Choa̱ xi mangósòn‑kao̱ jngo chjo̱ta̱ xi kjojndì na̱xi̱n
4
Jesús ngìjngokꞌà tsakꞌétsꞌia̱kao̱ nga tsakakóya ya̱ ndai ndáchikon xi ya̱ Galilea nchja̱‑ni,
kꞌoa̱ nꞌión nkjìn chjo̱ta̱ koanña‑ndaile̱,
saꞌnda koan‑chjén nga jngo chitso jaꞌasꞌen ya̱ sòn ndáchikon kꞌoa̱ tsakꞌèjna; kꞌoa̱ ngatsꞌi chjo̱ta̱ ya̱a tsakinchandai ndáchikon.
2 Kꞌoa̱ nkjìn kjoa̱ tsakakóya‑le̱ kao̱ choa̱ xi mangósòn‑kao̱ jngo kjoa̱,
kꞌoa̱ i̱ sꞌìn tsakakóya‑le̱:
3 «Ti̱nóꞌyaò:
Koe̱e‑ni,
jè chjo̱ta̱ xi bꞌéntjè tsojmì ntjè kikjojndì na̱xi̱n;
4 kꞌoa̱ kꞌia̱ nga kiskojndì na̱xi̱n tjín xi ya̱ ndai ndia̱a kitsao,
kꞌoa̱ jaꞌai ni̱se kꞌoa̱ jè kiskine.
5 Tjín kꞌa na̱xi̱n xi ya̱ jin la̱jao̱ kitsao,
jña nga choa nangi tjín;
kꞌoa̱ ti̱ꞌa chisò‑ni nga̱ tsì na̱nga̱ nangi kitsaojin.
6 To̱nga kꞌia̱ nga kitjo tsꞌoí,
tsakaká; kꞌoa̱ koiì nga̱ tsìn‑le̱ ja̱ma̱ nga kixì‑ni.
7 Tjín kꞌa na̱xi̱n xi ya̱ jin naꞌyá kitsaojin;
kꞌoa̱ jè naꞌyá koan‑ngꞌa kꞌoa̱ kisikꞌen‑ngi,
kꞌoa̱ jè na̱xi̱n lìkoi tsaka‑le̱ to.
8 To̱nga tjín kꞌà na̱xi̱n xi nda nangi kitsaojin,
kꞌoa̱ tsaka‑le̱ to,
nga̱ chisò kꞌoa̱ koan‑ngꞌa,
kꞌoa̱ tsaka‑le̱ xi kan‑tè,
xi jàn‑kan,
kꞌoa̱ saꞌnda jngo ciento̱ to tsaka‑le̱ nga jngó jngó».
9 Kꞌia̱ Jesús kitsò‑le̱:
«Jè xi tjín chrjoa̱‑ño xi nchrꞌoé‑ni,
nda kàtabasén‑ño».
10 Kꞌia̱ nga tsakꞌèjna to̱jè Jesús,
chjo̱ta̱ xi ya̱ tjiótꞌachrian‑le̱ kao̱ chjo̱ta̱‑le̱ xi tejaò xi xá kiskoéjin‑ni,
kiskònangi‑le̱ jmé xi tsòya‑ni jè choa̱ xi mangósòn‑kao̱ kjoa̱ jè.
11 Kꞌoa̱ kitsò‑le̱:
«Jòn tsakꞌaì‑no nga jchao̱o jè kjoa̱ꞌma‑le̱ jña batéxoma Niná;
to̱nga chjo̱ta̱ xi kꞌa,
to̱ kao̱o choa̱ xi mangósòn‑kao̱ jngo kjoa̱ kꞌoa̱xin‑le̱ ngayije;
12 »“Jmé‑ni kꞌia̱ nga tjiókòtsen kàtabe,
Kꞌoa̱ lìkoi kàtamajin‑le̱;
Kꞌoa̱ jmé‑ni kꞌia̱ nga tjiónchrꞌoé katanchrꞌoé,
Kꞌoa̱ lìkoi kàtamacho̱ya‑le̱;
Jmé‑ni nga tsì kàtasíkꞌófayatꞌa‑nile̱ Niná
Kꞌoa̱ nga tsì kàtachatꞌa‑le̱ jé‑le̱”».
13 Kꞌoa̱ kitsò‑le̱:
«A tsí macho̱ya‑no jotsò‑ni jè choa̱ xi mangósòn kjoa̱ jè.
Jókoa̱n‑ni nga koa̱n‑cho̱ya‑no ngayije jè choa̱ xi mangósòn‑kao̱ jngo kjoa̱.
