Jè chjo̱ta̱ xi ya̱ Gadara tsꞌe̱ xi kjìn sén ni̱chrjin xi tsꞌe̱ nai̱i kitjojin‑le̱.
5
Jesús kao̱ chjo̱ta̱ xi ya̱ kòtꞌayàtꞌa‑le̱ jaꞌaiyà chitso nga jaꞌai ya̱ xingoa‑le̱ ndáchikon, ya̱ nangi‑le̱ chjo̱ta̱ Gadara.
2 Kꞌia̱ nga je kitjojen Jesús ya̱ chitso,
ti̱ꞌa jaꞌaikòn jngo‑nile̱ chjo̱ta̱ xi ya̱ kitjojin‑ni jña tjió ngijao xi sꞌeyoyà kꞌen,
xi sén ni̱chrjin xi tsì nda tíjnajin‑le̱,
3 xi ya bꞌèjna jña tjió ngijao xi sꞌeyoyà kꞌen,
kꞌoa̱ ni̱ꞌya‑jìn xi ma‑le̱ nga bꞌètꞌanꞌión,
ni̱ kao̱‑jìn nꞌó ki̱cha̱ tàja.
4 Nga̱ nkjìn kꞌa kisꞌetꞌanꞌión‑ni nꞌó ki̱cha̱ tàja jè ndso̱ko̱ kao̱ ntsja,
to̱nga tsakatejtso kꞌoa̱ kisixkoa̱;
kꞌoa̱ ni̱ꞌya‑jìn xi matàjakao̱.
5 Kꞌoa̱ ngantsjaì ni̱chrjin kao̱ nga ni̱tje̱n,
bꞌamjen kjiꞌndiáxá ya̱ sòn nindo kao̱ ya̱ jña tjió ngijao‑le̱ kꞌen,
kꞌoa̱ kao̱ la̱jao̱ síkìꞌaon‑ni yao‑le̱.
6 Kꞌia̱ nga̱ tsabe nga Jesús sꞌa̱ kjìn tínchroaà,
kitòkanchrꞌoè kꞌoa̱ tsakasènxkónchꞌin‑tꞌale̱.
7 Kꞌoa̱ nꞌión kiskiꞌndiáxá,
kitsò:
—Jmé xi tjín‑lì xi kao̱ an,
ji Jesús ꞌNdí‑le̱ Niná Xi Nꞌión Ngꞌa Tíjna.
Kao̱o jaꞌaín‑le̱ Niná bꞌetsꞌoà‑lè, alì kjoa̱ñꞌain‑jìn bꞌaì‑naí.
8 Koiì nga Jesús títsò‑le̱:
«Sén ni̱chrjin xi tsì ndai,
tìtjo̱jin‑lai̱ jè chjo̱ta̱ xo̱kji».
9 Kꞌia̱ Jesús kiskònangi‑le̱ kitsò‑le̱:
—Jóꞌmì‑lì.
Kꞌoa̱ jè kitsò:
—Legión ꞌmì‑na;
nga̱ nkjìn ma‑niji̱n.
10 Kꞌoa̱ nꞌión tsakꞌétsꞌoa‑le̱ Jesús nga tsì kjaꞌaí ꞌnde kàtasíkasén.
11 Kꞌoa̱ ya̱ chrian nindo nꞌión nkjìn chi̱nga̱ tjiókjèn.
12 Kꞌoa̱ ngatsꞌi sén ni̱chrjin xi tsꞌe̱ nai̱i tsakꞌétsꞌoa‑le̱ Jesús,
kitsò‑le̱:
—Ya̱ ti̱kasén‑naíji̱n ya̱ jña tjió jè chi̱nga̱,
jmé‑ni nga ya̱ koi̱tjásꞌe̱njin‑nilai̱ji̱n.
13 Kꞌoa̱ kꞌia̱ Jesús kitsjoaꞌndè‑le̱.
Kꞌoa̱ jè sén ni̱chrjin xi tsì nda kitjojin‑le̱ chjo̱ta̱ xo̱kji,
jaꞌasꞌenjin‑le̱ chi̱nga̱,
xi jaò jmi‑la̱ ma;
kꞌoa̱ jè chi̱nga̱ kitòka,
kitsaojen‑ngi ya̱ na̱xi̱ kꞌoa̱ kitsaojin ya̱ ndáchikon, kꞌoa̱ ya̱ kꞌen ngindá.
14 Kꞌoa̱ jè chjo̱ta̱ xi tjiókoꞌnda chi̱nga̱ tsakanga,
kꞌoa̱ kitsòya ya̱ na̱xi̱nandá‑nꞌión,
kao̱ ngakijndà na̱xi̱nandá‑ꞌndí jme kjoa̱ xi koan. Kꞌoa̱ jè chjo̱ta̱ xi ya̱ tsꞌe̱ kichòkòtsen‑le̱ jmé‑ni kjoa̱ xi koan.
