꞌbasòn ndáchikon Jesús nga jaꞌaitje̱n‑ngi‑le̱,
kꞌoa̱ meè‑le̱ nga kjoa̱ꞌa títjòn‑le̱.
49 Kꞌia̱ nga tsabe chjo̱ta̱ xi ya̱ kòtꞌayàtꞌa‑le̱ nga tsòꞌbasòn ndáchikon,
kꞌoa̱sꞌìn kisikꞌaitsjen nga jngo se̱n tjióbe,
kꞌoa̱ nꞌión tsakꞌéjta;
50 nga̱ ngatsꞌi tsabe,
kꞌoa̱ ñaki chixòjeèn kjoa̱faꞌaitsjen‑le̱.
To̱nga Jesús kjoan tsakjákao̱,
kꞌoa̱ kitsò‑le̱:
—¡Alì bijkon‑jiòn,
an‑nià,
ti̱nꞌión‑tokòn!
51 Kꞌoa̱ jaꞌasꞌen‑kon‑le̱ ya̱ chitso,
kꞌoa̱ kisꞌejyò jè ntjao̱;
kꞌoa̱ jè chjo̱ta̱ xi ya̱ kòtꞌayatꞌa‑le̱ ñaki to̱ koanxkón‑le̱,
kꞌoa̱ ñaki to̱kꞌoa̱a koan‑le̱.
52 Nga̱ to̱jo kje macho̱ya‑jìnle̱ jè kjoa̱ xi koan xi tꞌatsꞌe̱ nio̱xtìla̱,
nga̱ tàjaà tjió ni̱ma̱‑le̱.
Jesús kisindaya jè xi chꞌin tjín‑le̱ ya̱ na̱xi̱nandá Genesaret
53 Kꞌia̱ nga Jesús kao̱ chjo̱ta̱ xi ya̱ kòtꞌayàtꞌa‑le̱ je jaꞌatojin ndáchikon,
jaꞌai ya̱ ꞌnde Genesaret,
kꞌoa̱ ya̱ kisikájna chitso‑le̱ ya̱ ndai ndáchikon.
54 Kꞌia̱ nga kitjo chitso,
ngatsꞌi chjo̱ta̱ xi ya̱ tjió kjoan tsabexkon nga jè Jesús.
55 Kꞌoa̱ jè chjo̱ta̱ xo̱kjoan ki ngakijndà ꞌnde xi tjió ya̱ jngotjondai,
jaꞌaikao̱‑ni ngakijndà ꞌnde chjo̱ta̱ xi chꞌin tjín‑le̱ xi na̱chanyá kjiosòn‑le̱,
to̱jña‑ni nga kinòꞌyà‑le̱ nga tíjna Jesús.
56 Kꞌoa̱ to̱jña‑ni nga faꞌasꞌen Jesús,
a na̱xi̱nandá‑ꞌndí,
axo̱ ya̱ na̱xi̱nandá‑nꞌión,
axo̱ ya̱ jña tjín ndꞌia,
kinikatió‑le̱ ya̱ yandia̱a chjo̱ta̱ xi chꞌin tjín‑le̱,
kꞌoa̱ tsakꞌétsꞌoa‑le̱ nga kàtatsjoáꞌnde‑le̱ nga si̱ikao̱ ni̱nga to̱ tjòn‑le̱ najño‑le̱;
kꞌoa̱ ngatsꞌi xi kisikao̱ najño‑le̱ Jesús kitjoxìn‑le̱ chꞌin xi tjín‑le̱.