14 Jè chjo̱ta̱ xi bꞌéntjè tsojmì ntjè jè‑ní xi bꞌéntjè én‑le̱ Niná.
15 Kꞌoa̱ jè xi ya̱ ndai ndia̱a kitsao,
jè‑ní chjo̱ta̱ xi sꞌentjèjin‑le̱ én‑le̱ Niná,
to̱nga kꞌia̱ nga maskan‑ni nga je nchrꞌoé,
kjoan faꞌaiì jè nai̱i,
kꞌoa̱ faꞌáxìn jè én xi kisꞌentjèjin ni̱ma̱‑le̱.
16 Kꞌoa̱ jè xi la̱jao̱ kitsaojin,
jè‑ní xi nchrꞌoé én‑le̱ Niná, nga to̱kꞌia̱ nchrꞌoé, kao̱o kjoa̱tsjoa kjoétjaò;
17 to̱nga tsì na̱nga̱ fì ja̱ma̱‑le̱,
to̱ choatseè ma‑le̱,
nga̱ kꞌia̱ nga faꞌai kjoa̱ñꞌain axo̱ majticha xi to̱ tꞌatsꞌe̱ én‑le̱ Niná,
ti̱ꞌa binchaxìn‑nile̱ én‑le̱ Niná.
18 Jè‑ní jè na̱xi̱n xi naꞌyá kitsaòjin:
jè chjo̱ta̱ xi nchrꞌoé én‑le̱ Niná,
19 to̱nga jè kjoa̱nìkjaòjin xi tjín i̱ soꞌnde,
kꞌoa̱ jè kjoa̱chꞌàna̱cha̱ xi tsꞌe̱ kjoa̱nchi̱ná,
kao̱ nga me‑ná nga sꞌe̱‑ná ngayije tsojmì,
faꞌasꞌenjin ni̱ma̱‑le̱ kꞌoa̱ síkꞌen‑ngi én‑le̱ Niná,
kꞌoa̱ lìkoi ba‑le̱ to̱.
20 Kꞌoa̱ jé‑bi̱ na̱xi̱n xi nda nangi kitsaojin:
jè xi nchrꞌoé én‑le̱ Niná kꞌoa̱ ñaki kjoa̱kìxi̱ nga kjoétjaò,
kꞌoa̱ ba‑le̱ to̱ xi kan‑tè,
xi jàn‑kan,
kao̱ xi jngo ciento̱ nga jngó jngó».
Ni̱jme‑jìn kjoa̱ xi sꞌejnaꞌma xi tsì jcha̱‑nile̱
21 Kꞌoa̱ Jesús kitsò sa‑le̱:
«Tsà ꞌya xi lꞌí faꞌaikao̱,
a kàxa̱a síkꞌéjnaꞌmangi,
axo̱ ya̱a na̱chan síkꞌéjnangi. A tsí tsà sꞌejnasòn‑ngꞌa.
22 Nga̱ tsìjme kjoa̱ꞌma xi tjín xi tsì tsà jcha̱sòn‑tsen‑le̱;
ni̱ xi tíjnaꞌma‑jìn xi tsì koa̱n‑tsen.
23 Jè xi tjín chrjoa̱‑ño xi nchrꞌoé‑ni,
nda kàtabasén‑ño».
24 Kꞌoa̱ kitsò sa‑le̱:
«Nda ti̱nchaño jme xi nòꞌyaò;
nga̱ ti̱koiì‑ni choa̱ xi bꞌèchoa̱‑nio,
sꞌe̱choa̱‑nio,
kꞌoa̱ Niná saꞌnda ngìsa̱a sa tse tsjoá‑no jòn xi nòꞌyaò.
25 Nga̱ jè xi tjín‑le̱,
kꞌoai̱i‑sale̱;
kꞌoa̱ jè xi tsìn‑le̱,
saꞌnda jmè‑ni xi síkꞌaitsjen nga tsꞌe̱, to̱saà tjóxìn‑le̱».
Choa̱ xi mangósòn‑kao̱ josꞌìn majchá tsojmìntjè
26 Jesús kitsò‑sale̱:
«Kꞌoa̱ati̱ sꞌìn tjín ya̱ jña batéxoma Niná,
joni jngo chjo̱ta̱ xi fìkꞌéntjè ya̱ jin nangi;
27 kꞌoa̱ bajnafè nga njiòn kꞌoa̱ bisòtje̱n nga ta̱njiòn,
kꞌoa̱ jè na̱xi̱n bisò kꞌoa̱ mangꞌa to̱nga jè lìkoi be jóma‑ni nga mantjè.