15 Jaꞌaikòn‑le̱ Jesús,
kꞌoa̱ tsabe jè chjo̱ta̱ xi kjoa̱ñꞌain tsakjaꞌá nga nꞌión nkjìn sén ni̱chrjin xi tsꞌe̱ nai̱i tsakatiòjin‑le̱,
tíjna,
kꞌoa̱ yꞌakjá najño‑le̱,
kꞌoa̱ nda tjín kon;
kꞌoa̱ jè chjo̱ta̱ kitsokjòn.
16 Kꞌoa̱ jè chjo̱ta̱ xi tsabe,
kitsòya‑le̱ jó koan‑tꞌaìn jè chjo̱ta̱ xi sén ni̱chrjin xi tsꞌe̱ nai̱i tsakꞌèjnajin‑le̱ kao̱ tꞌatsꞌe̱ kjoa̱ xi koan‑tꞌain ngatsꞌi chi̱nga̱.
17 Kꞌoa̱ jè chjo̱ta̱ xi ya̱ tsꞌe̱ tsakꞌétsꞌoa‑le̱ Jesús nga kàtabitjojin‑ni ya̱ ꞌnde‑le̱.
18 Kꞌia̱ nga Jesús jaꞌasꞌen chitso,
jè chjo̱ta̱ xi sén ni̱chrjin xi tsꞌe̱ nai̱i kitjojin‑le̱ tsakꞌétsꞌoa‑le̱ nga kàtatsjoáꞌnde‑le̱ nga ya̱ kꞌoàmjen‑kao̱.
19 To̱nga Jesús lìkoi kitsjoaꞌndè‑le̱.
To̱saà kitsò‑le̱:
—Tꞌin ya̱ ndꞌia‑li̱,
tꞌin‑chón‑lai̱ xìngi̱,
kꞌoa̱ tꞌìnya‑lai̱ jokji tse kjoa̱nda xi kàsꞌín Nai‑ná xi tꞌatsi̱ kꞌoa̱ josꞌìn nga kàmama̱ke‑lì.
20 Kꞌoa̱ kꞌia̱ ki,
tsakꞌétsꞌia̱kao̱ nga kisingasòn én ya̱ ꞌnde xi Decápolis ꞌmì,
jotjín kjoa̱xkón xi kisꞌin Jesús xi tꞌatsꞌe̱;
kꞌoa̱ ngatsꞌi chjo̱ta̱ to̱kꞌoa̱a koan‑le̱.
Jè tsòti‑le̱ Jairo kao̱ jè chjo̱on xi kisikao̱ najño‑le̱ Jesús
21 Chitso tíjnaya Jesús kꞌia̱ nga ki,
nga jaꞌa ngìjngokꞌà ya̱ xingoa‑nile̱ ndáchikon,
nꞌión kjìn chjo̱ta̱ xi koanxkótꞌa‑le̱; kꞌoa̱ jè, ya̱a tíjna ndai ndáchikon.
22 Kꞌoa̱ jaꞌaikòn‑le̱ Jesús jngo chjo̱ta̱ xi Jairo ꞌmì,
xi chjo̱ta̱ títjòn‑le̱ ndꞌia jña maxkia̱ xo̱n‑le̱ Niná xi tíjna ya̱ ꞌnde jè;
kꞌoa̱ kꞌia̱ nga tsabe tsakajnajten‑tꞌa nangi ya̱ ngi ndso̱ko̱ Jesús,
23 kꞌoa̱ nꞌión tsakꞌétsꞌoa‑le̱,
kitsò‑le̱:
—Jè ꞌndí tsòti‑na̱ jeè meè mꞌen;
nchroaí kꞌoa̱ tjanè‑lai̱ ndsai̱ jmé‑ni nga kàtamandaya‑ni kꞌoa̱ kàtabꞌèjnakon‑ni.
24 Kꞌoa̱ ki-ni Jesús,
kikao̱ Jairo;
kꞌoa̱ nꞌión nkjìn chjo̱ta̱ kitje̱n‑ngile̱ kꞌoa̱ jè chjo̱ta̱‑nkjìn ñaki tsakꞌéꞌnchò‑nꞌión Jesús.
25 To̱nga jngo chjo̱on xi chꞌin tjín‑le̱, xi je tejaò nó nga njín tíxìjten‑le̱,
26 kꞌoa̱ nꞌión tse kjoa̱ñꞌain tsakjaꞌá xi to̱ tꞌatsꞌe̱ nga nꞌión nkjìn chji̱ne̱xki kikon‑le̱,
kꞌoa̱ kisikjeya ngayije tao̱n‑le̱,
kꞌoa̱ ni̱jme‑jìn xi tsakasèn‑kao̱,
to̱ ngìsa̱a koan‑taó,
27 kꞌia̱ nga kinchrꞌoé xi tꞌatsꞌe̱ Jesús,
kinchroa jto̱n yátsꞌi̱n Jesús ya̱ jin‑le̱ chjo̱ta̱‑nkjìn,
kꞌoa̱ kisikao̱ najño‑le̱.