28 Nga̱ to̱jè mantjè ya̱ jin nangi,
títjòn bisò,
kꞌia̱ mangꞌa,
xi je‑ma manaxó; ba‑le̱ to;
29 kꞌoa̱ kꞌia̱ nga jè majchá to‑le̱ ti̱ꞌa tiì‑ni,
nga̱ jeè kichò ni̱chrjin‑le̱».
Choa̱ xi mangósòn‑kao̱ na̱xi̱n‑le̱ mostaza
30 Jesús kitsò‑sale̱:
«Jmé xi mangósòn‑kao̱ jña batéxoma Niná,
axo̱ jmé xi si̱ngósòn‑koa̱a.
31 Jo na̱xi̱n‑le̱ mostaza kji.
Kꞌia̱ nga sꞌentjèjin nangi,
koiì xi ngìsa̱ sa ꞌndí kji, ti̱kꞌoa̱‑ni ngayije na̱xi̱n xi tjín i̱ soꞌnde;
32 to̱nga kꞌia̱ nga je sꞌentjè,
mangꞌa,
kꞌoa̱ ngìsa̱a ngꞌa ma ti̱kꞌoa̱‑ni ngayije xka̱ntjè,
nꞌión tsejngà ma,
saꞌnda ya̱a bꞌénda tjé‑le̱ ni̱se kꞌoa̱ ya̱ batiò‑ngꞌián‑ngi».
Josꞌìn Jesús síchjén jè choa̱ xi mangósòn‑kao̱ jngo kjoa̱
33 Kꞌoa̱ nkjìn choa̱ xi mangósòn‑kao̱ jngo kjoa̱,
joni tsà jè,
kisichjén kꞌia̱ nga tsakjákao̱ jè én‑nda, jokji tje̱n koan‑cho̱ya‑le̱ jè xi kinchrꞌoé.
34 Tsà tsì kao̱ choa̱ xi mangósòn‑kao̱ jngo kjoa̱,
lìkoi tsakakóya‑le̱;
to̱nga jè chjo̱ta̱ xi ya̱ kòtꞌayàtꞌa‑le̱ kitsòya‑tꞌaxìn‑le̱ jotsò‑ni ngayije jme xi kitsòya‑le̱.
Kꞌia̱ nga Jesús kisikꞌéjnajyo ntjao̱‑nꞌión
35 Ti̱koi‑ni ni̱chrjin kꞌia̱ nga je koan‑njiòn,
Jesús kitsò‑le̱ chjo̱ta̱ xi ya̱ kòtꞌayàtꞌa‑le̱:
—Tjián ya̱ xingoa‑nile̱ ndáchikon.
36 Kꞌoa̱ Jesús kao̱ chjo̱ta̱ xi kòtꞌayàtꞌa‑le̱ kisixan‑tꞌa chjo̱ta̱‑nkjìn,
kikao̱ Jesús josꞌìn nga tíjnaya ya̱ chitso;
kꞌoa̱ ya̱ tje̱n‑kao̱‑sa chitso xi kja̱ꞌaí.
37 To̱nga kitjo ntjao̱-xkón,
xi nꞌión kisikjan‑le̱ ndáchikon kꞌoa̱ ñaki kixinchaà nandá ya̱ ya chitso,
meè kisꞌen‑ngindá.
38 Kꞌoa̱ Jesús tíjnatꞌaxìn ya̱ ya chitso,
kijnafè,
tjíngijko jngo najño fangijko;
kꞌoa̱ jè chjo̱ta̱ xi ya̱ kòtꞌayàtꞌa‑le̱ kisikjaꞌá‑le̱,
kitsò‑le̱:
—Ji xi bakòyai, a tsí makjájon‑lì nga je tífìsꞌen‑ngindá‑jián.
39 Kꞌia̱ tsakisótje̱n Jesús,
kinchja̱tikao̱ ntjao̱-xkón,
kꞌoa̱ kitsò‑le̱ jè ndáchikon:
—Jyó ti̱jnai,
ti̱jnajñaín.
—Án‑ni nga kꞌoa̱sꞌìn bijkon‑nio.
Án‑ni nga tsì tsà makjaín‑nino.
41 Kꞌia̱ jè chjo̱ta̱ xi ya̱ kòtꞌayàtꞌa‑le̱ nꞌión kitsokjòn,
kitsò‑le̱ xínkjín:
—ꞌYá‑ni jè chjo̱ta̱ xo̱kji,
nga saꞌnda jè ntjao̱ kao̱ jè ndáchikon síkitjosòn‑nile̱.