28 Nga̱ kitsò kjoa̱faꞌaitsjen‑le̱:
«Ni̱nga to̱ najño‑le̱ sikoa̱,
koa̱n‑ndaya‑nià».
29 Kꞌoa̱ kjoan kisꞌejyò njín‑le̱;
ñaki tseèn koan‑le̱ yao‑le̱ nga kitjoxìn‑le̱ chꞌin xi kjoa̱ñꞌain tísíkjaꞌá.
30 Ti̱ꞌa tsabe‑ni yao‑le̱ Jesús nga nganꞌión‑le̱ kitjojin,
kisikꞌófaya,
kiskòtsen‑le̱ chjo̱ta̱‑nkjìn,
kitsò:
—ꞌYá‑ni xi najño‑na̱ kàsíkao̱.
31 Jè chjo̱ta̱ xi ya̱ kòtꞌayàtꞌa‑le̱ kitsò‑le̱:
—ꞌYa‑ní nga jè chjo̱ta̱‑nkjìn bꞌéꞌnchònꞌión‑lì,
án‑ni nga si‑síni:
“ꞌYá xi kàsíkao̱‑na”.
32 To̱nga jè kiskòtsen‑ndai nga me‑le̱ skoe̱ ꞌyá‑ni xi kisikao̱ najño‑le̱.
33 Kꞌia̱ jè chjo̱on,
kitsokjòn kꞌoa̱ ñaki tíbꞌatsé,
nga tsabe jme xi koan ya̱ jin yao‑le̱,
kinchroa‑nchrꞌoè kꞌoa̱ tsakajnajten‑tꞌa nangi ya̱ ngi ndso̱ko̱ Jesús,
kꞌoa̱ kitsòya‑le̱ ngayije.
34 Kꞌoa̱ Jesús kitsò‑le̱:
—ꞌNdí chjo̱on,
jé kjoa̱makjaín‑li̱ kàbꞌasjentjaì‑lì;
nchꞌán tꞌin‑ni,
nga jè kàtjoxìn‑lì chꞌin‑li̱.
35 Ti̱sꞌa̱a tínchja̱‑ni Jesús nga jaꞌai xínkjín chjo̱ta̱ títjòn‑le̱ ndꞌia jña maxkia̱ xo̱n‑le̱ Niná,
kitsò‑le̱:
—Jè tsòti‑li̱ jeè kàmꞌen;
án‑ni nga to̱ jo tinìsi‑nilai̱ jè xi bakóya.
36 To̱nga kꞌia̱ nga je kinchrꞌoé Jesús jè én xi jaꞌai‑le̱ jè chjo̱ta̱ títjòn‑le̱ ndꞌia jña maxkia̱ xo̱n‑le̱ Niná,
kitsò‑le̱:
—Alì bijkon‑jìn,
to̱ kàtamakjaín‑lì.
37 Kꞌoa̱ lìkoi kitsjoaꞌndè nga ꞌya sa xi koan koai̱tje̱n‑ngi‑le̱,
to̱jè Pedro,
Jacobo,
kao̱ Juan ndsꞌe̱ Jacobo.
38 Kꞌoa̱ jaꞌai ya̱ ndꞌia‑le̱ chjo̱ta̱ títjòn,
kꞌoa̱ Jesús tsabe chjo̱ta̱ xi tjióbꞌéjta kao̱ xi tjiókjiꞌndiá kꞌoa̱ xi nꞌión tjiósíba.
39 Kꞌoa̱ kꞌia̱ nga jaꞌasꞌen,
kitsò‑le̱:
—Án‑ni nga kꞌoa̱sìkji bꞌèjtasínio,
kꞌoa̱ nga tìchjiꞌndiá‑nio.
Jè tsòti lìtsà kijnakꞌen‑jìn to̱ kijnafè‑ní.
40 To̱nga jè chjo̱ta̱ to̱ tsakijnòkeè Jesús.
Kꞌoa̱ jè tsakꞌaonsje ngatsꞌi,
to̱jè nꞌai‑le̱ kao̱ na̱‑le̱ tsòti kinchja̱‑le̱ kao̱ jè chjo̱ta̱ xi ya̱ tje̱n‑kao̱ Jesús,
kꞌoa̱ jaꞌasꞌen jña kijna tsòti.
41 Kꞌia̱ Jesús kiskoé ntsja tsòti,
kitsò‑le̱:
—Talita cumi (Én xi tsò‑ni:
“Tsòti,
jiì xo̱ xin‑lè,
ti̱sótjai̱n”).